Bɔfo Ɔmɛ13
1Gbali kɛ tsɔɔli komɛ nɛ ngɛ Antiokia asafo ɔ mi ji, Barnaba kɛ Simeon nɛ a tsɛɛ lɛ ke, “Nɔmlɔ Yumu” ɔ kɛ Lukio nɛ je Kireene kɛ Matsɛ Herode nyɛminyumu Manahen, kɛ Paulo.2E ba mi kaa ligbi ko benɛ a ngɛ Mawu jae nɛ a ngɛ hwɔ hae ɔ, Mumi Klɔuklɔu ɔ de mɛ ke, “Nyɛ je Barnaba kɛ Paulo ngɔ ha mi kɛ ha ni tsumi titli ko.”3Enɛ ɔ he je ɔ, benɛ a ha hwɔ nɛ a sɔle ɔ, a wo a nine pue a nɔ nɛ a wo mɛ blɔ.4Nɛ Mumi Klɔuklɔu ɔ tsɔɔ mɛ he nɛ a ya; nɛ a pue nɔ kɛ ho Seleukia ya. A ya po wo ɔ ngɛ lejɛ ɔ kɛ ba Kipro.5Nɛ benɛ a ba su Salami ma a mi ɔ, a ya fiɛ Manye Munyu ɔ ngɛ Yuda bi ɔmɛ a kpe he ɔmɛ; nɛ Yohane Marko piɛ a he kaa a sɔmɔlɔ.6Benɛ a fiɛ ngɛ wo kpɔ ma amɛ tsuo a mi nɛ a ba su Pafo ɔ, a ba na Yuda no kunya tsulɔ kɛ lakpa gbalɔ ko nɛ a tsɛɛ lɛ ke Baryesu ɔ7ngɛ Amlaalo Sergio Paulo ngɔ. Sergio Paulo ji nyumu hɛ si kalɔ ko nɛ ngɛ juɛmi saminya. Amlaalo ɔ tsɛ Barnaba kɛ Paulo kɛ ba e ngɔ, ejakaa e ngɛ hlae nɛ e bu Mawu Manye Munyu ɔ tue.8Se kunya tsulɔ ɔ, nɔ nɛ a tsɛ lɛ ngɛ Hela gbi mi ke Elima a, kplɛɛ we nɔ, ejakaa e sume nɛ amlaalo ɔ nɛ bu Barnaba kɛ Paulo a munyu ɔ tue nɛ e he Nutsɔ ɔ nɔ nɛ e ye.9Kɛkɛ nɛ Mumi Klɔuklɔu ɔ sɛ Paulo mi nɛ e hyɛ kunya tsulɔ ɔ gaa kɛ abofu nɛ e de lɛ ke,10“Mo abosiami bi, nɔ sisilɔ kɛ lakpatsɛ nɛ sume nɔ́ kpakpa! Anɛ o maa pee Nutsɔ ɔ he nyɛlɔ kɛ ya neneene lo?11Mawu maa sa tue ha mo, nɛ o be nɔ́ hyɛe kɛ ya si be ko.” Paulo nya nɔe si nɛ e hɛ mi wo diblii nɛ e li he nɛ e yaa. Nɛ e bɔni pɛɛ kpami ke nɔ ko nɛ ta tso mi ha lɛ.12Benɛ amlaalo ɔ na nɔ́ nɛ ba Baryesu nɔ ɔ, Mawu Munyu ɔ he wami ɔ ha nɛ e nya kpɛ e he, nɛ e he Manye Munyu ɔ ye.
