اقرأ 𐴔𐴡𐴃𐴞 27

𐴔𐴡𐴃𐴞27

𐴉𐴞𐴓𐴝𐴃𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤

¹𐴎𐴠𐴣𐴃𐴧𐴠𐴥 𐴁𐴞𐴀𐴕𐴧𐴝 𐴀𐴡𐴥𐴘𐴧𐴠, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴡𐴌 𐴔𐴟𐴌𐴟𐴁𐴧𐴞 𐴁𐴠𐴒𐴧𐴟𐴥𐴕𐴠 𐴔𐴞𐴓𐴞 𐴏𐴡𐴥𐴓𐴧𐴝 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴏𐴝𐴤𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝.²𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴁𐴝𐴣𐴊𐴞𐴥 𐴓𐴡𐴘𐴎𐴝𐴘 𐴇𐴝𐴥𐴑𐴞𐴔 𐴉𐴞𐴓𐴝𐴃𐴡𐴌𐴠 𐴒𐴡𐴏𐴝𐴥𐴘𐴊𐴞𐴘𐴠.

𐴘𐴡𐴇𐴟𐴥𐴊𐴝𐴌 𐴔𐴡𐴦𐴃𐴢

³𐴎𐴠𐴣𐴃𐴧𐴠𐴥 𐴘𐴡𐴇𐴟𐴥𐴊𐴝, 𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌𐴠 𐴊𐴡𐴥𐴌𐴞𐴊𐴞𐴘𐴠, 𐴀𐴞𐴥𐴃𐴠 𐴊𐴠𐴙𐴑𐴧𐴠𐴥 𐴊𐴠 𐴀𐴞𐴥𐴁𐴝𐴓𐴧𐴝 𐴔𐴡𐴦𐴃𐴡𐴌 𐴇𐴡𐴥𐴑𐴟𐴔 𐴀𐴡𐴥𐴘𐴧𐴠, 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴠 𐴁𐴞𐴐𐴞𐴤 𐴀𐴝𐴉𐴏𐴟𐴥𐴏𐴢 𐴇𐴝𐴥𐴘 𐴃𐴞𐴌𐴞𐴥𐴐𐴧𐴗𐴝 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴒𐴟𐴥𐴕 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴞𐴥𐴌𐴝𐴘𐴊𐴞⁴𐴈𐴡𐴀𐴌 𐴊𐴠, ”𐴀𐴝𐴀𐴛 𐴁𐴠𐴈𐴡𐴏𐴟𐴥𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴊𐴡𐴥𐴌𐴞𐴊𐴞 𐴒𐴟𐴕𐴝𐴤 𐴒𐴡𐴙𐴅𐴧𐴞𐴥.“
𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝𐴌 𐴑𐴞𐴦 𐴀𐴡𐴥𐴘𐴧𐴠؟ 𐴇𐴞𐴥𐴘𐴝𐴕 𐴃𐴟𐴘 𐴁𐴟𐴎𐴡𐴥𐴏𐴢.“

⁵𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴠 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴒𐴟𐴥𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴟𐴥𐴃𐴡𐴌𐴠 𐴔𐴠𐴓𐴝𐴤𐴔𐴝𐴌𐴞 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴎𐴝𐴘 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴉𐴝𐴥𐴣𐴐𐴞 𐴇𐴝𐴥𐴘𐴉𐴠𐴓𐴝𐴘𐴧𐴠.

⁶𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴒𐴟𐴥𐴕 𐴓𐴡𐴦𐴘𐴢 𐴈𐴡𐴀𐴌 𐴊𐴠, ”𐴀𐴞𐴀𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴝𐴐𐴧𐴟𐴤𐴃𐴢 𐴌𐴝𐴑𐴡𐴥𐴕 𐴎𐴝𐴘𐴠𐴏𐴢 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴀𐴕 𐴓𐴡𐴖𐴢 𐴖𐴡𐴥𐴌 𐴊𐴝𐴔.“⁷𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴁𐴞𐴘𐴝𐴏𐴝𐴕𐴝 𐴒𐴡𐴌𐴞𐴥, 𐴁𐴞𐴊𐴠𐴐𐴡𐴥𐴙𐴃𐴧𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴈𐴡𐴁𐴡𐴌𐴡𐴏𐴃𐴝𐴥𐴕 𐴁𐴝𐴕𐴝𐴘 𐴁𐴡𐴓𐴧𐴝 𐴇𐴠𐴥 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴒𐴟𐴥𐴕 𐴓𐴡𐴥𐴘 𐴑𐴟𐴀𐴝𐴥𐴣𐴙𐴅𐴧𐴝𐴌 𐴎𐴡𐴁𐴞𐴕 𐴕𐴝𐴥𐴕 𐴑𐴞𐴕𐴧𐴠𐴥.⁸𐴇𐴠𐴥𐴃𐴡𐴓𐴧𐴝 𐴇𐴠𐴥 𐴎𐴝𐴒𐴝 𐴒𐴝𐴥𐴕𐴡𐴌𐴠 𐴀𐴝𐴙𐴅 𐴉𐴡𐴙𐴅𐴧𐴡𐴕𐴃𐴡 𐴓𐴡𐴖𐴢 𐴖𐴡𐴌 𐴎𐴝𐴒𐴝 𐴈𐴡𐴀𐴘𐴢 𐴋𐴝𐴑𐴠.⁹𐴇𐴞𐴥𐴘𐴝𐴕𐴠, 𐴕𐴡𐴁𐴞 𐴘𐴝𐴌𐴔𐴞𐴥𐴘𐴝𐴌 𐴊𐴟𐴖𐴝𐴌𐴝 𐴈𐴡𐴖𐴝𐴤 𐴒𐴞𐴥𐴀𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥𐴘𐴧𐴠, ”𐴀𐴞𐴥𐴃𐴝𐴌𐴝 𐴇𐴠𐴥 𐴃𐴞𐴌𐴞𐴥𐴐𐴧𐴗𐴝 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴒𐴟𐴥𐴕 𐴓𐴡𐴘𐴧𐴠𐴥, 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤𐴌 𐴊𐴝𐴔, 𐴎𐴞𐴁𐴝𐴤𐴌 𐴊𐴡𐴌 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴠 𐴄𐴞𐴥𐴑 𐴒𐴡𐴙𐴅𐴧𐴞𐴥𐴓𐴢;¹⁰𐴀𐴝𐴦𐴌 𐴀𐴞𐴥𐴃𐴝𐴌𐴝 𐴇𐴞𐴥𐴀𐴕𐴡𐴌𐴠 𐴑𐴟𐴀𐴝𐴥𐴣𐴙𐴅𐴧𐴝𐴌 𐴎𐴡𐴁𐴞𐴕 𐴕𐴝𐴥𐴕 𐴑𐴞𐴕𐴝𐴃𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴅𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴔𐴝𐴁𐴟𐴊𐴠 𐴀𐴝𐴣𐴀𐴌𐴠𐴥 𐴇𐴡𐴥𐴑𐴟𐴔 𐴊𐴞𐴥𐴘𐴠.“

𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴏𐴟𐴥𐴖𐴝𐴓𐴢 𐴒𐴡𐴙𐴅𐴧𐴠𐴥

¹¹𐴀𐴞𐴏𐴝𐴤 𐴇𐴝𐴥𐴑𐴞𐴔 𐴉𐴞𐴓𐴝𐴃𐴡𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢, 𐴇𐴝𐴥𐴑𐴞𐴔𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝 𐴕𐴞𐴥𐴑𐴞؟“
𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥𐴘, 𐴃𐴟𐴀𐴛 𐴈𐴡𐴀𐴌 𐴊𐴠 𐴇𐴠𐴥𐴕𐴊𐴞𐴓𐴧𐴝.“

¹²𐴔𐴡𐴕𐴃𐴡𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴠 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴒𐴟𐴥𐴕𐴠 𐴀𐴞𐴥𐴁𐴝𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴥𐴁𐴝𐴘𐴠 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴕𐴡𐴥 𐴊𐴠𐴥.¹³𐴇𐴠𐴥𐴃𐴟𐴕𐴡𐴃𐴢 𐴉𐴞𐴓𐴝𐴃𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴕𐴡 𐴉𐴟𐴥𐴕𐴡𐴌 𐴕𐴞𐴥𐴑𐴞 𐴀𐴞𐴃𐴝𐴌𐴝𐴤 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴇𐴡𐴊𐴟𐴥𐴕 𐴒𐴡𐴁𐴝𐴤 𐴊𐴠𐴥𐴌؟“¹⁴𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴑𐴧𐴝𐴥𐴕 𐴀𐴠𐴓𐴎𐴝𐴔𐴡𐴌 𐴀𐴟𐴥𐴊𐴧𐴗𐴝 𐴎𐴟𐴖𐴝𐴁𐴢 𐴕𐴡𐴥 𐴊𐴠, 𐴇𐴠𐴥𐴃𐴡𐴓𐴧𐴝 𐴇𐴝𐴥𐴑𐴞𐴔 𐴀𐴠𐴁𐴧𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘.

𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴇𐴡𐴥𐴑𐴟𐴔

¹⁵𐴇𐴝𐴥𐴑𐴞𐴔𐴡𐴌 𐴕𐴞𐴘𐴡𐴔 𐴀𐴡𐴥𐴙𐴓𐴊𐴠, 𐴉𐴡𐴃𐴧𐴞𐴥 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴀𐴡𐴑𐴃𐴡𐴥𐴃𐴢 𐴔𐴝𐴙𐴕𐴐𐴠𐴥 𐴎𐴠 𐴇𐴡𐴊𐴞𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴃𐴡 𐴈𐴡𐴀 𐴇𐴠𐴥 𐴇𐴡𐴊𐴞𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴡𐴕.¹⁶𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴥𐴎𐴧𐴡𐴕 𐴕𐴝𐴔 𐴈𐴡𐴥𐴌𐴝𐴉𐴢 𐴔𐴡𐴐𐴟𐴥𐴌 𐴇𐴡𐴊𐴞 𐴀𐴝𐴐𐴧𐴞𐴥𐴓𐴢, 𐴎𐴝𐴌 𐴕𐴝𐴔 𐴁𐴝𐴥𐴌𐴝𐴁𐴧𐴝.¹⁷𐴇𐴠𐴥𐴃𐴡𐴓𐴧𐴝, 𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝 𐴀𐴡𐴥𐴘𐴧𐴠, 𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴣𐴀𐴌𐴠𐴥 𐴇𐴝𐴌𐴠𐴤 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴁𐴝𐴘𐴃𐴡𐴥 𐴔𐴡𐴕𐴠𐴈𐴡𐴀𐴌, 𐴁𐴝𐴥𐴌𐴝𐴁𐴧𐴝𐴌𐴠 𐴕𐴠𐴥, 𐴕𐴝𐴥𐴑𐴞 𐴀𐴞𐴏𐴝𐴤 𐴌𐴠, 𐴎𐴞𐴁𐴝𐴤𐴌𐴠 𐴔𐴡𐴀𐴏𐴞𐴤 𐴈𐴡𐴀؟“¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴞𐴓𐴝𐴃𐴠 𐴎𐴝𐴙𐴕𐴃𐴡 𐴊𐴠, 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴇𐴝𐴥𐴏𐴡𐴌𐴡𐴃𐴢 𐴒𐴡𐴥𐴌𐴞 𐴒𐴡𐴏𐴝𐴥𐴘𐴊𐴞𐴘𐴠 𐴊𐴠.

