YOCWA24
Yocwa oroco Gicike ki lwak i Cekem
1Lacen Yocwa dok ocoko kaka pa jo Icrael ducu kacel i Cekem; ci olwongo ludongo ki luwi lwak, lungolkop ki ludito tic ma i Icrael ducu, ci gubino gurye inyim Lubanga.2Ci Yocwa owaco bot lwak ducu ni, “Rwot Lubanga pa Icrael owaco kuman ni, ‘Kwariwu yam con gubedo i lobo ma loka kulu Euprate, ci gubedo ka woro lubanga mogo mukene. Ngat acel ikin gi obedo Tera ma won Abraim ki Nakor.3An yam akwanyo kwarowu Abraim woko ki i lobo ma loka kulu Euprate, ci atelo wiye akelo awok kwede i lobo Kanaan ducu, dok amiyo likwaye gunya mapol. Amiyo bote Icaka,4dok amiyo bot Icaka lutinone Yakobo ki Ecau. Ci amiyo lobo godi me Ceir bot Ecau me bedo mere, ento Yakobo ki lutinone gucito meggi wa i Ejipt.5Ka dok acwalo Moses ki Aron, ci ayelo jo Ejipt ki gemo mapol ki kit gin ducu ma atiyo ikin gi; ka lacen akwanyowu woko ki kunu.6Akwanyo kwariwu woko ki i Ejipt ci wuo wa i dog nam. Jo Ejipt guryemo kor kwariwu ki gadigadi lweny ki aguragura o kwede wa i dog Nam Makwar.7Ka kwariwu gukok bot Rwot Lubanga, ci en oketo mutu ikinwu ki jo Ejipt, ka dok odwoko nam cen ikomgi ci omwonyogi woko ducu. Yam wuneno ki wangwu gin ma atimo ikom jo Ejipt, dok wubedo i tim pi lwak kare malac.8Ka dok akelowu i lobo pa jo Amor ma gubedo loka Jordan tungcel. Ci gulwenyo kwedwu ento amiyogi i cingwu; wumako lobogi wucamo odoko mewu, ci atyekogi woko ki inyimwu.9Inge meno Balak wod pa Jipor, rwot me Moab, otinge olwenyo ikom jo Icrael; ka dok ocwalo kwena olwongo Balaam wod pa Beor ni obin wek ocenwu woko.10Ento an pe awinyo dog Balaam, ma omiyo en dok olamo gum ikomwu; kitmeno alarowu woko ki i cing Balak.11Ikare ma wukato loka Jordan, wubino i Jeriko, ci jo Jeriko gulwenyo ikomwu, kacel ki jo Amor, jo Periji, jo Kanaan, jo Kit, jo Girgac, jo Kiv ki jo Jebuc, ento amiyogi ducu i cingwu.12Ikare meno acoro pino jubi inyimwu pi ryemo luker pa jo Amor aryo ducu woko ki inyimwu; pe wun aye wuloyogi ki pala lucwanwu nyo atumwu.13Ci amiyo botwu lobo mayam pe wutiyo iye gin mo, ki taun madito mayam pe wun aye wugerogi, ci wubedo iye; wutye kacamo nyig olok ki nyig jeituni mayam pe wupitogi.’14Pimeno dong wulwor Rwot Lubanga, dok wutii bote ki lengcwiny ki gen madwong. Wubol lwak lubanga mayam kwariwu gubedo kaworogi i lobo ma loka kulu Euprate ki i lobo Ejipt woko, wek dong wuwor Rwot keken.15Ka pe wumito woro Rwot, ci tin dong wuyer ngat ma wubitiyo bote, ka nyo wubiyero lubanga mayam kwariwu gutiyo botgi i lobo ma loka kulu Euprate, nyo lubanga pa jo Amor ma wubedo i lobogini. Ento an gira ki jo ma i oda ducu wabitiyo bot Rwot.”16Lwak gudok iye ni, “Wan