اقرأ DANIELI 4

DANIELI4

Ekirooto kya Nebukadeneeza eky'omuti

¹Imwe amahanga goona, n'enganda zoona ez'endimi ezitari zimwe, abatwire omu nsi yoona, nyowe, omugabe Nebukadeneeza, naabahandiikira. Obusingye bukanye omuriimwe!²Kyanshemeza kworeka obumanyiso n'eby'okutangaaza ebi Ruhanga orikukira boona ankoreire.³Obumanyiso bwe ka ni bwingi,N'eby'okutangaaza bye ka ni bikuru!Obukama bwe n'obukama obutarihwaho,N'obutegyeki bwe bugumaho, nk'oku obusingye bugyenda nibwihaihana.

⁴Nyowe, Nebukadeneeza, nkaba ngaramisiriize omu nju yangye, eby'omu kikaari kyangye byona nibigyenda gye.⁵Ekiro kimwe naaroota ekirooto ekyantiiniise; ku naabaire mbyami aha kitanda kyangye, ebiteekateeko n'ebi naayorekirwe omu mutwe gwangye byandeetera kwemereza omutima.⁶Nikyo naaragiriire ku bandeetera abanyabwengye b'omuri Babulooni boona, ngu banshobororere ebi naarootsire,⁷Batyo abafumu n'abahi b'engisha n'Abakaludaaya, n'abarikuragura eby'enyonyoozi, baija, naabagambira ekyo kirooto, kwonka baaremwa kukinshobororera.⁸Bwanyima Danieli yaija omu maisho gangye, (Danieli ogwo niwe owaayetsirwe Beliteeshaza, nibamweterera ruhanga wangye, kandi owaabaire aine omwoyo gwa baaruhanga abarikwera) naamugambira ekyo kirooto, ningira nti:⁹Iwe Beliteeshaza, omukuru w'abafumu, nimmanya ngu oine omwoyo gwa baaruhanga abarikwera, kandi tihaine kitarikumanywa eki oremwa kushoboorora; mbwenu nshobororera ekirooto eki ndootsire, mmanye amakuru gaakyo.¹⁰Ebi nyorekirwe ndi aha kitanda kyangye nibyo ebi. Ku ngiire kugira nti, naareeba ekiti kirumbaire ahagati y'ensi, oburaingwa bwakyo burengyesereize.¹¹Ekyo kiti kyakura, kyahama, omutwe gwakyo gwahika omu iguru, kyareebwa ab'aha muheru gw'ensi yoona;¹²amababi gaakyo gaabengyeya, n'ebijuma byakyo byaba bingi; kandi kyabamu eby'okurya ebirikuhaazya abantu boona; enyamaishwa z'omu ishwa zaabona ekicuucu ahansi yaakyo, amahungu g'omu mwanya gaatuura omu mataagi gaakyo, n'ebiine omubiri byona kyaba nikyo kyabitunga.

¹³Ebindi ebi ndeebire ndi aha kitanda kyangye nibyo ebi; ndeebire orikwera owaagizirwe omurinzi naashuuma naaruga omu iguru.¹⁴Yaaragiira n'eiraka rihango naagira ati: Tema ekyo kiti, okikonkoboreho amataagi, okiiheho amababi, onaganagye ebijuma byakyo, enyamaishwa zihungye ahansi yaakyo, n'amahungu garugye omu mataagi gaakyo;¹⁵kwonka ekitsintsi okirekye kiri aha mizi yaakyo omu itaka omu bunyaatsi bw'omuroba obw'omu ishwa kibohirwe ebyoma n'emiringa, kigume nikitondwaho orume orurikuruga omu iguru, kandi kirye n'enyamaishwa obunyaatsi bw'omu ishwa;¹⁶omutima gwakyo gurekye kuguma guri ogw'omuntu, kureka kiheebwe omutima gw'enyamaishwa; kigume kityo okumara omwanya nk'ogw'emyaka mushanju.¹⁷Ekyo kifubiro kiragiirwe abarinzi, kyateebwaho ekigambo ky'abarikwera, ngu abakiriho abahuriire bamanye ngu Orikukira boona niwe ategyeka obugabe bw'abantu, kandi akabugabira ou arikwenda, akabwemekamu ab'ahansi okukira abandi boona.¹⁸Ekyo kirooto, nyowe omugabe Nebukadeneeza, niinye nkirootsire. Mbwenu iwe Beliteeshaza, okinshobororere, ahabw'okuba abanyabwengye boona tibarikubaasa kukinshobororera; kwonka iwe nookibaasa, ahabw'okuba omwoyo gwa baaruhanga abarikwera guri omuriiwe.

