Yohane6
Yesu ha nihi akpe enuɔ niye ni
1Enɛ ɔ se ɔ, Yesu po Galilea Wo ɔ nɛ a tsɛɛ ke Tiberia a.2Nɛ nihi fuu nyɛɛ e se nɛ a ya hyɛ bɔ nɛ e tsaa hiɔtsɛ ɔmɛ ha.3Nimli nɛ ɔmɛ a ti nihi ji nihi nɛ yaa Yerusalem nɛ a ya ye Hebemi Ligbi ɔ. Enɛ ɔ he je ɔ, benɛ Yesu kuɔ yoku ɔ nɛ e ya hi si nɛ e kaseli ɔmɛ bɔle lɛ ɔ,5e na nihi babauu nɛ a ngɛ yoku ɔ kuɔe kɛ ma e ngɔ. Kɛkɛ nɛ e plɛ e he nɛ e bi Filipo ke, “Jije wa ma na abolo ngɛ kɛ ha nimli nɛ ɔmɛ nɛ a maa ye?”6Se Yesu bi Filipo munyu nɛ ɔ kɛ ngɛ lɛ kae nɛ e hyɛ, ejakaa e le nɔ nɛ e maa pee momo.7Filipo he nɔ ke, “Abolo sidi lafa enyɔ po be mɛ sue.”8Nɛ e kaseli ɔmɛ a ti nɔ kake nɛ ji Andrea, Simon Petro nyɛmi ɔ de Yesu ke, “Jokuɛ nyumuyo ko ngɛ hiɛ ɔ nɛ hɛɛ abolo enuɔ kɛ lo enyɔ. Anɛ e maa su ma asafo ɔ kulaa lo?”10Se Yesu de e kaseli ɔmɛ ke, “Nyɛ ha nɛ a ti nɔ tsuaa nɔ nɛ e hi si.” Nɛ nyumuhi nɛ a yi bɔ maa su akpe enuɔ ɔ tsuo ho ya hi si ngɛ nga a nɔ.11Kɛkɛ nɛ Yesu wo abolo kɛ lo ɔ, nɛ e sɔle kɛ na Mawu si, nɛ e kɛ ha ni ɔmɛ, nɛ a ye nɛ a tɔ.12Benɛ a tɔ ɔ, Yesu de e kaseli ɔmɛ ke, “Nyɛ bua bibliwi nɛ piɛ ɔ nya, bɔ nɛ pee nɛ nɔ ko nɛ ko da.”13Nɛ kaseli ɔmɛ bua bibliwi nɛ piɛ ɔ nya nɛ a na kusii nyɔngma kɛ enyɔ.14Benɛ ni ɔmɛ na nyakpɛ ni ɔ nɛ Yesu tsu ɔ, a de ke, “Anɔkuale, nɔ nɛ ɔ ji Gbalɔ nɛ wa ngɛ blɔ hyɛe ɔ nɛ.”15Yesu na kaa a ngɛ hlae nɛ a nu lɛ nɛ a wo lɛ matsɛ. Lɔ ɔ he je ɔ, e je a he kɛ sɛ yoku ɔ mi.16Benɛ e su gbɔkuɛ nya si ɔ, e kaseli ɔmɛ pue nɔ kɛ ho wo ɔ nya ya ya ngɛ lɛ blɔ hyɛe.17Se benɛ du bu nɛ loloolo ɔ e bɛ ɔ, e kaseli ɔmɛ ya sɛ lɛ mi nɛ a bɔni wo ɔ pomi kɛ yaa Kapernaum.18Benɛ a yaa a, e yi be ko nɛ kɔɔhiɔ ngua ko ba te tlukaa nɛ wo ɔ gli nɛ nyu bɔni lɛ ɔ mi sɛmi.19Se benɛ a hlui le ɔ maa pee si tomi he etɛ loo eywiɛ ɔ, a na Yesu nɛ ngɛ wo ɔ nɔ nyɛɛe kɛ ma a ngɔ nɛ a tsui po.20Kɛkɛ nɛ e tsɛ mɛ nɛ e de mɛ ke lɛ i, lɔ ɔ he ɔ a ko ye gbeye.21Jehanɛ ɔ a ngɛ hlae kaa e ba sɛ le ɔ mi, se si kake too nɛ a ke a maa hyɛ ɔ, lɛ ɔ ya su he nɛ a yaa a.22E nɔ jena mɔtu benɛ a kpale kɛ ba wo ɔ se ɔ, a ba na nihi fuu nɛ bua a he nya ngɛ wo ɔ nya kɛ ngɛ lɛ mlɛe. Ejakaa a le kaa e kɛ e kaseli ɔmɛ nɛ ba lɛɛ se a je e he ngɛ lejɛ ɔ.23Tiberia lɛ kpa komɛ ngɛ wo ɔ nya lejɛ ɔ.24Lɔ ɔ he ɔ, benɛ a na kaa Yesu kɛ e kaseli ɔmɛ be lejɛ ɔ, a sɛ lɛ ɔmɛ a mi kɛ bu a nɔ kɛ ba Kapernaum ba ngɛ lɛ hlae.25Nɛ benɛ a ba na lɛ ɔ, a bi lɛ ke, “Mawetsɛ, kɛ o pee kɛ ba su hiɛmɛ nɛ ɔ kɛɛ?”26Yesu he nɔ de mɛ ke, “Anɔkuale ji kaa nyɛ ngɛ mi hlae, ejakaa i ha nyɛ niye ni nɛ nyɛ ye, se tsa pi ye nɔ nɛ nyɛ heɔ yeɔ he je.27Nyɛ ko ha nɛ níhi kaa niye ni nɛ puɛɔ ɔ, a se dimi nɛ pee nyɛ kɔmɔ tsɔ, se mohu nyɛɛ di neneene wami nɛ ami Nɔmlɔ Bi ɔ i ma ha nyɛ ɔ se. Ejakaa enɛ ɔ he je nɛ Tsɛ Mawu ɔ tsɔ mi kɛ ba ngɛ.”28A he nɔ nɛ a bi ke, “Mɛni wa maa pee nɛ maa sa Mawu hɛ mi?”29Yesu de mɛ ke, “Nɔ nɛ Mawu ngɛ hlae ji kaa nyɛ he e tsɔlɔ ɔ nɔ nɛ nyɛɛ ye.”30A he nɔ ke, “Ke o ngɛ hlae nɛ wa he ye kaa mo ji Mesia a, lɛɛ moo pee nyakpɛ níhi kɛ tsɔɔ wɔ.31Moo ke wɔ abolo daa ligbi kaa bɔ nɛ wa tsɛ ɔmɛ na benɛ a hia blɔ ngɛ nga a nɔ ɔ, kaa bɔ nɛ Ngmami ɔ de ke, ‘Mose ha mɛ abolo nɛ je hiɔwe ɔ.’ ”32Yesu de mɛ ke, “Tsa pi Mose nɛ ha mɛ abolo nɛ je hiɔwe ɔ, se ye Tsɛ ɔ nɛ ha mɛ. Nɛ amlɔ nɛ ɔ, e ha nyɛ anɔkuale Abolo nɛ je Hiɔwe.33Kikɛmɛ a anɔkuale Abolo nɛ ɔ ji Nɔmlɔ Adesa nɛ Mawu tsɔ kɛ je hiɔwe kɛ ba a nɛ, nɛ lɛ ji nɔ nɛ haa je ɔ tsuo neneene wami ɔ nɛ.”34Jehanɛ ɔ a de Yesu ke, “Mawetsɛ, mo ha wɔ kikɛmɛ a abolo nɛ ɔ daa ligbi.”35Nɛ Yesu ha mɛ heto ke, “Ami ji Wami Abolo ɔ nɛ. Nɔ ko be ye ngɔ bae nɛ hwɔ maa ye lɛ ligbi ko gblee; nɛ ni nɛmɛ nɛ heɔ ye nɔ yeɔ ɔ, kuma be mɛ yee kɔkɔɔkɔ.36Se kaa bɔ nɛ i de nyɛ momo ɔ, nyɛ na mi lɛɛ, se nyɛ he we ye nɔ nɛ nyɛɛ ye.37Se ni komɛ maa ba ye ngɔ, ni nɛmɛ nɛ Tsɛ ɔ ngɔ ha mi ɔ, nɛ ke a ba a, i be mɛ fiee kɔkɔɔkɔ.38Ejakaa tsa