لوقا6
1ئِجّن ن نْهَار ن سّبْث ن لْعِبَادَا، يعْذُو عِيْسَى ذݣ وبْرِيذ ذِي ڒْوسْط ن يمنْدِي اَكِذس يمحْضَارن نّس. بْذَان يمحْضَارن نّس تكّْسن ثِيْذرِين، تْقشَّارن-ثنْت س يفَاسّن نْسن، تتّن-ثنْت.2نَّان-اَسن ڒبْعَاض زِي ڒْحِزب ن يفَرِّسِيْين: "مَايمِّي تݣّم مِين يدْجَان حْرَام ذِي نْهَار ن لْعِبَادَا؟"3ئِنْدق-د عِيْسَى ينَّا-ٱسن: "مَا وَار ثغْرِيم شَا مِين يݣَّا دَاود وَامِي تُوْغَا يدْجُوْز نتَّا ذ يِنِّي اَكِذس؟4يُوْذف غَار ثمْزِيذَا ن أَربِّـي، يُوْفَا ذِنِّي اَغْرُوْم نّي إِي يدْجَان ذ صّذْقث يشَّا نتَّا يُوْشَا-اَسن إِ يِنِّي اَكِذس؛ وَاخَّا مَانَاينِّي وَار يدْجِي شَا حَلَال غِير إِ ڒْفُقَهَا وَاهَا."5ينَّا-ٱسن عِيْسَى: "مِّيس ن بْنَاذم إِݣ يدْجَان ذ لْحَاكم حتَّا خ نْهَار ن سّبْث ن لْعِبَادَا."6يجّن ن نْهَار ن سّبْث ن لْعِبَادَا نّغْنِي، يُوْذف عِيْسَى غَار يِجّن ن ثمْزِيذَا ن أَيث-إِسْرَائِيل يبْذَا يسڒْمَاذ. ذِنِّي يجّن ن ورْيَاز فُوْس نّس اَفُوْسِي يمُّوْث.7ئِمْسڒْمَاذن ن شَّرِيعَا ذ ڒْحِزب ن يفَرِّسِيْين تْلَاحَاضن خَاس مَا ٱث يسْݣنْفَا مَا لَّا ذِي نْهَار ن لْعِبَادَا حمَا اَث تَاهْمن.8عِيْسَى يسّن مِين غَارْسن ذِي ڒَعْقُوْڒَاث نْسن، ينَّا-ٱس إِ ورْيَاز نِّي إِي غَار يدْجَا فُوْس يمُّوث: "كَّر بدّ ذِي ڒْوسْط." أَرْيَاز نِّي يكَّر يبدّ ذِنِّي.9ينَّا-ٱسن عِيْسَى: "أَكنِّيو سّقْسِيغ: ذِي نْهَار ن لْعِبَادَا مَا حَلَال أَ نݣّ ڒْخِير نِغ أَ نݣّ شَّرّْ؟ أَ نْسنْجم نّفْس نِغ اَث نْنغ؟"10ئِخْزَر غَارْسن مَارَّا ئِج-يج، ينَّا-ٱس إِ ورْيَاز نِّي: "سَرّح فُوْس نّش!" ئِسَرّح-يث أُوْشَا يذْوڒ وفُوْس نّس يݣنْفَا.11نِثْنِي مِين ݣِّين؟ غضْبن اَطَّاس مْشَاوَارن جَارَاسن مِين غَا ݣّن إِ عِيْسَى.12ذݣ وُوْسَّان نِّي، ئِݣَعّذ عِيْسَى غَار وذْرَار اَذ يࢲَّادْج يقِّيم ذِنِّي دْجِيڒث ثكْمَاڒ يتْࢲَادْجَا إِ أَربِّـي.13وَامِي يصْبَح ڒْحَاڒ، ئِڒَاغَا-د خ يمحْضَارن نّس يخْضَر ثنْعَاش زَّايْسن يݣِّي-ثن ذ اَرُّسُل.14ذِنِّي