Korinto 211
1I na nɛ nyɛ na ye kuasia munyu tumi ɔ he tsui. Nyɛ na tsui nɛ ma de nɔ́ nɛ ngɛ mi haoe ɔ.2I jee nyɛ he hunga kɛ he numi nɛ Mawu nitsɛ ngɛ kɛ ha nyɛ ɔ, kaa nyɛɛ suɔ Kristo nɔ kake too kaa bɔ nɛ zangmayo nɛ he tsɔ kɛ e suɔmi haa nyumu kake nɛ maa pee e huno ɔ.3Se i ngɛ gbeye yee kaa a ma puɛ nyɛ juɛmi ngɛ nyɛ klɔuu peemi kɛ ha Nutsɔ ɔ sɔmɔmi ɔ he, kaa bɔ nɛ Abosiami mlɔɔ Hawa ngɛ abɔɔ ɔ mi ɔ.4Nyɛ ngɛ kaa nihi nɛ a lu, ejakaa nyɛ heɔ nɔ́ tsuaa nɔ nɛ nɔ ko ma de nyɛ ɔ nyɛ yeɔ, ke nɔ ko ba fiɛ Yesu kpa ko he sane ngɔ tsɔɔ nyɛ nɛ pi wa Yesu ɔ, aloo mumi kpa ko nɛ pi Mumi Klɔuklɔu ɔ nɛ nyɛ nine su nɔ ɔ, aloo blɔ kpa ko nɛ a guɔ nɔ kɛ heɔ yi wami ɔ, nyɛ heɔ lɛ nyɛ yeɔ saminya.
Nɔ sisili
5Se kɛ ɔ, i susuu we kaa kikɛmɛ a “Mawu tsɔli ngua” nɛ ɔmɛ, kaa bɔ nɛ a tsɛɛ a he ɔ, a hi pe mi ngɛ nɔ́ ko mi.6Ke ye nya mi tɛ kɛ munyu tumi po ɔ, i le nɔ́ nɛ he munyu nɛ i ngɛ tue, nɛ i he ye kaa nyɛ le enɛ ɔ, ejakaa wa jeɔ enɛ ɔ kpo paa ngɔ tsɔɔ nyɛ be fɛɛ be.7Akɛnɛ i fiɛ Mawu Manye Munyu ɔ ngɔ tsɔɔ nyɛ yaka gu ngɛ he si bami mi bɔ nɛ pee nɛ a wo nyɛ nɔ́ ɔ, anɛ i pee yayami lo?8Benɛ i ngɛ ni tsue ngɛ nyɛ kpɛti ɔ, asafo kpahi nɛ wo mi hiɔ. E ngɛ kaa nɔ nɛ i ju mɛ kɛ ba ye bua nyɛ.9Nɛ benɛ lɔ ɔ ta, nɛ i kɛ nyɛ ngɛ nɛ ohia ngɛ mi yee ɔ, i bi we nyɛ nɔ́ ko, ejakaa nyɛmimɛ Kristo se nyɛɛli nɛ je Makedonia a ba ha mi ye hiami níhi tsuo. I bi we nyɛ pɛsua hyɛ, nɛ i be nyɛ nɔ́ ko bie gblee.10I da Kristo anɔkuale ɔ nɛ ngɛ ye mi ɔ nɔ nɛ i ngɛ si woe kaa i ma tu enɛ ɔ he munyu ngɔ tsɔɔ nɔ tsuaa nɔ ngɛ Akaia.11Mɛni he i? Akɛnɛ i sume nyɛ he i lo? Mawu le kaa i suɔ nyɛ.12Se mohu ma pee nɔ́ nɛ i ngɛ dee nɛ ɔ bɔ nɛ pee nɛ ma tsi nihi nɛ ngɛ fiãe kaa mɛ hu a ngɛ Mawu ni tsumi tsue kaa bɔ nɛ wa ngɛ tsue ɔ a nya.13Mawu tsɔɛ kikɛmɛ a nimli nɛ ɔmɛ; lakpatsɛmɛ kɛ nɔ sisili nɛ tsakee a he ngɔ peeɔ Kristo bɔfohi ji mɛ.14Se kɛ ɔ, enɛ ɔ pee we mi nyakpɛ, ejakaa Abosiami tsakeɔ e he kɛ peeɔ la bɔfo;15nɛ lɔ ɔ he je ɔ, e be nyakpɛ kaa e sɔmɔli ɔmɛ hu ma nyɛ tsake a he kɛ pee bɔfo klɔuuhi. Se a ma na a ni tsumi ɔmɛ a he hiɔwo ngɛ nyagbe ligbi ɔ nɔ.16I ngɛ nyɛ dee ekohu ke, nyɛ ko bu mi kuasia ngɛ munyu nɛ i ngɛ tue kaa kikɛ ɔ he, se ke nyɛ susu ja a po ɔ, i ngɛ nyɛ bie nɛ nyɛɛ bu mi tue