Yohane10
Yesu ji Tohyɛlɔ Kpakpa
1“Nɔ fɛɛ nɔ nɛ gui agbo ɔ nya, se e tuu gbogbo ɔ kɛ sɛɛ to tsu ɔ mi ɔ, julɔ ji lɛ.2Ejakaa to hyɛlɔ ɔ agbo ɔ nya nɛ e guu.3Agbo nya bulɔ ɔ bliɔ agbo ɔ haa lɛ nɛ e sɛɛ mi. To ɔmɛ nuɔ e gbi nɛ a baa e ngɔ. E tsɛɔ e to ɔmɛ kɛ a biɛhi, nɛ e kpakaa mɛ kɛ jee kpo.4E nyɛɛ a hɛ mi, nɛ a nyɛɛ e se, ejakaa a le e gbi.5A nyɛɛ we nɔ kpa ko se, se mohu a tuɔ nɔ kpa nya fo ejakaa a li e gbi.”6Nihi nɛ ngɛ lejɛ ɔ nui abɛ nɛ Yesu bu ɔ sisi.7Lɔ ɔ he je ɔ, e je sisi ha mɛ ke, “Ami ji Agbo kɛ ha to ɔmɛ ɔ nɛ.8Juli kɛ ojo fiali ji nihi nɛ nyɛɛ ye hɛ mi ɔ nɛ, nɛ to kpakpa amɛ bui mɛ tue.9Ami ji Agbo ɔ nɛ; nɔ nɛ guu ye mi kɛ sɛɛ mi ɔ, a ma he e yi wami. E maa sɛ mi nɛ e maa je kpo, nɛ e ma na niye ni kpakpa.10Julɔ ɔ lɛɛ e baa ngɛ jumi kɛ nɔ gbemi kɛ nɔ́ puɛmi he. Ami kɛ i ba nɛ ma ha a na neneene wami nɛ e hyi fuu.11Ami ji Tohyɛlɔ Kpakpa a nɛ. Tohyɛlɔ Kpakpa a ngɔɔ e he kɛ saa afɔle ngɛ to ɔmɛ a he.12To hyɛlɔ nɛ ji apaatsɛ ɔ tuu fo kɛ siɔ to ɔmɛ ke e na ogbetee nɛ ma, nɛ e jee a he, ejakaa tsa pi e níhi ji mɛ, e pi a hyɛlɔ hulɔ. Nɛ ogbetee ɔ baa nɛ e ba gbɛɛ mɛ kɛ woɔ nga.13Apaatsɛ ɔ tuu fo kɛ siɔ to ɔmɛ ejakaa apaa kɛkɛ nɛ a bɔ lɛ, nɛ lɔ ɔ he je ɔ, to ɔmɛ a he pee we lɛ kɔmɔ tsɔ.14Ami ji Tohyɛlɔ Kpakpa a nɛ, nɛ i le ye to ɔmɛ nɛ mɛ hu a le mi;15kaa bɔ nɛ ye Tsɛ ɔ le mi nɛ ami hu i le lɛ ɔ, nɛ i ngɔɔ ye wami kɛ saa afɔle ngɛ to ɔmɛ a he ɔ.16I ngɛ to kpa komɛ hu nɛ a be to nɛ ɔmɛ a kpɛti. I ma ya kpaka mɛ hu kɛ ba nɛ mɛ hu a maa nu ye gbi.17Ye Tsɛ ɔ suɔ mi, ejakaa i ngɔ ye wami kɛ fɔ si, nɛ ye nine maa su nɔ ekohu.18Tsa pi nɔ ko nɛ kpɔ ye wami ɔ ngɛ ye dɛ, se ami nitsɛ nɛ i kɛ ha. Ejakaa i ngɛ he blɔ kɛ he wami nɛ i ngɔɔ ye wami ɔ kɛ fɔɔ si be nɛ i suɔ, nɛ i kpaleɔ ngɔɔ lɛ ekohu. Ye Tsɛ ɔ nɛ ha mi he blɔ nɛ ɔ.”19Munyu nɛ ɔmɛ nɛ e tu ɔ ha mi gbami ba Yuda nikɔtɔma amɛ a kpɛti ekohu ngɛ e he.20A ti ni komɛ de ke, “Mumi yayami ngɛ e mi aloo e ngɛ godo nue. Mɛni he je e sa kaa a bu Nɔmlɔ kaa kikɛ ɔ tue?”21Ni komɛ hu de ke, “Nɔmlɔ nɛ mumi yayami ngɛ e mi be kikɛmɛ a munyu nɛ ɔmɛ tue. Anɛ nɔ nɛ mumi yayami ngɛ e mi ma nyɛ bli nihi nɛ a hɛ yu ɔ a hɛ ngmɛ lo?”“Mo de wɔ anɔkuale ɔ paa”
