2 ኦዱዋ30
ፓስጋ ባላ ቦንቻናዉ ጊጉዋ
1መና ጎዳ እስራኤልያ ጾሳ ፓስጋ ባላ ቦንቻናዉ፥ የሩሳላመን ደእያ መና ጎዳ ጌሻ ጎልያ እስራኤልያ አሳይ ኡባይነ ይሁዳ አሳይ ኡባይ ያናዳን ህዝቂያሰ ኪቴዳ፤ ቃይ ኤፍሬማ አሳዉነ ምናሰ አሳዉ ዳብዳቢያ ጻፌዳ።2ካቲ፥ ካፓቱነ፥ የሩሳላመን ሺቄዳ አሳይ ኡባይ ፓስጋ ባላ ላኤን አግናን ቦንቻናዉ ቆፋ ቃቼድኖ።3ፓይድና ግድያ ቄሳቱ ባረንቱ ሁጲያዉ ጌይቤና ድራዉነ ዳሮ አሳይካ የሩሳላመን ሺቅቤና ድራዉ፥ አሳይ ፓስጋ አ ዎድያን፥ ኮይሮ አግናን ቦንቻናዉ ዳንዳይቤና።4ሄ ቆፋይ ካትያነ ሺቄዳ አሳዉ ሎኦ ቆፋ ግዴዳ።5ሄዋ ድራዉ፥ መና ጎዳ እስራኤልያ ጾሳ ፓስጋ የሩሳላመን ቦንቻናዉ በርሳበሄፐ ዶሚደ ዳና ጋካናዉ ደእያ እስራኤልያ አሳይ ኡባይ ያናዳን አዋያናዉ ቆፋ ቃቼድኖ። አያዉ ጎፐ፥ ሀ ፓስጋ ባላባይ ካሰ ህግያን ጻፈቴዳዋዳን ዳሮ አሳይ ቦንችቤና።6ካቲነ ካትያ ካፓቱ አዛዝና፥ ኪተቴዳዋንቱ እስራኤልያ ቢታ ኡባነ ይሁዳ ጋድያ ኡባ ሀዋዳን ያግያ ዳብዳቢያ አኪደ አፌድኖ፤ “እስራኤልያ አሳዉ፥ አሶረ ጋድያ ካተቱዋ ኩሽያፐ ከስ አኪደ፥ ህንተንቱ ቢታን አቴዳ ህንተንቱኮ እ ስማናዳን፥ ህንተንቱካ መና ጎዳኮ፥ አብራሃማ፥ ይሳቃነ እስራኤልያ ጾሳኮ ስምተ!7ባረንቱ መና ጎዳዉ፥ ባረንቱ አዎቱዋ ጾሳዉ አማነትቤና ህንተንቱ አዎቱዋዳንነ ህንተንቱ እሻቱዋዳን ሀኖፕተ። ህንተንቱ ኤርያዋዳን ጾሳይ ኡንቱንቱ ዎልቃማ ሙሩዋ ሙሬዳ።8ህንተንቱ መና ጎዳዉ አዛዘትተፐ አትና፥ ካሰ ህንተንቱ አዎቱዋዳን ህንተንቱ ሞርግያ ጋፍሶፕተ! ጾሳይ መናዉ ጌሼዳ ጌሻ ጎልያ ሃ ዪተ። ጾሳ ሀንቁ ኤጽያዌ ህንተንቱ ቦላፐ ክቻናዳን፥ መና ጎዳዉ፥ ህንተንቱ ጾሳዉ፥ ጎይንተ።9ህንተንቱ መና ጎዳኮ ስሞፐ፥ ህንተንቱ እሻቱዋነ ህንተንቱ ናናይ ባረንታ ኦሞዴዳዋንቱ ስንን ማሮታ ደሚደ፥ ሀ ጋድያ ስማና። አያዉ ጎፐ፥ መና ጎዳይ ህንተንቱ ጾሳይ ቃረትያዋነ ማርያዋ። ህንተንቱ አኮ ስሞፐ፥ ባረ ስን ህንተፐ ዎራ ዛረና” ያግያዋ።10ኪተቴዳዋንቱ ኤፍሬማ ጋድያነ ምናሰ ቢታ አደ፥ ዛብሎና ቢታ ጋካናዉ ካታማፐ ካታማ ቤድኖ። ሽን ሄ ካታማቱዋን ደእያ አሳቱ ኡንቱንቱ ካደ፥ ኡንቱንቱ ቦላ ሚጬድኖነ ቅሊጬድኖ።11ግዶፐነ፥ አሴራ አሳቱዋፐ፥ ምናሰ አሳቱዋፐነ ዛብሎና አሳቱዋፐ አማሬዳ አሳቱ ባረንታ ካዉሺደ፥ የሩሳላመ ዬድኖ።12ካቲነ ካትያ ኦሳንቻቱ መና ጎዳ ቃላ ማራን አዛዜዳዋ፥ ይሁዳ አሳይ እት ዎዛናን አዛዘታናዳን፥ ጾሳ ኩሺ ይሁዳ አሳ ቦላ ደኤዳ።ፓስጋ ባላይ ቦንቼቴዳ