kɛkɛ, konɛ ami hu ma fĩa bɔɔ kaa mɛ.17Ní nɛ i ngɛ nyɛ dee nɛ ɔ, e pi Mawu suɔmi nya munyu nɛ i ngɛ nyɛ tue, ejakaa i ngɛ munyu tue kaa kuasia tuɔ munyu.18Se akɛnɛ jamɛ a nimli ɔmɛ fĩaa ngɛ he lo nya he je ɔ, ami hu ma fĩa ja.19Nyɛ buu nyɛ he ni leli, se nyɛ buu jamɛ a kuasia amɛ tue kɛ bua jɔmi,20nɛ a yeɔ nyɛ nyɔguɛ nɛ a kpɔɔ nyɛ nɔ́ tsuaa nɔ, aloo ke a bui nyɛ ngɛ nɔ́ ko mi aloo a ngɛ a he nɔ woe ngɛ nyɛ nɔ, aloo ke a gba nyɛ hɛ mi ma tete ɔ, e hɛwi nyɛ.21I kɛ zo ngɛ dee ke wa be nyɛ nɔ jamɛ a he wami ɔ. Se nɔ́ tsuaa nɔ nɛ a fĩaa ngɔ toɔ nɔ ɔ, ami hu ma fia ngɔ to nɔ kaa mɛ nɔuu. E peeɔ mi kaa i ngɛ munyu tue kaa kuasia ekohu ngɛ hiɛ ɔ.22A fĩaa ke Hebri bi ji mɛ, e ngɛ mi ja a lo? Ami hu eko ji mi. Nɛ a deɔ ke mɛ ji Israel bi nɛ Mawu hla a nɛ. Ami hu eko ji mi. Anɛ a ke Abraham bimɛ ji mɛ lo? Ami hu eko ji mi.23A ke Kristo sɔmɔli ji mɛ lo? Lɛɛ i pe mɛ! Anɛ i ngɛ munyu tue kaa nɔ nɛ yi mi puɛ lo? I gbo dengme kɛ tsu ni. A wo mi tsu mi si abɔ; a fiaa mi kpa si abɔ, nɛ i su gbenɔ muɔ nya si abɔ.24Yuda bi ɔmɛ fiaa mi kpa si enuɔ sɔuu, eko fɛɛ eko mi ɔ, a fiaa mi kpa nyingmi etɛ kɛ nɛɛ.25A fiaa mi dade kpa si etɛ; a fiaa mi tɛ si kake, nɛ i kɛ pa nɔ lɛ ya butu si etɛ. I tlɔ wo nɔ nyɔ kɛ pia si kake.26I hia blɔ kɛ ya hehi fuu, nɛ i na nɔ ngɛ pahi nɛ hia a nɔ; nɛ i na nɔ ngɛ ojo fiali kɛ ye wekuli Yuda bi ɔmɛ kɛ ma je li ɔmɛ tsuo a dɛ mi. Ja a nɔuu i ná oslaa agbohi ngɛ awi yeli a dɛ mi ngɛ mahi a mi, kɛ ngahi a nɔ, kɛ wohi a nɔ, kɛ nihi nɛ tsɛɔ a he nyɛmimɛ ngɛ Kristo mi se a be ja a, a dɛ mi.27Nɛ pɔ tɔɔ mi ngɛ ni tsumi kɛ nyɔ fɔmi mi; nɛ behi fuu ɔ, hwɔ kɛ kuma ye mi. I ha hwɔ nɛ i nyɛɛ fiɛ̃ mi nɛ fiɛ̃ ye mi, ejakaa i be tade bɔ nɛ sa nɛ i woɔ.28Tsa pi enɛ ɔmɛ kɛkɛ, se mohu i yeɔ asafo ɔmɛ hu a nɔ yami he kɔmɔ.29Ke nɔ ko gbɔjɔ ɔ, i nuɔ he haa lɛ; nɛ ke nɔ ko nane tɔtɔ ɔ, ye mi mi saa mi ngɛ e he.30Se ke e he hia kaa ma fĩa a, lɛɛ i ma fia ngɔ fɔ ye gbɔjɔmi níhi a nɔ.31Mawu nɛ ji wa Nutsɔ Yesu Kristo Tsɛ, nɔ nɛ sa yi jemi daa kɛ daa a, le kaa i tuɔ anɔkuale.32Benɛ i ngɛ Damasko ɔ, asafoatsɛ nɛ ngɛ matsɛ Areta sisi ɔ ha a hwɔɔ mi ngɛ Damasko agbo ɔmɛ a nya konɛ a nu mi.33Se a kɛ mi wo kusii mi kɛ gu gli puɔ mi kɛ kple si nɛ i tu fo kɛ je a dɛ.Biblica, Inc.