Yohane8
Yo ajuama bɔlɔ ɔ
1Yesu kpale kɛ ho Nuyoku ɔ nɔ ya;2se e nɔ jena mɔtu mla a, e ba Sɔlemi We ɔ ekohu. E yi be ko nɛ nihi fuu ba bua a he nya ngɛ e ngɔ. Nɛ kaa bɔ nɛ e pɔɔ peemi ɔ, e ho hi si nɛ e tsɔɔ mɛ ni.3Benɛ e ngɛ munyu tue ɔ, Yuda nikɔtɔma amɛ kɛ Farisi bi ɔmɛ kpaka yo ajuama bɔlɔ ko kɛ ba da si ngɛ asafo ɔ hɛ mi nɛ a bi lɛ ke,4“Tsɔɔlɔ, wa nu yo nɛ ɔ paa nɛ e ngɛ ajuama bɔe.5Mose mlaa a tsɔɔ kaa e sa gbenɔ. Kɛ moo lɛɛ o ngɛ dee kɛɛ?”6A bi Yesu munyu nɛ ɔ nɛ a kɛ ka lɛ bɔ nɛ pee nɛ a na nɔ́ ko nɔ nɛ a da kɛ po e nya. Kɛkɛ nɛ Yesu ma e yi si nɛ e bɔni ni ngmami ngɛ zugba kɛ e nine nguɛ.7Se benɛ a ngɛ nɔ ngɛ lɛ bie ke e ha mɛ heto ɔ, e wo e he nɔ nɛ e de mɛ ke, “E da. Nyɛ ma nyɛ maa fiaa lɛ tɛ ɔ kɛ ya si e ma gbo, se nyɛ ti nɔ nɛ pee we yayami ko hyɛ ɔ, lɛ kekle e fia lɛ tɛ ɔ!”8Kɛkɛ nɛ e ma e yi si ekohu nɛ e bɔni ni ɔ ngmami ngɛ zugba.9Benɛ Yuda nikɔtɔma amɛ nu munyu nɛ ɔ, a bɔni lejɛ ɔ jemi kakaaka, kɛ je a nɔkɔtɔma a nɔ kɛ ya si sekpɛ nɔ ɔ nɔ, nɛ e ba piɛ Yesu nɔ kake kɛ yo ɔ pɛ ngɛ asafo ɔ hɛ mi.10Yesu wo e he no ekohu nɛ e bi yo ɔ ke, “Jije o nya poli ɔmɛ ngɛ? Anɛ a ti nɔ ko bui mo fɔ lo?”11Yo ɔ he nɔ ke, “Mawetsɛ, nɔ ko bui mi fɔ.” Nɛ Yesu de lɛ ke, “Lɛɛ ami hu i bui mo fɔ mɔ; moo ya nɛ o ko ya pee yayami hu.”12Pee se ɔ, Yesu de ni ɔmɛ ke, “Ami ji je ɔ La a nɛ, ke nyɛ nyɛɛ ye se ɔ nyɛ be nɔ́ tɛe ngɛ diblii mi, ejakaa wami la a ma kpɛ ngɛ nyɛ blɔ ɔ nɔ.”13Farisi bi ɔmɛ he nɔ nɛ a de lɛ ke, “O ngɛ fiae, nɔ́ nɛ o ngɛ dee ɔ be mi.”14Yesu de mɛ ke, “E ngɛ mi kaa ami nitsɛ ye he odase i ngɛ yee mohu, se e ji anɔkuale odase, ejakaa i le he nɛ i je kɛ he nɛ i yaa, se nyɛɛ lɛɛ nyɛ li enɛ ɔ ngɛ ye he.15Nɛ nyɛ ngɛ mi fɔ bue be mi nɛ nyɛ li anɔkuale ɔ. Ami lɛɛ i kojo we nɔ ko amlɔ nɛ ɔ.16Se ke i ma kojo nɔ ko ɔ, mu ko be ye kojomi ɔ he hie, ejakaa i kɛ Tsɛ ɔ nɛ tsɔ mi ɔ nɛ ngɛ.17Nyɛ mlaa amɛ tsɔɔ kaa ke ni enyɔ ye nɔ́ ko he odase ɔ, a ngɔɔ a odase yemi ɔ kaa anɔkuale odase.18Saminya, ami ji odase kake, nɛ ye Tsɛ nɛ tsɔ mi ɔ ji odase enyɔne ɔ.”19Nɛ a bi Yesu ke, “Jije o tsɛ ɔ ngɛ?” Yesu ha mɛ heto ke, “Nyɛ li nɔ nɛ i ji, nɛ lɔ ɔ he je ɔ, nyɛ li nɔ nɛ ji ye Tsɛ ɔ hulɔ. A ke nyɛ le mi jinɛ nyɛ ko le ye Tsɛ ɔ hulɔ.”Nihi fuu bɔni Yesu munyu ɔ sisi numi