¹⁹𐴉𐴞𐴓𐴝𐴃𐴢 𐴁𐴞𐴏𐴝𐴌𐴡𐴌 𐴃𐴡𐴑𐴃𐴡𐴥𐴌 𐴖𐴡𐴌𐴠 𐴁𐴡𐴀𐴘𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴘𐴡𐴥𐴒𐴧𐴗𐴝𐴌 𐴁𐴡𐴖𐴢 𐴖𐴠𐴥 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴈𐴡𐴥𐴁𐴡𐴌 𐴉𐴡𐴀𐴣𐴏𐴝𐴘𐴧𐴠 𐴊𐴠, ”𐴇𐴠𐴥 𐴁𐴠𐴈𐴡𐴏𐴟𐴥𐴌 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴑𐴠𐴏𐴧𐴟𐴥 𐴕𐴡 𐴒𐴡𐴌𐴞𐴥𐴘𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴠𐴓𐴢 𐴊𐴠 𐴌𐴝𐴙𐴃𐴧𐴝 𐴀𐴝𐴀𐴛 𐴐𐴡𐴥𐴂𐴧𐴡𐴕𐴡𐴃𐴢 𐴀𐴞𐴥𐴁𐴝𐴌 𐴎𐴡𐴌𐴞𐴘𐴝 𐴁𐴞𐴐𐴞𐴤 𐴊𐴟𐴑 𐴉𐴝𐴘𐴧𐴞𐴥.“

²⁰𐴓𐴠𐴑𐴞𐴕 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴠 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌𐴠 𐴀𐴟𐴏𐴑𐴝𐴘𐴊𐴞𐴘𐴠𐴥 𐴊𐴠, 𐴁𐴝𐴥𐴌𐴝𐴁𐴧𐴝𐴌𐴠 𐴔𐴝𐴒𐴞 𐴁𐴡𐴓𐴧𐴝 𐴀𐴝𐴦𐴌 𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴇𐴡𐴘 𐴁𐴡𐴓𐴧𐴝.

²¹𐴇𐴝𐴥𐴑𐴞𐴔𐴠 𐴀𐴝𐴁𐴝𐴌 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴠 𐴊𐴟𐴕𐴞𐴥 𐴎𐴡𐴕𐴡𐴃𐴧𐴟 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴣𐴀𐴌𐴠𐴥 𐴇𐴝𐴌𐴠𐴤 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴁𐴝𐴘𐴃𐴡𐴥 𐴔𐴡𐴕𐴠𐴈𐴡𐴀𐴌؟“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴁𐴝𐴥𐴌𐴝𐴁𐴧𐴝 𐴌𐴠.“

²²𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴞𐴏𐴝𐴤, 𐴎𐴞𐴁𐴝𐴤𐴌𐴠 𐴔𐴡𐴀𐴏𐴞𐴤 𐴈𐴡𐴀, 𐴀𐴞𐴥𐴁𐴝𐴌𐴠 𐴀𐴝𐴀𐴛 𐴑𐴞𐴦 𐴒𐴡𐴙𐴃𐴧𐴝𐴥𐴔؟“
𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡!“

²³𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴑𐴞𐴘𐴝𐴥, 𐴀𐴞𐴥𐴁𐴝𐴘𐴠 𐴑𐴞𐴦 𐴁𐴟𐴌𐴝 𐴒𐴡𐴙𐴅𐴧𐴠𐴥 𐴊𐴠𐴥؟“
𐴃𐴡𐴀 𐴀𐴞𐴥𐴃𐴝𐴌𐴝 𐴀𐴝𐴌𐴡𐴤 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢, ”𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡!“

²⁴𐴁𐴝𐴦𐴊𐴠 𐴉𐴞𐴓𐴝𐴃𐴠 𐴊𐴠𐴑𐴠𐴥𐴌 𐴊𐴠, 𐴘𐴡𐴥𐴒𐴧𐴗𐴝𐴘𐴠 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴕𐴡 𐴉𐴝𐴌𐴠𐴌, 𐴁𐴡𐴥𐴓𐴑𐴠 𐴀𐴟𐴥𐴌𐴟𐴏𐴧𐴟𐴓𐴢 𐴐𐴟𐴥𐴌𐴟 𐴀𐴡𐴥𐴘𐴎𐴝𐴌𐴒𐴡𐴘, 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴘𐴠 𐴉𐴝𐴕𐴞𐴥 𐴓𐴡𐴦𐴘𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴕𐴞𐴎𐴡𐴌 𐴀𐴝𐴥𐴃𐴢 𐴊𐴟𐴥𐴘𐴉𐴠𐴓𐴝𐴘 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴓𐴡𐴖𐴢 𐴖𐴡𐴥𐴌 𐴎𐴞𐴔𐴧𐴝 𐴀𐴝𐴀𐴛 𐴕𐴡; 𐴇𐴞𐴥𐴘𐴝𐴕𐴡𐴌 𐴎𐴟𐴖𐴝𐴁𐴢 𐴃𐴟𐴣𐴀𐴝𐴥𐴌𐴝 𐴁𐴠 𐴊𐴞𐴁𐴝.“

²⁵𐴇𐴠𐴥𐴃𐴟𐴕𐴡𐴃𐴢 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴌 𐴓𐴡𐴖𐴢 𐴖𐴡𐴥𐴌 𐴎𐴞𐴔𐴧𐴝 𐴀𐴝𐴣𐴀𐴌𐴝 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴉𐴟𐴀𐴝𐴙𐴕 𐴀𐴡𐴥𐴘𐴧𐴟𐴔!“

²⁶𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴁𐴝𐴥𐴌𐴝𐴁𐴧𐴝𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴠; 𐴔𐴡𐴕𐴃𐴡𐴌 𐴀𐴞𐴏𐴝𐴤𐴌𐴠 𐴐𐴡𐴀𐴣𐴑 𐴔𐴝𐴌𐴝𐴁𐴝𐴘 𐴁𐴝𐴦𐴊𐴠, 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴁𐴡𐴓𐴧𐴝 𐴒𐴡𐴏𐴝𐴥𐴘 𐴊𐴞𐴥𐴉𐴠𐴓𐴝𐴘𐴧𐴠.

𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴃𐴠𐴥𐴐𐴠𐴌𐴝𐴘𐴧𐴠

²⁷𐴁𐴝𐴦𐴊𐴠 𐴇𐴝𐴥𐴑𐴞𐴔𐴡𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴘𐴡𐴥𐴒𐴧𐴗𐴝𐴌 𐴔𐴡𐴇𐴡𐴥𐴓𐴡𐴌 𐴁𐴟𐴥𐴃𐴡𐴌𐴠 𐴓𐴡𐴘𐴒𐴞𐴘𐴠𐴥, 𐴀𐴝𐴦𐴌 𐴄𐴠𐴀𐴌𐴝𐴚 𐴄𐴞𐴥𐴘𐴝𐴌𐴠 𐴀𐴞𐴥𐴁𐴝𐴌 𐴏𐴝𐴘𐴌𐴡𐴥𐴑𐴟𐴓𐴃𐴟 𐴎𐴡𐴔𐴝 𐴒𐴡𐴙𐴅𐴧𐴠𐴥.²⁸𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴒𐴝𐴙𐴌𐴡𐴌 𐴇𐴡𐴦𐴌 𐴑𐴟𐴥𐴓𐴞𐴉𐴠𐴓𐴝𐴘 𐴀𐴞𐴥𐴁𐴝𐴌𐴠 𐴀𐴠𐴒𐴧𐴗𐴝𐴤 𐴓𐴝𐴓𐴢 𐴌𐴡𐴚𐴡𐴌 𐴎𐴟𐴁𐴧𐴝 𐴉𐴞𐴣𐴊𐴝𐴥𐴘𐴊𐴞𐴘𐴠.²⁹𐴀𐴞𐴥𐴃𐴝𐴌𐴝 𐴑𐴠𐴣𐴍𐴝𐴌 𐴀𐴠𐴒𐴧𐴗𐴝𐴤 𐴃𐴝𐴏𐴢 𐴁𐴝𐴕𐴝𐴘 𐴁𐴝𐴦𐴊𐴠 𐴀𐴞𐴥𐴁𐴝𐴌 𐴔𐴝𐴃𐴝𐴥𐴃𐴢 𐴊𐴞𐴘𐴝𐴘𐴊𐴞𐴘𐴠𐴥, 𐴀𐴝𐴦𐴌 𐴊𐴠𐴕 𐴀𐴝𐴥𐴃𐴡𐴃𐴢 𐴀𐴠𐴒𐴧𐴗𐴝𐴤 𐴓𐴝𐴍𐴞𐴥 𐴊𐴡𐴥𐴌𐴝𐴊𐴞𐴘𐴠. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴀𐴝𐴣𐴍𐴟𐴥𐴌 𐴃𐴡𐴥𐴑 𐴊𐴞𐴥 𐴀𐴞𐴥𐴁𐴝𐴌𐴠 𐴄𐴝𐴥𐴃𐴄𐴝𐴘 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴇𐴠𐴥𐴘 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝, 𐴃𐴡𐴌𐴠𐴥 𐴏𐴡𐴥𐴓𐴝𐴔!“³⁰𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴠𐴥𐴂𐴢 𐴔𐴝𐴙𐴅𐴧𐴠𐴥 𐴀𐴠𐴊𐴧𐴠 𐴓𐴝𐴍𐴞𐴥 𐴖𐴝 𐴓𐴡𐴦𐴘𐴢 𐴀𐴞𐴥𐴁𐴝𐴌 𐴔𐴝𐴃𐴝𐴥 𐴏𐴝𐴥𐴘 𐴁𐴝𐴌𐴞 𐴔𐴝𐴙𐴅𐴧𐴠𐴥.³¹𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴄𐴝𐴥𐴃𐴄𐴝𐴘 𐴒𐴡𐴌𐴞𐴥 𐴁𐴝𐴦𐴊𐴠, 𐴀𐴞𐴥𐴁𐴝𐴃𐴧𐴟 𐴓𐴝𐴓𐴢 𐴌𐴡𐴚𐴡𐴌 𐴎𐴟𐴁𐴧𐴝 𐴖𐴝 𐴑𐴟𐴥𐴓𐴞𐴉𐴠𐴓𐴝𐴘 𐴀𐴞𐴥𐴁𐴝𐴌 𐴇𐴡𐴦𐴌 𐴀𐴞𐴥𐴁𐴝𐴌𐴠 𐴉𐴞𐴣𐴊𐴝𐴥𐴘𐴊𐴞𐴘𐴠; 𐴁𐴝𐴦𐴊𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴁𐴡𐴓𐴧𐴝 𐴓𐴡𐴘𐴒𐴞𐴘𐴠𐴥𐴒𐴡𐴘.

𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝𐴘𐴧𐴠

³²𐴀𐴞𐴥𐴃𐴝𐴌𐴝 𐴐𐴡𐴥𐴀𐴌𐴡𐴃𐴧𐴟 𐴁𐴝𐴀𐴌𐴠 𐴕𐴠𐴦𐴓𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴑𐴟𐴌𐴠𐴕𐴞 𐴐𐴡𐴥𐴀𐴌𐴡𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥 𐴎𐴞𐴁𐴝𐴤𐴌 𐴕𐴝𐴔 𐴏𐴝𐴥𐴘𐴔𐴡𐴕; 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴀𐴞𐴏𐴝𐴤𐴌 𐴑𐴟𐴥𐴌𐴟𐴐𐴢 𐴐𐴝𐴕 𐴁𐴡𐴀𐴘𐴢 𐴓𐴡𐴘𐴎𐴝𐴘 𐴁𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴙𐴅𐴧𐴠𐴥.³³𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴒𐴡𐴓𐴒𐴡𐴃𐴝 𐴕𐴝𐴔𐴡𐴌 𐴀𐴠𐴑𐴧𐴝𐴥𐴕 𐴎𐴝𐴒𐴝𐴃𐴢, 𐴘𐴝𐴥𐴕𐴞 𐴔𐴝𐴃𐴝𐴥𐴌 𐴔𐴝𐴓𐴝𐴌 𐴎𐴝𐴒𐴝𐴃𐴢 𐴉𐴡𐴀𐴣𐴙𐴐𐴧𐴠,³⁴𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴃𐴞𐴃𐴝 𐴅𐴞𐴕𐴞𐴥𐴐𐴢 𐴔𐴞𐴘𐴝𐴥𐴘𐴧𐴝 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴈𐴝𐴥𐴘𐴃𐴡 𐴊𐴞𐴦𐴘𐴠𐴥; 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴇𐴝𐴥𐴘 𐴏𐴝𐴀𐴘𐴢 𐴕𐴝𐴥 𐴈𐴝𐴥𐴀.³⁵𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝𐴘 𐴁𐴝𐴦𐴊𐴠, 𐴓𐴡𐴄𐴝𐴥𐴌𐴞 𐴔𐴝𐴌𐴞 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴞𐴥𐴁𐴝𐴌 𐴇𐴡𐴦𐴌𐴏𐴟𐴖𐴡𐴌𐴡𐴌𐴠 𐴁𐴝𐴥𐴑 𐴒𐴡𐴙𐴅𐴧𐴠𐴥.³⁶𐴀𐴝𐴦𐴌 𐴇𐴠𐴥𐴍𐴠 𐴁𐴡𐴀𐴘𐴢 𐴃𐴝𐴥𐴑𐴞 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴡𐴦𐴛 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.³⁷𐴀𐴞𐴥𐴁𐴝𐴌 𐴔𐴝𐴃𐴝𐴥𐴌 𐴖𐴡𐴃𐴧𐴟𐴥 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴀𐴠 𐴈𐴡𐴏𐴟𐴥𐴌𐴞 𐴒𐴝𐴥𐴕 𐴏𐴝𐴥𐴀𐴘𐴕𐴁𐴟𐴥𐴄𐴢 𐴔𐴝𐴌𐴞𐴊𐴞𐴘𐴠, 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤, 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝.“

