WEL35
Taun Madito pa Lulevi
1Ka gitye i lobo aroo me Moab ma inget Jordan mukemo Jeriko Rwot owaco bot Moses ni,2“Cik jo Icrael ni gumi ki Lulevi taun madito me bedogi ki ikom lobo ma gibilimo me aleyagi; dok omyero gumi botgi lobo ma orumu taun madito meno wek obed me oletgi.3Taun madito meno bibedo pa Lulevi me bedogi, ki olet ma ingetgi bibedo pi kwayo dyangigi ki limgi makwo ducu.4Lobo ma wubimiyo bot jo Levi pi oletgi lace biromo mita miya angwen ki pyere abic cake ki icel me taun madit meno kun rumu tungi ki tungi.5Wubipimo dul lobo ma latwoke angwen ma romrom; bor me twoke acel acel bibedo mita miya abongwen, kun taun madit meno bedo idyere.6Wubimiyo bot Lulevi taun madito abicel me laro lunek dano ma pe guneko akaka kama wubiweko lunek ringo iye, dok wubimiyo botgi taun madito mukene pyere angwen wiye aryo me medo ikom meno.7Kitmeno taun madito ducu ma wubimiyo bot Lulevi biromo pyere angwen wiye aboro, kacel ki oletgi.8Taun madito ma wubimiyo botgi wubikwanyo ki ikom lobo ma jo Icrael bigamo; wubikwanyo mabup ki bot kaka madito, dok ki bot kaka matinone wubikwanyo manok, kun kaka acel acel miyo taune mogo bot Lulevi muporo lobo ma ogamo me ginaleyane.”Taun madito me laro lunek dano
9Rwot owaco bot Moses ni,10“Wac bot jo Icrael ni, ka dong wungolo kulu Jordan, wukato i lobo Kanaan,11ci wubiyero taun madito mogo wek gubed kabedo me laro lunek dano, wek dano ma pe oneko dano akaka olar iye kome.12Kunu bibedo me laro lanek dano ki bot lacul kwor, wek lanek dano mo pe oto nio ka ocung inyim lwak wek kingole kop.13Wubiyero taun madito abicel,14adek loka Jordan tung kunyango ki adek i lobo Kanaan, gubed taun me laro lunek dano.15Taun madito magi abiceli bibedo me laro kom jo Icrael ki pi welowu ki pi lubedo ma gibedo ikinwu, wek ka ngat mo oneko dano kun pe oneko akaka oring olar iye kome.16Ento ka ngat mo otiyo ki nyonyo, me neko lawote, meno en lanek; kibineke woko.17Kace ocelo dano ki kidi ma omako i cinge, maromo neko dano, ci ocele oto woko, meno en lanek; kibineke woko.18Ka onyo ogoyo ki odo ma omako i cinge, maromo neko dano, ce oto woko, meno en lanek; kibineke woko.19Wat macok pa lato kikome aye bineko lanek dano meno. Ka en ononge, ci romo neke.20Ka ngat mo obako dano ocobo pil pi mone, nyo otoke ikome ci obaye ocobo woko, kun nongo okiye akiya, ci oto woko,21nyo ka odonge ki cinge pi mone matye ikin gi ce oto woko, ngat ma ocobe nyo ma odongeni kibineko woko; meno en lanek. Wat macok ki lato kikome aye bineko lanek dano meno ka ononge.22Ento kace obake ci ocobe oyotoyot ma tyen mone mo pe, nyo otoke ikome ci obaye ocobo ma pe okiye akiya,23nyo ocele ki kidi maromo neko dano ma nongo pe onene, ci oto woko kadi yam pe en lameroke, dok onongo pe opiro timo en marac,24ci lwak myero ongol kop ikin lanek ki wat pa lato ma lacul kwor remo kun lubu cik magi.25Lwak myero olar lanek dano ki i cing wat pa lato ma lacul kwor remoni. Lwak bidwoko lanek i taun me laro lunek dano kama yam oringo olaro iye. En bibedo kunu matwal, nio ka ajwaka madit pa Lubanga ma kiwiro ki moo maleng ikare meno otyeko to woko.26Ento ka ikare meno lanek dano ocito okato woko inge taun madit meno, kama yam oringo iyeni,27ci ka lacul kwor remo pa lato onongo kome owec, kun tye woko inge wang apoki me taun madit meno me laro kome, ce lacul kwor remo pa lato oneko laneki, pe kibikwano alii me remo iwiye.28Pien dano meno myero obed i taun madit meno me laro kom nio wa ikare ma ajwaka madit pa Lubanga bito iye; ento inge to pa ajwaka madit pa Lubanga lanek dano twero dok cen ipacone.29Meno ducu bibedo cik botwu wa ikare pa likwayowu ducu, ikabedo ducu ma wubibedo iye.”30“Kace dano mo oneko dano, ci kibineko lanek woko pi lok pa lucaden; ento pe kibineko dano mo pi lok ma lacaden acel keken otito.31Dok pe wubigamo lim me koko kwo pa lanek dano mo ma bale romo to; kibineke aneka.32Dok pe wugam lim me kok mo pi dano ma oringo olaro taun me laro lunek dano, wek kiyene odwog obed i lobone ma nongo ajwaka madit pa Lubanga peya oto.33Pe wubinyobo lobo ma wubibedo iyeni; pien remo nyobo lobo woko, dok pe tye gin mo matwero kwanyo bal ki i lobo pi remo ma oo iyeni, kono remo pa lanek dano meno keken aye kwanyo.34Pe wubimiyo lobo ma wubedo iye, ma an bene abedo iye i dyewuni, odok keni; pien An a Rwot ma abedo ikin jo Icrael.”Bible Society of Uganda