Přečtěte si أَعْمَالْ 20

أَعْمَالْ20

بُولِسْ فِي مَقْدُونْيَا واليُونَانْ

¹بَعْدْمَا وْفَاتْ الخُوضَة، عَيِّطْ بُولِسْ لِلتْلَامْذَة وشَجِّعْهُمْ، ومْبَعِّدْ وَدَّعْهُمْ وسَافِرْ لْمَقْدُونْيَا.²وقْعَدْ يْدُورْ فِيهَا ويْشَجَّعْ بَرْشَة فِي المُؤْمْنِينْ فِي كُلْ بْلَاصَة. ومْبَعِّدْ وْصُلْ لِليُونَانْ،³وقْعَدْ فِيهَا ثْلَاثَة شْهُرْ. وَقْتِلِّي كَانْ يْحَضِّرْ فِي رُوحُو بَاشْ يْسَافِرْ لْسُورْيَة عْلَى طْرِيقْ البْحَرْ، كَانُوا اليْهُودْ يْخَطِطُوا بَاشْ يُقْتْلُوهْ، يَاخِي قَرِّرْ بَاشْ يِرْجَعْ عْلَى طْرِيقْ مَقْدُونِيَّة.⁴وسَافِرْ مْعَاهْ سُوبَاتْرُسْ وِلْدْ بِرُّسْ مِنْ بِيرِيَّة، وأَرِسْتَرْخُسْ وسَكُونْدُسْ مِنْ تْسَالُونِيكِي، وغَايُوسْ وتِيمُوثَاوُسْ مِنْ مْدِينِةْ دَرْبَة، وتِيخِيكُسْ وتُرُوفِيمُسْ مِنْ آسِيَّا.⁵هَاذُومَا سِبْقُونَا وقَعْدُوا يِسْتَنَّاوْ فِينَا فِي تَرُوَاسْ.⁶آمَا أَحْنَا سَافِرْنَا عْلَى طْرِيقْ البْحَرْ مِنْ فِيلِپِّي بَعْدْ عِيدْ الفْطِيرْ، وبَعْدْ خَمْسَة أَيَّامْ خْلَطْنَا عْلِيهُمْ لْتَرُوَاسْ، وقْعَدْنَا غَادِي سَبْعَة أَيَّامْ.

بُولِسْ يْقَيِّمْ مِيِّتْ

⁷ونْهَارْ الأَحَدْ، كُنَّا مَلْمُومِينْ بَاشْ نِقْسْمُوا الخُبْزْ ونَاكْلُوا. بْدَا بُولِسْ يُوعِظْ فِي الحَاضْرِينْ، وطَوِّلْ فِي الكْلَامْ حَتَّى لْنُصْفْ اللِّيلْ عْلَى خَاطْرُو كَانْ نَاوِي يْسَافِرْ مِنْ غُدْوَة.⁸والبِيتْ الِّي تْلَمِّينَا فِيهَا فِي الطَّاقْ الفُوقَانِي كَانْ فِيهَا بَرْشَة فْنَارَاتْ.⁹وكَانْ فَمَّة وْلِدْ إِسْمُو أَفْتِيخُوسْ قَاعِدْ عْلَى حَرْفْ الشِّبَّاكْ. كِي بُولِسْ طَوِّلْ فِي الكْلَامْ، غِلْبُو النُّومْ يَاخِي طَاحْ مِالطَّاقْ الثَّالِثْ، وهَزُّوهْ مِيِّتْ.¹⁰يَاخِي هْبَطْ بُولِسْ وطَبِّسْ عْلِيهْ وعَنْقُو وقَالْ: «مَا تْخَافُوشْ! رَاهُو حَيْ».¹¹وبَعْدْهَا طْلَعْ لِلطَّاقْ الفُوقَانِي، وقْسِمْ الخُبْزْ وكْلَا، وبْقَى يِتْكَلِّمْ حَتَّى لِلفَجْرْ، ومْبَعِّدْ مْشَى.¹²ورَوْحُوا بِالوْلِدْ حَيْ، وهَاذَا شَجَّعْهُمْ بَرْشَة.

