Luke21
1Lăm tămhơch hao, Siđăch sây khây tamun jina pađăc păch pađăc khây nĕh lăp nâm nhi cŭh.2En Siđăch sây du mvu ur mrô lŏh nŏq pađăc lăp nŏq var păndŏh jên ken.3Bây Siđăch nhai: “Nhâng canŏq, gru nhai bây pôp ŏh pành ur mrô lŏh sat heq pađăc gŏq vlơ lĕq,4mvăc ăp ndu tĭq văt pađăc lăp khây păch pađăc a sinlơ canăh nơm de. En ur mrô heq, a gatŭq lŏh sat pŏh pât nơm de, pađăc lĕq păch caya cồ nĕh gĕh.”5Lăm takiq ndu tăm nhai sĭq nhi cŭh, pành nhi cŭh vu ôp a tamô yăh rom lŭng nggâm khây păch pađăc ayh rom yăh, nŏq Siđăch nhai:6“Khây păch cồ pôp ŏh sên sây, en tât năr cồ sŏng lăm nŏq, đăng gĕh du palang tamô lây cồ gĕh chĕq tăm cơl vlơ tamô ndây cồ đăng khlai talĭh jưr.”7Lăm nŏq, Khây nĕh lŭp Siđăch pành: “En canŏq, ơ gru, lăm lây cồ gĕh khây sinlơ nŏq, bây têl chrĕh canŏq caheq lăm khây vrŭq nŏq mơch tănlŭh?”8En Siđăch âh: “Căh jơ nơm chĕq pôp ŏh ntrăch sinlơ lamvoch. Mvăc gŏq ndu tât sŏq săq gru de, nhai: ‘Payh nơm Ănh’ bây ‘Dâq chôch lawăch mơch tât en.’ Vâng saq bây khây nĕh.9Măt ndây, lăm pôp ŏh chăng sĭq minsŭh bây mintăq, nŏq vâng candŭh minsôc minsac, mvăc khây sinlơ nŏq gĕh sẫy lŭh lor, cồ canŏq, năr chôch lawăch đăng gal sŏng lăm nŏq uy.”10Alưr nŏq Siđăch nhai bây khây nĕh: “Văl heq mvlưl hao tăm chôl bây văl ndây, en daq heq tăm chŏl bây daq tĭq.11En gĕh khây dâq ntĕh lănggưn camhlăng bây gŏq gatŭq dŭh pangot, nggâm bây gŏq vông chhal ji râng tât gŏq gatŭq. En gĕh lawân khây wâr prai minsôc minsac bây khây panol măq lŭh a trôq.12En lor a ăp sinlơ nŏq, vu lŭh ti jra vlơ pôp ŏh bây ôp minlŏh minsat pôp ŏh, lăm dơp doq sŭng nhi vatom bây trăng sŭng vi jingo, têch văt pôp ŏh tât vôq măt vatau bây khây ganwâr mvăc tơm ju săq gru.13Vrŭq nŏq jêng lŭh vadâq yăh chĕq pôp ŏh dơp lŭh camvŭm candân.14Payh canŏq, căh di gân sŭng nuih pôp ŏh đăng sinâng lor chĕq tăm âh jơ nơm,15mvăc gru an pôp ŏh khây camvŭm nggâm sinlơ vanŏh vŏh chih cồ lĕq khây tamun tăm chôl pôp ŏh đăng gĕh trong tăm chŏl ha cammlăh sa gĕh.16Nhâng pôp ŏh tât daq vlam vrŭq nhŭp dơp payh ju mê vap, pôp ŏh, sŭc palây bây ganai nơm, en vu jrâm tachưt takiq ndu sŭng pôp ŏh.17Pôp ŏh pŏh vlam khây vu get ncom payh săq vôq gru.18Cồ du rawây sŏq vlơ vôq pôp ŏh de khoi đăng phiêt chĕq uy.19Sŭng sinlơ gân nuih wŏq vadâng nơm de, pôp ŏh jơ gĕh wênh nggui nơm.20En hê lăm lây pôp ŏh sây palây Yê-ru-sa-lem jikrân rawênh payh ju a mintan congti, vadâq nŏq căh gưt pành sinlơ pâm tayaih