Mateo8
Yesu tsa hiɔ slɔɔtohi
1Nihi fuu nyɛɛ Yesu se benɛ e bɔni si kplemi kɛ je yoku ɔ nɔ ɔ.2Kɛkɛ nɛ kpititsɛ ko ba kpla si ngɛ e he mi ke pɛɛ kpami ke, “Nutsɔ, ke o suɔ ɔ, o ma nyɛ ma tsa mi.”3Yesu ta e he nɛ e de lɛ ke, “I suɔ kaa ma tsa mo, o he nɛ tsɔ!” E nya nɔɛ si nɛ e he womi nɔ tɛ.4Se Yesu de lɛ ke, “Mo ko de nɔ ko, se mohu yaa tɛɛ nɛ o kɛ o he ya tsɔɔ osɔfo ɔ, nɛ o sã bɔ kaa bɔ nɛ Mose mlaa a tsɔɔ ngɛ kpititsɛmɛ a tsami he ɔ nɛ o kɛ ye odase.”5Benɛ Yesu ba Kapernaum ɔ, Roma sojahi lafa a nyatsɛ ko ba e ngɔ,6nɛ e ba kpa lɛ pɛɛ ke e ba tsa e wenyumu ko nɛ ku pue si nɛ e miɔ nɛ e ma gbo ɔ ha lɛ.7Yesu ha lɛ heto ke, “Yoo, i ma ba tsa lɛ ha mo.”8Sojahi lafa a nyatsɛ ɔ de Yesu ke, “Nutsɔ, e sɛ kaa o sɛɔ ye we ɔ mi, ja he je ɔ, mo de kɛkɛ ke, ‘A tsa tsɔlɔ ɔ’, nɛ e ma na he wami.9I he ye, ejakaa ami po nɛ a yeɔ ye nɔ ɔ, i ngɛ sojahi ngɛ ye sisi nɛ ke i de nɔ nɛ ɔ ke, ‘Mo, yaa’ a, e yaa; nɛ ke i de nɔ kpa hu ke, ‘Ba’ a, e baa; nɛ ke i de ye tsɔlɔ ke, ‘Moo pee enɛ ɔ kɛ enɛ ɔ’ ɔ, e peeɔ. Nɛ i heɔ yeɔ kaa o ngɛ he blɔ nɛ o tsaa hiɔ nɛ ɔ.”10Yesu hɛ mi pee lɛ yaa, nɛ e de ma asafo ɔ nɛ nyɛɛ e se ɔ ke, “I nɛ hemi kɛ yemi nɛ ngɛ kaa enɛ ɔ ngɛ Israel zugba a nɔ he ko!11Nɛ i ngɛ nyɛ dee ke ma je li fuu kaa Roma amlaalo nɛ ɔ maa je je ɔ tsuo kɛ ba nɛ a kɛ Abraham kɛ Isak kɛ Yakob ma ba hi si ngɛ Hiɔwe Matsɛyemi ɔ mi.12Nɛ a ma sake Israel bi nɛ mɛ mohu ji nihi nɛ a dla Hiɔwe Matsɛyemi ɔ kɛ to ɔ ngɔ fɔ diblii kpii ɔ mi, he nɛ ya fomi kɛ nɔ nami ngɛ ɔ.”13Kɛkɛ nɛ Yesu de Roma no ɔ ke, “Moo ya we mi. A pee bɔ nɛ o he ye ɔ ha mo!” Nɛ e wenyumu ɔ na he wami jamɛ a ngmlɛfia a nɔuu.14Benɛ Yesu sɛ Petro we ɔ mi ɔ, e na kaa Petro nganyɛ ɔ ngɛ asla ku nue nɛ e nyɛ we si temi.15Nɛ Yesu sa kɛ su hiɔtsɛ ɔ he nɛ e ta e nine he, kɛkɛ nɛ asla a nya po ha lɛ amlɔ ɔ nɔuu; nɛ e te si nɛ e sɔmɔ mɛ.16Jamɛ a ligbi ɔ gbɔkuɛ ɔ, a wo nihi nɛ mumi yayamihi ngɛ mɛ haoe kɛ ba Yesu ngɔ; nɛ Yesu tu munyu kɛ hia mumi yayami ɔmɛ nɛ e tsa hiɔtsɛ ɔmɛ tsuo.17Enɛ ɔ ha nɛ Gbalɔ Yesaia munyu ɔ ba mi ke, “E wo wa dengme ɔmɛ nɛ e tsa wa hiɔ ɔmɛ tsuo.”Taku ɔ se yami