بُولِسْ يْوَدَّعْ شْيُوخْ أَفَسُسْ

¹³آمَا أَحْنَا سْبِقْنَا بُولِسْ ورْكِبْنَا فِي سْفِينَةْ لْأَسُّوسْ، واسْتَنِّينَاهْ بَاشْ يْجِي يِرْكِبْ مْعَانَا مِنْ غَادِي، عْلَى خَاطْرُو حَبْ يِمْشِي لْأَسُّوسْ عْلَى سَاقِيهْ.¹⁴وَقْتِلِّي خْلَطْ عْلِينَا، طَلَّعْنَاهْ مْعَانَا فِي السْفِينَة ومْشِينَا لِمْدِينِةْ مِيتِيلِينِي.¹⁵ومِنْ غُدْوَة كَمِّلْنَا السْفَرْ ووْصُلْنَا قُدَّامْ جَزِيرِةْ خِيُوسْ. وفِي النْهَارْ الثَّالِثْ تْعَدِّينَا بِجْنَبْ جَزِيرِةْ سَامُوسْ. ووْصُلْنَا لْمْدِينِةْ مِيلِيتُسْ فِي النْهَارْ الرَّابَعْ.¹⁶وكَانْ بُولِسْ مْقَرِّرْ إِنُّو مَا يَاقِفْشْ فِي أَفَسُسْ بَاشْ مَا يْضَيَّعْشْ الوَقْتْ فِي آسِيَّا، فَمَّاشْ مَا يَخْلِطْ عْلَى عِيدْ يُومْ الخَمْسِينْ فِي أُورْشَلِيمْ.

¹⁷ومِنْ مِيلِيتُسْ، بْعَثْ بُولِسْ يِسْتَدْعَى فِي شْيُوخْ كْنِيسِةْ أَفَسُسْ.¹⁸وكِي وُصْلُوا قَالِلْهُمْ: «إِنْتُومَا تَعْرْفُوا كِيفَاشْ كُنْتْ نِتْصَرِّفْ مْعَاكُمْ طُولْ الوَقْتْ الِّي عَدِّيتُو بِينَاتْكُمْ، مِالنْهَارْ الأُوِّلْ الِّي عْفَسْتْ فِيهْ آسِيَّا.¹⁹وكُنْتْ نِخْدِمْ فِي الرَّبْ بْكُلْ تَوَاضُعْ وبَرْشَة دْمُوعْ، ونْقَاسِي فِي المْحَايِنْ فِي جُرِّتْ مُؤَامْرَاتْ اليْهُودْ.²⁰ومَا قَصِّرْتِشْ فِي حَتَّى حَاجَة تْفِيدْكُمْ. بِالعَكْسْ، كُنْتْ نْشَجَّعْ فِيكُمْ ونْعَلِّمْ فِيكُمْ قُدَّامْ النَّاسْ ومِنْ دَارْ لْدَارْ.²¹وكُنْتْ نْشَجَّعْ فِي اليْهُودْ ولِّي مُشْ يْهُودْ بَاشْ يْتُوبُوا ويِرْجْعُوا لِلَّهْ، ويَمْنُوا بْرَبْنَا يَسُوعْ.²²وآنَا تَوَّا بِشْ نْطِيعْ الرُّوحْ القُدُسْ ونِمْشِي لْأُورْشَلِيمْ، ومَا نَعْرِفْشْ شْنُوَّة الِّي يِسْتَنَّى فِيَّا غَادِي.²³آمَا فِي كُلْ مْدِينَة نِمْشِيلْهَا، الرُّوحْ القُدُسْ يْقُلِّي إِنُّو الحَبْسْ والمَشَاكِلْ يِسْتَنَّاوْ فِيَّا غَادِي.²⁴آنَا حْيَاتِي مَا تْهِمْنِيشْ، الِّي يْهِمْنِّي هُوَّ إِنِّي نْقُومْ بْمُهِمْتِي ونْكَمِّلْ الخِدْمَة الِّي كَلَّفْنِي بِيهَا الرَّبْ يَسُوعْ، وهِيَّ إِنِّي نْخَبِّرْ بِبْشَارِة نِعْمِةْ اللَّهْ.²⁵وآنَا نَعْرِفْ إِنْكُمْ إِنْتُومَا الِّي كُنْتْ فِي وِسْطْكُمْ نْبَشِّرْ بْمَمْلِكْةْ اللَّهْ مَا عَادِشْ بِشْ تْشُوفُوا وِجْهِي مَرَّة أُخْرَى.²⁶هَاذَاكَا عْلَاشْ نْقُلْكُمْ اليُومْ بِلِّي آنَا بَرِيءْ مِنْ دَمْكُمْ، كَانْ وَاحِدْ مِنْكُمْ مَا يِنْجَاشْ،²⁷عْلَى خَاطِرْنِي مَا خَبِّيتْ عْلِيكُمْ شَيْ مِنْ خُطِّةْ اللَّهْ.²⁸مَالَا رُدُّوا بَالْكُمْ عْلَى رْوَاحْكُمْ وعْلَى شَعْبْ اللَّهْ الكُلْ الِّي حَطْكُمْ الرُّوحْ القُدُسْ مَسْؤُولِينْ عْلِيهْ، بَاشْ تِتْلْهَاوْ بِكْنِيسِةْ اللَّهْ الِّي شْرَاهَا بْدَمُّو.

