Korinto 26
1Wa ngɛ nyɛ nɛ ji Mawu he piɛli ngɛ e ni tsumi ɔ mi ɔ pɛɛ kpae kaa nyɛ ko ha nɛ Mawu dloomi nɛ ɔ nɛ pee yaka gu.2Ejakaa Mawu de ke, Nyɛ ngmlaa kpami ɔ ba su mi ngɛ be nɛ sa mi; jamɛ a be ɔ mi nɛ a bli yi wami hemi agbo ɔmɛ ɔ nɛ. Nɛ i ye kɛ bua nyɛ ngɛ yi wami hemi ligbi ɔ nɔ. Nɛ amlɔ nɛ ɔ, Mawu ngɛ nyɛ tsɛe. Nyɛ yi wami hemi ligbi ɔ ji nɛ ɔ nɛ.3Wa sume kaa nɔ ko nɛ na tɔmi ko ngɛ wa he nɛ e gbe wa Nutsɔ ɔ he guɛ. Lɔ ɔ he je ɔ, wa baa wa je mi bɔ nɛ sa konɛ wa ko tɔ nɔ ko nɔ, aloo wa ko tsi nɔ ko Nutsɔ ɔ ngɔ bami blɔ.4Anɔkuale mi ɔ, ngɛ ni tsumi tsuaa ni tsumi mi ɔ, waa kɛ wa he tsɔɔ kaa Mawu sɔmɔli tutuutu ji wɔ; nɛ wa toɔ wa tsui si ngɛ nɔ́ nami kɛ haomi kɛ fimi mi.5A fiaa wɔ ni nɛ a woɔ wɔ tsu mi, gidigidi peeli ba tuaa wɔ; wa gbo dengme kɛ tsu ni, nɛ mahe hwɔmi kɛ ni yemi be mi.6Waa kɛ wa je mi bami kpakpa kɛ Manye Munyu ɔ sisi numi kɛ wa tsui si tomi tsɔɔ kaa Mawu sɔmɔli ji wɔ. Nɛ wa je wa mi mi jɔmi kɛ anɔkuale suɔmi nɛ hyi kɛ Mumi Klɔuklɔu ɔ kpo ngɔ tsɔɔ.7Ngɛ nɔ́ tsuaa nɔ mi ɔ, Mawu he wami ɔ ye kɛ bua wɔ nɛ wa ye anɔkuale. Nɛ níhi nɛ ji Mawu sɔmɔlɔ e he bumi kɛ e ta hwumi níhi ɔ, wa ngɛ eko.8Nihi ngɛ wa yi jee jio, a ngɛ wa he guɛ gbee jio, a ngɛ munyu tue kɛ ngɛ wɔ sie jio, e hɛ wui wɔ, wa daa si kpɛii ngɛ Nutsɔ ɔ jami ɔ mi. Anɔkualetsɛmɛ ji wɔ, se a tsɛɛ wɔ lakpatsɛmɛ.9Je ɔ bui wa he akɔtaa, se Mawu le wɔ. Wa ngɛ gbenɔ muɔ nya, se nyɛɛ hyɛ wɔ ha, wa gbo we, wa hɛ ngɛ kɛ ba si mwɔnɛ ɔ. A plaa wɔ se wa gbo we.10Wa yeɔ tsui, se wa bua jɔɔ daa ngɛ Nutsɔ ɔ mi. Ohiafohi ji wɔ, se mohu wa haa nihi fuu mumi dloomi nike ni ɔ kɛ peeɔ mɛ niatsɛmɛ. Wa be nɔ́ ko, se kɛ ɔ, nɔ́ ko he hia we wɔ.11Oo, ye nyɛmimɛ Korinto bi, i de nyɛ nɔ́ fɛɛ nɔ nɛ ngɛ ye juɛmi mi. I suɔ nyɛ kɛ ye tsui kulaa.12Ke nɔ́ kpa ko ngɛ waa kɛ nyɛ wa kpɛti ɔ, e ji wa ngɔ, ejakaa wa suɔ nyɛ nɛ wa bli wa tsui nya ha nyɛ se nyɛɛ lɛɛ nyɛ nga nyɛ tsui nya ngɔ wo wɔ.13I kɛ nyɛ ngɛ munyu tue kaa nɔ́ nɛ ami nitsɛ ye bimɛ ji nyɛ. Lɔ ɔ he je ɔ, nyɛ bli nyɛ tsui mi nɛ nyɛɛ suɔ wɔ kaa bɔ nɛ wɔ hu wa suɔ nyɛ ɔ.
Nyɛɛ kɛ yayami peeli nɛ ko bɔ
14Nyɛɛ kɛ ni nɛmɛ nɛ he we Nutsɔ ɔ nɔ yi ɔ nɛ ko bɔ huɛ, ejakaa mɛni kake peemi nɛ ngɛ Mawu bimɛ kɛ yayami peeli a kpɛti? Nɛ mɛni kake peemi la kɛ diblii ngɛ?15Nɛ mɛni kake peemi Kristo kɛ Abosiami ngɛ? Aloo mɛni bɔmi ngɛ nɔ nɛ heɔ Kristo nɔ yeɔ kɛ nɔ nɛ he we yi ɔ a kpɛti?16Nɛ mɛni kake peemi Mawu sɔlemi We ɔ kɛ wɔhi ngɛ? Ejakaa Mawu hɛ kalɔ ɔ Sɔlemi Tsu ji nyɛ, nɛ Mawu de ngɛ nyɛ he ke, “Ma hi a mi; nɛ ma nyɛɛ a kpɛti; nɛ ma pee a Mawu nɛ mɛ hu a maa pee ye ma.”17Enɛ ɔ he je nɛ Nutsɔ ɔ de ke, “Nyɛɛ je a kpɛti; nɛ nyɛ tsɔ nyɛ he kɛ je a he; nɛ nyɛ ko ta a mu nɔ́ ɔmɛ a he, nɛ ma he nyɛ atuu;18nɛ ma pee nyɛ Tsɛ, nɛ nyɛ hu nyɛ maa pee ye bimɛ nyumuhi kɛ yihi.”Biblica, Inc.