KOCEA12
1Gin ducu ma lutela pa jo Icrael gitiyo cake wa odiko nio kwede wa i otyeno obedo gin ma konygi peke liweng. Gin gimede ameda ki ticgi me nyayo goba ki tim bwami keken; giketo gicike ki jo Aciria, dok gitero moo jeituni wa i Ejipt pi yenyo kony ki botgi.2Rwot tye ki kop ikom Juda, en biketo can ikom Yakobo ma oporo kite, dok bene bicule marom ki tim ma mere.3Kare ma kwarogi Yakobo onongo tye i ic, en omako opuny tyen omine obedo kalweny ki omine Ecau, ka dong oteggi, olwenyo ki Lubanga.4Olwenyo ki lamalaika, ci oloyo, obako doge bot lamalaika ki pig wange. Dok orwate ki Lubanga i Betel, ci Lubanga oloko kwede kikunu.5En Rwot Lubanga me mony, ma nyinge Rwot.6Pimeno in dong idwog cen bot Lubangani wek okonyi. Mok ikom mar ki tiyo gin matye atir, kun ikuru Lubangani kare ducu.”7Rwot waco ni, “Jo Icrael gubedo calo lucatwil ma gitye ki lapim ma pe pimo kakare, gimaro bumu dano.8Jo Icrael giwake kun giwaco ni, ‘Nen wan lulonyo, wanongo limwa giwa ki wiwa; ma ngat mo pe matwero dotowa ni wanongo lonyowa ki tim me buma.’9Ento an a Rwot Lubangawu ma akelowu nia wa ki i lobo Ejipt; abimiyo wubibutu i kema dok aye, macalo ikare ma wutye i tim. 10Yam aloko bot lunebi, an aye ma amiyo ginanyuta onya odoko madwong, dok amiyo carolok kati ki bot lunebi.11Giworo cal twoni i Gilead, pimeno jo ducu ma worogi gibitum woko ducu liweng; gityero twoni me gitum i Gilgal, keno tyergi bene bidoko calo gweng ma odure ma kiguro i poto ma kipuru.12Yakobo yam oringo ocito wa i lobo Aram, Icrael con otiyo tic kunu pi nyomo dako, en yam okwayo romi wek enong dako.13Rwot yam ocwalo lanebi me laro Yakobo woko ki i Ejipt, dok omiyo lanebi ogwoke.14Jo Icrael dong gungeto cwiny Rwot matek omiyo kiniga omake; man omiyo kibingolo to iwigi gire pi balgi ducu. Rwotgi bipwodogi pi cac ducu ma gukelo ikome.”
Bible Society of Uganda