20Yesu tu munyu nɛ ɔmɛ ngɛ Sɔlemi We ɔ he nɛ a toɔ sika ngɛ ɔ, se a nui lɛ ejakaa e be ɔ sui lolo.21Pee se ɔ Yesu de mɛ ekohu ke, “Ma si nyɛ, nɛ nyɛ ma hla mi, nɛ nyɛ ma gbo ngɛ nyɛ he yayami ɔmɛ a mi. He nɛ i yaa lɛɛ nyɛ be nyɛe lejɛ ɔ maa ba.”22Nɛ Yuda bi ɔmɛ bi ke, “Anɛ e yaa gbe e he lo? Mɛni e ngɛ dee ɔ ke, ‘He nɛ i yaa a nyɛ be lejɛ ɔ nyɛe maa ba’ a?”23Kɛkɛ nɛ e de mɛ ke, “Nyɛɛ lɛɛ sisi hiɛmɛ nɛ ɔ nɛ nyɛ je, se ami lɛɛ i je hiɔwe. Je nɛ ɔ mi bimɛ ji nyɛ, se ami lɛɛ tsa pi je nɛ ɔ mi no ji mi.24Enɛ ɔ he je nɛ i ngɛ nyɛ dee ke nyɛ ma gbo ngɛ nyɛ he yayami ɔmɛ a mi ɔ nɛ, ja nyɛ he ye kaa ami ji Mesia a, Mawu Bi ɔ, ke pi ja a nyɛ maa tlɔ nyɛ he yayami ɔmɛ a mi kɛ gbo.”25A bi lɛ ke, “Moo tsɔɔ wɔ nɔ nɛ o ji.” Nɛ Yesu de mɛ ke, “Ami ji nɔ nɛ i deɔ nyɛ daa ke i ji ɔ nɛ.26I ngɛ he blɔ nɛ i kojoɔ nyɛ ngɛ níhi fuu a he, nɛ i tsɔɔ nyɛ níhi fuu, se i be pee ejakaa nɔ nɛ tsɔ mi ɔ, anɔkualetsɛ i nɛ nɔ́ nɛ e de mi ɔ, lɔ ɔ pɛ i deɔ.”27Se loloolo ɔ a nui sisi kaa Tsɛ ɔ he munyu e kɛ mɛ ngɛ tue ɔ nɛ.28Ja a he ɔ Yesu de mɛ ke, “Ke nyɛ gbe Mesia a, lɔ ɔ loko nyɛ maa na kaa ami i; nɛ nyɛ maa na hu kaa tsa pi ami nitsɛ ye juɛmi mi munyu nɛ i ngɛ nyɛ tue ɔ, se mohu nɔ́ nɛ Tsɛ ɔ tsɔɔ mi ɔ i.29Nɛ nɔ nɛ tsɔ mi ɔ kɛ mi ngɛ, e si we mi, ejakaa i peeɔ e bua nɔ nɔ́ daa.”30Jehanɛ ɔ, Yuda nikɔtɔma amɛ nɛ nu munyu nɛ ɔmɛ ɔ, he lɛ ye kaa lɛ ji Mesia a nɛ.31Nɛ Yesu de mɛ ke, “Ke nyɛ ba nyɛ je mi kaa bɔ nɛ i ngɛ hlae ɔ, lɛɛ ye kaseli ji nyɛ ngɛ anɔkuale mi,32nɛ nyɛ maa le anɔkuale ɔ, nɛ anɔkuale ɔ ma ha nyɛ maa ye nyɛ he.”33Se a de ke, “Wɔɔ lɛɛ Abraham weku ɔ mi wa je, nɛ wa pi nɔ ko nyɔguɛ ngɛ zugba nɛ ɔ nɔ. Mɛni o ngɛ tsɔɔe kaa, ‘Nyɛ maa ye nyɛ he’ ɔ?”34Yesu he nɔ ke, “Yayami nyɔguɛ ji nyɛ ti nɔ tsuaa nɔ.35Nɛ nyɔguɛ be blɔ nya ko, se Bi ɔ lɛɛ he blɔ fɛɛ he blɔ nɛ ngɛ ɔ, e nɔ i.36Lɔ ɔ he je ɔ, ke Bi ɔ ha nyɛ ye nyɛ he ɔ, lɛɛ nyɛ ye nyɛ he niinɛ.37I na le kaa Abraham weku ɔ mi bimɛ ji nyɛ mohu, se kɛ ɔ nyɛ ti ni komɛ ngɛ mi hlae nɛ a gbe, ejakaa ye munyu ɔ sɛ we a tsui mi.38I ngɛ nyɛ níhi nɛ i na ngɛ ye Tsɛ he ɔ dee, se nyɛ hu nyɛ ngɛ nyɛ tsɛ ɔ gbi nɔ yee.”39A he nɔ ke, “Wa tsɛ ji Abraham.” Yesu ha mɛ heto ke, “Dabi! A ke Abraham bimɛ ji nyɛ jinɛ nyɛ ngɛ e ni tsumi kpakpa amɛ tsue.40Se mohu ɔ nyɛ ngɛ ye se blɔ hlae nɛ nyɛɛ gbe mi, ejakaa i de nyɛ anɔkuale ɔ nɛ i nu ngɛ Mawu nya a; Abraham be