Read CAROLOK 10

CAROLOK10

¹Magi aye carolok pa Solomon.
Latin maryek yomo cwiny wone, ento latin maming cwero cwiny mine matek.

²Lonyo ma inongo ki tim maracu pe konyi, ento bedo ki kit ma atir twero lari ki ito.

³Rwot pe weko kec neko dano ma kite atir, ento en kwero dano marac miyo pe nongo gin ma iye mito.

⁴Ka in lawackom ci ibedo meri lacan, ento ka itiyo tic matek ci itwero lony.

⁵Ngat maryek coko cam woko ki i poto ka ocek, ento ngat ma nino mere anina ikare me kac kelo lewic iwiye kene.

⁶Rwot miyo gum ikom dano ma kite atir, dano marac mungu tim bwamine woko.

⁷Dano ma kite atir kipo pire pien en lakel gum, ento dano marac nyinge bibale woko, wi dano biwil woko ikome matwal.

⁸Ngat ma laryeko i cwinye twero lubu cik, ento dano ma laming ma loko lok me mingming agikine en aye can keken.

⁹Dano ma cwinye leng bedo labongo lworo mo, ento dano ma loko kite atata bingene woko.

¹⁰Dano ma bedo kamungu lok kun umu bal kelo ayela, ento ngat ma juku dano atir kelo kuc.

¹¹Lok ma jo ma kitgi atir giloko en aye wang it me kwo, ento dano marac loko lok kun nongo omungu tim bwamine woko.

¹²Adagadaga nyayo lweny ki mone, ento bedo ki mar umu bal ducu.

¹³Ngat ma nino ducu tye ki niang matut loko lok ki ryeko; ento dano ma wiye oding ka oloko lok mo, omyero ki miye mere pwod aye.

¹⁴Jo ma luryeko gilimo ngec ducu macalo gitwero, ento laming ka loko loke lwongo mere can me nyiko cok bote.

¹⁵Lonyo bedo calo gang matek bot lulonyo, ento lucan can nekogi aneka.

¹⁶Cul pa dano ma kite atir en aye kwo, ento magoba ma dano marac nongo en aye mede ameda ki timo bal.

¹⁷Dano ma winyo pwony tye kalubu yo ma tere i kwo, ento dano ma dag juk ngak mere ki yone pat.

¹⁸Dano matye ki adagadaga nino ducu loko lok goba keken, ngat maloko lok me kwoto luwote nongo en laming.

¹⁹Ka dano mo bedo kaloko lok madwong, ci twero timo bal i lok madwong ma en lokoni; dano maryek gire ling alinga.

²⁰Ngat ma kite atir loke bene leng calo ryal ma kiliyo maber: ento tam pa dano marac konye nok tutwal.

²¹Dano ma kite atir pwonyo jo mapol ki loke ma en loko, ento luming gito atoya pi ding wigi.

²²Ka Rwot omiyo gum, dano doko lalonyo; Rwot pe medo cwercwiny ikom gin ma en omiyo.

²³Tiyo gin marac obedo calo gituku ki bot laming, ento dano matye ki niang matut nongo yomcwiny iryeko ma en tye kwede.

²⁴Gin ma dano marac lworo mada bipoto ikome, ento dano ma kite atir kibicobo mitine.

²⁵Kace yamo mager okodo, ci bayo dano marac woko cen, ento ngat ma kite atir moko bedo mere matwal.

²⁶Pe myero icwal dano ma lawackom ni otii tic mo piri; pien tye calo kongo bwino mawac, dok calo yito ma duny donyo iwangi.

²⁷Lwor Rwot ci ibirii iwi lobo pi mwaka mapol, ento dano marac mwakane me bedo i lobo bibedo manok.

²⁸Gen pa dano ma kite atir kelo bote yomcwiny, ento gen pa dano marac lal woko ata.

²⁹Rwot tye macalo cel gogo matek pa ngat ma yo me kwone tye atir, ento jo ma gin lutim maracu en bityekogi woko liweng

³⁰Pe tye ngat mo ma bireto dano ma kite atir; dano marac aye pe bibedo i lobo.

³¹Ngat ma kite atir loko lok ki ryeko, ento ngat ma loko lok mungak me gobagoba kibingolo lebe woko.

³²Ngat ma kite atir loko lok mabeco ma dano pwoyo bene, kun dano marac nongo loko mere lok mungak ma rwenyo dano arwenya.

Bible Society of Uganda