Daniel8
1Babulawn pren kowi mang Belsazar chowm mang mih sum ning khe ang Daniel mih plan khi mukmang lowk khai.2Nami mukmang kowi ang uowi mih dow Elam pren kowi kowh Susa marow kri kowi chekhai. Nakhowk khe ang uowi mih dow nakowi kowh Ulai aw pang kowi chekhai.3Ang krawi tang mü hanow aw paipra pown kowi ruapurla iowng dawnglawng mih ang khi apum. Nami ruapurla kowh dow anang klangma uowi pre buk chekhai. Lowk mih nang dow alowk mih nang kung kowi kowh uang ta awm mih chekhai; nachenganchepaw nami uang ta awm mih nang dow rik awm mih lak-e lang klang chekhai.4Nami ruapurla dow tawngphak, mrawkphak hai satkup pra kowh uowi mih maten kowi krawi tingta bowk khai. Aia pur kowi dow miapaw kownowng iowng dowi chekhai, now aia rut hownia nowng lawng mih paw miapaw uowi dowi chekhai. Aia dow aia nau iawng krawi chang khai, now aia dow uang lang kür ngamlam khai.5Nami ruapurla lawnguan kowi ang tuak reng tak khe satkup hownia linlanma ruala uang apum khai. Nami ruala dow kakla krawng dowi kowi lenlenma uang iowm khai. Aia kowh mik takra kowi dow aiukma mih anang uowi lowk chekhai.6Nami ruala dow kunmarauma hown aw pang kowi iowng dawnglawng mih anang pre buk mih ruapurla prakowi kowiowm khai.7Nami ruala dow nami ruapurla kowi kowtingah hanow ruapurla kowh nang pre buk mih letta pe khai. Nami ruala pur kowi dow ruapurla mih nowng iowng dowi bowt chekhai; ruala mih ruapurla kowi dow krawng kowi theuah hanow khawk hown thuata naknak khai. Nami ruala hownia ruapurla kowi nowng lawng mih miapaw uowi dowi chekhai.8Nami ruala dow uang kür ngamlam khai. Nachenganchepaw aia kowh kür hu lai bowt khe dow aia kowh nang aiukma mih talet khai, now nami nang talet mih rah hownia nang aiukma uang awr awm tali klüng khai iawk. Naiawngün nang dow pren tali tingnui prakowi krawi tarawk khai.9Now naiawngün nang tali klüng mih kowi kowh alowk mih nang hownia dow achachow mih nang uang plan awm lowk iawk. Nami nang dow auown khe achachow chowdiah. Tawkchedow akung kowi mih aiukma uang awr phaw hanow satlawt, mrawkphak hai klangiungma mih Israel pren prakowi krawi tarawk khai.10Nami nang dow uang kür ngamlam hanow mukuang siphaiuüa hai krek ün kowi kowsenah khai. Now mukuang siphaiuüa hai krek sangrum kowi dow lusa kowi iu klala hanow aia thuata nak khai.11Nami nang dow aiamat kowi mukuang siphaiuüa kowh aluchow lak-e lang iuk padow tanü khai. Nami nang dow mukuang siphaiuüa kowh aluchow vüi ni towng kowh changah mih uanap pawi taingta pe khai, now Thurai chup kim paw sürlawkta pe naknak khai.12 Naiawng angak changra hownia nami nang dow mukuang siphaiuüa luk kowi ka chang alow khai. Now ni towng kowh uanap pawi dow aia vüi kowi pe changah reng khai, now aia dow kawngmu ching kowi kowh rirow mih krawng kowi iu kuakta khai. Aia changah mih srui dow chawn reng chekhai.13Nami kung kowi dow chimsaima mih kramamu pre ia talawp mih ang ta khai. Lowk ia mih kowi alowk mih kramamu lüntaah mih, “Mami mukmang kowi kowh tüng pe mih sia mün ni mowr chow nauowi kown? Ni towng kowh uanap pawi takcha piakra hai angak chap mün ni mowrchow nauowi tak kown? Thurai chup kim hai mukuang siphaiuüa kowi mün ni mowrchow khawk hown nathuaah kown?” pakhai.14Nakhowk khe nami kramamu kowi alowk mih kramamu tek pe mih, “Naiawng nauowi kown mih dow 2,300 ni mowr rau towng hai iak towng chekhai. Nami kung kowi dow Thurai chup kim mih nachimsaiah iawk kown,” pape khai.15Now ang Daniel mih nami mukmang lawnguan kowi tatuak thüm khe maru powm iawng ang pur kowi uang iowng lowk ia khai.16Now Ulai aw paipra pown hownia maru lowk ia sangprowk klow ang ta khai. Ang ta mih, “Gabriel, nami mukmang uan nami maru kowi phuang pe dit,” pakhai.17Now ang iowng rah re-e Gabriel uang tatawn khe dow ang kram kowh krawng kowi ang tim krum khai. Nakhowk khe Gabriel tek ang mih, “Aw maru chapa, en khi-ah mih mukmang dow khin chur khe kowh lawnguan chekhai,” pakhai.18Aia klang ang mih khin khe ang dow krawng kowi tabawk krawm se amawlawma chekhai. Aia dow krüng ang hanow pe iowng ang khai.19Aia tek ang mih, “Thurai kunmarau khin uang ting khe tawng iawng chow naown kown mih lawnguan ang natek en kown. Tawngplawng kowchow panow en khi-ah mih mukmang dow khin chur khe kowh vüi khowm bowkta mih lawnguan chekhai.20“Anang pre buk mih ruapurla dow Media pren hai Persia pren kowi kowh manguüa chekhai.21Now ruala dow Gris pren chekhai, now amik takra kowi kowh aiukma mih nang dow nami pren kowi kowh rik chowm mang mih mang chekhai.22Now talet mih nang re-e uang awr awm tali klüng mih nang dow Gris pren hownia pren nauang tabak tali klüng kown mih chekhai. Nachenganchepaw naiawngün pren kowi kowh manguüa dow uang rik chowm mang mih mang iawng kür nauowi kown nadowi.23“Amatni powng pren mih chur prakowi dow lainowmma angak nahu kown. Nami khin khe dow angakma hai kuanlama mih maru nauang chowm mang lowk ia kown.24Nami mang dow lainowmma nakür kown. Nachenganchepaw aiamat kür hown nadowi chekhai. Aia dow lainowmma nakrawi piak maru kown, now aia krawi changah mih srui dow nachawn kown. Aia dow akürma mih maru-uüa hai Thurai maru-uüa kowi nakrawi piak kown.25Aia dow kuan rak hown nachawn kown, now kowmatia kowi natanü maru iuk kown. Thaulangma maru uowi mih khin khe aia dow nakrawi sen maru kown, now Thurai kowi khowm padow aia mih nakingküa kown. Nachenganchepaw aia kowi dow lusa maru kür hown nadowi napiakta kown.26“Now 2,300 ni mowr rau towng hai iak towng kowh uanap lawnguan kowi tüng en mih mukmang dow nauang tachi nowm kown. Nachenganchepaw nami mukmang dow naitah kownkow tukta pe mur diah. Tawngplawng kowchow panow nami dow pur prakowi khin krama kung kowi kowh nauang tachi kown mih lawnguan chekhai,” pakhai.27Mami mukmang ang khita hanow ang Daniel mih lainowmma bowm khai, now ang kow nga pre sum ni khai. Nami kung kowi dow ang awr rü hanow ang cham chang mang lup khai. Nami mukmang uan ang tuk dowi rakowi lainowmma ang kowh saktuak pusa khai.
The Seed Company