enɛ ɔ pee.41Ke nyɛ tsu ni tsumi kaa kikɛ ɔ, lɛɛ nyɛ tsɛ ɔ gbi nɔ nɛ nyɛ ngɛ yee.” A he nɔ ke, “A fɔ we wɔ ngɛ ajuama bɔmi mi, Mawu nitsɛ ji wa tsɛ.”42Yesu de mɛ ke, “A ke Mawu ji nyɛ tse jinɛ nyɛ maa suɔ ye sane, ejakaa Mawu ngɔ i je kɛ ba. I bɛ ngɛ ami nitsɛ ye he wami nya, se mohu lɛ nɛ e tsɔ mi.43Mɛni he je nɛ nyɛ nui ye munyu ɔ sisi ɔ? Enɛ ɔ tsɔɔ kaa a ngɛ nyɛ nya tsie nɛ nyɛ ko nu sisi.44Ejakaa Abosiami bimɛ ji nyɛ, ja a he ɔ nyɛ suɔ nɛ nyɛ tsu ni tsumi yaya amɛ nɛ e tsuɔ ɔ. Nɔmlɔ gbelɔ ji lɛ kɛ je blema, nɛ e sume anɔkuale, ejakaa anɔkuale be e mi. Ke e ye lakpa a, mu ko be he, ejakaa lakpatsɛ ji lɛ.45Lɔ ɔ he je ɔ, ke i tu anɔkuale ɔ, nyɛ he we yi.46Nyɛ ti mɛnɔ ma nyɛ po ye nya ngɛ yayami ko he? Nɛ ke i ngɛ nyɛ anɔkuale ɔ tue ɔ, mɛni he je nɛ nyɛ he we mi yi mɔ?47Nɔ nɛ Mawu bi ji lɛ ɔ, e buɔ Mawu munyu tue kɛ bua jɔmi, se akɛnɛ nyɛɛ lɛɛ nyɛ bui lɛ tue he je ɔ, tsa pi e bimɛ ji nyɛ.”48Yuda nikɔtɔma amɛ he nɔ nɛ a de lɛ ke, “Samaria no! Nubwɔ! Anɛ wa de we mwɔnɛ ɔ ke mumi yayami ngɛ o mi lo?”49Yesu he nɔ ke, “Mumi yayami be ye mi, ejakaa i ngɛ ye Tsɛ ɔ hɛ mi nyami woe, se nyɛɛ lɛɛ ye he guɛ nyɛ ngɛ gbee.50Nɛ e ngɛ mi kaa i hla we nɛ ma pee ye he agbo mohu, se Mawu ngɛ hlae nɛ e pee mi ja, nɛ e maa kojo nihi nɛ kua mi ɔ.51I ngɛ nyɛ dee anɔkuale mi kaa nɔ nɛ heɔ mi yeɔ ɔ, e be gboe gblee.”52Kɛkɛ nɛ Yuda nikɔtɔma amɛ de lɛ ke, “Kpaako wa na le kaa mumi yayami ngɛ o mi tutuutu. Abraham kɛ gbali ngua amɛ po gbo; nɛ moo lɛɛ o deɔ ke nɔ nɛ heɔ o nɔ yeɔ ɔ, e be gboe gbleegbleegblee ɔ.53Anɛ o kle pe wa tsɛ Abraham kɛ gbali ɔmɛ nɛ gbo ɔ lo? Mɛnɔ ji mo?”54Nɛ Yesu de mɛ ke, “Ke fiami nɛ i ngɛ fiae ɔ, fiami gu i. Se ye Tsɛ nɛ nyɛ deɔ ke nyɛ Mawu ji lɛ ɔ, ji nɔ nɛ ngɛ enɛ ɔmɛ dee kɛ ngɛ ye hɛ mi nyami woe ɔ nɛ.55Se nyɛ li lɛ tete. Ami lɛɛ i le lɛ, nɛ ke i de nyɛ nɔ kpa a, lɛɛ i peeɔ lakpatsɛ kaa nyɛ. Se anɔkuale ɔ nɛ i ngɛ nyɛ tue. I le lɛ, nɛ i yeɔ e gbi nɔ.56Nyɛ tsɛ Abraham hla kɛ bua jɔmi kaa e ko na ye bami ɔ. E le kaa i ma, nɛ e bua jɔ.”57Yuda nikɔtɔma amɛ de lɛ ke, “O yi jeha nyingmi enuɔ tete lolo nɛ o na Abraham lo?”58Yesu he nɔ nɛ e de mɛ ke, “I ngɛ nyɛ dee anɔkuale mi ke, i ngɛ loko a fɔ Abraham.”59Kɛkɛ nɛ Yuda nikɔtɔma amɛ miɔ nɛ a fiaa lɛ tɛ nɛ a gbe lɛ, se Yesu laa e he nɛ e si Sɔlemi We ɔ.Biblica, Inc.