Paulo ho Turkia ya
13Nɛ Paulo kɛ nihi nɛ piɛ e he ɔ je Pafo nɛ a wo lɛ kɛ ba Perge ngɛ Pamfilia. Se Yohane lɛɛ e kpale ngɛ lejɛ ɔ kɛ ba Yerusalem ekohu.14Nɛ Barnaba kɛ Paulo tsa nɔ kɛ ba Antiokia ngɛ Pisidia zugba a nɔ. Hejɔɔmi Ligbi ɔ nɔ ɔ, a ya kpe he ɔ nɛ a ya ja Mawu.15Nɛ e ba mi kaa benɛ a kane Mawu munyuhi kɛ je Mose kɛ Gbali ɔmɛ a womi ɔmɛ a mi se ɔ, kpe he ɔ nikɔtɔma amɛ tsɔ nɛ a ba de mɛ ke, “Anyɛmimɛ, ke nyɛ ngɛ nɔ́ ko nɛ nyɛ maa tsɔɔ wɔ ɔ, nyɛɛ ba nɛ nyɛ ba tsɔɔ wɔ.”16Kɛkɛ nɛ Paulo te si nɛ e nga mɛ, nɛ e de mɛ ke, “Israel bi kɛ nyɛ nihi nɛ nyɛ yee Mawu gbeye, nyɛɛ bu tue!17Mawu nɛ e ma ji kikɛmɛ a Israel ma nɛ ɔ, nɛ e hla wa tsɛ ɔmɛ nɛ e wo a hɛ mi nyami ngɛ Mizraim, nɛ e kpaka mɛ kɛ je nyɔguɛ yemi mi.18E lɛ mɛ jeha nyingmi eywiɛ sɔuu ngɛ nga a nɔ.19Nɛ e kpata mahi kpaago a hɛ mi ngɛ Kanaan zugba a nɔ, nɛ e dla a zugba a kɛ ha mɛ kaa a gbosi ni.20E ha mɛ kojoli nɛ a ye a nɔ jeha lafa eywiɛ kɛ nyingmi enuɔ kɛ ba su Gbalɔ Samuel nɔ.21Pee se ɔ, a kpa Mawu pɛɛ ke e ha mɛ matsɛ, nɛ e ha mɛ Kis bi Saulo nɛ je Benyamin weku ɔ mi ɔ, nɛ e ye a nɔ matsɛ jeha nyingmi eywiɛ.22Se Mawu kpa Saulo nɛ e ngɔ David kɛ to e nane mi ngɛ matsɛ sɛ ɔ nɔ. Mawu de ngɛ David he ke, ‘Ye bua jɔ Isai bi David ɔ he, ejakaa e ma ba pee ye suɔmi nya ni.’23Nɛ Matsɛ David mi nɔuu nɛ Yesu, nɔ nɛ ji Israel Yiwamihelɔ nɛ Mawu wo e he si ɔ je.24Se loko ji Yesu ba a, Yohane Baptisilɔ ɔ sɛ e hlami nɛ e ba fiɛ ke Israel no tsuaa Israel no nɛ e kpale ngɛ yayami se kɛ ba Mawu ngɔ.25Nɛ e ba mi kaa benɛ Yohane ngɛ e ni tsumi ɔ nya gbee ɔ, e bi ke, ‘Anɛ nyɛ ngɛ susue kaa ami ji Yiwamihelɔ ɔ lo? Kpaoo! Nɔ ko nɛ kle pe mi ma, nɔ nɛ i sɛ nɛ a kɛ mi toɔ e he kulaa.’26Anyɛmimɛ Abraham bimɛ, kɛ nyɛ ma je li nɛ yee Mawu gbeye, wɔ tsuo nɛ a kɛ yi wami hemi nɛ ɔ ba ha.27Yuda bi ɔmɛ kɛ a nikɔtɔma amɛ ngɛ Yerusalem ɔ gbe Yesu, nɛ lɔ ɔ ha nɛ gbami nɛ a gba kɛ fɔ si ɔ ba mi. A pee enɛ ɔ ejakaa a yo we lɛ, nɛ a li kaa e he munyu ji nɔ́ nɛ gbali ɔmɛ ngma kɛ fɔ si ɔ. Se a kaneɔ nɔ́ nɛ gbali ɔmɛ ngma a nɛ a nuɔ daa ngɛ Hejɔɔmi Ligbi ɔ nɔ.28A nɛ gbenɔ fɔ bumi sane ko ngɛ e he, se kɛ ɔ, a bi Pilato nɛ e gbe lɛ.29Nɛ benɛ nɔ́ tsuaa nɔ nɛ a ngma ngɛ e gbenɔ ɔ he ɔ ba mi pɛpɛɛpɛ ɔ, a je lɛ kɛ je sɛumi tso ɔ nɔ nɛ a ya to lɛ ngɛ yɔkɔ mi.30Se Mawu tle lɛ si kɛ je gbeje.31Nɛ pee se ɔ, e je e he kpo si abɔ kɛ tsɔɔ nihi nɛ kɛ lɛ je Galilea kɛ ba Yerusalem ɔ, nɛ a ye he odase ngɛ ma a mi kaa e te si.32Manye Munyu nɛ ɔ he je nɛ i kɛ Barnaba ba nyɛ ngɔ ngɛ nɛ wa ba ha nɛ nyɛɛ le kaa si nɛ Mawu wo wa tsɛ ɔmɛ ɔ,33e ba mi ngɛ wa yi