pi ami nitsɛ ye suɔmi nya ni peemi he nɛ i je hiɔwe kɛ ba ngɛ, se mohu Mawu, nɔ nɛ tsɔ mi ɔ suɔmi nya ni he nɛ i ba ngɛ.39Nɛ Mawu suɔmi nya ji kaa nihi nɛ e ngɔ ha mi ɔ a ti nɔ kake nɛ ko laa, se mohu ma tle mɛ si kɛ ba neneene wami mi ngɛ Nyagbe Ligbi ɔ nɔ.40Ejakaa ye Tsɛ ɔ suɔmi nya ji kaa nɔ tsuaa nɔ nɛ heɔ e Bi ɔ nɔ yeɔ ɔ, e na neneene wami, nɛ ma tle lɛ si ngɛ Nyagbe Ligbi ɔ nɔ.”41Kɛkɛ nɛ Yuda bi ɔmɛ bɔni huhuɛmi ngɛ e he, ejakaa e de ke lɛ ji Abolo nɛ je hiɔwe ɔ nɛ.42Nɛ a de ke, “Kɛ e ngɛ tsɔɔe kɛɛ? Anɛ tsa pi Yosef bi Yesu ɔ nɛ wa le e tsɛ kɛ e nyɛ ɔ ji nɛ ɔ lo? Kɛ pee kɛɛ nɛ e deɔ ke e je hiɔwe kɛɛ?”43Se Yesu he nɔ nɛ e de mɛ ke, “Nyɛ ko huhuɛ ngɛ nɔ nɛ i de ɔ he.44Ejakaa nɔ ko be ye ngɛ nyɛe maa ba, ja Tsɛ ɔ nɛ tsɔ mi ɔ ha lɛ he blɔ, nɛ ma tle jamɛatsɛ ɔmɛ kulaa si kɛ ya neneene wami mi ngɛ Nyagbe Ligbi ɔ nɔ.45Nɛ kaa bɔ nɛ a de nyɛ ngɛ Ngmami ɔ mi ɔ, ‘Mɛ tsuo kulaa a maa pee ye nihi nɛ a tsɔɔ mɛ Mawu he ni.’ Ni nɛmɛ nɛ nuɔ Tsɛ ɔ munyu ɔ nɛ a kaseɔ anɔkuale ɔ kɛ jee e ngɔ ɔ, a maa ba ye ngɔ.46Enɛ ɔ tsɔɔ we kaa nɔ ko na Tsɛ ɔ hyɛ, ja ami pɛ ji nɔ nɛ na lɛ.47I ngɛ nyɛ dee anɔkuale mi ke, nɔ tsuaa nɔ nɛ heɔ ye nɔ yeɔ ɔ, e na neneene wami ɔ momo.48Niinɛ, ami ji Wami Abolo ɔ nɛ!49Benɛ nyɛ tsɛ ɔmɛ ye abolo nɛ a ha mɛ ngɛ nga a nɔ ɔ, a gbo, ejakaa wami be mi.50Se abolo nɛ je hiɔwe ɔ haa nɔ nɛ yeɔ eko ɔ neneene wami.51Ami ji Wami Abolo nɛ je hiɔwe kɛ ba a nɛ. Nɔ nɛ maa ye kikɛmɛ a abolo nɛ ɔ be gboe, e maa hi si kɛ ya neneene, ejakaa abolo nɛ ɔ ji ye he lo nɛ a kɛ ha ngɛ je ɔ yi wami hemi he.”52Kɛkɛ nɛ Yuda bi ɔmɛ bɔni nya sami ngɛ munyu nɛ e tu ɔ he ke, “Kɛ Nɔmlɔ nɛ ɔ maa pee nɛ e ha wɔ e he lo nɛ waa ye kɛɛ?”53Nɛ Yesu de mɛ ekohu ke, “Anɔkuale munyu i ngɛ nyɛ tue ke, ke nyɛ yi Nɔmlɔ Bi ɔ he lo, nɛ nyɛɛ nu e muɔ ɔ, nyɛ nine be neneene wami ɔ nɔ sue.54Se nɔ nɛ yeɔ ye he lo nɛ e nuɔ ye muɔ ɔ, jamɛ a nɔ ɔ ngɛ neneene wami, nɛ i ma