1 Krónikasi18
Wuribu burí le lagañeirubei Dawidi
1Lárigiñe sun le, aba lagañeiruni Dawidi wuribu hama Filistéana, aba lanügüni uburugu Gatü lau sun burí lirahüñü aüdü le geyegubei lau hawéi.2Gañei lumuti giñe wuribu hama Moábüna, aba herederun lábugiñe lubafu Dawidi, aba hafayeihan liseinsuna gumadi lun.3Gañei lumuti giñe Dawidi wuribu luma Adadü-éserü, le lurúeite Sobá, le luágunbei Amatü, lasuseredunbei sun le, lídanbei yebe louchun Adadü-éserü lárügüdüni sun lóubawagu duna Éufüratesi.4Ragüti Dawidi milu karü hawéi to lánina wuribu, daügua laña sedü-milu súdaragu ha gabayuagutiña hama wein-milu ha éibutiña; halagualéi hagudi sun gabayu ha achawahabarun karü to lánina wuribu, ígira san gabayu tun san karü.5Lárigiñe aba hayabin Síriana Damasükugiñe lun híderaguni Adadü-éserü le lurúeite Sobá, gama lumoun aba lagañeiruni Dawidi wuribu kóntüra Síriana, aba láfaragun wein-bián-milu hádangiñe.6Lárigiñe aba líchugun Dawidi súdaragu Siria le lani Damasüku, aba herederun Síriana lábugiñe lugumadin, aba hafayeihan liseinsun gumadi lun. Ítara liña lubeiti, sun le ñein lumuti lidin Dawidi, lagañeiragüdüni Aburemei.7Lárigiñe aba lagidaruni Dawidi idaüdinaü burí lauti golu le hayusurubei lani Adadü-éserü úfisigu hawéi, aba lanügüni Herusaléun.8Barüti giñe saragu buronse uburugugiñe Tibatü luma Kun le burí luburugute Adadü-éserü. Lau buronse ligía ladügei Salomón óunwenbu lagei duna, wagabu luma burí ílagu lauti buronse lun layusurun ténpulurugu.9Dan laganbunbei Toi le lurúeite Amatü luagu gáñeila lan Dawidi wuribu kóntüra sun lánigu Adadü-éserü le lurúeite Sobá,10aba lóunahani Adorámü le liráü lau sun luwuyeri ílagu golu, pülata luma buronse lun labusurun lun urúei Dawidi luagu lagañeiruni wuribu kóntüra Adadü-éserü, lugundun lageindaguañahaña giñe Toi luma Adadü-éserü.11Aba lederegeruni Dawidi sun ílagu ligía lun Bungiu, úara luma golu luma pülata le buga lanügübei hawéi Edomuna, Moábüna, Amonna, Filistéana hama Amaléküna.12Gañei lumuti giñe Awisái le liráü Seruiá wuribu kóntüra disiwídü-milu Edomuna lidan fulasu wayati le lani Salu.13Lárigiñe aba líchugun Dawidi súdaragu Edomu, aba herederun sun Edomuna lábugiñe lubafu; ábaha lagañeiragüdüni Aburemei Dawidi le ñein lumuti lidin.Lani Dawidi úfisigu
14Arúeihati Dawidi hawagu sun Ísüraelina, adügeina sun katei lidan lúaran houn sun lumutuniña.15Hoabü meha le liráü Seruiá hábutibei súdaragu; Hosafátü le liráü Ailudu ligía lánibei urúei abürühati.16Sadoku le liráü Aitubu luma Aimelekü le liráü Abiatárü, fádirigu; Sabüsá ligía meha abürühabalin sun asusereduti.17Benaíasi le liráü Hoyadá, ligía hábutibei óunigirutiña ha Keretüna hama Peletüna. Lirahüñü meha Dawidi íderagubalin.Bible Society of Honduras