nɔ. Ejakaa Mawu tle Yesu si kɛ je gbeje kaa bɔ nɛ a ngma ngɛ David La enyɔne ɔ mi ngɛ Yesu he ke, ‘I wo mo ye biɔ o hɛ mi nyami mwɔnɛ ɔ.’34Ejakaa Mawu wo si kaa e ma tle lɛ si nɛ e be gboe hu, kaa bɔ nɛ a ngma ngɛ Ngmami Klɔuklɔu ɔ mi nɛ a de ke, ‘Ma ngɔ dloomi níhi nɛ i wo David si ngɛ he ɔ kɛ ha nyɛ.’35Nɛ e de ngɛ David La kpa ko hu mi ke, ‘Mawu be e Bi Klɔuklɔu ɔ he ngmɛe nɛ e sa gblee!’36Tsa pi David he munyu nɛ e ngɛ tue, ejakaa benɛ David gbe ni tsumi nɛ Mawu ha lɛ ɔ nya a, e gbo nɛ a pu lɛ nɛ e sa.37Se nɔ nɛ he munyu nɛ e ngɛ tue ji nɔ nɛ Mawu tle lɛ si ɔ, nɔ nɛ gbenɔ na we e nɔ he wami ko ɔ.38Anyɛmimɛ suɔli, nyɛɛ bu mi tue! I ngɛ nyɛ dee ke, kɛ gu Yesu nɔ ɔ, a maa ngɔ nyɛ he yayami ɔmɛ kɛ ke nyɛ.39Nɛ e nɔ nɔuu a maa gu kɛ bu nɔ tsuaa nɔ nɛ heɔ e nɔ yeɔ ɔ bɛmi; nɛ enɛ ɔ ji nɔ́ ko nɛ Yuda bi ɔmɛ a mlaa be nyɛe maa pee.40Lɔ ɔ he je ɔ, nyɛɛ hyɛ nyɛ he saminya konɛ níhi nɛ a ngma ngɛ gbali ɔmɛ a womi ɔmɛ a mi ɔ nɛ a ko ba nyɛ nɔ. Ejakaa a de ke,41‘Nyɛɛ hyɛ, nyɛ nɔ he guɛ gbeli, nyɛ hɛ mi ma kpata, ejakaa ma tsu nɔ́ ko ngɛ nyɛ yi nɔ nɛ ke nyɛ nu he ɔ, nyɛ be hee maa ye.’ ”42E ba mi kaa benɛ a ngɛ Yuda bi ɔmɛ a kpe he ɔ jee ɔ, a kpa Paulo pɛɛ nɛ e ba tu munyu kɛ tsɔɔ mɛ ekohu ngɛ Hejɔɔmi Ligbi nɛ maa ba a nɔ.43Nɛ Yuda bi ɔmɛ kɛ ma je li ɔmɛ nɛ yee Mawu gbeye ɔ nyɛɛ Paulo kɛ Barnaba se kɛ je kpe he ɔ kɛ ba ma a mi nɛ Paulomɛ slɔ mɛ wawɛɛ kaa a pɛtɛ Mawu dloomi ɔ he.44Nɛ benɛ Hejɔɔmi Ligbi ɔ su ekohu ɔ, ma a tsuo ba bua a he nya nɛ a bu Mawu Munyu ɔ tue.45Se Benɛ Yuda bi ɔmɛ a nikɔtɔma amɛ na asafo nɛ ba pue si ɔ, a bɔni hunga jemi nɛ a tu musu bɔmi munyuhi kɛ si Paulo nɛ a bɔ mɔde kaa a maa ku e fiɛmi ɔ nya.46Kɛkɛ nɛ Paulo kɛ Barnaba tu munyu kɛ kã ke, “E sa kaa a kɛ Mawu Manye Munyu ɔ ba ha nyɛ Yuda bi ɔmɛ kekle, se akɛnɛ nyɛ kua Mawu Munyu ɔ, nɛ nyɛ bui nyɛ he kaa nihi nɛ sa neneene wami ɔ, wa ma wo kɛ ya ha ma je li ɔmɛ.47Ejakaa ja a nɛ Nutsɔ ɔ wo kita nɛ e de ke, ‘I pee mo la kɛ ha ma je li ɔmɛ, konɛ o kpaka mɛ kɛ je zugba nyata he kɛ ba ye yi wami hemi ɔ mi.’ ”48Benɛ ma je li ɔmɛ nu munyu nɛ ɔ, a bua jɔ a he saminya nɛ a nya, nɛ a ti nihi nɛ suɔ kaa a nine nɛ su neneene wami ɔ nɔ ɔ, a he ye.49Nɛ Mawu Munyu ɔ gbɛ fia jamɛ a zugba a nɔ he fɛɛ he.50Nɛ Yuda bi ɔmɛ a nikɔtɔma amɛ wo yihi Mawu jali ɔmɛ a yi mi, kɛ ma mi nikɔtɔma amɛ, nɛ a bua basabasa peeli a nya kɛ wo Paulo kɛ Barnaba he nɛ a fie mɛ kɛ je ma a mi.51Se Paulo kɛ Barnaba blɛ a nane si zu ngɔ pue ma a nɔ nɛ a si lejɛ ɔ kɛ ho Ikonium ya.52Nɛ kaseli ɔmɛ a bua jɔ a he nɛ a hyi tɔ kɛ Mumi Klɔuklɔu ɔ.Biblica, Inc.