³⁸𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴊𐴟𐴘 𐴎𐴡𐴕 𐴋𐴝𐴈𐴝𐴣𐴙𐴄𐴡𐴌𐴠 𐴘𐴡𐴥 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴓𐴢, 𐴀𐴠𐴎𐴧𐴡𐴕𐴡𐴌𐴠 𐴀𐴞𐴥𐴁𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴀𐴠𐴊𐴧𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴀𐴞𐴥𐴁𐴝𐴌 𐴁𐴝𐴕 𐴋𐴝𐴥𐴑 𐴀𐴡𐴃𐴧𐴟.³⁹𐴀𐴝𐴦𐴌 𐴎𐴠𐴃𐴝𐴌𐴝𐴤 𐴇𐴠𐴥 𐴉𐴡𐴣𐴃𐴢 𐴁𐴝𐴥𐴘 𐴎𐴝𐴦𐴌, 𐴀𐴞𐴥𐴃𐴝𐴌𐴝 𐴔𐴝𐴃𐴝𐴥 𐴓𐴝𐴌𐴞-𐴓𐴝𐴌𐴞 𐴀𐴞𐴥𐴁𐴝𐴌𐴠 𐴃𐴠𐴥𐴐𐴠𐴌𐴝𐴘⁴⁰𐴈𐴡𐴀𐴌 𐴊𐴠, ”𐴃𐴟𐴘 𐴃𐴡 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴁𐴝𐴥𐴚𐴒𐴞 𐴃𐴞𐴕 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴁𐴝𐴌 𐴁𐴝𐴕𐴝𐴘𐴊𐴡𐴘𐴝, 𐴘𐴝𐴓𐴝 𐴃𐴟𐴘 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴝𐴏𐴝 𐴏𐴝𐴥𐴘! 𐴎𐴡𐴊𐴞 𐴃𐴟𐴘 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴠 𐴀𐴡𐴥𐴘𐴓𐴠, 𐴑𐴟𐴥𐴌𐴟𐴐𐴡𐴃𐴧𐴟 𐴓𐴝𐴔𐴞 𐴀𐴝𐴘.“⁴¹𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴋𐴡𐴣𐴀𐴌 𐴀𐴞𐴔𐴝𐴔, 𐴀𐴝𐴓𐴠𐴔 𐴀𐴠𐴊𐴧𐴠 𐴔𐴟𐴌𐴟𐴁𐴧𐴞 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴄𐴝𐴥𐴃𐴄𐴝𐴘 𐴒𐴡𐴌𐴞𐴥 𐴈𐴡𐴀𐴌 𐴊𐴠,⁴²”𐴀𐴞𐴁𐴝𐴤𐴘𐴠 𐴃𐴡 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴁𐴝𐴏𐴝𐴘𐴃𐴡𐴥; 𐴔𐴡𐴕𐴃𐴡𐴌 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴊𐴠 𐴁𐴝𐴏𐴝𐴘 𐴕𐴡 𐴉𐴝𐴌𐴠𐴌! 𐴀𐴞𐴁𐴝𐴤 𐴀𐴞𐴏𐴌𐴝𐴥𐴙𐴓𐴡𐴌 𐴁𐴝𐴀𐴣𐴐𐴧𐴝 𐴕𐴡 𐴕𐴠𐴥, 𐴘𐴝𐴓𐴝 𐴀𐴞𐴁𐴝𐴤 𐴑𐴟𐴥𐴌𐴟𐴐𐴡𐴃𐴧𐴟 𐴓𐴝𐴔𐴞 𐴀𐴝𐴘𐴧𐴡𐴤𐴑, 𐴁𐴝𐴦𐴊𐴠 𐴀𐴝𐴣𐴀𐴌𐴝 𐴀𐴞𐴁𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴘𐴟𐴔.⁴³𐴀𐴞𐴁𐴝𐴤𐴘𐴠 𐴀𐴝𐴓𐴧𐴝𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴌𐴝𐴑𐴠𐴥; 𐴎𐴡𐴊𐴞 𐴀𐴝𐴓𐴧𐴝𐴃𐴧𐴟 𐴔𐴡𐴕𐴠𐴈𐴡𐴀, 𐴃𐴡𐴥𐴀𐴘𐴓𐴠 𐴀𐴠𐴇𐴡𐴥𐴕 𐴀𐴝𐴓𐴧𐴝𐴘𐴠 𐴀𐴞𐴁𐴝𐴤𐴌𐴠 𐴁𐴝𐴏𐴡𐴗𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴝𐴤𐴘𐴠 𐴈𐴡𐴘𐴃𐴡𐴤 𐴊𐴠, ’𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴝𐴓𐴧𐴝𐴌 𐴉𐴟𐴖𐴝.‘ “⁴⁴𐴎𐴠 𐴋𐴝𐴈𐴝𐴣𐴙𐴄𐴢 𐴃𐴟𐴕𐴡𐴌𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝-𐴇𐴠𐴥𐴕𐴊𐴞𐴓𐴧𐴝 𐴈𐴡𐴃𐴝𐴤 𐴈𐴡𐴀𐴘𐴢 𐴀𐴞𐴥𐴁𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴠𐴥.

