阅读NWOYO CIK 4

NWOYO CIK4

Moses ocuku cwiny jo Icrael me bedo luwiny

¹Ci Moses owaco bot jo Icrael ni, “Wuwiny cik ki kop man ma atye ka pwonyowu kwedeni, ci wucobgi, wek wubed makwo, ci wubicito wuo i lobo ma Rwot Lubanga pa kwarowu tye ka miyowu, wek wucam obed mewu.²Pe wumed lok mo ikom cik ma atye kacikowu kwedeni. Pe wukwany lok mo woko ki ikome, dok wugwok cik pa Rwot Lubangawu ma atye kacikowu kwede ducu.³Yam wuneno ki wangwu gin ma Rwot otimo iwi got Baal-peor; pien yam Rwot Lubangawu okwanyo jo ducu ma gulubu jok Baal me Peor ki ikinwu, ci onekogi woko;⁴ento wun jo mayam wuketo genwu ikom Rwot Lubangawu pud wutye makwo ducu wa tin.⁵Nenu, dong atyeko pwonyowu ki cik mapatpat ki gin ma Rwot ongolo, macalo Rwot Lubangana ocika kwede, wek wulubgi i lobo ma wucok donyo iye me camoneni.⁶Wugwokgi, wucobgi, pien meno aye bibedo ryekowu ki ngeyo pinywu inyim rok mukene. Ka gin biwinyo lwak cik magi ducu ci gibiwaco ni, ‘Adada, rok man maditi tye ki ryeko, dok gin lwak ma gingeyo piny.’⁷Pien pe tye rok mukene madit ma lubangagi bedo cok kwedgi macalo Rwot Lubangawa bedo cok kwedwa ikare ducu ma wakok bote.⁸Dok pe tye rok madit mo matye ki lwak cik ki kop ma kingolo atir marom ki cik man ma tin aketo i nyimwuni.

⁹Ento myero wunen maber ni wugwoke kenwu ki cwinywu ducu, wek wiwu pe owil ikom gin ma wuneno ki wangwu, wek pire pe oa woko ki i cwinywu ikare me kwowu ducu. Wutit bot lutinowu ki likwayowu wek gunge¹⁰kit mayam wucung kwede inyim Rwot Lubangawu i Koreb, ci inino meno Rwot owaco bota ni, ‘Cok lwak kacel bota, wek amii guwiny loka, gupwony lworo an pi kare ducu ma gibedo kwede iwi loboni, dok gin bene gupwony ki lutinogi.’¹¹Ci yam wubino cok, ci wucung ite got ma onongo got tye ka wang ki mac ma olic wa i polo, i dye colpiny ki pol ma ocido licuc.¹²Ci Rwot yam oloko kwedwu ki i dye mac. Yam wuwinyo dwon ngat maloko, ento pe wuneno kom gin mo; wuwinyo dwon keken.¹³En yam otito botwu pi gicikene ma en ocikowu ni wucobi, en aye Cik apar ma en ocoyogi i kidi aryo ma apada.¹⁴Ikare meno Rwot ocika ni apwonywu ki cik ducu ki gin ma en ongolo ducu, wek wulubgi i lobo ma wubicito loka ca ka camoneni.”

Cik ma gengo woro cal

¹⁵Ci Moses owaco ki jo Icrael ni, “Ikare mayam Rwot oloko kwedwu i Koreb ki i dye mac ca, pe wuneno kom mo;¹⁶pimeno wugwoke wek pe wubal pi payo cal mo pirwu kenwu, kadi cal kom gin mo keken maporo laco nyo dako,¹⁷nyo maporo lee mo matye iwi lobo, nyo winyo mo ma tuk ki bwome,¹⁸nyo gin mo ma lak alaka i ngom, nyo rec mo keken.¹⁹Dok wugwoke wek ka wuilo wangwu malo i polo; ka wuneno ceng ki dwe ki lwak lakalatwe ma i polo, ci cwinywu pe oterwu karyebe piny inyimgi ka worogi. Rwot Lubangawu omiyo magi bot rok ducu ma iwi lobo.²⁰Ento yam Rwot olarowu woko ki i lobo Ejipt, ki i rukmac ca ma otwak, wek wubed jone kikome macalo ikare man.²¹Dok bene yam kiniga omako Rwot ikoma pirwu, ci okwongo kwong ni an pe abingolo kulu Jordan, dok bene pe abidonyo i lobo maber ma Rwot Lubangawu tye kamiyowu me aleyawu.²²En bene owaco ni an abito woko ki i lobo man, dok pe abimedo kingolo loka Jordan; ento wun aye wubingolo wukato loka ca pi camo lobo ca maber tutwali.²³Wugwoke wek wiwu pe owil ikom gicike pa Rwot Lubangawu mayam en ocike kwedwu wek pe wutii cal apaya mo maporo kom gin mo mayam Rwot Lubangawu okwero ni pe wutii.²⁴Pien Rwot Lubangawu en mac ma wango piny woko liweng, en Lubanga ma lanyeko