13ላኤን አግናን እርሹ ገልቤና ኡክ ባላ ቦንቻናዉ ሎይ ዳሮ አሳይ የሩሳላመን ሺቄዳ።14ኡንቱንቱ ደንዲደ፥ የሩሳላመን ደእያ ያርሽያ ሳኣ ቆሊደ፥ እጻና ጩዋይያ ሚሻ ኡባ ድጊደ፥ ቀድሮና ዛንጋራን ኦሌድኖ።15ሄዋፐ ጉይያን፥ ላኤን አግናን፥ ታማነ ኦይደን ጋላስ ፓስጋ ዶርሳ ሹኬድኖ። ባረንቱ ሁጲያዉ ጌይቤና ቄሳቱ ነ ሌዋቱ ዬላቲደ፥ ባረንቱ ሁጲያዉ ጌዬድኖ፤ ያቲደ ጹግያ ያርሹዋ መና ጎዳ ጌሻ ጎልያ አሄድኖ።16ጾሳ አሳ ግድያ ሙሴ ህግያዳን፥ ጌሻ ጎልያ ግዱዋን ባረንቱ ሳኣን ሳኣን ኤቄድኖ፤ ቄሳቱ ሌዋቱ ኩሽያፐ አኬዳ ሱ ጫጫፌድኖ።17ሄ ሽቁዋ ግዶን ጌይቤና ዳሮ አሳቱ ደኢኖ። ሄዋ ድራዉ፥ ፓስጋ ዶርሳቱዋ መና ጎዳዉ ሹካናዉ ዳንዳይክኖ፤ ሌዋቱ ኡንቱንቱ ኮታን ፓስጋ ዶርሳ ሹኪደ መና ጎዳዉ ሺሼድኖ።18ኤፍሬማ ዛርያፐ፥ ምናሰ ዛርያፐ፥ ይሳኮራ ዛርያፐነ ዛብሎና ዛርያፐ ዳሮ አሳቱ ህጊ አዛዝያዋዳን ባረንቱ ሁጲያዉ ጌይቤናዋ ግዶፐነ፥ ፓስጋ ባላ ሜድኖ። ሄዋ ድራዉ፥ ካቲ ህዝቂያሰ ኡንቱንቶ ዎሲደ፥ “አቤት፥ አሳ ኡባዉ ሎኦ መና ጎዳዉ፥ ሀዋንቱ ህጊ አዛዝያዋዳን ባረንቱ ሁጲያዉ ጌይቤናዋ ግዶፐነ፥ ኡንቱንቱ ነዉ፥ መና ጎዳዉ፥ ባረንቱ አዎቱዋ ጾሳዉ ጎይኒኖ። ሄዋ ድራዉ፥ ኔን ኡንቱንቶ አቶ ያጋ” ያጊደ ዎሴዳ።20መና ጎዳይ ህዝቂያሳ ዎሳ ስሲደ፥ ኡንቱንታ ፓዳ።21የሩሳላመን ሺቄዳ እስራኤልያ አሳይ እርሹ ገልቤና ኡክ ባላ ዎልቃማ ናሸቻን ላፑን ጋላስ ቦንቼዳ። ሌዋቱነ ቄሳቱ የ ሚሻን የጺደ፥ ጋላስ ጋላስ መና ጎዳ ጋላቲኖ።22ሄዋፐ ጉይያን፥ ህዝቂያሰ መና ጎዳ ኪታን አኬካንቻ ግድያ ሌዋቶ ሃሳዪደ፥ ኡንቱንቱ ምንዳ።አሳይ ኡባይ እትፐተ ያርሹዋ ያርሺደ፥ መና ጎዳ ባረንቱ አዎቱዋ ጾሳ ጋላቲደ፥ ሚድነ ኡሺደ፥ ባላ ላፑን ጋላስ ቦንቼድኖ።23ኩመን ያአይ ባላ ሀራ ላፑን ጋላሳ ጉጂደ ቦንቻናዉ ማዬዳ፤ አሳይ ላፑን ጋላስ ባላ ናሸትደ ቦንቼዳ።24አያዉ ጎፐ፥ ይሁዳ ካቲ ህዝቂያሰ ያርሹዋ ያርሻናዉ፥ ሻአ ኮሩማቱዋ፥ ላፑን ሻአ ዶርሳቱዋነ ዴሻቱዋ ያአዉ እሜዳ፤ ቃይ ካፓቱ ሻአ ኮሩማቱዋነ ታሙ ሻአ ዶርሳቱዋ ያአዉ እሜድኖ። ሎይ ዳሮ ቄሳቱ ካ ባረንቱ ሁጲያዉ ጌዬድኖ።25ኩመን ይሁዳ ያአይ፥ ቄሳቱ፥ ሌዋቱ፥ እስራኤልያፐ ዬዳ አሳይ ኡባይነ ካሰ እስራኤልያ ጋድያፐ ዪደ፥ ይሁዳ ቢታን ደኤዳ አሳይ ኡባይ ናሸቴዳ።26ዳዊታ ናኣ፥ እስራኤልያ ካትያ ሶሎሞነ ዎድያፐ ዶምና፥ ሀቼ ጋካናዉ፥ የሩሳላመን ሀዋ ማላትያ ባል ቦንቼት ኤረና ድራዉ፥ የሩሳላመን አሳይ ሎይ ናሸቴዳ።27ሄዋፐ ጉይያን፥ ቄሳቱ ነ ሌዋቱ ደንዲደ፥ ጾሳይ አሳ አንጃና ማላ ዎሴድኖ፤ ጾሳይ ሳሉዋን፥ ባረ ደእያ ጌሻ ሳኣን ኡንቱንቱ ዎሳ ስሴዳ።
The Word for the World International