Matthew14
1Cipau tingdau ge, Galilee cuikui reu kedibe Herod Jisu ha siulu.2Pa pe kangga kedime dage rangdi, “Aipaude Duipumketeibe John da; pa ketsai gade ringcuh dida. Ciziemne bata kengkieng aidungde peda heta teibam.”3Kedanemene Herod John de tuilu, eh pecu kanglu delwe hebaangki gage pecu kaidi, pe caihereibe Philip nau Herodias ziemne.4Kedanemene ting kage John pe dage, “Cipau puide de n nau kera n ziemne hezai ma,” de eh rangbam kedine. 5Herod pecu teitsetdi neudi, dede pa minadungde hingdi, kedanemene penui pecu caihakecime gelie la kecune.6Dede Herod de kemna tingba kegwangdau, Herodias napui hemaabe dwa de helim lim nah Herod suiyi teilu.7Ciziemne, pa kie kegai keheibe pa pecu peu zielie letpet eh sampet beudi.8Pecai pe pui ne rangkebeu nzwa, pa rangdi, “Duipumketeibe John peu hekwak gage kailwe aika acu peulo.”9Hegwangpei pesui sia sütdi, dede pe sampet kedide ziemne nah pecu ngngwa matyei kebamme ziemne, pe sui tei beu lulo pa aja kai beudi.10Pa reugwame ge de langgai eh hebaangki gade John peu dangdi.11Ge pe peu hekwak gage kailwe pwagwang releipui de peu beu, nah pa cide pepui de pwagwang beudi.12Ge John caisuime gwang pe paau pwa tetdi, delwe cide kungdi. Aipau cai, penui mie delwe Jisu dage ranglia.13Jisu aide siu luge, pa liem gade cikade tetpwa mina lungh kemak heni ga pekatei miedi. Maadibe cide siu luge, penui namdidung gade pile tet gwang pecai suidi.14Ge Jisu gwang eh maadibe de ngaulu. Pa penuide ngaunggiadi nah teeinei kelame de teingkeibeu.15Tinghegi gwang kezeu dau, ledeukelumedung pe da gwang eh ranggai, “Aide au mina lungh kemak heni ge nah peting de riham dida. Cine maadidung de langgi dilo, iciu eh penui renam ga mie penui ziemne taktyei lui kerane.”16Dede Jisu penui dade rangdi, “Penui tetdi mede yi. Nnui penuide matyei kera ma pwapeu lulo.”17Penui pe dage rangdi, “Anui aika magede gah da tangku kwakmengei nah heka pumna rünne gwale.”18Pa rangdi, “Cidungde aika acu teugwang beulo.”19Ge Jisu maadibe de tsehei reu ga ntumbam lulo ranggai. Pa tangkukwak mengei nah heka pumna de pwalu. Tinggim ngangcuh piegai eh pa tangkukwakdung de samlam gai nah teipoplu delwe cidungde ledeukelumedung de peugai, nah ledeukelumedung cidungde maadibe de peubeu.20Penui pelane tyei nah nggei kaplu. Pecai penui taktyei tyeibang keludung hekwalu, hebie kereiekena puiting kecu.21Matyei kelume mina cangmengei kenzwa ge, hename nah mipui de si mene .22Jisu zette peu ledeukelumedung de liemga nlütlu, delwe jaaidi keda lebie pe dwa gwangnswa lulo beu, pa maadibe de langgi kebam dauge.23Pa maadibe de langgi kedi cai, pa kekie tei kerane kideutu reuga pekatei hangdi. Cidau tinghegi gwangdi, nah pa pekatei rünne cika bam.24Aipau tingdau liem de rejaai sum ga ladi, dui nswak gage pung nlim teu eh, kedanemene tingkai ne penuide guilwa bam kedine.25Tingmui reket pe mdaibe tingdau , Jisu dui reu gade tet penuida gwang.26Ledeukelumedung pecu duireu ga tetkela ngau keludau, penui ngngi sütdi eh, “Cide au herabe geda,” de rangdi nah penui ngngi eh mradi.27Dede Jisu zette penui dage maranggai, “Kuu lu! Ih lie! Ngngi diso.”28Ge Peter ranggai, “Rampaubo, magade nang liecai, acu peu duireu gade tetpet nda gwang lulo samkai beulo.”29Jisu rangdi, “Mpetlu.” Cine Peter liem gade mpetlu nah Jisu da mie kerane duireu gade tetpet.30Dede Peter tingkai cisüt kecu de ngau luge, pa ngngidi. Pa nlim mie ge, pa sahbak eh, ranggai, “Rampaubo, acu kelibeu lo!”31Jisu zette pe ba hwapwa Peter de teulu delwe pedage rangdi, “Nang kenlum keceu nabo, daitei nang lunghau dino?”32Nah Jisu penai Peter liem ga nlüt luge, tingkai gui ngkaam zingdi.33Ge ledeukelume liem ga kelamedung Jisu de reca eh, rangdi, “Nang Tinggwang Nabe kesang da.”34Penui cide kahgwang keludau, penui Gennesaret deu ga gwanglu.35Mina heni cika kebamme Jisu de ci luge, penui sam twagwapung kebam deu pelane gage kai langgai, nah penui keteeikenei leude peda ngngwa gwang.36Penui pe dade pe pairi peu tunglo eh kiedi, nah cide tung kelu leune yilu.
Bridge Connectivity Solutions Pvt. Ltd.