سِمْعَان، ئِسمَّا-ث بُطْرُس، ذ وُوْمَاس أَنْدْرُوْس، ذ يَعْقُوْب، ذ يُوْحَنَّا، ذ فِيلِيپَّـاس، ذ بَارْتُوْلُوْمَاي،15ذ مَتَّى، ذ تُوْمَا، ذ يَعْقُوْب مِّيس ن حَلْفَى، ذ سِمْعَان ؤُمِي قَّارن <لْمُنَاضِل>،16ذ يَهُوْذَا مِّيس ن يَعْقُوْب، ذ يَهُوْذَا إِسْخَرِيُوْطِي يعْنِي ونِّي يزّنْزن عِيْسَى.17ئِهْوَا-د عِيْسَى يبدّ ذݣ يِجّن ن ومْشَان ذ ڒوْضَا. ذِنِّي اَطَّاس ن يمحْضَارن نّس ذ وَاطَّاس ن يِوْذَان زِي ثْمُوْرْث ن يَهُوْذِيَا ثكْمَاڒ، زِي لْقُدْس، عَاوذ زِي صُوْر ذ صَيْدَا إِݣ يدْجَان خ وغزْذِيس ن ڒبْحَر.18ؤُسِين-د غَارس حمَا اَذ سْڒَان إِ وَاوَاڒ نّس، عَاوذ حمَا اَثن يسْݣنْفَا زِي ڒهْڒَاشَاث نْسن. يِنِّي يتْعدَّابن س جْنُوْن ذ يعفَّانن ؤُڒَا ذ نِثْنِي تْݣنْفَان.19خْسن مَارَّا ڒْغَاشِي نِّي اَث حَاذَان مِينْزِي يجّن ن جّْهذ يتفّغ-د زَّايس، ئِسْݣنْفَا-ثن مَارَّا إِذْسن.20ئِيْسِي ثِيطَّاوِين نّس عِيْسَى غَار يمحْضَارن نّس ينَّا-ٱسن:"سَّعْذ نْوم آ ڒْمُسَاكِين،أَقَا ڒْمُلْك ن أَربِّـي إِ كنِّيو.21سَّعْذ نْوم آ يِنِّي يدْجُوْزن،أَقَا اَذ تجَّاوْنم.سَّعْذ نْوم آ يِنِّي يتْرُوْن،أَقَا اَذ تْضحْشم.22سَّعْذ نْوم مڒَا تْعِيفَّان-كنِّيو يِوْذَان،وَار كنِّيو قبْڒن سَّاوَاڒن ذَايْوم س ڒْعِيب،تْزَوَرن-كنِّيو عْلَاحْسَاب مِّيس ن بْنَاذم.23ذِي نْهَار نِّي فَرْحم نݣْزم س ڒفْرَاحْث ڒَاحقَّاش اَغَارْوم يِيڒِي يجّن ن لْأَجَار ذ اَمقّْرَان ذݣ وجنَّا مِينْزِي اَمُّو إِي يݣِّين ڒجْذُوْذ نْسن إِ لْأَنْبِيَا.24وَلَكِن، يَا ڒفْضِيحث نْوم آ تْوَاجَر،مِينْزِي ثْعِيشم مِين ثْعِيشم.25يَا ڒفْضِيحث نْوم آ يِنِّي يجِّيوْنن ڒخُّو،مِينْزِي اَكنِّيو يڒْقف جُّوْع.يَا ڒفْضِيحث نْوم آ يِنِّي يضحْشن ڒخُّو،مِينْزِي اَذ تْخِيّْقم اَذ تْرُوْم.26يَا ڒفْضِيحث نْوم مڒَا تْشكَّرن-كنِّيو يِوْذَان مِينْزِي اَمُّو إِي يݣِّين ڒجْذُوْذ نْسن إِ يِنَّي يتَارَّان يخف نْسن ذ لْأَنْبِيَا.27أَذَاوم ينِيغ آ يِنِّي يتْسْڒَان: خْسث ڒْعَذْيَان نْوم، ݣّث