Luki7
1Mandânə ə̂në Jezu yîsə̂ əpʉ kə azü nə nɔ̂ ə̂në əndje nâ ndə kə dji əpʉ nə̂ ye kɔ, tshə nâ mâ lə gala Kaprənayɔmə.2Mâ je, ə̈bə̈ kapita nə̂ atrugu nə̂ əgɔ Rɔmə sə̂ də ə̈bə̈ əyïkosəra nə̂ ye ə̂në tshə yîndə ye tə bandanə kɔ. Ə̂tə̂ əyïkosəra nə̂ ye nə kâ ətshə tə bandanə, tshə sə̂ trö də kuzu.3Alɔ ə̂në kapita nə djî ndə Jezu nə kɔ, tshə wlâ alabə̈ aâgbɔ̂ azü nə̂ Ajuwufu kə ətshə ndə kə pa tshə na ə grɔ rəka tə̂ əyïkosəra nə̂ əne nə.4Əndje nâ ə tê Jezu ə kɨ̂ ə̂sə̂ əyo tə̂ əndje kə ətshə ə pâ: «Koshe səye lï ndə kə pa bə mbrə ə̂rɔ̂ nə kə ətshə.5Tshə yində azü əgɔ nə̂ əzə̂, ətshə kə sə̂ â mâ anda aangbɔ nə̂ ä kɔ.»6Bale, Jezu zâ äwä əndje. Ə̂në tshə ndô trö də anda nə kɔ, kapita nə̂ atrugu nə wlâ alabə̈ agbɔbəngâ nə kə ətshə ə pâ: «Âgbɔ̂ Əzü, wü əyo tə̂ zə wü ne, mə lï lï ndə kə pa bə li gâ lə anda nə̂ əmə ne.7Âdârə ə̂në mə wû lə ala əmə ə pa mə lï lï ndə kə pa mə na gâ tə̂ zə də ə̂tə̂ əmə ne. Pä kʉtə̂ ə̈bə̈ əpʉ bale, rəka nə sə kə katə̂ əyïkosəra nə̂ əmə nə.8Mbrə ə̂në əmə də ə̂tə̂ əmə, mə sə gâ tshekudu alabə̈ aâgbɔ̂ azü. Mə sə də atrugu tshekudu əmə ə̂në mə sə kə za ama kə əndje. Kədə mə pa kə ə̈bə̈ nə bale ə pa: “Nä mâ ko-e”, tshə sə kə na na ye. Alɔ ə̂në mə pa kə ə̈bə̈ ata nə ə pa: “Nä mâtəye”, tshə sə kə na nə. Alɔ ə̂në mə pa kə əyïkosəra nə̂ əmə ə pa: “Mbrə̈ ərə səye”, tshə sə kə mbrə nə.»9Alɔ ə̂në Jezu djî əpʉ səkɔ, əpʉ nə tô tə̂ ye. Tshə dô tə̂ ye gâ tə̂ ə̂kpû azü ə̂në əndje zâ äwä ye kɔ ə pâ kə əndje ə pa: «Mə pa kə e: mə sɔ̂tə̂ marä tə̂ lɔsu rəke sɔ̂ ndə ə̈bə̈ əzü bale, ndje sɔ lə əgɔ Isərayalə nɔ̂ ne.»10Alayïawla nə̂ kapita nə dô tə̂ əndje gu na ye gâ lə manda ə wû əyïkosəra nə də ə̂rɔ̂ tshelə akwa ye.11Mandânə, Jezu nâ mâ lə ə̈bə̈ gala ə̂në əɨrɨ nə kə də̂ Nayinə kɔ. Atrawaya nə̂ ye də ə̂kpû azü ə̂në əndje ngbâ ə ngbâ kɔ sə̂ kə gi ətshə na na ye.12Alɔ ə̂në tshə ndô trö tə̂ ama tshelagɔ gala nə gâ ye kɔ, tshə tê alabə̈ azü ə̂në