Korinto 29
1I na kaa e he hia we kaa ma ngma nyɛ nɔ́ ko ngɛ Mawu bi ɔmɛ a yemi kɛ buami he.2Ejakaa i le bɔ nɛ nyɛ hɛ dɔ ha, nɛ i fĩa ngɛ he ngɔ tsɔɔ Makedonia bi ɔmɛ kaa Akaia bi dla a he jeha nɛ be ɔ tɔɔ kaa a maa ye kɛ bua. Niinɛ, nyɛ hɛ dɔmi nɛ ɔ wo nihi fuu ka, nɛ a bɔni yee kɛ ngɛ buae.3I ngɛ nyɛmi ɔmɛ tsɔe konɛ fiãmi nɛ wa fĩa kɛ to nyɛ nɔ ɔ, e ko pee fiãmi gu, se mohu a ba na kaa bɔ nɛ wa de mɛ ɔ, nyɛ dla nyɛ he kɛ sika a tsumi.4Ye hɛ mi ma pue si, nɛ nyɛ hu zo maa gbe nyɛ ke Makedonia bi ɔmɛ a ti ni komɛ kɛ mi ba nɛ a ba na kaa nyɛ dla we nyɛ he kulaa kaa bɔ nɛ wa de mɛ ɔ.
Nyɛ ha, Mawu maa to nane mi
5Enɛ ɔ he je nɛ i tsɔ nyɛmimɛ nɛ ɔmɛ kɛ sɛ ye hlami ngɛ konɛ a ba hyɛ ha kaa nike ni ɔ nɛ nyɛ wo he si ɔ nyɛ nine su nɔ kɛ fɔ si lo. Ma suɔ kaa e pee nike ni nɛ je nyɛ tsui mi, se pi nɔ́ ko nɛ a nyɛ nyɛ nɔ kaa nyɛ ha.6Se nyɛ kai enɛ ɔ kaa, ke nyɛ ke nɔ́ ko nyafii ɔ, nyɛ ma na e nane mi tomi nyafii. Ngmɔ hulɔ nɛ duɔ dumi wu bɔɔ ɔ, e kpaa yiblii bɔɔ pɛ, nɛ nɔ nɛ duɔ fuu ɔ, e kpaa yiblii fuu.7Nɔ tsuaa nɔ nɛ ha bɔ nɛ e ma nyɛ kɛ je e tsui mi. Nyɛ ko nyɛ nɔ ko nɔ nɛ e ha pe bɔ nɛ e ma nyɛ, ejakaa Mawu suɔ nɔ nɛ kee ni kɛ jee e tsui mi.8Mawu ngɛ he wami nɛ e maa to nane mi ha nyɛ. E ma ha nyɛ nɔ́ tsuaa nɔ nɛ nyɛ ngɛ hlae ɔ kɛ be nɔ, bɔ nɛ pee nɛ nyɛ na eko kɛ ye kɛ bua ni kpahi hulɔ.9Kaa bɔ nɛ Ngmami ɔ de ke, “Mawu nɔmlɔ naa ohiafo mɔbɔ kɛ jee e tsui mi, nɛ e nɔ́ kpakpa peemi ɔ maa wo e hɛ mi nyami kɛ ya neneene.”10Nɛ Mawu, nɔ nɛ haa ngmɔ hulɔ dumi wuhi nɛ e duɔ, nɛ lɛ nɔuu e haa e kpaa yiblii fuu nɛ e yeɔ ɔ, e ma ha nyɛ dumi wuhi fuu, nɛ e ma ha yiblii ɔmɛ hu maa ba fuu konɛ nyɛ na eko nɛ nyɛ kɛ ye kɛ bua.11Mawu maa pee nyɛ niatsɛmɛ ngɛ nɔ́ tsuaa nɔ mi, nɛ nyɛɛ pee nihi nɛ a mi jɔ kɛ nɔ́ kemi be fɛɛ be konɛ ohiafo ɔmɛ a gu wa nɔ kɛ na Mawu si ngɛ nyɛ nike ni ɔmɛ a he.12Ejakaa kikɛmɛ a ni kemi nɛ ɔ woɔ yiblii kpakpahi enyɔ. Lɔ ɔ ji e yeɔ kɛ buaa nihi nɛ ngɛ fimi mi, nɛ e haa nɛ a naa Mawu si babauu.13Nihi nɛ nyɛ yeɔ kɛ buaa a, a bua jɔɔ a he ngɛ nyɛ nike ni ɔmɛ a he; nɛ tsa pi lɔ ɔ kɛkɛ, se mohu a jeɔ Mawu yi hulɔ kaa nyɛ ni peemi ni kpakpa amɛ kɛ Manye Munyu ɔ nɛ nyɛ kɛ ba a ngɔ ɔ sɔ pɛpɛɛpɛ.14Nɛ mɛ hu a maa sɔle kɛ suɔmi nɛ a ma kpa pɛɛ kɛ ha nyɛ ngɛ Mawu dloomi nɛ a na kɛ gu nyɛ nɔ́ ɔ he.15Nyɛ ha nɛ waa na Mawu si ngɛ e Bi nɛ ji e nike ni nɛ he jua wa a he.Biblica, Inc.