2 TEKWARO28
Rwot Akaj me Juda
1Akaj ocamo ker ma mwaka me dite tye pyere aryo, ci obedo kaloc i Jerucalem pi mwaka apar wiye abicel. Pe obedo katiyo gin manen atir iwang Rwot Lubangane, kit ma kwarone Daudi yam otiyoni,2ento obedo kalubu kit pa luker me Icrael. En otiyo cal aliya pi jok Baal.3Obedo kawango odok eceta i nota pa wod pa Kinom, ki bene owango wode me gityer, kun en lubu kwede kit tim me kwer pa rok ducu ma Rwot yam oryemogi woko ki inyim jo Icrael.4Akaj obedo katyero gitum ki wango odok eceta iwang jogi ma iwi godi mabocone ducu ki iwi cere ki iwang ayweya ma ite yadi ma potgi oluk.5Pieno Rwot Lubangane omiyo en woko i cing rwot me Ciria, ma oloyo en ci oyako jo mapol ki ikin lwake oterogi woko wa i Damaciko. Dok kimiye i cing rwot me Icrael, ma oloyo en kun oneko lwak jone madwong adada.6Pien Peka wod pa Remalia obino ikomgi ci oneko jo alip miya ki pyere aryo i Juda inino acel, gin ducu gubedo twoni oita lwenye matego, pien onongo dong gutyeko bwoto Rwot Lubanga woko, ma en Lubanga pa kwarigi.7Ka Jikri twon oteka me Epraim, oneko Maaceya wod pa rwot Akaj, ki Ajrikam ma ladit maloyo i gangkal, ki Elkana ma en aye lawang rwot.8Jo Icrael guyako jo alip miya aryo ki ikin utmegigi, mon, awobe, ki anyira; dok guyako jamigi mapol ci gutero i Camaria.9Ento lanebi pa Rwot mo onongo ceng tye kunu, ma nyinge Oded; en ocito karwate ki mony ma onongo ocito i Camaria, ci owaco botgi ni, “Nenu, nene kiniga omako Rwot Lubanga pa kwariwu ikom jo Juda ci omiyogi i cingwu, ento wun wunekogi ki akemo madwong mada ma pire owinye wa i polo.10Kombedi tamwu tye karido wi lwak ma a i Juda ki Jerucalem, co ki mon, wek gubed opiiwu. Pe wun bene ongeyo ni wutye ki bal ma wutimo inyim Rwot Lubangawu?11Dong wuwiny loka, ci wucwal jo ma wukwanyogini wek gudok cen; pien gin utmegiwu, wudwokgi kama wukwanyogi ki iyeni, pien akemo pa Rwot tye ikomwu madwong.”12Ludito mukene me Epraim, ma gin aye Ajaria wod pa Yokanan, Berekia wod pa Mecilemot, Lekijikia wod pa Calum, ki Amaca wod pa Kadlai, gucung gujuku jo ma gua i mony,13kun giwaco ni, “Pe wubikelo jo ma kiyakogi wa botwa kany, pien tamwu tye me tingo alii mukene ki bot Rwot ka dok wamedo ikom balwa ki alii ma dong watyeko tingoneni! Pe aliiwa dong tye dwong, dok bene akemo pa Rwot tye magwar ikom wa jo Icrael.”14Kitmeno jo ma gin lumonyi guweko dano ki jami ducu ma guyakogi inyim lutela ki inyim lwak mucoke ducu.15Jo ma kicoyo nyinggi maloni gua gutero dano ma kiyakogini, kacel ki jami, ci guruku jo ducu ma ikin gi ma gitye nono nyo munero ki bongi ma lumony onongo guyako. Gurukugi ki bongi, ka kimiyogi war tyen wa ki cam bene ki gin amatagu, dok guwiro komgi ki moo. Ka lacen gutingo jo magoro ikin gi ki kana, guterogi wa bot lutugi jo Juda ma gibedo cok Jeriko, i taun madito me otit, ka gucako gudok cen wa i Camaria.16Ikare meno rwot Akaj ocwalo kwena bot rwot me Aciria kun lego kony ki bote;17pien onongo jo Edom gumonyo jo Juda ci guloyogi bene, guyako jo mogo ki ikin gi, guterogi woko i opii.18Jo Piliciti bene gumonyo taun ma i Cepela ki Negeb me Juda, Bet-cemec, Aijalon, Gederot, Coko ki taun madito ki matino ma ingete ducu, Timna ki gangi matino ma ingete ducu, Gimjo ki gangi matino ma ingete ducu; ci gubedo iye.19Ci Rwot oketo pwod ikom Juda pi rwot Akaj me Juda, pien en obedo katimo tim mogo me kwer i Juda, pien obedo kacayo dog Rwot Lubangane.20Pimeno omiyo Tiglat-pilecer rwot me Aciria ma ka konyo en obino kalweny ikome, ci otime malit ma omiye tek bedo.21Ci Akaj okwanyo jami ma i Ot pa Rwot Lubangane ki ma i ode ki ma i ot pa lutelane, ci oculu ki mucoro bot rwot me Aciria; ento en pe omedo ki nongo iye kit kony mo wa acel.22Ikare ma dong can odiye adada rwot Akaj aceli omede ameda ki cayo dog Rwot Lubangane.23En otyero gitum bot lwak lubangagu pa jo Damaciko ma onongo guloye, kun waco ni, “Pien lwak lubangagu pa luker me Ciria okonyogi, an abityero gitum botgi wek gukonya bene.” Ento man okelo can madit ikome ki ikom jo Juda ducu.24Ci Akaj ocoko jami ducu ma kitiyo kwede i Ot pa Rwot Lubanga ocako ngido woko matinotino gin jami magi ma onongo kitiyo kwedgi i Ot pa Lubanga, ka dok oloro dogola me Ot pa Rwot woko; cut otiyo keno tyer mapol pire kene ma oromo i Jerucalem woko ducu.25I taun madito acel acel ducu ma i Juda en oketo iye wang jogi kama kiwango iye odok eceta bot lwak lubanga mukenegu, ma omiyo kiniga omako Rwot Lubanga pa kwarine.26Lok kom Akaj mudonge ducu, ki kite ducu, nia i acakine nio i agikine, gityeko coyone i Buk pa Luker me Juda ki me Icrael.27Akaj oto, ci en oywe kacel ki kwarine, ci kiyiko en i gange ma i Jerucalem, pien pe gutere kayiko i lyel pa luker me Juda. Ci wode Kejekia aye oleyo katyene.Bible Society of Uganda