𐴀𐴞𐴏𐴝𐴤𐴌 𐴔𐴡𐴦𐴃𐴢

⁴⁵𐴇𐴠𐴥 𐴊𐴞𐴕 𐴊𐴟𐴀𐴣𐴙𐴅𐴧𐴝𐴌 𐴁𐴝𐴌𐴡𐴥 𐴖𐴝 𐴁𐴝𐴥𐴎𐴠 𐴓𐴡𐴥𐴃𐴞 𐴃𐴞𐴕 𐴕𐴗𐴝𐴥 𐴁𐴝𐴥𐴎𐴠 𐴉𐴝𐴥𐴕 𐴒𐴟𐴣𐴍𐴝 𐴔𐴟𐴓𐴧𐴟𐴑 𐴀𐴝𐴕𐴊𐴝𐴤𐴌 𐴀𐴡𐴥𐴘 𐴀𐴝𐴐𐴧𐴞𐴥𐴓𐴢.⁴⁶𐴃𐴞𐴕 𐴕𐴗𐴝𐴥 𐴀𐴝𐴥𐴕𐴞𐴑 𐴁𐴝𐴙𐴅𐴧𐴠𐴥 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤𐴘𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴠𐴓𐴞𐴥, 𐴀𐴠𐴓𐴞𐴥, 𐴓𐴝𐴔𐴝𐴥 𐴏𐴝𐴁𐴝𐴑𐴇𐴄𐴝𐴥𐴕𐴞؟“𐴘𐴝𐴥𐴕𐴞, ”𐴀𐴡𐴥 𐴀𐴝𐴣𐴀𐴌 𐴀𐴝𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴀𐴝𐴓𐴧𐴝, 𐴃𐴟𐴀𐴛 𐴀𐴝𐴣𐴀𐴌𐴠𐴥 𐴑𐴞𐴘𐴡𐴥𐴓𐴧𐴝 𐴏𐴝𐴥𐴌𐴞𐴊𐴞𐴘𐴡؟“

⁴⁷𐴇𐴠𐴥𐴍𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴕𐴡𐴁𐴞 𐴀𐴠𐴓𐴞𐴘𐴝𐴏𐴡𐴌𐴠 𐴋𐴝𐴑𐴠𐴌.“

⁴⁸𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴀𐴠𐴑𐴧𐴟𐴥 𐴊𐴟𐴣𐴌𐴠 𐴎𐴝𐴘 𐴀𐴠𐴑𐴧𐴝𐴥𐴕 𐴀𐴠𐴏𐴉𐴡𐴥𐴕𐴅 𐴓𐴡𐴦𐴘𐴢 𐴏𐴞𐴥𐴌𐴑𐴝𐴃𐴢 𐴁𐴟𐴌𐴝𐴘𐴧𐴠𐴥, 𐴀𐴝𐴦𐴌 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴣𐴌 𐴔𐴝𐴃𐴝𐴥𐴃𐴢 𐴁𐴝𐴎𐴝𐴥𐴘𐴊𐴞 𐴀𐴞𐴏𐴝𐴤𐴌𐴠 𐴇𐴝𐴥𐴘 𐴁𐴡𐴓𐴧𐴝 𐴊𐴞𐴦𐴘𐴠𐴥.⁴⁹𐴔𐴡𐴕𐴃𐴡𐴌 𐴀𐴝𐴌𐴒𐴟𐴥𐴕𐴠 𐴈𐴡𐴀𐴌 𐴊𐴠, ”𐴃𐴞𐴥𐴘𐴡, 𐴀𐴞𐴁𐴝𐴤𐴌𐴠 𐴀𐴠𐴓𐴞𐴘𐴝𐴏𐴠 𐴁𐴝𐴏𐴝𐴘𐴃𐴡𐴥 𐴀𐴝𐴘𐴧𐴠𐴤 𐴕𐴠𐴥 𐴏𐴝𐴀𐴘𐴢.“

⁵⁰𐴀𐴞𐴏𐴝𐴤𐴘𐴠 𐴀𐴝𐴁𐴝𐴌 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴒𐴟𐴎𐴡𐴌𐴞 𐴀𐴞𐴥𐴁𐴝𐴌 𐴉𐴡𐴌𐴝𐴕 𐴊𐴞𐴉𐴠𐴥𐴓𐴝𐴘𐴧𐴠.

⁵¹𐴇𐴠𐴥𐴃𐴟𐴕𐴡𐴃𐴢 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴉𐴡𐴌𐴡𐴊𐴝 𐴒𐴝𐴥𐴕 𐴖𐴡𐴃𐴧𐴟𐴥 𐴓𐴡𐴥𐴃𐴞 𐴕𐴞𐴏𐴠 𐴉𐴡𐴙𐴅𐴧𐴡𐴕𐴃𐴡 𐴉𐴝𐴥𐴍𐴞 𐴊𐴟𐴘 𐴁𐴝𐴥𐴑 𐴀𐴡𐴥𐴘𐴒𐴞𐴘𐴡𐴘; 𐴀𐴝𐴦𐴌 𐴎𐴡𐴁𐴞𐴕𐴡𐴃𐴢 𐴁𐴟𐴥𐴏𐴝𐴓𐴢 𐴁𐴝𐴘𐴧𐴠𐴥, 𐴋𐴡𐴣𐴀𐴌-𐴋𐴡𐴣𐴀𐴌 𐴐𐴞𐴥𐴓𐴢 𐴀𐴡𐴥𐴑𐴧𐴡𐴓𐴢 𐴉𐴝𐴥𐴍𐴞𐴒𐴞𐴘𐴡𐴘,⁵²𐴈𐴡𐴁𐴡𐴌 𐴀𐴡𐴥𐴑𐴧𐴡𐴓𐴢 𐴑𐴟𐴥𐴓𐴞𐴒𐴞𐴘𐴡𐴘, 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠.⁵³𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝 𐴈𐴡𐴁𐴡𐴌𐴡𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴒𐴞𐴘𐴡𐴘 𐴀𐴝𐴦𐴌 𐴂𐴝𐴑 𐴐𐴡𐴥𐴀𐴌𐴡𐴃𐴢 𐴎𐴝𐴘 𐴁𐴡𐴀𐴗𐴃𐴢 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴊𐴞𐴘𐴠.

