La Amɛ2
Yiwamihelɔ Matsɛ ɔ he la a
1Mɛni he je nɛ je ɔ mi mi wo la kɛ wo Nutsɔ ɔ he, nɛ nihi ngɛ yaka nihi a he susue?2Zugba a nɔ matsɛ ɔmɛ kpe kɛ wo Neneene Tsɛ ɔ kɛ e Mesia a he.3A ngɛ dee ke, “Nyɛɛ ba nɛ wa kpɔ wa he kɛ je e nɔ yemi ɔ sisi. Wa be Mawu nyɔguɛhi pee hu.”4Se Hiɔwe lokoo Mawu ɔ ngɛ mɛ muɔe. A yi mi tomi ɔmɛ peeɔ lɛ muɔ.5Si kake too nɛ e ma ka a hɛ mi kɛ abofu nɛ e maa wo a he gbeye.6Nutsɔ ɔ de ke, “Ye Matsɛ nɛ i suɔ ji enɛ ɔ nɛ. Nɛ i wo lɛ matsɛ ngɛ ye ma klɔuklɔu Yerusalem ɔ mi.”7Nɛ matsɛ ɔ he nɔ ke, “I ma je Mawu yi mi tomi ɔ kpo kɛ tsɔɔ, ejakaa Nutsɔ ɔ de mi ke, ‘Ye bi ji mo, nɛ mwɔnɛ ɔ ji o fɔmi ligbi. Nɛ mwɔnɛ ɔ i kɛ o anunyami ɔ ngɛ mo hae.’ ”8“Moo lɛɛ mo bi mi kɛkɛ, nɛ i ma wo je ɔ tsuo ngɔ wo o sisi; nɛ je mi ma amɛ tsuo maa pee o nɔ́.9Moo ye a nɔ kɛ dade kpa nɛ o ywia mɛ kaa a ywiaa zu buɛhi.”10Nyɛ zugba a nɔ matsɛ ɔmɛ kɛ nɔ yeli ɔmɛ, nyɛɛ bu tue be nɛ ɔ mi.11Nyɛ sɔmɔ Nutsɔ ɔ kɛ gbeye yemi kɛ bumi.12Nyɛɛ ba nyɛ he si ha e Bi ɔ, bɔ nɛ pee nɛ e ko na nyɛ he abofu nɛ nyɛ hɛ mi nɛ e ba kpata. E be kɛe nɛ e mi mi fumi ɔ maa te si. Se nihi nɛ kɛ a he kpasa lɛ ɔ ma ya sa we ngɛ e ngɔ nɛ a ma na bua jɔmi.Biblica, Inc.