ڒْخِير ذݣ يِنِّي كنِّيو يتْعِيفَّان.28بَرْكث ونِّي إِي كنِّيو ينعْڒن، تَّارث إِ أَربِّـي خ يِنِّي كنِّيو يتْعدَّابن.29ونِّي ش غَا يُوْوْثَان غَار ومݣِّيز نّش، ؤُش-اَس شك ؤُڒَا ذ اَمݣِّيز نّش نّغْنِي. ونِّي ذَاش غَا ييْسِين اَزدْجَاب نّش، اجّ-يث شك اَذَاش ييْسِي ؤُڒَا ذ ثَقْمِيجَات نّش.30ونِّي ذَاش غَا يتَّارن شَان ثْمسْڒَايْث، ؤُش-اَس-ت. ونِّي ذَاش غَا يكّْسن ثِمسْڒَايِين نّش، وَار ث تتَّار شَا اَذَاش ثنْت يَارّ.31مَامّش تخْسم اَذَاوم ݣّن يِوذَان، ؤُڒَا ذ كنِّيو ݣّم-اَسن اَمنِّي.32مڒَا كنِّيو تخْسم غِير يِنِّي إِي كنِّيو يتخْسن، مَان لْأَجَار إِي غَارْوم؟ إِيوَا ؤُڒَا ذ يِنِّي يعصَّان تخْسن يِنِّي ثن يتخْسن.33مڒَا تݣّم ڒْخِير غِير ذݣ يِنِّي إِي ذَايْوم يتݣّن ڒْخِير، مَان لْأَجَار إِي غَارْوم؟ ؤُڒَا ذ يِنِّي يعصَّان تݣّن مَانَايَا.34مڒَا ثرْضْڒم إِ يِنِّي ثسّْنم اَذَاوم د اَرّن، مَان لْأَجَار إِي غَارْوم؟ ؤُڒَا ذ يِنِّي يعصَّان رطّْڒن إِ يِنِّي يعصَّان حمَا اَذ د اَرّن اَمَرْوَاس نْسن.35وَلَكِن خْسث ڒْعَذْيَان نْوم، ݣّث ذَايْسن ڒْخِير. رضْڒث وَار تْرَاجَاث وَالُو. أُوْشَا اَغَارْوم يِيڒِي لْأَجَار ذ اَمقّْرَان، أَذ تِيڒِيم ذ ثَارْوَا ن أَربِّـي يُوْعْڒَان. مِينْزِي نتَّا ذ اَصبْحَان اَك يِنِّي وَار ث يتْشكَّرن شَا ذ يِنِّي يتݣّن شَّرّْ.36رحْمث يوْذَان مَامْش يرحّم بَابَاثْوم.37وَار تْعيَّابم حَدّ حمَا وَار كنِّيو يتْعيِّيب شَا أَربِّـي. وَار تْزَاوَاڒم حَدّ حمَا وَار كنِّيو يتْزَاوَاڒ شَا أَربِّـي. سمْحم إِ يِوْذَان، أَذَاوم يغْفَر أَربِّـي.38ؤُشم-اَسن إِ يِوْذَان، أَتَاف اَذَاوم يمُّوْش. أَذَاوم يمُّوْش ڒَعْبَر ذ اَصبْحَان ذݣ وَاحْسِي ن وزدْجَاب نْوم، أَث سْهزّن اَث ذكّْنن حتَّا اَذ ينْفيّض. ڒَعْبَر إِي ثْسخْذَامم ذ ونِّي إِي كِذْوم غَا يسخْذم أَربِّـي."39ئِسِّيوڒ اَكِذْسن عَاوذ عِيْسَى س يِجّن ن ڒْمَعْنَا ينَّا-ٱسن: "أَضَرْغَاڒ، مَا ٱذ يجَرّ اَضَرْغَاڒ؟ مَا وَار وطِّين شَا س ثْنَاين إِذْسن ذِي شَان ثسْرَافْث؟