2 Moyanjuwwiinkaa Maxaafa4
Aro'i Reyeexxe Hiyyeette Manjichchoxxa Zayite
1Wabeekotike ya'ixxe gamo kade hedheemmake mitte manjichchixxi are Elsa'i «Atiki erganji anki aro'i reyeeni! Isinna Duuchchi Woddika Gootta sodaataake manjo kadeexxa atinni egendeetteni; ta'a kinni anke aro'i'aa maalaqa liqeessemmaki manjichchi ookkone liqi'aa lame labbaxxa anxa oose adhdhe garbake assedho'aa dage'eeni» hita'ni Elisa'i'ni raarte.2Elsa'inna «Ani ati'a maa assona'a hassaatte? Mini atiki giddo mayi hedheexxa ane'ni kuli» isee hiyye.Isenna «Ani atixxi erganjo shiixxooxxe odolchonni hexxeexxa zayite malee weli afennelchi mittilchinna hedhebaani» hite.3Elsa'inna isee hiyyee qici, «Atike olla'a duuchchanaa'ni heddo oddowwa kadhati:4Atinna oose atixxi mini giddi'a e'yitineechi uduma mine cufi: zayitetanna waabuwwa duuchcha'n fulchi: mitti mittingi waabi wo'ma wodda mitte gama'ni uggi.»5Tennexxe manjichcho hadi'a marteexxi oose ifixxinni welti hula cuffe: waabuwwa ise'a shiqinshaa'na'a ise wonshate'ni kexxe.6Waabuwwa duuchcha wonshiteechchi uduma belto ifika «Wele waaba idagi» hite.
Isinna kinni «Gateeki mitti waabinna hedhebaani» ise'a hiyye. Ookkoneechchi uduma zayite yaatammaxxi uurrite.7Isenna higgeexxi tenne Duuchchi Woddike Gootike manji'a kulde. Isinna, «Martettexxi Zayitetanna gurgudhdhite liqa affetteka manjichchoke hiissi: gateekinna ati'anna atixxe oose'a la'ote'e kadaani» hiyye.
Suunemitotixxe Manjichchoki Belti Reyotenaa'ni Ke'e
8Barra mitte Elsa'i Sunemi'a me'e. Ookkonna mitte dureette manjichcho hexxemmani; isenna ita ito'a jaba qici'ni isoo kadhatte; ookko'ni sa'aa wodda duuchcha ita ito'aa iseke mine'ni e'ya'nemmani.9Manjichotinna aro'o ifika hitee qici, «Kunni duuchchi wodda, hula no'oxxenaa'ni sa'a'neeki manji; qullichcha Duuchchi Woddike Goottike manjo kadeexxa ege'neenneni.10Tennexxe mine iimiki hana mitte shiixxooxxe kutaka mine ijaarre mitte taqe, kibbe, baricumanna xxassa ugginannoni; no'oba'a dagaa wodda duuchcha ookko'o hafuura adhaani.»11Mitte barra Elsa'i ookko dageexxi hafuura adhdhaammaxxe kutabaa iimi'a maraeexxi irikate.12Giyaazi'i erganjo ifika, «Marte eettene Sunemichcho ye'i» hiyye. Isinna ye'ee wodda daggeexxi isi edo uurrite.13Elsa'inna, « ‹No'aa hite yo'oshsha rakkattetteni; maa ati'a assonna'a hassaatte? Moyanjoke'e yookaani loliinke mannke ajajalli'a ati'a kulanoxxi yaane hexxee?› hitetexxi ise'e qori» hiyye.Manjichchotinna hiissiteexxi «Aniqqa firi aniki giddo hedhennaxxee rakkonda afebe'noni» hite hiissite.14Elsa'inna Giyaazi'i «Maa ise'a assinannota» hiyye qore.
Giyaazinna, «Ise labbaka belto affebaani: iseki aro'inna cime'en» hiyye.15Elsa'inna «Isee ye'i» hiyye. Isenna daggeexxi hulate'ni uurrite.16Elsa'inna «Dagaasane iittee wodda labba belto luu'mexxatton» ise'a hiyye.
Isenna «Waawoti! Anke gootta; ati Mageniinki manji; maganneten addachchisabaaka muuxemabaaka hiyyichcho ane'ni haasoottoxxe!» hite.17Yaane kinni manjichchotinna siila'wite: Elsa'i hiyyemmaxxe eettene woga'ni labba belto ilde.18Beltikinna nophphe: mitte barra anni isiki midha haamammake mannini welti hedhemmabaa mare.19Dedhange'ni «Umi anee bowwaasiseen! Umi anee bowwasiseeni!» hiyye. Annikinna erganjo ifika ye'eexxi; «Belto konne dukkettexxi amatibaa aaxxe iyyemari» hiyye.20Erganjikinna ookone belto aadheexxi amatiba iyyemare; beltikinna barra saafo'i qico'ni amate'ni luu'meme; ookkoneechchi uduma reye.21Iima Duuchchi Woddike Goottike manjixxe taqe'ni diiphisse; hulatanna iso'ni cuffeexxi fulde.22Ookkoneechchi uduma aro'okanna yexxeexxi «Duuchchi Woddike Goottike manjibaa rake mare'e higonna'a mitte eriganjonna mitte harre ani'a ergi» hite.23Aro'i isekinna «Telcho isiba maye'e mara ati'a hasisse? Sanbatake yookaan baate fulatika ayyaana ulfeessinaaxxe barrabaan» ise'a hiyye.