palây heq mơch tât en.21Lăm nŏq, vu lây sŭng palây Yu-đê, sô du tăm pôn vlơ gŭng, vu lây vlăc canđal palây, sô lŭh du, en vu lây u ling tamăn, vâng sĭq lăp palây.22Mvăc heq cồ khây năr trŏh daq chĕq khây camvŭm gĕh chêr nhâng jêng gayh.23En nhâng, ji côr lŭng an khây ur cồ vŭn bây khây tamun mê an con pu sŭng khây năr nŏq! Mvăc gĕh sinlơ rabăh rabơp măq mi sŭng palây, nggâm sinlơ măq nuih tŭh jưr vlơ văl heq.24Khây nĕh payh vông chưt a pĭh taq bây nhŭp têch khây nĕh ôp dĭch an ăp daq palây, bây palây Yê-ru-sa-lem pâh vlam văl daq ndây jot mpên pagơq pahơn diêt tât lăm cồ vadâq khây văl daq aling gĕh lôch vênh.25Khoi gĕh khây panol vlơ măt năr, măt khay nggâm khây simănh, bây sinlơ si-yưr nuih sŭng ăp daq văl u ntĕh heq vênh sinlơ jăl wăl payh ju camvŭm sec ranđih daq lênh de nggâm chhal ramvưt rapăn đĭh nđĭh tĭq.26Khây vu khlêp phiêt mvăc phŭng râm bây câp nggơ khây păch vra yĕng tŭh jưr vlơ văl ganơ u ntĕh, mvăc khây prơn camlhăng avlơ trôq khoi cồ gatâr lănggưn.27Alưr nŏq, khây nĕh gĕh sây Con Tamun jưr tât sŭng lawang tŭq nggâm bây prơn gŭn sindraq sindil măq mi lŭng.28Payh lăm khây vrŭq nŏq pơq vôq sẫy lŭh, căh tao yăq bây pơq prĭh vôq nơm, mvăc sinlơ yơt pôp ŏh de tât mơch en.”29Siđăch đơm an khây nĕh du sinlơ prŭp: “Căh sên u chhơ vả nggâm lĕq khây chhơ nor.30Payh cồ lăm lây nĕh me vưt chông chăq singging, pôp ŏh gưt, lăm cồ tămhơch sên sây, pành khay dŭh nĕh mơch tât èn.31Khoi canŏq, lăm pôp ŏh sây khây vrŭq heq nĕh tât, pôp ŏh sô căh gưt pành daq Cô Voq de tât mơch en.32Nhâng canŏq, gru nhai bây pôp ŏh pành chhe njang heq nhâng bâng cồ đăng saq ntrăch di tât lăm ăp vrŭq tĭq nĕh tât.33Trôq bây ntĕh nĕh saq ntrăch, en payh khây camvŭm gru de nhâng đăng dâq lây saq ntrăch.34En nŏq căh jơ yăh nơm vơn, chĕq nuih tôr pôp ŏh đăng ôp an nưm njŏq sŭng vrŭq sa huch, vanhưl sicot nggâm khây gŏq sinlơ sinâng sĭq vrŭq vri heq, tât daq năr nŏq pành simmrât vŭq tât vlơ pôp ŏh35dân ca dăq takhlayh, mvăc vrŭq nŏq sẫy tât an lĕq săq con tamun rĭh vlơ lam măt ntĕh.36Nŏq căh iêh sên sŭng ăp vadâq, vơu ngwân payh chĕq pôp ŏh lôch prơn dê ntrăch a khây sinlơ mơch sẫy lŭh nŏq, bây chĕq tao yăq truh u vôq măt Con Tamun.”37Canŏq sŭng lăm dŭng năr, Siđăch pađau tămti sŭng nhi cŭh, en tât vi mau, alưr lăm hao tu gŭng cuôl pành Ô-liu, Siđăch lu măng u nŏq.38En ăp ndu tât bây Siđăch a măng rŭq chĕq iêt chăng Siđăch u sŭng nhi cŭh.
FAR EAST BROADCASTING COMPANY