Mammaassiinkaa Maxaafa27

1Barra idaggaaxxa ege'na gophpheetaxxe'esoodo kaddaaxxe'n irkattoxxe'e.
2Weli manni ate'e saado malee ati ifi saaddoxxe'eweli atixxe'e haaso'o malee ati ifixxa eloxxa haasotoxxe'e.
3Kinji a'uraan, maanchikinna hirikki hiyya,gowwi manjiinxi mufe kinn lamingee'n irra a'urtaan.
4Mufe godoba jabaatate'ninna aarete'n geessisa,hinaaffe kinn mufe saxxaan ayyete ise edo dande'e uurra?
5Iima leelleek yowwichchi, buqo hexxeexxe jaalalanaa'n sa'a.
6Naaphinxe sunqedha mannii'n jaaliinxa miidha woyya.
7Goddeeke manji'a malebiinxi la'e xe'mitabaan,so'lo'weeke kinni qarartaanxi yaane midde xe'mitaan.
8Mine ifikenaa'ni fule doonsakiyya hiyyaak manji,mine ifika waalde me'ite doonsakiyya hitammaxxe ciichoshshate.
9Shittotixxinna hixaaninxi fishshe manjo gammachchiissammashsha,jaaliink gorsinna manjo gammachchiisa.
10Atika jaalonna kadi atike annnika jaalo waaldoxxe'e,rakko ate'n geltaa wodda atike dayyiba martoxxe'e; bayyike firi mannii'n shiqika olla'a woyyani.
11Anke beltoo! Muxxete kadde ane'e gammachchiis,ane'e cee'maake duuchchi'anna hiissichcho uwwa dandee'annon.
12Qaro dagga'neexxa rakko affee gollata,ege'na afebaak manji kinni rakkonde'n mare miidhema.
13Alagi manjike liqi'a annooma adheeke manjixxa seemma adhdhi,ookkone alagi manjixxeenna eettene seemma abixxi.
14Soodimaro hafuura gikki asse jaalo ifika nage'a aadha,badinati qixxeteni.
15Afoollitte are,xeeninxa barra sammi hiyye xissamake xissishshate.
16Ise'e sammi assatee wo'laana,diidallo yookaan zayite angati cu'mate'e wo'laanaten.
17Sibilji sibiljo cabbammashsha, manjikinna ittanni mitti mitte cabba.
18Balleessetika haqichcho kaalse heqqedhaak manji gumma isexxe ita,gootta ifika heqedhaak manji kinni ulfaata.
19Wode'i daa'witetishsha alba manjiinka leellishammashsha,manjiinxi qalbenna ookkone manjika yaada farri assitee leellishsha.
20Reyeek manni hedhaabinna hirreessi geyeen hiyyammabaashshanni,manjiinxi halchanna ittande.
21Worqetinna birretik sibiljinxi ca'umma giirate'n baqisende ege'nendammashsha,manji isi'a uwwendaaxxe saadinonni hega uudema.
22Hawwawwa midhatishsha mooyyeke'n tumisanjik tundetele,hawwawwumma isixxa isonaa'n hoyya dandeettabexxo.
23Gedhebi atik hedheeka jeeja hubatte uudi,hore atikeenna xonxoommat.
24Durumma duuchchi woddi'a hexxabaan,mootummatinna ilatenaa'n ilati qico'n.
25Baggeexxi arso haamendee'na'a haaroxxi lattaa wodda,gooroti hana hexxeexxi arsonna bukki assendaa wodda;26Gedhebi atikenaa'n seemmate kaddaaxxa orda alfitatton,re'e atixxanna gurgurte boga hidhdhitattochcho alfitatton.
27Ati'anna atike mini hadi'aatixxe dubarte erganjuwwi'a geltaaxxa re'etixxa ado alfitatton.

The Word for the World International

https://app.library.bible/content/2b894378475c6aea