EJEKIEL40
Kitero Ejekiel i Jerucalem
1Inino dwe apar i acaki me mwaka manyen, inge mwaka pyere aryo wiye abic ma dong warii kwede i opii, i mwaka me apar wiye angwen ma onongo taun madit me Jerucalem dong kituru woko, inino meno kikome teko pa Rwot obino ikoma,2ci otinga woko i ginanyutane, okela i lobo Icrael, ka ociba piny iwi got mabor. Ci aneno lwak gedo mapol inyima ma ginen calo taun madit ma akeme kwede.3Ikare ma dong en okela kunu, ci aneno dano mo manen calo mola, omako tol tworo ki lagada i cinge me pimo piny; en danonu onongo ocung i dog gang.4Ci danonu owaca ni, “Wod pa dano, nen piny maber, dok iwiny lok ki iti, ci iket cwinyi me tamo pi gin ducu ma abinyuti, pien kikeli kany ki tyen lok ni myero anyuti gin meno ducu; ci in dong ituc gin ducu ma inenogini bot jo Icrael.”Dog gang matye tung kunyango
5Gin ma anenoni aye Ot pa Lubanga, ma kirumu woko litit ki cel. Ci laconu dok okwanyo odoo lagadane me pimo piny ma bore romo puti apar, ci opimo cel. Onongo ni bore me dok malo romo puti apar, ki lace nyo dit me kome bene romo puti apar.6Lacen en oa ocito i dog gang matye yo tung kunyango. Ka oito rwom ocito kwede malo, ci opimo dogola ki pinye i ngom, ci oromo puti apar.7Ki ingeye onongo tye yoo ma kikato kwede, onongo tye iye kicika pa lukurpiny maromo adek ingete acel acel. Kicika acel acel bore onongo tye puti apar ki lace bene puti apar, ki cel ma onongo tye ikin gi, lacgi nyo dit komgi onongo romo puti aboro. I nge kicika pa lukurpiny onongo tye iye yoo me wot ma bore romo puti apar, yone onongo cito donyo i kicika madit ma okemo Ot pa Lubanga.8Lacen opimo kicika meno ma okemo Ot pa Lubangani, ci onongo lace romo puti apar wiye aryo.9Cel ma inget dog gang tungi ki tungi onongo romo puti adek, kicika me donyo iye onongo tye cok ki Ot pa Lubanga kikome.10Onongo tye kicika adek tungi ki tungi i dogola matye yo tung kunyango; gin kicika adek meno ducu onongo ditogi romrom, ki cel ma ikin kicika bene onongo ditogi romrom.11Ka dok opimo lac me dog gang ma kidonyo kwedeni, ci oromo puti pyere aryo wiye aryo, ki dong kama twolo i dog gang onongo tye puti apar wiye abicel.12Dong ki inyim kicika pa lukurpiny acel acel onongo tye cel macek ma bore romo incic pyere aryo, ki dit me kome bene onongo romo incic pyere aryo.13Dok opimo lac me dog gang cake ki i kor ot me kicika acel o kwede wa i kor ot me kicika mukene ma okeme ki lawote, ci oromo puti pyere angwen.14Danonu dok opimo kicika me donyo ma kikato kwede idyekal mukene, ci onongo oromo puti pyere adek wiye aryo.15Ci dong bor pa yoo ducu cake ki woko me o i dog gange cito kwede atir wa i kicika me agiki onongo romo puti pyere aboro.16Onongo bene wang dirica madinge tye i kicika acel acel ki i cel ma onongo tye ikin gi. Kicika ma i dogola me donyo bene dirica onongo orumu woko ducu litik. Cel ma ikin kicika bene onongo kigoro iye cal yadi otit.Dyekal ma tung ku woko
17Lacen danonu okwanya okela idyekal matye tung ku woko. Onongo tye iye kunu kicika pyere adek ma orumu dyekal woko; ki inyimgi tye kama kipeto ki gweng maber.18Kama kicano iye gwengi onongo omede orumu dyekal woko. Man onongo bore rom ki bor pa dog gang; en aye dyekal ma woko matye kupiny ma kipeto iye gweng.19Ka dok opimo bor piny me dyekal matye tung ku iye ki inyim dog gang ma kupiny, me dok kwede inge dyekal ma i iye, ci bore oromo puti miya acel ki pyere abicel.Doggang matye tung Kumalo
