1 Timoti6
1Aza vnyanya n ɓa snu əɓahni fyi n korogbma fyenu nya, ɓa ga əɓa adagayi mwamwa shi kwo kwnuce jesnu n nunui, nabai n a taa sa Shekwoyi əye nukwoi ɓədo n əyi nyawui m.2Aza yi n əɓa adagayi zhni avyiyi nu, ɓa to ci ɓa wyegba ntuge ɓa kwnu avyiyi nu zhni m. N əkwoɓwi, ɓa zhni ɓa tnutnu n gnabmyabmya ntuge əɓa adagayi zhni əɓa aza ayeyei nu, shi ɓa kwnu avyiyi nu zhni nyi, jesnu adagayi, ɓa kwu əɓahni ga, ɓa gye nge əɓa afyenu ɓwa bmazhni lo.
Shebmyashi kwo kwnusnu n fyei vnyanya.
Anyawuyi akwocednai n gyiwye yeyei
3Ndei əzaho wunya kpokəlo ədo lo gbowo, jesnu to woi ye n agbega shnishnii əyi Dagayi Yeisu Kirisiti nyai ɓədo n nyawuwu shekwodnawo nyai m,4wo n tukwomwai lo jesnu wo ta kpe nyahonyahoi əye lo m. Wo n aɓəpwawo nukwoi lo ntu aɓənakpeaje ɓo, jesnu n anyàwui ntu aɓədagbma ɓo n ɓa kwnuɓe n nuwnu, n ɓəshinmì ɓədai, ɓəmwi nukwoi nya5jesnu n aɓoajefyii ciici n azai n əɓa abwugba wnuwnuiya, n ɓa kwu gyi gaiciyanunui əsna, jesnu aza n ɓa zhninubwo nge shekwodnawowo nu zhni gyiwye ɓwa gyiba nya.6Ama shekwodnawowo n nyaɓwa awyekwnui, əkwo nu zhni gyiba yaakwo.7Ntuge yi to ɓə ɓe anyì n nyahoi shi m, jesnu yi to ɓə kwnu n anyì n nyahoi shi m.8Ama n yi n nyagyii lo n ajei, ɓa kwu yi kwnuawye.9Aza yi n ɓa ncei pma ɓa kwu zè anyaɓwayi, ɓa kaya fyi n mwumwu ɓədo n agbúlui jesnu ɓa lofyi n amama aɓo n aɓəmwi aɓwawui, n ɓa ka aza fyi n əfyi n agbmazhnii.10Ntuge gyiwye yeye əkwo nu zhni aɓənukwoizhni vnyanya gbegye. Aza n ɓa kwnu gyiwye fnafna, ɓa la kwnuya n gaiciyaganunui jesnu ɓa kwu əɓahni fnyi-anya n abwugbawnu bəgyei.Ɓəgbega kpmasnui ga Timoti
11Ama əho, Shekwoyi əza, shetusi n aɓo ye vnyanya, jesnu ha zna ɓəfyecezhni shni, shekwodnawo, gaiciyaganunui, yeyewu, əmìfyi, ɓədo n tukwownashii.12Snu okwnu manai gaiciyaganunui nya. La əɓwatashi wyewyeyi nyalonyalo nya ədo n a ɓə yi ho n əkwo əɓo, əsa n ho ɓə gbmiɓo manai gnyi n aza n mwabəgyé awye nyi.13Gnyi n Shekwoyi awyeba, n wo ga nyahonyahoi wyewyeyi nyi, ɓədo n Kirisiti Yeisui, əza, əsa n wo ɓə gnyi woi gbmi əɓo gnyi n Pwontus Byilatusu abye, wa gbmi əɓo manai, mi ga ho ɓəgbega ye ge14la ɓəgbetu ye shiɓwa n tna-ababalai knyi kwo ntna ɓətu, nya əsa n əyi Dagayi Yeisu Kirisiti ɓə kpeyawu ncei,15əɓo n Shekwoyi ɓə ɓe n kwoi n əwo əsai; Shekwoyi, anabəlikada jesnu Begyiyii kəto: Asu aje Əsu jesnu adagayi aje Dagayii,16əza gbmanyi kəto n wo ta fyí m, jesnu wo dna n bwuznagna n a ta myi n yegwu kwo m, əza n əzaho too gye wo əwye, kwo a ɓa gyewye m. Mwamwa n ikwoi zhni əwo nya nu nyalonyalo. Amyi.17Tu aza yi ɓəgbe n ɓa n nyaɓwai lo n anyì ye nsayi nyi, nge ɓa to zhni tukwognanakwo kwo ge ɓa kwu əɓa əwyetu kpe n nyaɓwa m, n kwo taa gnyi nyalonyalo nyi m. Ama ɓa kwu əɓa awyetu kpe n Shekwoyi, əza n wo ga yi anya vnyanya n əɓwai loya ntu əyi agbmada wo ɓo.18Tu ɓa ɓəgbe ɓa zhni əɓo n kwo bmya, ɓa kwu zhni anyaɓwayi fyi n aɓo manai zhni, ɓa kwu zhni aɓwa loloiyayi jesnu n əɓahnii yeyei ɓa bma azaje zhni.19N zokwo ye nu, n ɓa ɓə ye nyaɓwa zhi əɓahni n zhni shnipa kaláda nya ntu cala ɓo n kwo ye ɓeɓelo nyi, nabai n ɓa ɓə myi ɓai taɓwashi wyewyeyi n əkwo nu zhni wyewyeyi hnihnii nyi.20Timoti, la əwyewna n ənya n a kwu fnyí ho n akwnu. La əwye pmyi n aɓədada tnashekwodnawo nya, ɓədo n aɓoi n ɓa gnyiapaapa n awyegai n a yi kwo dna n kwocedna nge ɓəyekpe,21ədo n azaho n ɓa, ɓə la əkwo əɓo gbmi ama dna n əkwo ɓwashishi ɓa la kwnuya n gaiciyaganunui.Shebmyashi kwo kwnusnu n fyei vnyanya.
Biblica, Inc.