DANIEL12
Kare me agiki
1Lamalaikanu owaco ni, “Ikare meno Mikael bibino, ma en rwot madit maloyo rokwu. Dok kare me can bibedo tye, kit can malit adada ma peya onen nicake wa ikare ma rok ocake kwede nio kwede wa ikare meno. Ikare meno aye kibilaro iye rokwu, jo ma kibinongo yam kicoyo nyinggi i buk pa Lubanga.2Dok jo mapol ikom jo mayam dong guto woko gibikwo dok aye, jo mukene gibidonyo i kwo ma bedo nakanaka, ento jo mukene gibinongo meggi lewic ki cac ma bedo nakanaka.3Jo maryek biryeny macalo pete me polo; ki jo ma giloko jo mapol dwogo ikit ma atir, gibidoko calo lakalatwe maryeny matwal.4Ento in Daniel, um buk woko, ci imwon doge woko, nio wa ikare me agiki. Jo mapol gibibedo karingo tungi ki tungi, ki ngec bene bimede.”5Cutcut ki inge meno an Daniel aneno piny, ci aneno jo mukene aryo gucung i dog kulu, ngat acel ocung i dog kulu tungcel ki acel tungcel.6Ci ngat acel ikin gi owaco bot lamalaika ma onongo oruku bongo camanini, matye malo iwi pii ma i kuluni ni, “Man bitero kare marom mene nio ka agiki me ginaura magi bio?”7Ci lamalaika ma onongo oruku bongo camaninini ma obedo malo iwi pii ma i kuluni, otingo cinge aryo ducu okemo polo; ci awinyo en ka kwongo kwong ki nying ngat ma bedo matwali ni, “Gin meno bibedo pi mwaka adek ki nucu. Ka dong ineno nino me libo jo maleng otum ci jami magi ducu bene bitime cobe kakare.”8Awinyo, ento onongo pe aniang. Ma omiyo awaco ni, “Ai rwoda, agiki me jami magi bibedo ningning?”9Ci en odok iye ni, “In icit meri citoni Daniel, pien pud kiumu loke, dok kimwono woko kuru kare me agiki.10Jo mapol gibilonye, gibiloke gidoko maleng, kun bene kilonyogi odoco; ento jo maracu gibibedo meggi katimo gin maracu. Pe tye ngat mo ikin lutim maracu ma biniang iye; ento jo maryek aye biniang iye.11Cake ikare ma kikwanyo iye gitum awanga me nino ducu ca, kun dong kiketo gin me kwer malik, bibedo nino alip acel ki miya aryo ki pyere abongwen.12Jo ma gibigwoke i niyegi nio ka nino alip acel ki miya adek ki pyere adek wiye abic oromo bibedo tye ki gum.13Dong in Daniel bed lagen nio wa i agiki. In ibito, ento lacen ibicer pi nongo mot ma meri ikare me agiki.”Bible Society of Uganda