⁵⁴𐴌𐴡𐴔𐴞 𐴐𐴝𐴥𐴀𐴂𐴢 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴉𐴟𐴥𐴖𐴝𐴣𐴃𐴞 𐴎𐴠𐴃𐴝𐴌𐴝𐴤 𐴀𐴞𐴏𐴝𐴤𐴌𐴠 𐴉𐴝𐴀𐴌𐴝 𐴊𐴞𐴥𐴘𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴎𐴠𐴃𐴧𐴡𐴥𐴃𐴢 𐴁𐴟𐴥𐴏𐴝𐴓𐴢 𐴀𐴠𐴊𐴧𐴠 𐴀𐴝𐴌𐴡𐴤 𐴑𐴞𐴦-𐴑𐴞𐴦 𐴀𐴡𐴥𐴌 𐴊𐴠 𐴇𐴞𐴥𐴀𐴕 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘 𐴀𐴝𐴦𐴌 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴀𐴞𐴁𐴝𐴤 𐴀𐴝𐴓𐴧𐴝𐴌 𐴉𐴟𐴖𐴝 𐴀𐴝𐴐𐴧𐴞𐴥𐴓𐴢!“

⁵⁵𐴁𐴡𐴀𐴗𐴃𐴢 𐴁𐴠𐴍𐴞𐴘𐴝𐴥𐴙𐴕 𐴎𐴠𐴃𐴝𐴌𐴝𐴤 𐴒𐴝𐴓𐴞𐴓𐴡𐴃𐴧𐴟 𐴓𐴡𐴥𐴃𐴞 𐴀𐴞𐴏𐴝𐴤𐴌 𐴉𐴞𐴏𐴝𐴥 𐴊𐴡𐴌𐴞 𐴀𐴞𐴥𐴁𐴝𐴌𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴝𐴙𐴐𐴧𐴞𐴤𐴓𐴢, 𐴀𐴞𐴥𐴃𐴝𐴌𐴝 𐴊𐴟𐴌𐴡𐴃𐴧𐴟 𐴒𐴡𐴥𐴌𐴞 𐴇𐴞𐴥𐴀𐴕 𐴏𐴝𐴀𐴘𐴢 𐴃𐴝𐴥𐴙𐴑𐴧𐴞𐴓𐴢.⁵⁶𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴀𐴝𐴐𐴧𐴞𐴥𐴓𐴢, 𐴘𐴝𐴑𐴟𐴁𐴢 𐴀𐴠𐴊𐴧𐴠 𐴘𐴟𐴏𐴟𐴥𐴉𐴡𐴌 𐴔𐴝𐴦 𐴔𐴡𐴌𐴞𐴘𐴝𐴔 𐴀𐴝𐴐𐴧𐴞𐴥𐴓𐴢, 𐴀𐴠𐴊𐴧𐴠 𐴎𐴠𐴁𐴠𐴊𐴝𐴙𐴌 𐴉𐴟𐴀𐴝𐴙𐴕 𐴊𐴡𐴌 𐴔𐴝𐴦 𐴀𐴝𐴐𐴧𐴞𐴥𐴓𐴢.

𐴀𐴞𐴏𐴝𐴤𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥𐴘𐴧𐴠

⁵⁷𐴇𐴝𐴥𐴣𐴎𐴞𐴕𐴧𐴝 𐴀𐴡𐴥𐴘𐴧𐴠 𐴌𐴝𐴥𐴌, 𐴇𐴠𐴥𐴍𐴠 𐴀𐴝𐴌𐴝𐴔𐴝𐴥𐴃𐴞𐴘𐴝 𐴐𐴡𐴥𐴀𐴌𐴡𐴃𐴧𐴟 𐴘𐴟𐴏𐴟𐴥𐴉𐴢 𐴕𐴝𐴔𐴡𐴌 𐴀𐴠𐴎𐴧𐴡𐴕 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴢 𐴀𐴝𐴙𐴐𐴧𐴠𐴥, 𐴎𐴞𐴁𐴝𐴤 𐴕𐴞𐴎𐴠 𐴘𐴡𐴥 𐴀𐴞𐴏𐴝𐴤𐴌 𐴀𐴠𐴥𐴒𐴧𐴗𐴝 𐴀𐴟𐴔𐴧𐴡𐴃𐴢 𐴀𐴡𐴥𐴘𐴒𐴞𐴓𐴒𐴡𐴘.⁵⁸𐴘𐴡𐴥𐴒𐴧𐴗𐴝𐴘𐴠 𐴉𐴞𐴓𐴝𐴃𐴡𐴌 𐴇𐴝𐴣𐴏𐴠 𐴎𐴝𐴘 𐴀𐴞𐴏𐴝𐴤𐴌 𐴓𐴝𐴐𐴧𐴗𐴝 𐴔𐴝𐴙𐴒𐴧𐴠𐴥. 𐴇𐴠𐴥𐴃𐴟𐴕𐴡𐴃𐴢 𐴉𐴞𐴓𐴝𐴃𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴓𐴝𐴐𐴧𐴗𐴝 𐴘𐴡𐴥𐴒𐴧𐴗𐴝𐴌𐴠 𐴊𐴞𐴦𐴉𐴠𐴥𐴓𐴝 𐴎𐴝𐴘 𐴁𐴡𐴓𐴧𐴝.⁵⁹𐴘𐴟𐴏𐴟𐴥𐴉𐴠 𐴓𐴝𐴐𐴧𐴗𐴝 𐴓𐴡𐴦𐴘𐴢, 𐴀𐴠𐴑𐴧𐴝𐴥𐴕 𐴏𐴝𐴥𐴉𐴢 𐴇𐴡𐴇𐴡𐴥𐴕𐴡𐴌 𐴇𐴡𐴦𐴌𐴡𐴃𐴢 𐴁𐴠𐴌𐴝𐴤𐴘𐴧𐴠,⁶⁰𐴀𐴝𐴦𐴌 𐴕𐴞𐴎𐴡𐴌 𐴕𐴡𐴘𐴝 𐴈𐴡𐴁𐴡𐴌𐴡𐴃𐴢 𐴌𐴝𐴙𐴑𐴧𐴠𐴥𐴒𐴡𐴘, 𐴎𐴞𐴁𐴝𐴤𐴌𐴠 𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴓𐴢 𐴑𐴟𐴥𐴣𐴊𐴞 𐴁𐴝𐴕𐴝𐴀𐴙𐴓𐴢. 𐴁𐴝𐴦𐴊𐴠 𐴈𐴡𐴁𐴡𐴌𐴡𐴌 𐴔𐴟𐴑𐴡𐴃𐴢 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴐𐴞𐴥𐴓𐴢 𐴀𐴡𐴗𐴎𐴝𐴘𐴊𐴞, 𐴒𐴞𐴦𐴘𐴠𐴥𐴒𐴡𐴘.⁶¹𐴇𐴠𐴥𐴣𐴃𐴧𐴠 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴀𐴠𐴊𐴧𐴠 𐴀𐴝𐴌𐴀𐴠𐴑 𐴔𐴡𐴌𐴞𐴘𐴝𐴔 𐴇𐴠𐴥𐴍𐴠 𐴈𐴡𐴁𐴡𐴌𐴡𐴌 𐴔𐴟𐴀𐴕𐴃𐴟 𐴁𐴡𐴘𐴍𐴝𐴤 𐴀𐴝𐴐𐴧𐴞𐴥𐴓𐴢.