20Ci lacen danonu otelo nyima ocito kweda tung kumalo, ci nen, onongo tye kunu doggang ma okemo tung kumalo, ma en aye doggang me dyekal ma woko. Ci en opimo bore ki lace.21Ci onongo tye iye kicika adek tungi ki tungi, ki cel ma ikin gi, ki kicika me donyo ma kikato kwede idyekal mukene, gin ducu ditogi romrom ki dito pa mukene ca matye idoggang ma tung kunyango ca. Bor me doggang onongo romo puti pyere aboro ki lace onongo romo puti pyere angwen.22Kicika madit, wang dirica, ki cal yadi otit ma gigorogi ikom kicika onongo girom ki mukene me dog gang ma okemo tung kunyangoni. Kany bene onongo tye iye rwom abiro ma kicito kwede i doggang ki kicika me donyo onongo tye ki tung i iye.23Dogcel ma donyo idyekal ma i iye onongo okemo dogcel matye tung kumalo kit macalo tye kwede tung kunyango. Ci opimo nia ki i dogcel mukene o kwede wa ikom dogcel matye tungcel, oromo puti miya acel ki pyere abicel.Dogcel matye tung kupiny
24Ka dok danonu otela otera wa tung kupiny; ka wao kunu ci waneno dogcel mukene. Ci opimo cel ma inget doggang ki tungi, ki kicika me donyo; ci onongo ditogi rom ki mukenegu.25Kidok onongo tye wang dirica i dogcel man ki i kicika me dogola me donyo, ma girom ki wang dirica mukenegu. Ci bore onongo romo puti pyere aboro, ki lace puti pyere angwen.26Ki bene onongo tye kunu rwom abiro ma kicito kwede i doggang meno, ki kicika me dogola me donyo onongo tye ki tung i iye. Ci onongo bene kigoro cal otit i cel ma inget dogolane; acel tye tungcel ki mukene tye tungcel.27Dok bene onongo tye dogcel mo tung kupiny idyekal ma i iye. Danonu opimo bor piny matye ikin dogcel aryonu ma okemo tung kupiny, ci bore oromo puti miya acel ki pyere abicel.Dyekal ma i iye: Dogcel matye tung Kupiny
28Lacen danonu okela idyekal ma i iye kun wadonyo ki i dogcel matye tung kupiny. Ci opimo dogcel ma tung kupiny, ci onongo ni dite rom ki dito pa dogcel mukenegu ducu.29Kicika ma ingetegu, ki cel ma inget dogolane, ki kicika ma dogola me donyo onongo ditogi romrom ki dito pa kicika mukenegu. Kidok bene onongo tye wang dirica mapol ma orumu ki tung i iye ki i kicika me dogola me donyo; ma bore onongo romo puti pyere aboro, ki lace onongo romo puti pyere angwen.30Dok bene kunu onongo tye iye dogola mapol me donyo ma kirumu woko; borgi onongo romo puti pyere angwen ki lacgi onongo romo puti aboro.31Kicika ma i dogola me donyo onongo okemo dyekal ma woko, ki cal yadi otit onongo gitye ikom cel ma inget dogolane, ki yoone me ito onongo tye ki rwom aboro.Dyekal ma i iye: Dogcel matye tung kunyango
32Ka dok okela idyekal ma i iye kun wawok ki i dogcel matye tung kunyango. Ci en opimo dogcel, ci onongo ni dite rom ki mukenegu ducu.33Kicika ma ingetegu, ki cel ma inget dogolane, ki kicika ma i dogola me donyo onongo ducu rom ki mukenegu. Kidok onongo tye wang dirica mapol ma orumu woko ki tung i iye, ki kicikane ma i dogola me donyo bore onongo romo puti pyere aboro, ki lace onongo romo puti pyere angwen.34Kicika ma i dogola me donyone onongo okemo tung dyekal ma woko. Ki bene onongo cal yadi otit ma kigorogi ikom cel ma nget dogolane ducu, acel tye tungcel ki mukene tungcel ki yoone me ito malo onongo tye ki rwom aboro.Dyekal ma i iye: Dogcel matye tung kumalo
