NIYABO21
Polo manyen ki lobo manyen
1Ka dok aneno polo manyen ki lobo manyen, pien polo mukwongo ki lobo mukwongo onongo dong gurweny woko, kadi wa nam bene onongo dong peke.2Ci aneno taun madit maleng, Jerucalem manyen, kun oa ki i polo bot Lubanga bino piny, ma kiyubu woko macalo nyako ger ma kideyo pi cware.3Ci awinyo dwon mo malongo ma oa ki i komker kun waco ni, “Nen, kabedo pa Lubanga dong tye bot dano. En bibedo kacel kwedgi, ci gin gibibedo jone. Lubanga kikome aye bibedo kwedgi, kun bene bedo Lubangagi.4En bijwayo pig wanggi woko ducu. To dong bibedo pe, kadi kumu nyo koko, nyo arem, pien gin macon dong ducu gurwenyo woko matwal.”5Ci ngat ma obedo iwi komker owaco ni, “Nen, atye kaketo jami ducu dong manyen.” Ka doki owaco ni, “Coo lok man, pien lok magi lok ma gene dok me ada.”6Ci owaca ni, “Dong otime! An Alpha ki Omega, an acaki ki agiki. Ngat ma orwo neko, abimiyo mato pii me wang it me kwo labongo wel mo.7Meno aye mot ma ngat ma oloyo binongo, ki an abibedo Lubangane, en bene bibedo latina.8Ento jo ma lulworo, ma pe gin lugen, lutim tim mogo me kwer, lunek dano, lutim abor, lutim tim jokjok, luwor cal jogi, ki jo ducu ma gin lugoba, gibinongo mot ma kipoko botgi i nam matye kalyel mac ki gweng calfa; meno aye to me aryo.”Jerucalem manyen
9Ci malaika acel ki ikin lumalaika abiro ma onongo gitye ki atabo abiro ma gemo abiro me agiki tye i igi ca, obino oloko bota kun waco ni, “Bin, anyuti Nyako ger, dako pa Latin romo.”10Cutcut lamalaika otinga, otera woko wa iwi got mo madit mabor tutwal, kun onongo Cwiny Maleng dong oyutu tama woko, ka onyuta Jerucalem, gang maleng, ma a ki i polo bot Lubanga bino piny,11ma onongo tye ki deyo pa Lubanga. Onongo ryeny calo kidi me wel madit makato ducu, ma pe nen atata, calo jacipa, dok leng calo gweng ma mil amila.12Cele onongo dit ocudu malo likung, doge onongo tye apar wiye aryo. Lumalaika apar wiye aryo onongo gitye i dogcel ducu, dok bene i dogcel onongo kicoyo iye nying kaka apar wiye aryo pa jo Icrael.13Dogcel adek onongo tye tung kunyango, tung acam dogcel adek, tung acuc dogcel adek, ki tung kupotoceng bene dogcel adek.14Cel me taun madit bene onongo tye ki te gutine apar wiye aryo, ki ikomgi onongo tye iye nying lukwena apar wiye aryo pa Latin romo.15Ngat ma oloko kweda ni onongo tye ki odo me jabu me pimo taun madit ki dogcel ki cele bene.16Taun madit meno onongo yam twoke tye angwen ma giromrom, bore rom ki lace, ci opimo taun madit meno ki odoone, oromo kilomita alip aryo ki miya angwen; ma bore ki lace kacel ki bore me odok malo ducu romaroma.17En bene dok opimo cel, ci oromo mitar pyere abiro nono ka kipimo ki bad dano, kit macalo lamalaika opimo kwede.18Cel meno onongo kigero ki jacipa, ki taun madit meno kono onongo kigero ki jabu keken, ma nongo nen maleng calo kiyo.19Teguti ducu me taun madit onongo kideyo woko ki lutino kidi me wel mapatpat. Mukwongo obedo kidi ma kilwongo ni jacipa, me aryo capir, me adek agat, me angwen emeradi,20me abic onik, me abicel karnelian, me abiro kuricolit, me aboro berul, me abongwen topaj, me apar kuricoparac, me apar wiye acel jacint, me apar wiye aryo ameticito.21Gin me loro dogcel apar wiye aryo ni onongo obedo tiko matar me wel gin apar wiye aryo, gin me loro dogcel acel acel kitiyo ki kit tikonu acel keken. Yoo ducu ma i taun madit meno kiyubu ki jabu keken, manen leng calo kiyo.22Pe aneno ot mo me woro Lubanga i taun madit meno, pien ot me woro Lubanga ki kunu en aye Rwot Lubanga Won Twer Ducu kikome, ki Latin romo.23Ceng nyo dwe pe bimite i gang meno me ryeny iye, pien deyo pa Lubanga aye dero matye kunu, ki tarane en aye Latin romo.24Lengo matye iye bimiyo rok ducu giwoto maber; ki luker ducu ma iwi lobo gibikelo deyogi iye.25Pe kibiloro dog cele i dyeceng, ki dyewor bene bibedo peke kunu.26Kibitero iye deyo ki lonyo pa rok ducu.27Ento gin mo ma kome keni pe bidonyo iye, kadi ki ngat mo ma timo gin me kwer, nyo gin me goba, ento kono jo ma nyinggi dong kicoyo woko i buk me kwo pa Latin romoni keken.Bible Society of Uganda