Isenna «Rakko hexxebaan: me'aanneni» hite.24Ookkoneechchi uduma isenna harre fe'edheexxi erganjo ifika; «Rakke me'itaashsha assi; ani uurisi hiyyonnole malee anxe hite laana me'issoxxe» hite.25Tennexxe kexxeexxi Duuchchi Woddike Goottiki manji hedheeba Qermeeloosixxe koobaba'a me'ite. Duuchchi Woddike Goottiki manji bayyi'nini afeexxi eriganjo ifika Giyaazi'i hiyyee qici, «Sunemichcho uuddetteni? Iikiixxi!26Gongita'ni martettexxi maachcho ‹nage'aangebaa ati? Aro'i atiki nage'aangebaa? Belti atiki nage'aangebaa? Hitettexxi ise'e qori› » hiyye.
Isenna «No'o Duuchchiing nage'akeni» hite.27Duuchchi Woddike Goottik manji hedheexxe kooba'ni gelteexxi lekka isixxe'ni ibbe; Giyaazi hoyyo'a dagee wodda Duuchchi Woddike Goottiki manji kinni «Yo'oshsha yaadeemmaxxee waali! Duuchchi Woddiki Gootti tenne maye'e anenaa'ni sho'exxanna ane'ni kula gopheexxa ege'nebo'nonni» hiyye.28Isenna «Anke gootta; ani'a belto uutottaa atee laqedheenna'a? ‹Muuxemabaake hiyyichchinni anee addachchissooxxe› atee hiyyeennabaa?» hite.29Elsa'inna Giyaazi'i, «Rakke kexxe anxa siqqo adhdhitettexxi me'i! Orake'ni mitti manjinninna nage'a aaxxoxxe: fedheeki manji nage'a ate'e aadhoole cuqqi hitoxxe; siqqichcho anxa beltinke albaa'ni uggi!» hiyye.30Beltiinxi ama kinn Elisa'ii, «Hedhaake Duuchchi Woddike Goottike summinninna hexxaatteke atike summinni kakataannen: haranga ate'e waale me'abe'noni!» hite. Tennexxe ke'exxi isexxa duuka me'e.31Geyazinna edise me'eexxi siqqichcho beltinke albaa'ni hana ugge; yaane kinn hafuurikinna lubbo hexxeemmabaan. Tennexxee Giyazi Elsa'ibaa hige mareexxi «Belti dammaqebaani» hiyye.32Elsa'inna mini'a e'yee wodda belti taqete'ni diiphemmamaba reyeemmani.33Belti kinna isi calli he'neeba hula culfeexxi; Duuchchi Woddike Goottibaa soodate.34Ookkoneechchi uduma taqeti iima sa'e beltoke'ni daba'leexxi ifika afo'o beltiinke afo'o'ni gence asse; illetanna, angatanna ittan ifixxe anganni gence asse. Konne rensha'ni hana dabba'le; eettene yanna'ni beltiinki bisi eebbe.35Elsa'inna ke'eexxi mini giddo eriqenna kayya maremeechchi uduma taqete'ni sa'eexxi higgeeni beltoke'ni hana daba'le; beltinkinna torbaane yanna hexxifatee'na ille isixxi baqqi hite.36Elsa'inna Giyaazi'i ye'eexxi «Sunemichcho ye'i» hiyye. Isinna isee'e ye'e. Isenna higge daggeeshshanni, «Belti atiki kunseten adhdhi» hiyye.37Isenna buttinake'ni wabbi hiteexxi Elisayixxe lekka'ni ibbe: ookkoneechchi uduma beltokanna adhdhiite me'ite.
Ha'la Afeeka Qaa'minaachcho
38Elsa'i Geligeela'a hige; ookkone boga'ninna solo'i e'yeemmani. Wabeekotik orgi isi edo ofo'le hedhee'naa erganjo ifika hiyyee qici, «Lumoka waaba booso uggite konne manni'a qaa'minaachcho gafi» hiyye.39Wabeekole giddii'ni mitti shaaniinsha hedheka shafuwwa qocatee'e fichchi giddi'a mare: isinna badda'a giddo lateexxa buqqe afe; buqqetenaa'ninna qoonjinxa gumma qoceexxi seemma ifixxe'ni wonsheexxi hige dageexxi shashshateexxi qaa'minaammalcho gafemmaxxe odolcho'ni gafe; maachcho kadeexxa kinni ayyinna ege'neemmabaani.40Manni ito'a qaa'minaachcho hoole; reefi afo'iki manqeeshshaani «Koo Duuchchi Woddike Goottike manjo; odolcho giddo shiltaaxxe ha'la hexxeni!» hine raarre; itanna indebaani.41Elsa'inna «bulle ane'ni uwwe» hiyye. Eettene bulle odolcho giddo woreexxi; «Manni ito'a uwwe» hiyye. Odolcho giddonna shiyaachchi afemeba'a.Dhibbi Manji Ita Ite
42Mitti manji umoke'ni raxxeexxe midhaxxa gumma ra'issineexxa lame tomme so'iinka xaltanna shiixxooka tisha qalqallote'ni uggeexxi Be'aalishaalisha Duuchchi Woddike Goottike manjibaa dage. Elsa'inna erganjo ifika «Manni ito'a uwwi» hiyye.43Erganjikinna, «Konnee hitta assee dhibba manji'a uwwanno?» hiyye qore.Elsa'i kinni, «Ito'a mannakee uwwi; Duuchchi Woddik Gootti, ‹Inde'na'a insa'ne'a gataani› hiyya'neeni» hiyye.
Elisa'ina44Ookkoneechchi uduma insa'ne'a shiqishshe Duuchchi Woddik Gootti hiyyemmashshanni inde'naa gate.
The Word for the World International