tle lɛ si ngɛ Nyagbe Ligbi ɔ nɔ.55Ejakaa ye he lo ɔ ji niye ni nitsɛ, nɛ ye muɔ ɔ hu ji nyu nunui nitsɛ.56Nɔ nɛ yeɔ ye he lo nɛ e nuɔ ye muɔ ɔ, e ngɛ ye mi, nɛ ami hu i ngɛ e mi.57Wami Tsɛ ɔ nɛ tsɔ mi ɔ he wami nya nɛ ye hɛ ngɛ ngɛ, nɛ ja a nɔuu nihi nɛ maa ye ye he lo nɛ a maa nu ye muɔ ɔ, a maa hi hɛ ngmengmle mi ngɛ ye he je.58Ami ji anɔkuale Abolo nɛ je hiɔwe ɔ nɛ; nɔ nɛ maa ye ye Abolo nɛ ɔ ma na neneene wami nɛ e be gboe kaa bɔ nɛ nyɛ tsɛ ɔmɛ ye abolo nɛ je hiɔwe nɛ a gbo ɔ.”59Yesu tu munyu nɛ ɔmɛ benɛ e ngɛ sɔlemi pee ngɛ Kapernaum kpe he ɔ.60Nɛ e kaseli ɔmɛ tete po de ke, “Munyu nɛ ɔmɛ a mi kuɔ. Mɛnɔ ma nyɛ a sisi maa tsɔɔ?”61Benɛ Yesu na kaa munyu ɔ ngɛ e kaseli ɔmɛ a juɛmi nya gbae ɔ, e de mɛ ke, “Anɛ enɛ ɔ nɛ ngɛ nyɛ haoe ɔ lo?62Lɛɛ ke nyɛ na ami Nɔmlɔ Bi ɔ nɛ i ngɛ kpalee kɛ yaa hiɔwe ekohu ɔ nɛɛ, kɛ nyɛ ma susu kɛɛ?63Mumi Klɔuklɔu ɔ pɛ ji nɔ nɛ haa neneene wami; nɛ nihi nɛ a fɔ mɛ si kake kɛ gu he lo mi pɛ ɔ, a nine be dloomi nike ni nɛ ɔ nɔ sue. Se amlɔ nɛ ɔ, i de nyɛ bɔ nɛ nyɛ maa pee nɛ nyɛ nine maa su kikɛmɛ a anɔkuale mumi mi wami nɛ ɔ nɔ.64Se nyɛ ti ni komɛ he we mi yi.” Yesu de mɛ enɛ ɔ, ejakaa e le kɛ je sisije ɔ nihi nɛ he we lɛ yi ɔ kɛ nɔ nɛ maa tsɔɔ e se blɔ ɔ.65Nɛ e de ke, “Enɛ ɔ ji nɔ́ nɛ i ngɛ tsɔɔe benɛ i de ke nɔ ko be ye ngɔ nyɛe maa ba kaa ja Tsɛ ɔ ha lɛ he blɔ ɔ.”66Benɛ Yesu de enɛ ɔ, e kaseli ɔmɛ a ti nihi fuu kpale ngɛ e se.67Yesu po e he nɛ e bi e kaseli nyɔngma kɛ enyɔ ɔmɛ ke, “Anɛ nyɛ hu nyɛ ngɛ kpalee ngɛ ye se lo?”68Simon Petro he nɔ nɛ e de lɛ ke, “Mawetsɛ, mɛnɔ ngɔ wa yaa? Mo pɛ o nya nɛ neneene wami gbi ngɛ,69nɛ wa he ye, nɛ wa le hu kaa mo ji Mawu Bi nɛ he tsɔ ɔ nɛ.”70Enɛ ɔ se ɔ Yesu de mɛ ke, “Nyɛ ni nyɔngma kɛ enyɔ nɛ i hla, se nyɛ kpɛti nɔ kake ɔ Abosiami i.”71Yuda Iskariot nɛ ji Simon bi ɔ he munyu nɛ Yesu ngɛ tue ɔ nɛ, ejakaa lɛ ji kaseli ɔmɛ a ti nɔ nɛ maa tsɔɔ e se blɔ.Biblica, Inc.