Yohane1
La ngɛ diblii mi
1Loko a bɔ je ɔ, Kristo ngɛ, nɛ e kɛ Mawu ngɛ. Lɛ ji Mawu ɔ nɛ.2E ngɛ kɛ je sisije, nɛ e ngɛ daa.3Lɛ nɛ e bɔ nɔ́ tsuaa no nɛ ngɛ; nɔ́ ko nɔ ko be je nɛ ɔ mi nɛ pi lɛ nɛ e bɔ.4Lɛ nɛ e hɛɛ neneene wami, nɛ jamɛ a wami ɔ nɛ haa nimli tsuo wami.5E wami ɔ ji La nɛ ngɛ tsoe ngɛ diblii ɔ mi, se diblii ɔ li La nɛ e ji, nɛ e nyɛ we e nɔ hu nɛ e ye.6Mawu tsɔ Yohane Baptisilɔ ɔ kɛ ba.7E ba nɛ e ba ye Kristo he odase nɛ e tsɔɔ nɔ nɛ e ji, konɛ a he e nɔ nɛ a ye.8Pi Yohane nitsɛ ji La a, se mohu La a he odase yemi he nɛ e ba ngɛ.9Pee se ɔ, nɔ nɛ ji anɔkuale La a nitsɛ ba nɛ e ba kpɛ ha nɔ tsuaa nɔ ngɛ je ɔ mi.10Lɛ nɛ e bɔ je ɔ, se benɛ e ba a, je ɔ li e mi tso.11E ba lɛ nitsɛ e nihi a ngɔ se a nya we e he.12Nihi bɔɔ nɛ nya e he, nɛ a he e nɔ ye ɔ, e pee mɛ Mawu bimɛ.13Nɛ a fɔ nihi nɛ he e nɔ ye ɔ ekohu, pi ngɛ he lo nya, se mohu ngɛ Mawu suɔmi nya.14Kristo plɛ Nɔmlɔ adesa nɛ e ba hi wa kpɛti ngɛ zugba a nɔ, nɛ e hyi tɔ kɛ dloomi kɛ anɔkuale. Wa ti ni komɛ na e hɛ mi nyami ɔ kaa Hiɔwe Tsɛ ɔ Bi kake too ɔ hɛ mi nyami.Yohane ngɔ Yesu kɛ tsɔɔ
15Yohane tsɔɔ lɛ nine nɛ e de asafo nɛ bua e he nya a ke, “Nɔ nɛ ɔ ji nɔ nɛ i tu e he munyu ke, ‘Nɔ ko ma nɛ e pe mi kulaa. E ngɛ momoomo loko a fɔ mi.’ ”16Ngɛ e dloomi fuu ɔ nya a, e jɔɔ wɔ tsuo babauu.17Mawu kɛ mlaa gu Mose nɔ kɛ ba, se Yesu Kristo ji nɔ nɛ ngɔ dloomi kɛ anɔkuale kɛ ba ha wɔ.18Nɔ ko nɛ Mawu hyɛ, se e Bi kake too ɔ nɛ e kɛ lɛ ngɛ ɔ pɛ nɛ le lɛ, nɛ lɛ e ba tsɔɔ wɔ bɔ nɛ Tsɛ ɔ ngɛ ha.19Benɛ Yohane ngɛ Yesu he odase nɛ ɔ yee ɔ, Yuda nikɔtɔma amɛ tsɔ osɔfo nguahi kɛ a se yeli kɛ je Yerusalem kɛ ba e ngɔ nɛ a ba bi lɛ ke lɛ ji Mesia, Yiwamihelɔ nɛ ma a lo?20Yohane de mɛ paa ke, “Pi imi ji Kristo ɔ.”21Tsɔli ɔmɛ bi lɛ ekohu ke, “Lɛɛ mɛnɔ ji mo mɔ? Elia ji mo lo?”Nɛ e ha mɛ heto ke, “Tsa pi imi i.”
