Přečtěte si 1 Iyoni 2

1 Iyoni2

¹Natukuweyavo, taidei gavetokiluma wagaimiya e ada keke wanadewa koyona. Aku kai tamo gaito gina koyona, aga adaTolubadigolagola gimiyamiya, Yeisu Keliso. Banae Toyegayegana, ada Tamada wagaine giveoveola faideya.²Banae Tauna bolavoi-menai, ada yada koyona faina gifatana e ada Yaubada yana nuwakoyo yada koyona faine ani nuwana gibubuna. Ada keke ide yada koyona gaga faine gida alika, aku kaduwe babi matatabuna anakalivayavo yadi koyona faidiya gialika.

³Kai Yaubada yana veimeya kamatawalewaleyena, aga kana alamanena velemoena ani ide Banae kaalamanena.⁴Gavakaliva gina vonavona, “Iya Yaubada gaalamanena” aku yana veimeya keke gida itaveyabi, kaliva tainei ani tovefwayafwaya, ada vona anavelemoena keke tauna wagaine gida miyami.⁵Aku kai gaito Yaubada yana vona gimatawalewaleyena, vona velemoena banae ani Yaubada yana nuwakabubu givekaliva yawaina wagaine. Taidei wagaine kaalamanena ani kamiyamiya Yaubada wagaine.⁶Kai gaito ginavona, “Iya Yaubada wagaine gamiyamiya,” gilubodana banae ginadewa anafaiweya Yeisu gidewa.

Kaliva kana nuwakabubuyedi ke kana miyamiya malina wagaine.

⁷Tubuiya aseasekuweyavo, keke vaita veimeya evaguna gada vetokilumi wagaimiya, aku veimeya tuwaina faina gavetokiluma, tainei ebavevuvu wagaine gimiyamiya wagaimiya. Veimeya taidei tuwaina ani anaifufu bademowa wanogalina.⁸Aku kaduwe veimeya taidei vaita evaguna. Ada veimeya-nai ananuwanuwa tunutunugina iitana Banae Keliso wagaine ke imi wagaimiya, faina yuyuvana giavavaina aku malina velemoena bademowa gituituimalina.⁹Gaito ginavona, “Iya gamiyamiya malina wagaine” aku tubuiyana giagougena, ina banae aimo yuyuvana wagaine gimiyamiya.¹⁰Gavakaliva tubuiyana ginuwakabubuyena ani banae gimiyamiya malina wagaine, ada nuwainagena wagaine keke tamo gavavuvu gida miyami ke ginabe koyona wagaine.¹¹Aku gaito tubuiyana giagougena, banae yuyuvana wagaine gimiyamiya ada ginunudadana yuyuvana wagaine. Keke gida alamane gadedeku ginauna, faina yuyuvana matana gisebodana.

¹²Natukuweyavo, gavetokiluma wagaimiya faina Yaubada yami koyona givenuwaegena Keliso wagaine.

¹³Imi kamakuweyavo, gavetokiluma wagaimiya faina bademowa waalamanena Yeisu, Banae tova nagona ebavevuvu velemoena wagaine gimiyamiya.
Imi kaikuweyavo, gavetokiluma wagaimiya faina kaliva koyona Seitani wagaine bademowa walugaviya ke watoyogisegena.
Kaduwe natukuweyavo, imi wagaimiya gavetokiluma faina Tamada waalamanena.

¹⁴Imi kamakuweyavo, gavetokiluma wagaimiya faina bademowa waalamanena Keliso, Banae ebavevuvu velemoena wagaine-deya gimiyamiya-vagata.
Imi kaikuweyavo, gavetokiluma wagaimiya faina toyogimiyavo, ada Yaubada yana vona gimiyamiya aseasemiya, ada kaliva koyona Seitani wagaine walugaviya ada watoyogisegena.

Babi ananuwanuwa keke nuwami ginadola.

