1 Кур.кн23
1Кунам Давид шоҥгемын, ятыр ийготым поген, тудо Израильын кугыжажлан шке Соломон эргыжым шогалтен.2Тудо Израильын чыла вуйлатышыжым, иерей ден левитшым поген.3Кумло ияш да тылеч кугурак ийготан левит-влакым шотлен лектыныт, нунышт кумло кандаш тӱжем еҥ лийыныт.4Нунын кокла гыч коло ныл тӱжем еҥым Господьын пӧртыштӧ пашам ышташ палемденыт, возкалыше ден судья-влак куд тӱжем,5капка орол-шамыч ныл тӱжем лийыныт, эше ныл тӱжем еҥ Давидын ыштыме семӱзгарже-влак дене Господьым чапландарен.6Давид левит-шамычым кум тӱшкалан шелын, вет Левийын кум эргыже лийын: Гирсон, Кааф да Мерари.7Гирсонын эргыж-влак: Лаедан ден Шимей.8Лаеданын эргыже-шамыч: икымше – Иехиил, вара Зефам ден Иоиль, чылаже кумыт.9Шимейын эргыж-влак: Шеломиф, Хазиил да Гаран – чылаже кумыт. Нуно Лаедан урлык вуйлатыше-шамыч лийыныт.10Шимейын вес эргыж-влак: Иахаф, Зиза, Иеус да Берий. Нине нылытын тыгак Шимейын эргыж-влак лийыныт.11Иахаф икымше лийын, Зиза – кокымшо. Иеус ден Берийын эргыж-влак шагалын лийыныт, сандене нуно ик урлыклан шотлалтыныт.12Кааф эрге-влак: Амрам, Ицгар, Хеврон да Узиил – чылаже нылыт.13Амрамын эргыже-шамыч: Аарон ден Моисей. Аарон да тудын эргыж-влак святитлен ойырымо лийыныт: нунын пашашт курым-курымеш Господь чурий ончылно тӱтыраш, Тудлан служитлаш да Тудын лӱмжӧ дене суапландараш лийын.14А Моисей, Юмын айдеме, да тудын эрге ден уныкаже-шамыч Левий тукымлан шотлалтыныт.15Моисейын эргыж-влак: Гирсам ден Елиезер.16Гирсам эрге-шамыч: кугуракышт – Шевуил.17Елиезер эрге-влак: кугуракышт – Рехавий. Елиезерын моло эргыже лийын огыл, но Рехавийын шуко эргыже шочын.18Ицгар эрге-влак: кугуракышт – Шеломиф.19Хевронын эргыже-шамыч: кугуракышт – Иерий, кокымшо – Амарий, кумшо – Яхазиил да нылымше – Иекамам.20Узиилын эргыж-влак: кугуракышт – Миха, кокымшо – Ишший.21Мерари эрге-шамыч: Махли ден Муши. Махлин эргыж-влак: Елеазар ден Кис.22Елеазар эрге-влакым ыштыдеак колен, тудын лач ӱдыржӧ-влак лийыныт. Нуным Кис эрге-влак, чузайыштын эргыже-шамыч, марлан налыныт.23Мушин эргыж-влак: Махли, Едер да Иремоф – чылаже кумыт.24Теве Левий тукым эрге-влак, нунын урлык ден вуйлатышышт. Нуным урлыкышт дене, кажныжым лӱмышт дене шотлен лектыныт. Нуно чыланат, коло ияш деч кугурак ийготан-влак, Господьын пӧртыштӧ служитленыт.25Вет Давид каласен: «Господь, Израильын Юмыжо, шке калыкшылан тыныслыкым пуэн да тудым курымешлан Иерусалимеш вераҥден.26Левит-влаклан скинийым да тушто служитлаш кучылтмо тӱрлӧ арверым тетла нумалышташ ок кӱл».27Сандене Давидын пытартыш кӱштымыж почеш коло ияш деч кугурак ийготан левит-влакым шотлен лектыныт.28Нуно ынде Господьын пӧртыштӧ служитлыше Аарон тукым эрге-влаклан полшеныт: кудывече ден пӧлем-шамычлан вуйын шогеныт, чыла святой арверым эрыктеныт да Юмын пӧрт дене кылдалтше моло пашам ыштеныт.29Эше нуно Господь ончыко пыштыме киндылан, тыгак кинде надырлан кучылтмо эн сай ложашлан, шере лепошкалан, кӱктымӧ киндылан, олив ӱй дене лугымо руашлан, нунын чотышт ден висаштлан вуйын шогеныт.30Кажне эрдене да кастене нуно Господьым тауштен чапландарышаш улыт улмаш.31Тыгак кажне шуматкечын, у тылзе годым да пайрем кечылаште йӱлалтен пуымо надырым – мыняр палемдыме лийын – конден шогымо годым Господь чурий ончылно лийшаш улыт улмаш.32Тыгеракын, нуно Юмо дене вашлийме омаш пелен служитленыт, святой верлан вуйын шогеныт да шке иза-шольыштлан – Аарон тукым эрге-влаклан – Господьын пӧртыштӧ служитлыме годым полшеныт.
Institute for Bible Translation, Finland