pe wabedo ki tam mo me bwoto Rwot pi tiyo bot lubanga mukene,17pien Rwot Lubangawa aye yam okwanyowa kacel ki kwariwa ki i lobo Ejipt, ki i ot kol me bedo opii. En otiyo lwak lanyut madito kun wan waneno, ogwokowa i yoo ducu ma wawoto iye ki ikom rok ducu ma wakato wawok ki ikin gi ni.18Rwot oryemo rok meno ducu woko ki i nyimwa, gin jo Amor mayam gubedo i loboni, ma omiyo wan wabitiyo bot Rwot, pien en aye Lubangawa.”19Ento Yocwa dok owaco bot lwak ni, “Pe wutwero tiyo bot Rwot Lubanga, pien en Lubanga maleng, en Lubanga ma lanyeko. Pe bitimowu kica ikom tim aranyiwu ki balwu.20Kace wubwoto Rwot kun wutiyo bot lubanga mogo pa lurok, ci en biloke katimowu marac ci tyekowu woko, kadi bed yam kong onongo otimowu maber.”21Ci lwak gugamo dog Yocwa ni, “Pe kumeno; wan giwa wabitiyo bot Rwot.”22Ci Yocwa dok owaco bot lwak ni, “Wun aye wudoko caden ikomwu kekenwu, pien dong wutyeko yero Rwot kun wuwaco ni, wubitiyo bote keken.” Ci lwak gugamo ni, “Wan aye caden giwa.”23Ci Yocwa owaco botgi ni, “Wubol lubanga pa lurok ducu ma gitye ikinwu woko, wek wulok cwinywu odwog ikom Rwot Lubanga pa Icrael.”24Ci lwak guwaco bot Yocwa ni, “Wabitiyo bot Rwot Lubangawa, dok wabiworo doge.”25Kitmeno Yocwa oketo gicike ki lwak inino meno, ci omiyo botgi cik mapol i Cekem inino meno kun nyutu kit ma myero gulub ki cik mapatpat ducu.26Ci Yocwa ocoyo lok magi ducu i buk me cik pa Lubanga; ci okwanyo got madit, ocibo ocung kunu ite yat kworo ma i Kabedo Maleng pa Rwot.27Yocwa dok owaco bot lwak ducu ni, “Nenu, got man aye bibedo caden ikomwa, pien otyeko winyo lok pa Rwot ducu ma en owaco botwa; ma omiyo en bedo lacaden ikomwu wek pe dok wukwer Lubangawu.”28Ka meno otum, ci Yocwa ociko lwak ci guket woko kun ngat acel acel odok i lobo ma oleyoni.To pa Yocwa ki pa Eleajar
29Ki inge lok meno ducu Yocwa wod pa Nun ma latic pa Rwot oto woko ma onongo mwaka me dite oromo miya acel ki apar.30Ci guyiko kome i lobone kikome, i lobo mayam kimiyo bote, i Timnat-cera i lobo godi pa jo pa Epraim, tung kumalo me lobo Gaac.31Jo Icrael gutiyo bot Rwot ikare pa Yocwa ducu ki ikare pa ludongo ducu mayam gudong ka Yocwa dong oto. Gin jo ma onongo gingeyo tic ducu mayam Rwot otiyo pi jo Icrael.32Cogo kom Yucepu ma onongo yam jo Icrael gukelo ki i Ejipt kiyiko i Cekem i dul lobo mayam Yakobo owilo ki bot awobe pa Kamor ma won Cekem. En owilo ki dul lim maromo ryal miya acel. Ci Dul lobonu odoko lobo pa likwayo pa Yucepu matwal.33Ka Eleajar wod pa Aron bene oto, ci kiyiko kome i Gibea, i gang pa wode Finekaci mayam onongo kimiyo bote i taun ma i lobo godi pa jo pa Epraim.Bible Society of Uganda