Přečtěte si Tsuɓari 1

Tsuɓari1

Wuma ili i gbani ɗa

¹Kadanshi ka malum, kolobo ka Dawuda, mogono a Urushelima.²Gbani ɗa, ili dem gbani ɗa. malum ma danai.Ili ra̱ka̱ gbani ɗa. Ili dem gbani ɗa.³Yiɗa̱i vuma u ciya̱i a̱ ka̱tsuma̱ ka kataci ka̱ nika na wi a kuyaꞋan a aduniyan?⁴Tsukaya tsu laza, ka̱ta̱ tsukaya tsu yoku tsu ta̱wa̱,ama aduniyan i ta̱ lo ko wannai.⁵Kanna ka tsu uta̱ ta̱ ka̱ta̱ kpamu kanna ka̱ yikpa̱,ka̱ta̱ ka dakaka o kubono a̱ ubuta̱ u na ka̱ uta̱i kpamu.⁶Wunla̱i u tsu lapa ta̱ a kubana a uɓonɗakaika̱ta̱ kpamu u kpatala u kubono a uɓongaɗi,ka̱ ka̱na̱ kuka̱ra̱Ꞌa̱, n u bonoi a̱ ubuta̱ u na wu uta̱i.⁷Nyeneke ra̱ka̱ n ci yene ta̱ a kubana mala,n nannai dem mala ma shana ba.A̱ ubuta̱ u na nyeneke tsu uta̱,ta ɗe o tsu bono kpamu.⁸Ili dem i tsu tuka̱ ta̱ n woꞋi,tsu na vuma u kufuɗa kugisanku ba.A̱shi o tsu oꞋwo n kindi ba,atsuvu feu o tsu oꞋwo n kupana ba.⁹Ili i na i gita̱i ɗe n cau, i ɗaɗa kpamu i doku i bonoi,ili i na a yaꞋin ɗe n cau, i ɗa kpamu o kudoku a yaꞋanko ili i savu aduniyan nampa ba.¹⁰Ili yoku yi ta̱ lo i na vuza u kudana,<<La̱na̱ biꞋi, na va̱ ili i savu i ɗa>>?I ɗa yi ta̱ lo m megeshekafu ayin a̱ tsu.¹¹Babu vuza na u kuciɓa n ili i na i lazai,ali n ili i na kpamu i kuta̱wa̱,aza a na a̱ kuta̱wa̱ n ka̱ca̱pa̱i a kuciɓa n ili i na i gita̱i ba.

Ugboji gbani ɗa

¹²Mpa malum, n lyaꞋa ta̱ tsugono tsa aza a Isaraila punu a Urushelima.¹³Ɗa n zuwai ka̱ci ka̱ va̱ adama a na n la̱nsa̱ ugboji n kuyeve ki ili ra̱ka̱ i na yi aduniyan a nampa. Ɗa me enei ili i na Ka̱shile ka zuwakai vuma yi ta̱ n kataci.¹⁴Ɗa me enei ili ra̱ka̱ i na i a kuyaꞋan aduniyan, ra̱ka̱ gbani ɗa, yi o kutono wunla̱i.¹⁵ili i na baci i ka̱nza̱i, yi kubonoko mejege ba,e ci kece i na yi lo ba.¹⁶Ɗa n danai ka̱ci ka̱ va̱, <<La̱na̱ n ciya̱ ta̱ ugboji u na n laꞋi yaba dem vu na u lyaꞋi tsugono a Urushelima kafu mpa, mayun n ciya̱ ta̱ ugboji n kuyeve ka a̱bunda̱i.>>¹⁷Ɗa n zuwai ka̱ci ka̱va̱ adama a na n yeve ugboji n ujari koɓolo n tsulau, ama nannai dem ɗa me enei kutono ku wunla̱i ku ɗa.¹⁸Adama a na ugboji wa̱ a̱bunda̱i u tsu tuka̱ ta̱ n una̱mgbuka̱tsuma̱,kuyeve ka̱ a̱bunda̱i ku zuwa ta̱ ka̱ɗu ka vuma kuna̱mgba̱.