40أَمحْضَار وَار يدْجِي شَا ذ اَمقّْرَان خ لْمُعَلِّم نّس. وَلَكِن مْكُڒ اَمحْضَار إِݣ يكمّْڒن ثْغُوْرِي نّس يتِيڒِي اَمشْنَاو لْمُعَلِّم نّس.41مَايمِّي تْسحْقَارذ شْوَايْت ن وڒُوْم إِݣ يدْجَان ذِي ثِيطّ ن وُوْمَاش، شك تتُّوْذ اَكشُّوْض إِݣ يدْجَان ذِي ثِيطّ نّش؟42مَامّش تݣّذ ثْزعّْمذ اَذ تِينِيذ إِ وُوْمَاش: آي ؤُمَا، اجّ-اَيِي اَذَاش د كّْسغ ڒُوْم-أَ إِݣ يدْجَان ذِي ثِيطّ نّش، شك عَاذ تجِّيذ اَكشُّوْض ذِي ثِيطّ نّش؟ آ لْمُنَافِق، كّس ذ اَمزْوَارُو اَكشُّوْض نِّي زِي ثِيطّ نّش. عَاذ إِي غَا ثتْوَاڒِيذ مْلِيح حمَا اَذ تكّْسذ ڒُوْم إِݣ يدْجَان ذِي ثِيطّ ن وُوْمَاش!43وَار ثدْجِي ثْشجَّارْث ثَصبْحَانْت تَارو مِين يدْجَان ذ اَعفَّان. وَار ثدْجِي عَاوذ ثَشجَّارْث ثَعفَّانْت تَارو مِين يدْجَان ذ اَصبْحَان.44مِينْزِي كُڒ ثَشجَّارْث ثْظهَّار-د س مِين تَارو. وَار د ڒقْذن بُو ثَازَارْث زݣ يسنَّانن. وَار د تكّْسن بُو وضِيڒ زِي ثْزݣّْوَارْث.45بْنَاذم اَصبْحَان يسُوْفُوْغ-د مِين يدْجَان ذ اَصبْحَان زِي ڒْكنْز اَصبْحَان ن وُوْڒ نّس. بْنَاذم اَعفَّان يسُوْفُوْغ-د مِين يدْجَان ذ اَعفَّان زِي ڒْكنْز اَعفَّان ن وُوْڒ نّس. ڒَاحقَّاش اَقمُّوْم ن بْنَاذم يسَّاوَاڒ مِين يدْجَان ذݣ وُوْڒ نّس.46مَايمِّي ذَايِي ثقَّارم آ سِيذِي، آ سِيذِي أُو كنِّيو وَار تݣّم مِين ذَاوم قَّارغ؟47مَارَّا ونِّي غَارِي د يتَاسن يتسْڒَا إِ وَاوَاڒ ينُو يخدّم زَّايس اَتَاف اَذَاوم ينِيغ مِينْدِي يتْشَابَّاه.48ئِتْشَابَّاه ذݣ يِجّن ن ورْيَاز إِݣ يبنَّان ثَدَّارْث نّس، ئِغْزَا اَطَّاس يݣَّا دْسَاس خ وزْرُو. وَامِي د يحْمڒ يغْزَار يعْذُو خ ثدَّارْث نِّي، وَار يزمَّر اَت يسنْهزّ مِينْزِي ثبْنَا مْلِيح.49ونِّي يتسْڒَان إِ وَاوَاڒ ينُو وَار زَّايس يخدّم شَا اَتَاف يتْشَابَّاه ذݣ يِجّن ن ورْيَاز يبْنَا ثَدَّارْث نّس خ وشَاڒ بْڒَا دْسَاس. وَامِي خَاس يعْذُو يغْزَار نِّي ثوْضَا ذغْيَا ذ اَبْرِيذ، ثقِّيم ذ ڒْخِرْبث."
Wycliffe Bible Translators, Inc.