𐴈𐴡𐴁𐴡𐴌𐴡𐴃𐴢 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢

⁶²𐴃𐴝𐴌𐴉𐴡𐴌 𐴊𐴞𐴕، 𐴎𐴞𐴁𐴝𐴤 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴐𐴧𐴞𐴥𐴓𐴢, 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴢 𐴉𐴞𐴓𐴝𐴃𐴡𐴌 𐴇𐴝𐴣𐴏𐴠 𐴎𐴡𐴔𐴝 𐴀𐴡𐴥𐴘𐴧𐴠,⁶³𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴅𐴡𐴕𐴝𐴥𐴁𐴢, 𐴀𐴝𐴣𐴀𐴌𐴝𐴃𐴧𐴟 𐴔𐴡𐴕𐴡𐴃𐴢 𐴀𐴝𐴏𐴠𐴤, 𐴇𐴠𐴥 𐴊𐴟𐴥𐴑𐴝𐴁𐴝𐴎𐴢 𐴀𐴞𐴥𐴁𐴝 𐴎𐴞𐴕𐴊𐴝 𐴃𐴝𐴥𐴑𐴞𐴃𐴠 𐴈𐴡𐴀𐴙𐴓𐴢 𐴊𐴠, ’𐴃𐴞𐴕 𐴊𐴞𐴕 𐴁𐴝𐴦𐴊𐴠 𐴀𐴝𐴀𐴛 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴧𐴟𐴔.‘⁶⁴𐴇𐴠𐴥𐴃𐴡𐴓𐴧𐴝 𐴃𐴞𐴕 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴈𐴡𐴁𐴡𐴌𐴒𐴗𐴝𐴥𐴌𐴠 𐴈𐴡𐴌𐴝𐴒𐴡𐴌𐴞 𐴉𐴝𐴀𐴌𐴝 𐴊𐴞𐴥𐴘𐴝 𐴎𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴡𐴥; 𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴓𐴝𐴐𐴧𐴗𐴝 𐴏𐴟𐴌 𐴒𐴡𐴌𐴞𐴥 𐴓𐴡𐴘𐴎𐴝𐴘 𐴔𐴝𐴙𐴕𐴐𐴡𐴥𐴌𐴠 𐴈𐴡𐴘𐴁𐴡𐴤 𐴊𐴠, ’𐴀𐴞𐴥𐴁𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴒𐴞𐴘𐴡𐴘,‘ 𐴃𐴡𐴥𐴘 𐴉𐴞𐴏𐴡𐴥𐴌 𐴊𐴟𐴥𐴑𐴝 𐴀𐴝𐴒𐴡𐴌 𐴊𐴟𐴥𐴑𐴝𐴌 𐴃𐴟𐴥𐴖𐴝𐴌𐴡 𐴈𐴡𐴥𐴌𐴝𐴉𐴢 𐴀𐴡𐴥𐴘𐴁𐴡.“

⁶⁵𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴘𐴎𐴡, 𐴎𐴝𐴘 𐴎𐴠𐴊𐴧𐴟𐴥𐴌 𐴈𐴡𐴌𐴝𐴒𐴡𐴌𐴞 𐴉𐴝𐴌𐴡 𐴇𐴠𐴥𐴊𐴧𐴟𐴌 𐴒𐴡𐴌𐴞𐴥 𐴈𐴡𐴁𐴡𐴌𐴒𐴗𐴝𐴥𐴌𐴠 𐴉𐴝𐴀𐴌𐴝 𐴊𐴡𐴥𐴒𐴡𐴘.“⁶⁶𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴎𐴝𐴘 𐴐𐴞𐴥𐴓𐴢 𐴓𐴝𐴕𐴡𐴃𐴢 𐴔𐴡𐴀𐴌 𐴓𐴝𐴒𐴝𐴘 𐴀𐴠𐴊𐴧𐴠 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴢 𐴇𐴠𐴥𐴍𐴠 𐴌𐴝𐴑𐴞𐴥, 𐴈𐴡𐴁𐴡𐴌𐴒𐴗𐴝𐴥𐴌𐴠 𐴈𐴡𐴌𐴝𐴒𐴡𐴌𐴞 𐴉𐴝𐴀𐴌𐴝𐴊𐴞𐴘𐴠.

The Word for the World International

https://app.library.bible/content/87faca8b51c22590