18Benɛ Yesu na kaa ni ɔmɛ a he bɔni hiɛmi ngɛ e he ɔ, e de e kaseli ɔmɛ ke a dla nɛ a po taku loo pa a kɛ ho e se je ya.19Yesu nya nɔɛ si nɛ Yuda bi ɔmɛ a womi ngmali ɔmɛ a ti nɔ kake de lɛ ke, “Tsɔɔlɔ, i ma nyɛɛ o se kɛ ya he tsuaa he nɛ o yaa!”20Se Yesu he nɔ nɛ e de lɛ ke, “Kɔkɔbohi ngɛ muɔhi nɛ a hwɔɔ mi, nɛ lohwe pɛlitsɛmɛ hu ngɛ tsuhi, se Nɔmlɔ Bi ɔ lɛɛ e be he nɛ e kɛ e yi fɔɔ.”21E kaseli ɔmɛ a ti nɔ kake hu de lɛ ke, “Nutsɔ, ha mi blɔ nɛ ma ya pu ye tsɛ konɛ ma ba nyɛɛ o se.”22Se Yesu de lɛ ke, “Moo nyɛɛ ye se nɔuu nɛ o ngmɛɛ nihi nɛ gbo ngɛ mumi mi ɔmɛ a he nɛ a pu a he.”23Ni nɛ ɔmɛ a se ɔ, Yesu kɛ e kaseli ɔmɛ sɛ lɛ mi nɛ a bɔni pa a pomi kɛ yaa e se.24Tlukaa a, kɔɔhiɔ ngua ko te nɛ e bɔni lɛ ɔ kpami, se Yesu hwɔ mahe.25E kaseli ɔmɛ sa kɛ su e he nɛ a tsiɛ lɛ kɛ ngmlaa ke, “Nutsɔ, mo he wa yi wami, wa ngɛ mue!”26Se Yesu de mɛ ke, “Nyɛ nɛ nyɛ hemi kɛ yemi pi! Mɛni ba nɛ nyɛ tsui po kikɛ ɔ?” Kɛkɛ nɛ e te si nɛ e ke kɔɔhiɔ kɛ nyu ɔ nɛ gli ɔ yi nɛ a ngmɛ dii.27Kaseli ɔmɛ ye gbeye nɛ a pee yaa nɛ a bi ke, “Mɛnɔ po ji nɛ ɔ nɛ kɔɔhiɔ kɛ wo tete buɔ lɛ tue nɛ ɔ?”28Benɛ a ya su pa a se ngɛ Gadara bi ɔmɛ a zugba a nɔ ɔ, nyumuhi enyɔ nɛ mumi yayamihi ngɛ a mi kɛ lɛ ba kpe. Gɔ mi ji he nɛ a hii, nɛ nɔ ko nyɛ we lejɛ ɔ gumi ejakaa a plɛ a he awi yeli.29Benɛ a na Yesu pɛ nɛ a hia ngmlaa nɛ a bɔni bimi ke, “Mɛni sane waa kɛ mo ngɛ, mo Mawu Bi ɔ? O be he blɔ nɛ o gbaa wa nya ngɛ be nɛ ɔ mi.”30Kpotoohi fuu ngɛ ni yee ngɛ lejɛ e ɔ,31kɛkɛ nɛ mumi yayami ɔmɛ kpa Yesu pɛɛ nɛ e ha mɛ he blɔ nɛ a ya sɛ a mi.32Nɛ Yesu de mɛ ke, “Nyɛɛ ya!” Nɛ a je kpo ngɛ a mi kɛ ya sɛ kpotoo ɔmɛ a mi, nɛ kpotoo ɔmɛ kulaa wo fo kɛ je yoku ɔ nɔ kɛ ya sɛ pa a mi nɛ a gbo ngɛ nyu ɔ mi.33Se benɛ nihi nɛ ngɛ kpotoo ɔmɛ hyɛe ɔ na nɔ́ nɛ ba a, a tu fo kɛ ho ma a mi ya nɛ a ya bɔ ma mi bi ɔmɛ amaniɛ,34nɛ ma a tsuo je kpo, nɛ benɛ a ba na Yesu ɔ a kpa lɛ pee nɛ e je a zugba a mi ha mɛ kpoo.Biblica, Inc.