Danieli okushororera omugabe ekirooto kye

¹⁹Bwanyima Danieli owaayetsirwe Beliteeshaza yaamara omwanya muhango ashobeirwe, ayemereize omutima ahabw'ebiteekateeko bye. Omugabe yaagaruka yaamugira ati: Iwe Beliteeshaza, ekyo kirooto n'amakuru gaakyo birekye kukwemereza omutima. Beliteeshaza yaamugarukamu ati: Mukama wangye, ekyo kirooto nikikabe aha barikukwanga, n'amakuru gaakyo nigakabe aha bazigu baawe!²⁰Mbwenu ekyo kiti ki oreebire nikikura, kikahama, omutwe gwakyo gukahika omu iguru, kikareebwa ab'aha muheru gw'ensi yoona,²¹n'amababi gaakyo gakabengyeya, kikagira ebijuma bingi, kikabamu eby'okurya ebirikuhaazya abantu boona, kandi enyamaishwa z'omu ishwa zikabona ekicuucu ahansi yaakyo, amahungu g'omu mwanya gakatuura omu mataagi gaakyo,²²Nyakusinga, ekyo kiti niiwe. Okakura, waahama, obukuru bwawe bwayeyongyera bwahika omu iguru, n'obutegyeki bwawe bwahika aha muheru gw'ensi.²³Kandi, nk'oku omugabe areebire orikwera ogizirwe omurinzi naashuuma naaruga omu iguru, akagira ati: Tema ekyo kiti, okimareho; kwonka ekitsintsi n'emizi yaakyo obibohese ebyoma n'emiringa, obirekye omu itaka omu bunyaatsi bw'omuroba obw'omu ishwa, kigume nikitondwaho orume orurikuruga omu iguru, kandi kirye n'enyamaishwa z'omu ishwa, kigume kityo okumara omwanya nk'ogw'emyaka mushanju;²⁴mbwenu Nyakusinga, amakuru gaakyo nigo aga. Omanye ku kiri ekiragiro kya Rukira-boona, ekyahika ahari mukama wangye omugabe.²⁵Noija kubingwa omu bantu, otaahe n'enyamaishwa z'omu ishwa, orye obunyaatsi nk'ente, otondweho orume orurikuruga omu iguru, omare omwanya nk'ogw'emyaka mushanju ori otyo, okuhitsya obu orimanya ngu Rukira-boona niwe ategyeka obugabe bw'abantu, akabuha ou arikwenda weena.²⁶Kandi nk'oku baragiire kureka ekitsintsi n'emizi y'ekyo kiti, nikwo obugabe bwawe burikwija kukurindirwa, okuhitsya obu orimanya ngu Eiguru niryo ritegyeka.²⁷N'ahabw'ekyo, Nyakusinga, ninkushaba oikirize obwengye obu ndikukuha; omareho ebibi byawe ahabw'okukora eby'okuhikiirira, kandi ebicumuro byawe obiihiseho okugirira abarikuhatwa embabazi, obundi okuba gye kwawe kukaabaasa kwongyerwaho.

Ekirooto okuhikiirira aha mugabe

²⁸Bwanyima ebyo byona byahika aha mugabe. Nebukadeneeza.²⁹Ku haahingwire ameezi ikumi n'abiri, eizooba rimwe omugabe akaba naagyendagyenda aha mutwe gw'enju, nyaruju y'obugabe bwa Babulooni.³⁰Yaagira ati: Babulooni egi yoona t'ei naayombekire n'amaani g'obushoboorozi bwangye kandi n'ekitiinisa ky'obukuru bwangye?³¹Ebyo bigambo ku byabaire bitakarugire mu kanwa k'omugabe, eiraka ryaruga omu iguru nirigira riti: Iwe mugabe 'we Nebukadeneeza, niiwe orikugambirwa. Obugabe bwawe bwakwihwaho,³²noija kubingwa omu bantu, otuure n'enyamaishwa z'omu ishwa; noija kurya obunyaatsi nk'ente; kandi omare omwanya nk'ogw'emyaka mushanju ori otyo, okuhitsya obu orimanya ku Rukira-boona niwe ategyeka obugabe bw'abantu, akabuha ou arikwenda weena.³³Ahonaaho ekigambo ekyo kyahikiirira ahari Nebukadeneeza, yaabingwa omu bantu, yaaguma naarya obunyaatsi nk'ente, omubiri gwe nigutondwaho orume orurikuruga omu iguru, okuhitsya obu eishokye rye ryakuzire rikaba nk'amooya g'eishamba, n'ebyara bye bikashokoza nk'eby'enyonyi.

³⁴Bwanyima y'ebyo biro, nyowe Nebukadeneeza nkaimutsya amaisho gangye ahaiguru, naagarukwamu akengye, naasiima Rukira-boona, naahimbisa Otahwaho ebiro byona, naamuha ekitiinisa;Ahabw'okuba obutegyeki bwe n'obutegyeki obutahwaho,Kandi obukama bwe bugumaho, nk'oku obusingye bugyenda nibwihaihana.³⁵Abatuura omu nsi boona nibabarwa nka busha,Akora omu mahe g'omu iguru n'omu batuura omu nsiNk'oku arikwenda,Kandi tihariho obaasa kumuteera ha mukono,Nari okugira ati: Eki nookora ki?

³⁶Omu bunaku nibwo bumwe naagarukwamu akengye, kandi obukuru bwangye n'okwizihirwa kwangye byangarukaho kureetera obugabe bwangye ekitiinisa. Abahi b'obwengye bangye n'abakungu bangye bankubuukira, naahamibwa omu bugabe bwangye, n'obukuru bwangye bwayongyerwaho.

³⁷Mbwenu nyowe Nebukadeneeza ninsiima Omukama w'eiguru, nimmusingiza, kandi nimmuha ekitiinisa; ahakuba emirimo ye ehikire, emihanda ye n'ey'amazima, kandi abo abatuura n'amaryo naabaasa kubagarura ahansi.

Bible Society of Uganda

https://app.library.bible/content/9bf4c154bb6029f7