1Nā ināianei, ko te kupu tēnei a Ihowā,a tōu kaihanga, e Hākopa,a tōu kaiwhakaahua, e Īharaira:“Kaua e wehi kua oti nei hoki koe te hoko e ahau;kua karangatia e ahau tōu ingoa; nāku koe.2Ka haere koe i roto i te wai, ko ahau hei hoa mōu;i ngā awa anō, e kore e huri mai ki runga i a koe;ki te haere koe i roto i te ahi, e kore koe e wera,e kore anō te mura e kā ki a koe.3Ko Ihowā hoki ahau, ko tōu Atua,ko te Mea Tapu o Īharaira, ko tōu kaiwhakaora;i hoatu e ahau a Īhipa hei utu mōu,a Etiopia rāua ko Tepa hei wāhi mōu.4I te mea he taonga nui koe ki tāku titiro,he mea e whakahōnoretia ana, ā, i arohaina koe e ahau;mō reira ka hoatu e ahau he tangata mō tōu tūranga,he iwi hoki hei utu mōu kia ora.5Kaua e wehi; kei a koe nei hoki ahau:ka kawea mai e ahau ōu uri i te rāwhiti,ka kohikohia mai koe i te uru.6Ka mea ahau ki te raki, ‘Hōmai’;ki te tonga, ‘Kaua e kaiponuhia’;kawea mai āku tama i tawhiti,āku tamāhine i te pito o te whenua –7te hunga katoa i huaina nei tōku ingoa mō rātou;nāku hoki rātou i hanga hei whakakorōria mōku:nāku ia i whakaahua, nāku hoki ia i mahi.”8Whakaputaina mai ngā matapō he kanohi nei ō rātou,ngā turi he taringa nei ō rātou.9Kia huihui ngā iwi katoa, kia rūpeke tahi ngā tauiwi;ko wai i roto i a rātou hei whakaatu i tēnei,hei kōrero i ngā mea ō mua ki a tātou?Kia hōmai e rātou ō rātou kaiwhakaatu,kia whakatikaia atu ai tā rātou;mā rātou rānei e whakarongo, e mea mai, “He pono.”10“Ko koutou hei whakaatu mō tāku,” e ai tā Ihowā,“me tāku pononga i whiriwhiria e ahau,kia mōhio ai koutou, kia whakapono ai ki tāku,kia mātau ai ko ahau ia,kāhore he Atua i whakaahuatia i mua i ahau,kāhore hoki tētahi i muri i ahau.11Ko ahau, ko ahau nei anō, a Ihowā,kāhore atu hoki he kaiwhakaora, ko ahau anake.12Nāku i whakaatu, nāku hoki i whakaora, nāku anō i kōrero,i te mea kāhore he atua kē i roto i a koutou;nā, ko koutou hei kaiwhakaatu mōku,” e ai tā Ihowā, “ā, ko te Atua ahau.13Āe rā, i te mea kāhore anō he rā ko ahau tēnei;e kore hoki tētahi e whakaora ake i roto i tōku ringa;māku e mahi, ko wai hoki hei whakakāhore?”14Ko te kupu tēnei a Ihowā,a tō koutou kaihoko, a te Mea Tapu o Īharaira:“He whakaaro ki a koutou i unga tāngata ai ahau ki Papurōna,ā, ka mauria mai e ahau rātou katoa,he mawhiti mai, arā ngā Karari i runga i ngā kaipuke i harakoa ai rātou.15Ko Ihowā ahau, ko tō koutou Mea Tapu,ko te kaihanga o Īharaira, ko tō koutou Kīngi.”16Ko te kupu tēnei a Ihowā,nāna nei i hōmai te ara i te moana,he huarahi i roto i ngā wai kaha.17Nāna nei i whakaputa mai te hāriata, te hōiho,te ope, me te kaha;takoto tahi ana rātou, tē ara ki runga;kua keto rātou, kua tineia, ānō he muka.18“Kaua e mahara ki ngā mea ō mua;ko ngā mea onamata kaua e whakaaroa.19Tēnei ahau te mahi nei i te mea hou;ākuanei te tupu ai; e kore rānei e mōhiotia e koutou?Ka oti i ahau he ara i te koraha,he awa i te tītōhea.20Ka whakakorōriatia ahau e ngā kararehe o te pārae,e ngā kīrehe mohoao, e ngā otereti;nō te mea ka hoatu e ahau he wai i te koraha,he awa i te tītōhea,hei inu mā tāku iwi, mā tāku i whiriwhiri ai;21mā te iwi i whakaahuatia e ahau māku,mā rātou e kauwhau te whakamoemiti mōku.22“Nā, kīhai nei koe i karanga ki ahau, e Hākopa;kua hōhā koe ki ahau e Īharaira.23Kīhai i kawea mai e koe ki ahau āu hipi hei tahunga tinana;kīhai anō ahau i whakakorōriatia ki āu patunga tapu.Kāhore āku whakamahi i a koe ki te whakahere,kīhai anō koe i ngenge, i te meatanga i te whakakakara.24Kīhai i hokona e koe he kākaho reka māku ki te moni,kīhai hoki ahau i mākona i te ngako o āu patunga tapu.Engari, i whakamahia ahau e koe ki ōu hara,māuiui ana ahau i āu mahi hē.25“Ko ahau, ko ahau nei anō,te kaimuru atu i ōu hē, he whakaaro anō ki ahau;e kore anō ōu hara e maharatia e ahau.26Whakamaharatia ahau; tātou ka whakawā ki a tātou anō;kōrerotia e koe tāu, kia whakatikaia ai koe.27Ko tōu pāpā tuatahi, i hara;ko ōu kaiwhakaako, whakakeke ana ki ahau.28Nā reira whakapokea iho e ahau ngā rangatira o te wāhi tapu,ā, hoatu ana e ahau a Hākopa ki te kanga,a Īharaira ki te tāwai.”