əndje sə̂ kə na də ə̈bə̈ kuzu gâ pâ ə̂dû kɔ. Kuzu nə sə̂ tə əgblə koshe kpiabale nə̂ ə̈bə̈ yashe koya. Ə̂kpû azü gala nə sə̂ kə gi kuzu nə na na ye.13Alɔ ə̂në Âgbɔ̂ Əyïngerə nə wû yashe koya nə, əyo ye mbrə̂ ətshə, tshə pâ kə ətshə ə pa: «Kätə̂ əkɨ nə.»14Tshə gî tə̂ ye trö ə gôro sandugu kuzu nə. Azü nə ə̂në əndje zâ kuzu nə kɔ kâ. Jezu pâ: «Mɔdɔ, mə za ama kə əbə, äfɔ!»15Kuzu nə âfɔ ə sə̂ gâ tʉ ə vɔ̂tə̂ kə pa əpʉ. Jezu kîrə ətshə kə əyï nə.16Awa mbrə̂ azü nə nɔ̂, əndje mbê Ndjapä ə pâ: «Ə̈bə̈ âgbɔ̂ awopandəma Ndjapä wûtu gâ lə takpa tə̂ əzə̂ gâ ye! Ndjapä nâ ndə kə wu azü nə̂ ye.»17Əpʉ gâ pâ aərə ə̂në Jezu mâ kɔ zâ ətshe nɔ̂ lə ashɔ Jude də aəgɔ nɔ̂ ə̂në ə sə̂ trö də Jude nə kɔ.18Atrawaya nə̂ Zââ Batistə pâ ndə əpʉ aərə sə̂ nɔ̂ kə ətshə. Zââ nə ê alabə̈ əndje bishi lə takpa tə̂ əndje19ə wlâ əndje kə Âgbɔ̂ Əyïngerə ndə kə yu ətshə ə pa: «Bə sə tə ətshə ə̂në tshə sə kə na nə kɔ, wala ä ka tə̂ ə̈bə̈ ata əzü kpî a?»20Alɔ ə̂në əndje nâ ə tê Jezu nə kɔ, əndje pâ kə ətshə ə pa: «Zââ Batistə wlâ ä ndə kə yu əbə ə pa: “Bə sə tə ətshə ə̂në tshə sə kə na nə kɔ, wala ä ka tə̂ ə̈bə̈ ata əzü kpî a?”»21Pə tə̂ alɔ nə səkɔ, Jezu grɔ̂ arəka tə̂ azü ngbatshe. Tshə mbrə̂ â aərə tshekotə̂ azü ngbatshe ə̂në ə ndɨ̂ gâ ye kɔ ə gâmba tə̂ əndje gâ mandânə. Tshə grɔ̂ aafrɔ ayirə̂ tə̂ azü, ə mbrə̂ â alayïbula ə̂në əndje ngbâ ə ngbâ kɔ lîshi.22Mandânə, Jezu kîrə əpʉ kə alayïawla nə̂ Zââ nə ə pa: «E gü ə pä ndəma əpʉ aərə ə̂në e wû də əpʉ ə̂në e djî kɔ kə Zââ nə: alayïbula sə kə lishi, awurtʉ sə kə na ana, alayïbitû sə kə dji əpʉ, akwa alayïbroma sə mvo, akuzu she, əndje mʉ̂ Ə̂rɔ̂ Əpʉ kə alayïəyo.23Ənə̂ ye tə ə̂rɔ̂nə, əzü ə̂në lɔsu ye te te mbrə əmə ne kɔ!»24Alɔ ə̂në alayïawla nə̂ Zââ nə gû na ye gâ ye kɔ, Jezu vɔ̂tə̂ kə pa əpʉ kə ə̂kpû azü nə gâ pâ əpʉ Zââ nə ə pa: «Ərə yekɔ də̂ e nâ ə wû mâ lə ngbûndû kɔ? Ə̈bə̈ wara ə̂në əyi sə kə meme nə kɔ a?25Bale, ərə yekɔ də̂ e nâ ə wû kɔ? E nâ ə wû ə̈bə̈ əzü ə̂në tshə yî aləba ə̂në ə fʉ wââ kɔ a? Azü ə̂në əndje yi aə̂rɔ̂ aləba ə zɨ aə̂rɔ̂ aərə kɔ əndje sə lə aanda nə̂ alayïngerə.26Rəkɔ, ərə yekɔ də̂ e nâ ə wû kɔ? E nâ ə wû ə̈bə̈ awopandəma Ndjapä a? Mə pa djatra əpʉ kə e, tshə rô awopandəma Ndjapä.27Ətshə də̂ Fraka nə̂ Ndjapä pâ əpʉ gâ pâ ye ə pa:“Wü-a! Mə sə kə wla əyïawla nə̂ əmə ətshi zəndə kə pa tshə gamba äwä ətshi zə.” »28Jezu pâ kwatə̂ye ə pa: «Mə pa kə e, lə takpa tə̂ azü ə̂në əndje zû əndje ə zû kɔ, ə̈bə̈ âgbɔ̂ əzü ə̂në tshə rô Zââ kɔ guta gu ne. Bale, əngʉ əzü lə Əgɔngerə nə̂ Ndjapä sə tə âgbɔ̂ əzü ə rô ətshə.»29Azü əgɔ nə nɔ̂ də aaworɔ ngendja lapɔ ə̂në əndje djî əpʉ nə̂ ye kɔ wûsə̂ nə ə pa Ndjapä mbrə̂ ərə nə̂ ye də äwänə â Zââ nə zâ batamo kə əndje.30Bale, Afariza də aawoyisə̂ âgbɔ̂ əpʉ wə̂ra tə̂ əndje tə̂ ə̂rɔ̂ ərə ə̂në Ndjapä yində kə mbrə kə əndje kɔ â wə̂ra tə̂ əndje ndə kə za batamo nə̂ Zââ nə.31Jezu pâ kwatə̂ye ə pa: «Mə sə kə yisə̂ azü tshe kpəsəye gâ tə̂ aəde? Əndje kô aəde?32Əndje kô aneshe ə̂në əndje sə̂ gâ tʉ gâ ə̂grû tshelagɔ ə sə̂ kə ta râwâ lə takpa tə̂ əndje ə pa: “Ä û ədɨ ndə kə pa e vi tə̂ e, bale e vî tə̂ e vî ne; ä vî ətshi kuzu, bale e kɨ̂ kɨ̂ ne.”33Mbrə ə̂në Zââ Batistə nə nâ ə zɨ̂ mapa zɨ̂ ne ə ndjû duva ndjû ne, e pa: “Tshə sə də afrɔ yîrə̂ lə ye.”34Əgblə nə̂ Əzü nâ ə sə̂ kə zɨ ərə ə ndju ərə, e pa: “Koshe səye sə tə awozɨ ərə də awondju ərə, tə gbɔbəngâ aaworɔ ngendja lapɔ də alayïnyaka.”35Bale, kə wusə̂ ərə nə̂ Ndjapä sə də äwänə lə ala aneshe nə̂ ye nɔ̂.»36Ə̈bə̈ Fariza ê Jezu ndə kə pa tshə na əndje də ətshə zɨ rəgo. Jezu nâ ə lî mâ lə anda nə̂ koshe səkɔ ə sə̂ gâ tʉ ndə kə zɨ rəgo nə.37Ə̈bə̈ əmbrʉ yashe sə̂ je lə gala səkɔ. Alɔ ə̂në tshə djî ə pa Jezu sə kə zɨ rəgo mâ ndə Fariza nə, tshə nâ də ə̈bə̈ anga yombo ə̂në əndje mbrə̂ də ə̈bə̈ əkpʉ ə̂në əɨrɨ nə kə də̂ aləbatrə kɔ trɔ̂ lə nə .38Tshə nâ ə kâ gâ tə̂ ə̈nü Jezu