²⁹«وآنَا نَعْرِفْ الِّي بَعْدْمَا نِمْشِي بِشْ يُدْخْلُوا بِينَاتْكُمْ نَاسْ كِالذْيُوبَة المِتْوَحْشَة ومُشْ بِشْ يِرْفْقُوا بْشَعْبْ اللَّهْ.³⁰ويُخْرْجُوا مِنْكُمْ نَاسْ يْبَدْلُوا الحَقْ فِي تَعْلِيمْهُمْ بَاشْ يْجُرُّوا التْلَامْذَة وْرَاهُمْ.³¹مَالَا رُدُّوا بَالْكُمْ، وتْذَكْرُوا كِيفَاشْ قْعَدْتْ ثْلَاثَة سْنِينْ وآنَا انَّبَّهْ فِي كُلْ وَاحِدْ فِيكُمْ نْهَارْ ولِيلْ وآنَا نِبْكِي بِالدْمُوعْ.

³²«وتَوَّا نْخَلِّيكُمْ فِي وْدِيعِةْ رَبِّي، وكِلْمِةْ نِعْمْتُو القَادْرَة بَاشْ تِبْنِيكُمْ وتُضِمْنِلْكُمْ مِيرَاثْ مْعَ قِدِّيسِينْ اللَّهْ الكُلْ.³³آنَا عُمْرِي مَا اشْتْهِيتْ لَا فُضَّة ولَا ذْهَبْ ولَا لِبْسَة حَدْ.³⁴وإِنْتُومَا تَعْرْفُوا الِّي آنَا خْدِمْتْ بِيدَيَّا هَاذُمْ بَاشْ نُصْرُفْ عْلَى رُوحِي وعَالنَّاسْ الِّي مْعَايَا.³⁵ووَرِّيتْكُمْ كِيفَاشْ يِلْزِمْنَا نِخْدْمُوا ونِتْعْبُوا بَاشْ نْعَاوْنُوا المِحْتَاجِينْ. اتْفَكْرُوا كْلَامْ الرَّبْ يَسُوعْ وَقْتِلِّي قَالْ: "الِّي يَعْطِي يِتْبَارِكْ أَكْثِرْ مِلِّي يَاخُذْ"».

³⁶وبَعْدْمَا قَالْ الكْلَامْ هَاذَا، رْكَعْ مْعَاهُمْ الكُلْ وصَلَّى.³⁷واطَّرْشْقُوا الكُلْ بِالبْكَاء، وتِرْمَاوْ عْلَى بُولِسْ يْعَنْقُوا ويْبُوسُوا فِيهْ.³⁸وأَكْثِرْ حَاجَة حَزْنِتْهُمْ كِي قَالِلْهُمْ الِّي مَا عَادِشْ بِشْ يْشُوفُوهْ مَرَّة أُخْرَى. ومْبَعِّدْ شَيْعُوهْ لِلسْفِينَة.