యాకోబు4
1మీ తాణటి గొడ్హయఁ ఓడె ఏర్సి ఆవి ఆనఇఁ ఎంబిటి వాహీను? మీ మణుసుత మన్ని ఆసయఁ, మీ సుకొమితక్కి పోటు ఆవి ఆహీని ఒణ్పూఁటిమ?2మీరు ఆస అహీఁజెరి సమ్మ మీరు బెట్ట ఆహీలొఒతెరి. లోకూఁణి పాయిదెరి. లగ్గెఎతి ఒణ్పుతొల్లె మెహ్నణి బర్రె ఆస ఆదెరి మేడి కియ్యలి ఆడ్డొఒతెరి. ఇంజాఁ, పోటు రీదెరి గొడ్హయఁ హోప్దెరి సమ్మ మహపురుఇఁ రీహఅతి పాయిఁ మీరు ఏనఅఁవ బెట్ట ఆఒతెరి.3మీరు రీస్తివ, బెట్ట ఆఒతెరి. ఏనఅకి ఇచ్చిహిఁ మీ సుక్కొమి పాయిఁ మీ లగ్గెఎతి ఆసాఁణి పూర్తి ఆవి కిహకొడ్డలితక్కి లగ్గెఎతఅఁతి రీసిఁజెరి.4దారి గట్టతెరి, ఈ తాడెపురుతొల్లె తోణె దొస్తిసరి, మహపురుకి పగ్గగట్టతొవి ఆనయి ఇంజిహిఁ మీరు పుంజాలొఒతెరికి? ఏదఅఁతక్కి ఎంబఅసి ఈ తాడెపురుతొల్లె తోణె దొహ్నెసి, ఏవసి మహపురుకి పగ్గగట్టసి ఆనెసి.5ఏవసి మా బిత్ర ఇట్టాని మహపురు జీవు మమ్మఅఁ హారెఎ ఆసకిహీయనె ఇంజీఁ, పుస్తెకొముత రాచ్చితి కత్త ఉజ్జెఎతయిఎ ఇంజీఁ మీరు ఒణ్పీజెరికి?6సమ్మ, ఎల్లెకీఁ ఆఎ, ఏవసి హారెఎ కర్మ తోహ్నెసి. ఏదఅఁతక్కిఎ, “మహపురు బొడ్డపొణొ ఆనరఇఁ అజ్జికిహఁ, తాంబుతక్కి తాంబు ఊణ ఆనరఇఁ కర్మ మెహ్నెసి,” ఇంజీఁ మహపురు కత్త వెస్సీనె.7ఏదఅఁతక్కి, మహపురుఇఁ లొఙహఁ మంజు. సాతానుఇఁ అజ్జికిదు. ఏవసి మీ తాణటి హొడ్తుహ్నెసి.8మీరు మహపురు దరి వాదు, ఎచ్చెటిఎ ఏవసి మీ తాణ వానెసి. పాపు గట్టతెరి మీ కెస్కాఁణి నొర్హ కొడ్డదు. రీ మణుసు గట్టతెరి మీ హిఁయాఁణి సుద్దు కిహకొడ్డదు.9దుక్కు ఆదు, డీదు, మీ కప్కుతి డీనిలేఁ, మీ రాఁహఁతి హప్లిలేఁ మాస్కదు.10ప్రెబు నోకిత మింగొతక్కి మీరుఎ ఊణ ఆదు. ఎచ్చెటిఎ ఏవసి మిమ్మఅఁ పడ్డి కియ్యనెసి.11తయ్యి తంగితెరి, మీ తాణ రొఒణి ముహెఁ రొఒతెరి ఒజ్జఅరేటు లగ్గెఎతి హాడ్డయఁ జోల్కి ఆఅదు. ఎల్లెకీఁఎ తన్ని తయ్యికి ఒజ్జఅరేటు జోలహఁ, తన్ని తయ్యిఇఁ బిచ్చర కిన్నసి, నియొమి సాస్తురితక్కి ఒజ్జఅరేటు జోలినెసి. నియొమి సాస్తురితిఎ బిచ్చర కిహీనెసి. నియొమి సాస్తురితి బిచ్చర కిహీంజి ఇచ్చిహిఁ, నియొమి సాస్తురి అస్సహఁ తాకీలొఒతి ఇన్ని కత్త. సమ్మ ఏదఅఁతిఎ వెండె బిచ్చర కిన్నిలేఁ మంజి.12నియొమి సాస్తురితి హీతసి ఓడె బిచ్చర కిన్నసి రో మహపురుఎ, ఏవసిఎ గెల్పలితక్కి హేడి కియ్యలితక్కి ఆడ్డిని బ్డాయు గట్టసి. ఎట్కతరఇఁ బిచ్చర కియ్యలితక్కి నీను ఎంబఅతి?13“నీంజుకి విఎకి పలణ రో గాడత హజ్జహఁ ఎంబఅఁ రో బర్సెక మంజహఁ ఏపారొమి కిహఁ, టక్కయఁ మేడికిన్నొ వాదు” ఇంజిహిఁ వెస్తి ఆని లోకుతెరి, వెంజు.14విఎ ఏనయి ఆనెకి ఎంబఅసి పున్నెసి? మీ బత్కు ఎచ్చేతయి? ఏది రో గాడెక తోంజ ఆహాఁ, గాడెకెఎ మ్ణెఁగహన్ని ఊకొడిలేఁతయి.15ఏదఅఁతక్కి మీరు, “ప్రెబుకి ఇచ్చ మచ్చిహిఁ, నీంజు మారొ బత్క మంజహఁ ఈదఅఁ కిన్నొ, ఏదఅఁ కిన్నొ” ఇంజిహిఁ వెస్పి ఆనయి మన్నె.16సమ్మ, నీఎఁ ఇచ్చిహిఁ మీరు బొడ్డపొణొతొల్లె నెంజాని మీ ఒణ్పుయఁ పాయిఁ గౌరొమితొల్లె జోలిఁజెరి. ఎల్లెతి గౌరొమి లగ్గెఎతయి. బేరొమి కిన్నసి తన్ని హర్కుతొల్లె ఓడె కొడ్వితెసి17ఏదఅఁతక్కి నెహిఁ కమ్మయఁ కియ్యలి పుంజాఁ, నెహిఁ కమ్మయఁ కిఅసరి, ఏదిఎ ఏవణకి పాపు ఆనె.
The Word for the World International