²⁵Ka dong wunywalo lutino ki likwayo, ma dong wudike i lobo ca, kace wupoto ibal kekenwu pi tiyo cal apaya maporo kom gin mo keken, ka wutimo gin manen marac iwang Rwot Lubangawu, ci wubimiyo kiniga make ikomwu.²⁶Tin dong alwongo polo ki lobo gubed caden botwu ikom lok man ni, ka pe wulubu lok man wubito wutum woko oyotoyot ki i lobo ma dong wucok ngolo Jordan ka camone; dok pe wubirii iye kare malac, ento gibityekowu woko liweng.²⁷Dok Rwot biketowu woko ata ikin rok mapatpat, ci wubidong ma welwu nok tutwal i dye lurok kama Rwot biryemowu wucito iye.²⁸Ki i rok kunu wubiworo iye lwak lubanga mapol ma kipayo calgi ki ikom bao nyo ki ikom got ma kitiyo ki cing dano, ma pe gineno piny, dok bene pe giwinyo lok, pe gicamo, dok bene pe gingweyo piny.²⁹Ento ki i lobo kunu en aye wubicako lega iye bot Rwot Lubangawu ci en biwinyowu, ka wulego bote ki cwinywu ducu.³⁰Ka piny oloyowu, ma dong gin meno ducu opoto ikomwu ikare me lacen, ci wubiloke wudwogo cen bot Rwot Lubangawu, ci wubiworo doge.³¹Pien Rwot Lubangawu en Lubanga ma lakica: pe bitenyowu ata, pe bityekowu woko, wiye pe biwil ikom gicike mayam ocike bot kwarowu, mayam okwongo pire botgi.

³²Kong wupeny pi gin mayam otime con ca, mayam okwongo nyimwu cake ikom nino mayam Lubanga ocweyo iye dano iwi lobo. Kong wupeny kite nia ikin piny ducu, ka yam nyo gin madit macalo man kong otiine, nyo yam kong ki winyo pire kamo.³³Yam kong tye rok mo ma guwinyo dwon lubanga mo maloko kun a ki i dye mac, kit mayam wun wuwinyo, ci pud gubedo makwo?³⁴Nyo yam kong lubanga mo otemo cito kakwanyo rok mo me bedo pire kene ki ikin rok mukene marom ki gin ducu mayam Rwot Lubangawu otimo pirwu i lobo Ejipt kun wuneno ki wangwu? Rwot onyutu twerone i yo mapol, ki lanyut ki tango madongo; dok bene otiyo gin makelo lworo madwong.³⁵Yam kinyutu botwu wek wunge ni Rwot aye Lubanga; pe tye Lubanga mo mukene doki.³⁶Oweko wuwinyo dwone ma a ki i polo pi tiro kitwu; dok onyutu botwu mace madit iwi lobo, ka dok wuwinyo dwone ki i dye mac.³⁷En yam omaro kwariwu, omiyo en oyerowu, ci okwanyowu woko ki i Ejipt pi teke madwong ma en kikome tye kwedwu.³⁸En oryemo rok madito ki matego makatowu ki inyimwu pi kelowu i lobogi, wek omii lobogi botwu wek wucam obed mewu macalo ikare man.³⁹Myero dong wunge tin, dok wuket icwinywu ni, Rwot aye Lubanga matye malo i polo ki piny iwi lobo; pe tye mo mukene.⁴⁰Pimeno wumak cike ki gin ma ociko ducu ma tin acikowu kwede, wek nyimwu obed leng, ki nyim lutinowu ma bilubuwu bene obed leng, wek wurii pi kare malac i lobo ma Rwot Lubangawu tye ka miyowu matwal.”

Taun me laro luneko matye tung kunyango me Jordan

⁴¹Ikare meno Moses opoko taun adek pat tung kunyango me Jordan,⁴²wek lunek dano ma nongo pe guneko luwotgi akaka, kun nongo mone mo pe ikin gi guring iye gular komgi wek pe kinekgi ka guo i taun magi.⁴³Bejer ma i tim ma obedo cerecere pi jo pa Reuben, Ramot i Gilead pi jo pa Gad ki Golan i Bacan pi jo pa Manace.

Acaki miyo cik pa Lubanga

⁴⁴Man aye cik mayam Moses omiyo bot jo Icrael;⁴⁵gin aye lok me caden ducu, ki cik ki gin ma kingolo ducu mayam Moses oloko bot jo Icrael ikare ma dong gua woko ki i Ejipt.⁴⁶En oloko botgi ki i loka Jordan, i nota ma okemo Bet-peor, i lobo pa Cikon rwot pa jo Amor mayam bedo i Kecbon, mayam Moses ki jo Icrael guloyo ka dong gua woko ki i Ejipt.⁴⁷Gucamo lobone ki lobo pa Og rwot me Becan, gin luker aryo pa jo Amor mayam gubedo loka Jordan tung kunyango.⁴⁸Wang lobone ocake ki i Aroer ma i dog nota me Arnon ocito kwede wa i got Cirion, ma en aye Kermon,⁴⁹kacel ki Araba ducu ma i tung kunyango me Jordan o kwede wa i nam me Araba ma i pwor got me Piciga.

Bible Society of Uganda

https://app.library.bible/content/1618808970a5a3ca