Jehanɛ ɔ a bi le ke, “anɛ mo ji Gbalɔ ɔ lo?” Nɛ e he nɔ ke, “Dabi.”22Tsɔli ɔmɛ ya nɔ nɛ a bi Yohane ke, “Lɛɛ mɛnɔ kulaa ji mo mɔ? Mo ha wɔ heto konɛ wa ya bɔ ni nɛmɛ nɛ tsɔ wɔ ɔ amaniɛ. Kɛ o ngɛ dee kɛɛ?”23Nɛ e he nɔ ke, “Ami ji gbi nɛ ngɛ pɛe ngɛ nga gbajaa a nɔ ngɛ dee kaa bɔ nɛ Gbalɔ Yesaia gba nɛ e de ke, ‘Nyɛ dla nyɛ he kɛ hyɛ Nutsɔ ɔ blɔ ɔ.’ ”24Kɛkɛ nɛ Farisi bi ɔmɛ pa tsɔ kɛ ho Yohane ngɔ ya.25Nɛ a ya bi lɛ ke, “Ke pi mo ji Yiwamihelɔ loo Elia loo Gbalɔ ɔ, lɛɛ mɛni he wami o ngɛ nɛ o baptisiɔ nɔ?”26Yohane ha mɛ heto ke, “Ami lɛɛ nyu pɛ nɛ i kɛ ngɛ baptisie, se nɔ ko ngɛ juami ɔ kpɛti ngɛ hiɛ ɔ amlɔ nɛ ɔ nɛ nyɛɛ kɛ lɛ kpi hyɛ;27nɛ e be kɛe nɛ e maa je e ni tsumi ɔ sisi ngɛ nyɛ kpɛti, nɔ nɛ i sɛ nɛ i peeɔ e sɔmɔlɔ po.”28Sane nɛ ɔ ba ngɛ Betania, kɔpe ko nɛ ngɛ Yordan Pa a se he nɛ Yohane ngɛ nihi baptisie ngɛ ɔ.29E nɔ jena a, Yohane na Yesu nɛ ma e ngɔ, nɛ e de ke, “Hyɛ Mawu To Bi ɔ nɛ woɔ je ɔ tsuo he yayami kɛ yaa a.30E he munyu nɛ i ngɛ tue ke, ‘E piɛ bɔɔ nɛ nɔ ko nɛ kle pe mi maa fie ye se kɛ ba, e ngɛ momo loko a bɔ mi ade.’31Jinɛ i li kaa lɛ ji nɔ nɛ ma a, se imi lɛɛ i ngɛ baptisie kɛ nyu bɔ nɛ pee nɛ a je e mi tso ngɔ tsɔɔ ma a.”32Nɛ Yohane kale bɔ nɛ e na Mumi Klɔuklɔu ɔ nɛ kple si kɛ je hiɔwe kaa obleku lahuɛ kɛ ba ma Yesu yi kpɛti ɔ.33E tsa nɔ nɛ e de mɛ ekohu ke, “I li kaa lɛ i, se benɛ Mawu tsɔ mi ke ma ya baptisi ɔ, e de mi ke, ‘Nɔ nɛ o maa na nɛ Mumi Klɔuklɔu ɔ ma kple si kɛ ba ma e nɔ ɔ, lɛ ji nɔ nɛ blɔ nɛ o ngɛ hyɛe ɔ nɛ, nɛ lɛ ji nɔ nɛ maa baptisi kɛ Mumi Klɔuklɔu ɔ nɛ.’34I na nɛ e ba mi ngɛ nyumu nɛ ɔ nɔ, nɛ i ye he odase kaa lɛ ji Mawu Bi ɔ nɛ.”
Yesu tsɛ kaseli
35E nɔ jena benɛ Yohane kɛ e kaseli ɔmɛ a ti ni enyɔ daa si,36nɛ Yesu ba be ɔ, Yohane hyɛ lɛ too nɛ e de mɛ ke, “Nyɛɛ hyɛ, Mawu To Bi ɔ ji nɛ ɔ nɛ.”37Kɛkɛ nɛ Yohane kaseli enyɔ ɔmɛ plɛ a he, nɛ a nyɛɛ Yesu se.38Benɛ Yesu plɛ e he nɛ e na mɛ ngɛ e se ɔ, e bi mɛ ke, “Mɛni nyɛ ngɛ hlae?”Nɛ a de lɛ ke, “Mawetsɛ, jije o hii?”39Nɛ e de mɛ ke, “Nyɛɛ ba nɛ nyɛ ba hyɛ.” A nyɛɛ e se kɛ ho he nɛ e to ɔ ya nɛ a kɛ lɛ ya hi si kɛ je piani ngmlɛ eywiɛ kɛ ya si gbɔkuɛ nya si.40Kaseli enyɔ nɛ ɔmɛ a ti nɔ kake ji Andrea, Simon Petro nyɛminyumu ɔ.41Nɛ Andrea ho ya de e nyɛmi Petro ke, “Wa na Yiwamihelɔ ɔ!”42Nɛ e kpaka Petro kɛ ba Yesu ngɔ. Yesu hyɛ Petro too nɛ e de lɛ ke, “Mo ji Simon, Yohane binyumu ɔ nɛ, se a ma tsɛ mo ke Petro, e sisi ji Tɛsa.”43E nɔ jena a, Yesu pee e juɛmi kaa e maa ya Galilea. E na Filipo nɛ e de lɛ ke, “Ba nyɛɛ ye se.”44Filipo je Betsaida, Andrea kɛ Petro mɛ a ma a mi.45Filipo hu ya na Natanael nɛ e de lɛ ke, “Wa na Yiwamihelɔ ɔ, nɔ nɛ Mose kɛ gbali ɔmɛ ngma e he sane ɔ. A tsɛɛ le ke, Yesu, Yosef nɛ je Nazaret ɔ bi.”46Nɛ Natanael bi Filipo ke, “Nazaret! Anɛ nɔ́ kpakpa ko ma nyɛ je Nazaret lo?”
Nɛ Filipo de lɛ ke, “Moo lɛɛ moo ba nɛ mo nitsɛ o ba hyɛ.”47Benɛ a maa ho Yesu ngɔ sumi ya a, Yesu de mɛ ke, “O nɛ, Israel no anɔkualetsɛ nɛ ma a nɛ, e sisi we nɔ.”48Nɛ Natanael bi Yesu ke, “Kɛ o pee kɛ le nɔmlɔ nɛ ji mi kɛɛ?” Nɛ e he nɔ ke, “I na mo ngɛ tso ko kaa mangoo tso ɔ sisi loko ji Filipo ba na mo ɔ nɛ.”49Nɛ Natanael de Yesu ke, “Mawetsɛ, mo ji Mawu Bi, Israel Matsɛ ɔ nɛ.”50Yesu bi lɛ ke, “Akɛnɛ i de mo ke i na mo ngɛ tso ko kaa mangoo tso ɔ sisi he je nɛ o he ye ɔ lo? O maa na okadi nguahi nɛ kle pe enɛ ɔ.51Nɛ o maa na nɛ hiɔwe tete nya bli nɛ Mawu bɔfo ɔmɛ ngɛ mi.”
Biblica, Inc.