EJEKIEL31
Can ma bipoto ikom Parao kacel ki jone
1Inino dwe acel, dwe me adek, i mwaka me apar wiye acel me bedowa i opii, Rwot dok oloko kweda. En owaca ni,2“Wod pa dano, wac bot Parao rwot me Ejipt ki bot lwake ni:In mono kiporo diti ki dit pa anga?3Nen, abipori ki Aciria, en yat cedar me Lebanon,ma jange oluk dok tipune bene calo bunga,ma odongo mabor adada,wiye kikome bor oo wa ikin pol.4Pii onongo tye omiyo yat meno odongo,dok bene obedo kacwiyo pii matye ite ngom.Kibedo ka onyo pii i kabedo kama onongo yat tye kadongo iye,ka gumiyo ora kulugu gumol,piine ocito ite yadi ducu ma i bunga.5En aye ma omiyo yate odongo woko maborma okato yadi ducu ma gidongo i bunga woko;jange odongo maboco dok mapek,pi pii mabup ma onongo tye i pote.6Winyo ducu me polo gigero odigi i jange;ki lee tim ducu ginywalo lutinogi ite tipune,dok rok madito me wi lobo ducu giywe ite tipune.7Onongo nen maber mada i dite,ki i boco me jange ducu;pien lwite odonyo piny i ngom kama pii mabup tye iye.8Yadi cedar ma gudongo i poto pa Lubanga pe kitwero pyem kwede,kadi ki yadi ma gudongo maboco bene pe kitwero poro kwede.Pe tye yadi mo ma komgi pwot ma kiporo ki jange wacel.Pe tye yat mo i poto pa Lubangama onongo nen ber calo eno.9Aketo obedo manen maber,ma jange ojany woko i kabedo ducu.Yadi ma i Eden ducu dong nyeko omakogi woko ikome,gin yadi ma onongo yam gitye i poto pa Lubangani.10Pimeno, An Rwot Lubanga Matwero ducu awaco kuman ni. Kit macalo yat meno odongo mabor, wiye oo wa ikin pol, ka dong ocako wake ki i cwinye pi boreni,11ma omiyo an dong akwero yat meno woko, amiyo woko bot laloc me rok mukene. En bitic ki yat man ikit yo ducu malubu rac kite.12Lurok, ma gin jo mager adada ma gikato rok mukene ducu, gibitongo yat meno gireto woko i ngom ka dong giweko kunu. Jange bipoto iwi godi ki i nota ducu, ci gibitur woko lirum idye kulu ma gimol i lobo ducu. Ma omiyo jo ducu ma gubedo iwi lobo gibia woko ki ite tipune giweko yat meno.13Winyo bene bibino ci gibedo ikom yat ma opotoni, ki lee tim bene gibibedo kawot ki iwi jange ma oturi.14Man ducu bitime wek yadi ducu ma gidongo kanget pii pe gudong maboco tutwal, dok bene pe wigi oo wa ikin pol, wek yat mo ki ikin yadi ducu ma cwiyo pii pe odong maboco calo gin. Gin ducu bito calo dano, ma ka guto ci myero gudony piny i lyel i lobo pa jo ma oto karibe ki jo ma oto matye kunu.”15An Rwot Lubanga Matwero ducu awaco kuman ni, “Inino ma yat meno dong odonyo piny i lobo pa jo ma oto, abimiyo pii matye ite ngom ume ci kumu pire. Abijuku kulu madongo gu woko ducu, miyo ora kulu ducu dong pe bimol kato woko. Pi yat meno abimiyo piny cido woko ikom got Lebanon ci amiyo yadi ducu ma dongo i bunga two woko.16Ikare ma abicwalo en kwede me cito i lobo pa jo ma oto, mor me potone keken bimiyo rok ducu yenge. Yadi ducu me Eden, ki yadi ducu me Lebanon ma gibeco adada, ki yadi ducu ma gicwiyo pii, gibikweyo cwinygi i lobo matye piny.17Gin bene gibicito piny kacel kwede, me bedo ki jo mayam dong kityeko nekogi woko i lwenyi. Eyo, jo ducu ma gitye ikin lurok mayam gibedo ite tipune gibito.18Ci yat ma kiloko ikomeni en aye rwot me Ejipt ki lwake ducu. Kadi bed yadi me Eden onongo pe gitye kitmeno i deyo ki i bocogi, kibikelo in ibedo kacel ki yadi me Eden idonyo i lobo matye piny; ci ibiribe ki jo ma pe kilirogi dok ki jo mayam kinekogi i lweny.” Man an Rwot Lubanga Matwero ducu aye ma awaco.Bible Society of Uganda