nə. Tshə vɔ̂tə̂ kə kɨ nə, ngɔla ye grâ gâ pâ ə̈nü Jezu nə. Tshə trû də sukumu ye ə ɔ̂ ə̈nü Jezu nə ə sɨ̂ yombo nə gâ pâ nə.39Fariza nə ə̂në tshə ê Jezu nə ndə kə zɨ rəgo nə kɔ wû ərə nə rəkɔ, tshə pâ mâ lə ye ə pa: «Kədə koshe səye kə sə kəmə ngâ tə ə̈bə̈ awopandəma Ndjapä, tshə sə kə wusə̂ nə kəmə ə pa yashe səye ə̂në tshə goro əne kɔ sə tə əmbrʉ yashe.»40Jezu zâ əpʉ ə pâ kə Fariza nə ə pa: «Shemɔ, mə sə də ə̈bə̈ əpʉ ndə kə pa kə əbə.» Shemɔ kîrə əpʉ ə pa: «Awoyisə̂ ərə, pä əpʉ nə.»41Jezu pâ əpʉ ə pa: «Ə̈bə̈ əzü sə̂ je ə̂në ngendja nə̂ ye sə̂ lə kumu azü bishi. Tshə kô ngendja gerətshe kə ə̈bə̈ nə ə kô ngendja teashe kə bale nə.42Əndje bishi nɔ̂ sə̂ sə̂ də ngendja ndə kə piyi nə kə ətshə ne, tshə kâtə̂ ködä nə kə əndje nɔ̂. Əde lə əndje bishi kə sə kə yində ye ə rô pâ nə?»43Shemɔ nə kîrə əpʉ kə ətshə ə pa: «Mə wu ənə̂ əmə ə pa ətshə nə ə̂në tshə kâtə̂ əgerə ngendja nə kə ətshə kɔ.» Jezu pâ kə ətshə ə pa: «Bə pa əpʉ nə də äwänə.»44Mandânə, Jezu dô tə̂ ye gâ tə̂ yashe nə ə pâ kə Shemɔ nə ə pa: «Bə wu yashe səye a? Mə lî gâ lə anda nə̂ zə, bə tô ə̂ngû tô kə əmə ndə mə yutu də ə̈nü əmə ne, bale ətshə, tshə yûtu ə̈nü əmə də ngɔla ye ə trû də sukumu ye.45Bə ɔ̂ ama əmə ɔ̂ ne, bale ətshə, tshə kâ kâtə̂ kə ɔ ə̈nü əmə ne mambʉmə ə̂në mə lî gâ lə anda nə̂ zə kɔ.46Bə sɨ̂ kâdâ sɨ̂ gâ lə kumu əmə ne, bale ətshə, tshə sɨ̂ yombo gâ pâ ə̈nü əmə.47Âdârə ə̂në mə pa kə əbə: Ndjapä gbâ tshelə anyaka nə̂ ye ə̂në ə ngba ʉrrr kɔ, âdârə ə̂në tshə yîsə̂ nə ə pa tshelə əne yində əmə tə bandanə kɔ kə sə̂. Əzü ə̂në əndje gba tshelə anyaka nə̂ ye teashe, kə yi tə̂ nə̂ ye sə teashe ndje.»48Mandânə, Jezu pâ kə yashe nə ə pa: «Tshelə anyaka nə̂ zə gbâ gâ ye.»49Azü nə ə̂në əndje sə̂ kə zɨ rəgo nə də Jezu nə kɔ pâ mâ lə əndje ə pa: «Koshe səye sə tə əde â gba tshelə anyaka kɔ?»50Jezu pâ kə yashe nə ə pa: «Lɔsu zə tshɔ̂ əbə lə kuzu gâ ye. Gü na ye lə blatshe.»
The Seed Company