22Yesu ya Yerusalem ngɛ fiɛ be mi ngɛ Sɔlemi Tsu ɔ nya blimi he;23nɛ e ya slaa si ngɛ Sɔlemi We ɔ he ko nɛ a tsɛɛ ke Solomo Ablanaa a nɔ.24Nɛ Yuda nikɔtɔma amɛ ba bɔle lɛ ngɛ lejɛ ɔ nɛ a bi lɛ ke, “Mɛni be kulaa nɛ o ma de wɔ anɔkuale ɔ? Ke mo ji Kristo ɔ, mo de wɔ paa koo!”25Yesu ha mɛ heto ke, “Tsɛ i de nyɛ momo nɛ nyɛ he we yi. Okadihi nɛ i ngɛ pee ngɛ ye Tsɛ ɔ biɛ mi ɔ ji níhi nɛ ngɛ ye he odase yee, se nyɛ he we yi.26Nyɛ he we mi yi ejakaa tsa pi ye to ɔmɛ ekomɛ ji nyɛ.27Ye to ɔmɛ nuɔ ye gbi nɛ i le mɛ hulɔ nɛ a nyɛɔ ye se.28I haa mɛ neneene wami nɛ a hɛ mi be kpatae gblee. Nɔ ko be mɛ nyɛe ma kpɔ ngɛ ye de,29ejakaa ye Tsɛ nɛ ngɔ mɛ kɛ ha mi ɔ ngɛ he wami pe nɔ tsuaa nɔ, ja a he ɔ nɔ ko be mɛ nyɛe ma kpɔ ngɛ ye dɛ.30Ami kɛ ye Tsɛ ɔ nɔ kake ji wɔ.”31Kɛkɛ nɛ Yuda nikɔtɔma amɛ kukuɔ tɛ ke a ma kɛ fiaa lɛ nɛ a gbe lɛ.32Se Yesu bi mɛ ke, “Ngɛ Mawu blɔ tsɔɔmi nya a, i tsu ni tsumi kpakpahi babauu nɛ ma kɛ ye kɛ bua ni ɔmɛ. Ni tsumi nɛ ɔmɛ a ti te nɔ́ nɛ he je nɛ nyɛ ngɛ hlae nɛ nyɛɛ gbe mi ngɛ nɛ ɔ?”33A he nɔ nɛ a de lɛ ke, “Tsa pi ni tsumi kpakpa ko nɛ o tsu he nɛ wa ngɛ mo tɛ fiae ngɛ, se mohu ngɛ musu bɔmi he je, ejakaa nɔmlɔ adesa ji mo se o ngɛ o he tsɛe ke Mawu.”34Yesu ha mɛ heto ke, “Nyɛ nitsɛmɛ nyɛ mlaa ko tsɔɔ kaa mawuhi ji nyɛ.35Ke anɔkuale Ngmami ɔ tsɛɔ nihi nɛ Mawu Munyu ɔ ba a ngɔ ɔ ke mawuhi,36nɔ nɛ Mawu pee lɛ Klɔuklɔu nɛ e tsɔ lɛ kɛ ba je ɔ mi hu de ke, ‘Ami ji Mawu Bi ɔ’, anɛ enɛ ɔ peeɔ musu bɔmi munyu lo?37Nyɛ ko he mi ye ke i tsu we Mawu nyakpɛ ni tsumi ko.38Se ke i tsu nyakpɛ ni tsumihi ɔ, nyɛ he nyɛɛ ye, ke nyɛ he we ami yi tete. Enɛ ɔ ma ha nɛ nyɛɛ le kaa Tsɛ ɔ ngɛ ye mi, nɛ ami hu i ngɛ Tsɛ ɔ mi.”39Yuda nikɔtɔma amɛ bɔ mɔde kaa a maa nu lɛ ekohu se e je a kpɛti zaa,40kɛ ho Yordan Pa a se he nɛ Yohane baptisi nihi ngɛ kekle ɔ ya nɛ e ya hi lejɛ ɔ.41Nɛ nihi babauu nyɛɛ e se nɛ a de a he ke, “Yohane pee we okadi ko, se nɔ tsuaa nɔ nɛ e de ngɛ nyumu nɛ ɔ he ɔ ba mi pɛpɛɛpɛ.”42Nɛ nihi fuu he ye kaa lɛ ji Mesia a nɛ.Biblica, Inc.