35Dok okela i dogcel matye tung kumalo, ci opimo, onongo dite obedo rom ki dito pa mukenegu.36Kicika ma ngetegu, ki cel ma inget dogolane ki kicika ma i dogola me donyo onongo ditogi ducu rom ki dito pa mukenegu ducu, onongo bene tye iye wang dirica mapol ma orumu woko dyere. Bore onongo romo puti pyere angwen.37Kicika ma i dogola me donyo onongo okemo tung dyekal ma woko. Onongo cal yadi otit tye ma kigoro ikom cel ma inget dogolane ducu, acel tye tungcel, ki mukene tye tungcel ki yoone ma ito kwede malo onongo tye ki rwom aboro.Gedo mapatpat matye cok ki dogcel matye tung kumalo
38I dyekal ma woko onongo tye iye kicika mo ki dogolane ma okube ki kicika me dogola me donyoneni, kama onongo kilwoko iye ringo lee ma kityero me gitum awanga.39Onongo tye meja angwen i kicika me dogola me donyo, aryo tye tungcel ki aryo mukene kicibo tungcel, ma lee me gitum awanga ki gitum me bal ki gitum me tingo alii onongo kingologi iwi meja magi.40Dong tung inge kicika me dogola me donyo kama kidonyo iye i dogcel matye tung kumalo, onongo tye iye meja aryo; ki dok inget kicika ma i dogola me donyo onongo bene tye iye meja aryo.41Pimeno i i kicika onongo tye iye meja angwen, ki tung wokone bene onongo tye iye meja angwen, magi ducu dong ribe doko meja aboro, ma lee ma kityero me gitum awanga ducu kingologi iwigi.42Dok bene onongo tye meja angwen me got ma kipayo apaya ma kitiyo kwedgi pi yubu lee me gitum awanga, ki bene onongo borgi romo incic pyere aryo ki lac wigi onongo romo incic pyere adek itwoke acel acel ducu. Dong jami tic ma kitiyo kwedgi me ngolo lee me gitum awanga onongo kiketo iwigi.43Goli ducu mabocogi rom ki lac cing, onongo kigurugi gurumu i kicika woko ducu. Ringo ma kimito tyerone me gitum kong kiketo iwi meja magi.44Ka dok okwanya ki idyekal ma woko okela idyekal ma i iye, ci aneno onongo tye kunu kicika aryo; acel onongo tye inget dogcel matye tung kumalo, kun okemo tung kupiny, ki acel onongo tye tung dogcel matye tung kupiny, ki mukene okemo tung kumalo.45Ci danonu otita ni kicika ma okemo tung kupinyi meno pa ajwaki ma giloyo tic i Ot pa Lubanga.46Ento kicika ma okemo tung kumaloni meno pa ajwaki ma giloyo tic ikom keno tyer. Ajwaki magi ducu gin Lulevi ma gin aye likwayo pa Jadok; ma gin keken ki ikin likwayo pa Levi aye giyegi me cito inyim Rwot katic bote.Dyekal ma i iye ki Ot pa Lubanga
47Ci danonu opimo dyekal ma i iye, bore onongo romo puti miya acel ki pyere abicel ki itwoke acel acel. Keno tyer onongo tye inyim Ot pa Lubanga kikome.48Lacen otera i i kicika matye i dogola ma kidonyo kwede i Ot pa Lubanga. Ci opimo dogola me donyo; bore obedo puti aboro ki lace puti pyere aryo wiye adek, ki dit me kom cel onongo romo puti abic ryoryo ducu.49Bor pa kicika ma i dogola me donyo, ki lace, onongo romo puti apar wiye abongwen, onongo bene tye rwom apar me ito malo iye. Dok bene onongo wir tye kunu inget dogola me donyo tungi ki tungi.Bible Society of Uganda