Hebri10
Somi Momo ɔ kɛ Somi He ɔ a kpɛti slɔɔto
1Níhi nɛ a na kɛ je Yuda bi ɔmɛ a blema mlaa amɛ a mi ji ní kpakpahi nɛ Kristo maa pee kɛ ha wɔ ɔ a he nini kɛkɛ. Ngɛ blema blɔ nya tomi ɔ mi ɔ, a ngɛ bɔ sae be fɛɛ be daa jeha, se lɔ ɔ po nyɛ we ni ɔmɛ a yi wami nɛ e he.2Kaa e ma nyɛ a yi wami ma he jinɛ bɔ sami si kake pɛ ko hiɛ; jinɛ e ko tsukɔ jali ɔmɛ a he kulaa, nɛ a be he nue hu kaa yayami peeli ji mɛ.3Se daa jeha bɔ sami nɛ ɔmɛ mohu haa nɛ a kai a yayami kɛ a tue gbomi ɔmɛ.4Lɔ ɔ he je nɛ Kristo de ngɛ ke, na kuhi kɛ apletsihi a muɔ be yayami nyɛe ma je ligbi ko.5Enɛ ɔ he je nɛ benɛ Kristo ma je ɔ mi ɔ, e de ke, “Oo Mawu, na kuhi kɛ apletsihi a muɔ sɛ o hɛ mi, lɔ ɔ he je nɛ o dla ye nɔmlɔ tso nɛ ɔ nɛ ma ngɔ fɔ si ngɛ bɔ sami la tɛ ɔ nɔ kaa bɔ sami nɔ.6O bua jɔɛ lohwehi a gbemi kɛ bɔ sami ngɛ o hɛ mi kɛ ha yayami jemi ɔ he.”7Kɛkɛ nɛ i de ke, “O nɛ, i ba nɛ ma ba tsu o suɔmi nya ni, nɛ ma ngɔ ye wami kɛ ha kaa bɔ nɛ a ngma ngɛ ye he ngɛ Ngmami ɔmɛ a mi kaa ma pee ɔ.”8Benɛ Kristo tu e bua nɛ jɔɛ bɔ sami slɔɔto ɔmɛ, kaa bɔ nɛ a ngɛ ngɛ blɔ nya tomi momo ɔ mi ɔ he munyu ta a,9jehanɛ ɔ, e de ke, “O nɛ mi. I ba nɛ ma ba ngɔ ye wami kɛ ha.” E po kekle blɔ nya tomi ɔ mi nɛ e ngɔ nɔ́ nɛ hi pe lɔ ɔ kɛ to nane mi.10Ngɛ blɔ nya tomi he nɛ ɔ nya a, a ngɔ wa yayami ɔmɛ kɛ ke wɔ nɛ a tsukɔ wa he kɛ Kristo gbenɔ si kake too ɔ.11Se ngɛ somi momo ɔ mi ɔ, osɔfo ɔmɛ daa si daa ligbi ngɛ bɔ sami la tɛ ɔ hɛ mi ngɛ bɔ sae, nɛ bɔ sami nɛ ɔmɛ hu nyɛ we gblee nɛ a je wa yayami ɔmɛ.12Se Kristo ngɔ e he kɛ ha Mawu ngɛ wa yayami ɔmɛ a he je, nɛ e ngɔ e he kɛ sã bɔ si kake too kɛ ha be fɛɛ be, nɛ lɔ ɔ se ɔ, e ho ya hi si ngɛ Mawu hiɔ nine nɔ,13nɛ e ngɛ mlɛe nɛ a ngɔ e he nyɛli ɔmɛ kɛ wo e nane sisi.14Ejakaa e wo e bɔ sami kake nɛ ɔ kɛ ha nɛ ni nɛmɛ nɛ e tsu a he ɔ, a hi kɛ pi si ngɛ Mawu hɛ mi kɛ ya neneene.15Nɛ Mumi Klɔuklɔu ɔ yeɔ enɛ ɔ he odase, ejakaa e de ke,16“Enɛ ɔ ji somi nɛ i kɛ Israel bi maa so, i ma wo ye mlaa amɛ kɛ wo a tsui mi bɔ nɛ pee nɛ a suɔ nɛ a ye nɔ. Nɛ i ma ngma ye mlaa amɛ ngɛ a juɛmi mi bɔ nɛ pee nɛ a le ye suɔmi nya ni be fɛɛ be.”17Nɛ e de ke piɛ he ke, “I be a he yayami ɔmɛ kɛ a tɔmi ni peemi ɔmɛ kaie hu.”18Nɛ he nɛ a wo yayamihi ngɔ ke ngɛ kulaa kɛ yaa neneene ɔ, yayami he bɔ sami ko he hia we hu.19Anyɛmimɛ, enɛ ɔ he je ɔ, wa ma nyɛ ya sɛ He Klɔuklɔu Pe Kulaa a, he nɛ Mawu ngɛ ɔ, ngɛ Yesu muɔ ɔ he je.20Enɛ ɔ ji wami blɔ he nɛ Kristo bli kɛ ha wɔ benɛ e gba tsu nya bo nɛ ji e he lo ɔ mi konɛ wa ya sɛ he klɔuklɔu ɔ ngɛ Mawu hɛ mi.21Nɛ akɛnɛ wa Osɔfo Nɔkɔtɔma a nitsɛ ji Mawu we ɔ nɔ yelɔ ɔ,22nyɛ ha nɛ waa hɛ kɛ su Mawu he kɛ anɔkuale tsui kɛ hɛ nɔ kami kaa e ma he wɔ, ejakaa a ngɔ Kristo muɔ ɔ kɛ fiã wa nɔ nɛ a kɛ tsukɔ wa he,nɛ jehanɛ ɔ hu a fɔ wa nɔmlɔ tso ɔmɛ a he kɛ nyu nɛ mi tsɔ.23Jehanɛ ɔ nyɛ ha nɛ waa hyɛ yi wami hemi nɛ Mawu wo wɔ he si ɔ blɔ. Nɛ wa gba mi kpoo nɛ wa de ni kpahi, nɛ wa yi mi nɛ ko pee wɔ enyɔɔnyɔ. Ejakaa nɔ nɛ wo wɔ si ɔ, e pi lakpatsɛ.Nyɛɛ di kpakpa peemi se