¹⁵Babi ananuwanuwa ke anakaikaiwabuyavo ani keke nuwami ginadola. Kai gaito babi ananuwanuwa nuwana gidolana, aga Tamada ananuwakabubu ani keke gida miyami wagaine.¹⁶Faina dewa moyaina babi wagaine imiyamiya, anafaiweya kaliva vovodi ananuwanuwa koyodi inuwanuwayedi, gavana gavana faidiya matadi iitaitavedigaga, ada kadu gavadi moyaidi faidiya taudiyavo adiyegana ikikilakaina. Taidei gaitoma-dina keke idaela Tamada wagaine aku matatabuna ielai babi ananuwanuwa koyona wagaine.¹⁷Ada babi anakalivayavo keke Yaubada ida vemoimoine kadu yadi nuwanuwa luvadiga ani iavavaina, aku badi gavega Yaubada yana nuwanuwa igugaiyena ani ina miyamiya-vagata.

Matawa gimaduyegemona Keliso nibainavo faidiya.

¹⁸Natukuweyavo, tova anaebalauyabu givelilivana. Ada anafaiweya bademowa wanogalina vaita Keliso Nibaina gina yegemona, ani malinai bademowa Keliso nibainavo moyaidi iyegemona. Taidei wagaine kaalamanena tova anaebalauyabu bademowa gielai.¹⁹Kaliva-dina taidei keke velemoena ide tovetumagana yada yoo wagaine, e ada isegeda inau. Kai badi velemoena yada yoo aga ida miyamiya wagaideya. Aku yadi nau-nai givewaleda vaita badi moyaidi keke ide yada yoo wagaine.

²⁰Aku imiyavo ani Yaubada Tabutabuna Aluwaluwana gibiwana wagaimiya, e ada moyaimi vona velemoena waalamanena.²¹Taidei faina Iya gavetokiluma wagaimiya, keke vaita vona velemoena keke wada alamane faine, aku velemoena ani waalamanena. Ada kaduwe faina waalamanena ani Yaubada yana vona velemoena wagaine keke tamo fwaya gida elaela.²²Aku gaito tovefwayafwaya? Tainei gaito banae gina veweyena Yeisu evona keke Keliso. Kaliva-nai ani Keliso nibaina, banae giveweyena Tamada ke Natuna.²³Badi gavega iveveweyena Yeisu aga ina Tamada keke gida miyami badi wagaidiya. Aku gavega ivonavonamogatala Yeisu Banae Yaubada Natuna, ina badi wagaidiya kaduwe Tamada gimiyamiya.

²⁴Aku imiyavo ani wana itaveyabimi ada gavana nagona wanogalina ani wana duveyalaina aseasemiya. Kai gavana nagona wanogalina ani gina miyamiya aseasemiya, aga imiyavo tova moyaina wana luveyabina Tamada ke Natuna wagaidiya.²⁵Ada taidei luveyabina-nai wagaine yawai-vagata kanuwanuwagana, anafaiweya givonadabadabayena.

²⁶Gaitoma-dina taidei gavetokiluma wagaimiya, faina biyavo-dina ibalabalalava ina fwayanegenegemi yadi vewala balana wagaine.²⁷Aku Keliso Aluwaluwa Tabuna gibiwana wagaimiya e ada tova moyaina Banae gimiyamiya wagaimiya. Taidei faina keke wana nuwanuwa vaita seyana gaito gida vevewalemi, faina Banae Aluwaluwa-nai gaitoma matatabuna givevewalemi. Ada yana vewala ani vona velemoena, keke tamo fwaya wagaine. Ada anafaiweya givewalemi, wana miyaveyalata Banae Keliso wagaine.

²⁸Ada natukuweyavo, tova moyaina wana miyaveyalata Banae wagaine e ada tova-nai gina yegemona, ide wa yada asevatu keke kana vovomumu Banae matane yana ela-nai wagaine.²⁹Imi waalamanena ani Keliso Banae yegayega-moena, e ada anafaiweya kaduwe wana alamanena gavega idewadewa yegayegana, badi Yaubada wagaine itubuga.