2 BaKhorinte12
1Ndakafanila zwiloba fuba; nekutobe kusina tjandinowana nekwako, koga ndowhoyendilambeli ndileba nekwemibono nezumbunuligwa kunobva kunaHe.2Ndoziba nlume umuna Khirisitu, wakadzamuligwa kudzimu kwebutatu, mumamakole aligumi nemana akapinda, kuti kene waka elimunyama kene waka esimunyama anditoziba, koziba Ndzimu.3Kuti kene waka elimunyama kene waka esimunyama anditoziba, koziba Ndzimu,4koga tjandinoziba whuti nlume iwhoyu wakadzamuligwa kuPharadayisi, kakale wakawha matama asingake akabudziwa umwe nhu, nhu tjaasingake akahhula nlomo nekwatjo.5Ndowhozwiloba fuba ndilimilile iwhoyu nlume, koga imi tjekwangu anditowhozwikudza, kuhhe kwekuzwikudza nesasima kwangu.6Nekene ndingahaka zwikudza, ndoba ndisitjilengwe, ngobe ndowhobandileba lebeswa. Koga ndozwidziba, kuyetila kuti kusibe ne unokumbula nekwangu kupinda tjaanobona mundili netjaanowha kubva kundili.7Kudze ndisikule kwazo mukuzumbunuligwa, ndakabhayiwa nemhiwa mumbili, ntumwa waSatane, kuti undidziyidze, kuyetila kuti ndisizwikudze.8Ndaka kumbilisisa He katatu nekwemhiwa iwhoyu, kuti ubhude mundili;9koga wakati kundili, “Ngoni dzangu dzakakulizana, ngobe masimba angu anohhadzisika mukusasima.” Ndizo ke ndowhozwiloba fuba nesasima kwangu ndakahanha, kudze masimba aKhirisitu agale pehhugwi kwangu.10Ndizo nentha yaKhirisitu, ndogutshikana nesasima, tukwa, bulemo, dziyidzika, nemamanikano; ngobe hapa ndisakasima, ipapo ndipo ke pandinamasimba.11Ndandili tjilengwe! Makandisundidzila kuba itjo, ngobe ndaka ndakafanila kudziwa ndimwi. Ngobe andizotongoba ndili ntukununu kubapositoli ibaba banoyi bakulu, nekutobe ndisitjimwe.12Zwilakidzilo zwempositoli wakwako zwakayetiwa pakati kwenyu ngemoyo nlefu, kunohanganyisila zwilakidzilo nematjenamiso nemihingo mikulu kwazo.13Mungaba makabhakhwa zwakayipa, kwakasiyana ne amwe makubungano ose, kuhhe kwekuti imi tjekwangu andizotongoba ntolo kumuli? Mundiyetile mazwibhatigwa nlandu iwhoyu!14Ngwenuwali ndatjilulamila hha kumuli kwebutatu. Anditowhoba ntolo, ngobe anditohaka tjimwe tjenyu koga ndohaka imwi; ngobe bana abazofanila lela bazwadzi babo, koga bazwadzi ndibo bakafanila lela bana babo.15Ndowhohingisa kwandinako kakale azwipila nayiko kose kwandili iko ndakahanha, kuti ndimubhatshe. Hapa ndimuda kwazo, imi ndingakodiwa kuhomanana?16Ngatitini andizoba ntolo kumuli, koga imwi moti ndakanditjebela, ndikamukunda ngemutjebela.17Ndingaba ndakamutjebela ndihingisa umwe webandakatuma kumuli?18Ndakatetedza Thayithasi kuti ahhe kumuli, ndikawumpa nghalimoyo akawumpeleka. Thayithasi wakamutjebela? Atizohinga nemeya yakafanana? Atizotshamba nhambo dzakafanana?19Mabamukumbula lubaka gose kuti tatizwidzibilila mbeli kwenyu? Tabatilebeleka muna Khirisitu tilimbeli kweNdzimu, kose ikoku kuli musimisa, badikani.20Ngobe ndohla kuti pamwe swiyo ndingabuya akomuwana musi sekwandinoyemula, nekuti mungandiwana ndisi sekwamunoyemula; kuti pamwe kungaba nekakabadzana, nefupa, nemon'wa, nenyimana, netukana, nelebana zwakayipa, nezwida, nesawililana.21Ndohla kuti hapa ndibuya kakale Ndzimu wangu angandiswabisa mbeli kwenyu, kakale kungahaka kuti ndilile ndililila bunji gwayibabo bakatjinya mumahhuba akapinda, basakahanduka muhambgwa yesazwibhata, mubupombgwe, netjibana kwabaka bethama.
The Word for the World International