24Ngɛ nɔ́ nɛ e pee kɛ ha wɔ he je ɔ, nyɛ ha nɛ wa hla nɔ́ nɛ wa maa pee kɛ ye kɛ bua wa he, nɛ wa na suɔmi kɛ ha wa he, nɛ waa suɔ ni tsumi kpakpahi.25Wa hɛ nɛ hi nɔ, nɛ waa ba sɔlemi kpe ɔmɛ; se wa ko pee kaa bɔ nɛ ni komɛ pɔɔ peemi ɔ. Waa wo wa si bi he wami nɛ wa kai mɛ, ejakaa e kpalemi kɛ bami ligbi ɔ ngɛ sue.26Ejakaa nɛ wa le yayami kɛ pami he anɔkuale ɔ se ɔ, ke nɔ ko hɛ ngɛ he nɛ e pee yayami ɔ, Kristo gbenɔ ɔ be jamɛ a yayami ɔ nɔ hae; blɔ ko be nɛ a ma kɛ je jamɛ a yayami ɔ.27Se mohu Mawu mi mi fumi nɛ he ngɛ gbeye, nɛ maa sa e he nyɛli ɔmɛ kɛ la glegleegle ɔ pɛ ji nɔ́ nɛ piɛ.28Ke nɔ ko tɔ Mose mlaa nɔ, nɛ a na odasehi enyɔ loo etɛ kɛ si lɛ ɔ, a buu lɛ gbenɔ fɔ nɛ mɔbɔ nami ko be mi.29Lɛɛ tue gblami nɛ a ma kɛ ha lɛ ɔ maa hi gbeye, nɔ́ nɛ a ma kɛ ha nɔ nɛ maa te si kɛ si Mawu Bi ɔ, nɛ e bui e muɔ nɛ e kɛ sã bɔ ɔ kaa nɔ́ ko nɛ he jua wa, nɛ e maa wo Mumi Klɔuklɔu ɔ nɛ ngɔɔ Mawu mɔbɔ nami kɛ ba haa e nimli ɔmɛ ɔ mi mi fumi.30Ejakaa wa le nɔ nɛ de ke, “Ye blɔ fa mi nɔ́ ji kojomi; i ma pee mɛ kɛ to nane mi.” Lɛ kɛ nɛ e de ke, “Nutsɔ ɔ nitsɛ nɛ maa kojo e nimli ɔmɛ.”31O nɛ, e maa pee gbeye ke Mawu hɛ kalɔ ɔ nine maa su nɔ ko nɔ.32Nyɛ kai nyakpɛ be ɔmɛ, be nɛ nyɛ le Kristo kekleekle ɔ, bɔ nɛ nyɛ ngɔ nyɛ he kɛ pɛtɛ e he, be mi nɛ nyɛ ngɛ amanehlu nae tete.33Be komɛ ɔ, a muɔ nyɛ nɛ a fiaa nyɛ kpa, nɛ be komɛ hu nyɛ hyɛ bɔ nɛ a pee ni komɛ jamɛ a ni ɔmɛ nɔuu ha, nɛ a ni pee nyɛ mɔbɔ.34Nyɛ na nɔ́ kɛ ni nɛmɛ nɛ a wo mɛ tsu mi ɔmɛ; nɛ nyɛ bua jɔ nyɛ he benɛ a kpɔ nyɛ níhi ngɛ nyɛ dɛ ɔ, ejakaa nyɛ le kaa nɔ́ kpakpahi ngɛ nyɛ hɛ mi nɛ nyɛ ma na ngɛ hiɔwe, níhi nɛ maa pee nyɛ nɔ́ daa.35Enɛ ɔ he je ɔ, bɔ fɛɛ bɔ nɛ ji ha a, nyɛɛ pɛtɛ nyɛ hɛ nɛ nyɛ kɛ fɔ Nutsɔ ɔ nɔ ɔ mi wawɛɛ, ejakaa e hwɔɔ se hiɔwo ɔ kle agbo.36E he hia kaa nyɛɛ to nyɛ tsui si nɛ nyɛɛ pee Mawu suɔmi nya ni, bɔ nɛ pee nɛ nyɛ nine nɛ su nɔ́ nɛ e wo nyɛ si ngɛ he ɔ nɔ.37E be kɛe nɛ e maa su si.38Nɛ ni nɛmɛ nɛ a ji dali ngɛ Mawu hɛ mi ngɛ hemi kɛ yemi nya a, a hɛɛ a dami ɔ mi, nɛ a he e nɔ nɛ a ye ngɛ nɔ́ tsuaa nɔ mi, ejakaa ke a kpale ngɛ se ɔ, Mawu be a he bua jɔmi nae.39Se wa kpale we ngɛ Mawu se, nɛ wa ngmɛɛ we wa hemi kɛ yemi ɔ he. Wa hemi kɛ yemi ngɛ e mi ɔ deɔ wɔ kaa wa susumahi ma na yi wami hemi.Biblica, Inc.