Titə3
1Pä əpʉ kwatə̂zə kə azü nɔ̂ ə pa əndje dji əpʉ ama alayïngerə də əgbro azü aəgɔ, ə mbrə̈ ndəma əndje ə sə̈ trö ndə kə pa əndje mbrə ə̂rɔ̂ ərə nɔ̂.2Əndje pä tə̂ ə̈bə̈ əzü pä bale ne ə sə̈ tə azü ə̂në blatshe sə lə takpa tə̂ əndje də angâ əndje ə wüsə̂ kə mbrə ə̂rɔ̂ ərə kə azü ə yïsə̂ kə mbrə tə̂ əndje lə zɨtɨ nə gâ tə̂ azü nɔ̂ alɔnɔ̂ gashu.3Leme-e, əzə̂ ndje, a sə̂ tə aəndɨ, ə djî əpʉ djî ne, ə tshî ə̂rɔ̂ äwä tʉ gâ ye, ə sə̂ tə akanga adongo aəgo aərə nɔ̂ də aərə nɔ̂ ə̂në ə fʉ ə fʉ kɔ. A mbrə̂ tə̂ əzə̂, leme-e, tə̂ äwä əmbrʉ ərə də kə za tshelə əzə̂ gâ tə̂ aərə nə̂ azü, â tshelə azü wə̂ra tə̂ əndje tə̂ əzə̂ â a sə kə wəra tə̂ əzə̂ tə̂ angâ əzə̂ lə takpa tə̂ əzə̂.4Bale, alɔ ə̂në Ndjapä, tə Awoshe əzə̂, mâ ə̂rɔ̂tə̂ ye gashu kə azü nɔ̂ ə yîsə̂ äwä ə̂në tshə yîndə əndje də nə kɔ gashu gâ ye kɔ,5tshə shê əzə̂ lə kuzu gâ ye. Ə də̂ mbrə aərə ə̂në a mbrə̂ kəmə də äwänə kɔ də̂ tshə shê əzə̂ lə kuzu nə kɔ ne, bale mbrə ə̂në, ətshə də ə̂tə̂ ye, tshə wû əyo əzə̂ kɔ də̂ tshə shê əzə̂ lə kuzu nə tə̂ äwä ə̂ngû kə zu əzə̂ tə tafa nə ə̂në tshə yɔ̂ əzə̂ lə nə gâ ye kɔ də tafa kə sə əzə̂ ə̂në Âgbɔ̂ Yîrə̂ nə zâ äwä nə kə əzə̂ gâ ye kɔ.6Ndjapä nə wlâ Âgbɔ̂ Yîrə̂ nə gâ pâ əzə̂ tə âkrâ ə rô pâ nə, tə̂ äwä Jezu Kristə, Awoshe əzə̂,7kanika, ə̂në Ndjapä nə wû əzə̂ tə aə̂rɔ̂ azü lə ala ye lə ə̂rɔ̂tə̂ ye gâ ye kɔ, a do tə̂ əzə̂ tə azü kə sɔtə̂ sorô nə̂ alɔnɔ̂ ə̂në a za lɔsu əzə̂ gâ pâ nə kɔ.8Əpʉ səye sə tə djatra əpʉ, â mə yində nə ə pa bə gbɔ də nə tə bandanə, kanika azü ə̂në əndje zâ lɔsu əndje kə Ndjapä gâ ye kɔ, əndje zä lɔsu əndje nɔ̂ gâ tə̂ äwä kə mbrə aə̂rɔ̂ aərə. Ərə ə̂në ə ga ə ga, ə̂në ə sə tə ə̂rɔ̂nə mbrə azü kɔ kə sə̂.9Bale, dɔ̈ âdɔ̂ aashera əndɨ, də əpʉ əɨrɨ alätä azü, də aashera gâ ndə akəpʉ gâ pâ âgbɔ̂ əpʉ nə̂ Mayïzə, mbrə ə̂në aərə sə̂ nɔ̂ kɔ, ə sə kʉ ambanə â ə tɔ tɔ gâ tə̂ ə̈bə̈ ərə bale ne.10Əzü ə̂në tshə sə kə sɔ tshelə takpa tə̂ azü, gbə̈tɔ ətu ye äwä bale, mandâ bishi nə, bə gï ətshə gashe,11ə wüsə̂ nə ə pa marä tə̂ əzü rə, tshə tshî ə̂rɔ̂ äwä tʉ gâ ye ə sə kə mbrə nyaka â sə kə wa ngbanga gâ pâ ye də ə̂tə̂ ye.12Alɔ ə̂në mə sə kə wla Arətemasə wala Tishikə kə əbə, prä äwä katshä ə nä ə të əmə mâ Nikɔpɔlisə, mbrə ə̂në mə pâ mâ tə̂ lɔsu əmə ə pa mə sə mâ je tə̂ tshekɨ əzɨ ngbagû.13Gä ndə Zenasə, əyïkɔkɔ̂, də Apolɔsə ə kö aərə ə̂në əndje ma əgo nə mbrə ana nə̂ əndje nə kɔ kə əndje, kanika ə̈bə̈ ərə bale tshɔ tshɔ əndje ne.14Ə lï ndə kə pa azü nə̂ əzə̂ ndje manda ndə kə pa əndje za tə̂ əndje nɔ̂ gâ tə̂ äwä kə mbrə aə̂rɔ̂ aərə, ndə kə pa əndje ko aərə mbrə alabə̈ aərə ə̂në ə wutu katshä katshä kɔ, kanika əndje sə sə kʉ yera ambanə ne.15Azü nɔ̂ ə̂në əndje sə ngotə̂ əmə kɔ, əndje za wanda kə əbə. Blä azü ə̂në əndje sə tə agbɔbəngâ əzə̂ lə əpʉ lɔsu kɔ kə ä.
Ə̂rɔ̂tə̂ Ndjapä sə̈ də e nɔ̂!
Ə̂rɔ̂tə̂ Ndjapä sə̈ də e nɔ̂!
The Seed Company