John10

1“Dong dik, dong dik, gô đnooy dii êêp kơy, kơyq leh dalơh hlê 'mok tuôôy hooy muut chuông trưưu, đơu laay tok muut bơơn trôôk kadrơy, nưq laa adro atôk ji adro varoh.2Bơh adro xing 'mok hooy muut laa manih xakaq ku trưưu.3Manih jư 'mok luh 'mok ka dro nưq, ji trưưu tameng apok ku adro xakaq, yôôch manih xakaq taayh anơng yal trưưu ku ni đơu jarooy oot vlôh pi gôk.4Tuôôy manih xakaq heq jarooy dêq trưưu ni vlôh, ni hooy adroyq oot, măn trưưu tyauq atêq ni, vii oot qween xet apok ku manih xakaq.5Bơh oot kajưk dik hnoq leh hooy tyauq dro be xet, wiit hlê, oot xadăk klôônq klơlh ni, vii oot leh qween xet apok ku khơl adro be xet.”6Lôôk Jê-xu đnooy apok atoh neq ka oot, bơh toleq dro nưq leh hlolh kaluh varơuq Kadraq đnooy dii oot laa kajoq.
7Lunưq, Lôôk Jê-xu laay đnooy dii oot: “Dong dik, dong dik, gô đnooy ka êêp kơy đaneq gô laa 'mok ku trưưu.8Dêq hloay dro leq truh adroyq gô laa adro atôk ji adro varoh, bơh trưưu leh tameng tyauq bơy oot.9Gô laa poop 'mok. Atoh dro leq hooy muut dalơh hlê gô, yôôch dro nưq hnoq jah wơơt, yôôch dro nưq hnoq hooy muut, hooy vlôh ji axek hloq manay rek.10Adro atôk leh truh atoh be aalq laa xôq varoh atôk, păk kaxêêt ji păk kaxêêt dêq. Gô truh xôq trưưu e varơuq riirh ji e jah trôôk galơh galaay.11Gô laa manih xakaq tamaq kaxay. Manih xakaq tamaq kaxay chiuq kaxêêt xăk riirh gô vii trưưu.12Adro dơơp hngơy, vii leh aalq laa adro xakaq, đơu trưưu leh aalq laa ku ni, lunưq ni hloq xo vari truh yôôych ka'lăk tăk trưưu ji xadăk jư xăk, măn xo vari varoh rôp trưưu ji dơơp ăm pachaay hyaak,13vii ni laa adro dơơp hngơy anưq đôôyq dii ni, ưng duh tabông be aalq laa truh trưưu.14Gô laa manih xakaq tamaq kaxay, gô 'yo xet trưưu ku gô, ji trưưu ku gô 'yo xet gô,15dang đaji Vaq xet gô, gô kung xet Vaq; ji gô chiuq kaxêêt xăk riirh gô vii trưưu.16Gô e kaluh trưưu kadrơy đơu leh măn đom chuông neq. Oot kung anưq, duh gô jarooy xuq, ji oot hnoq tameng apok gô, yôôch hnoq vơ e muuyq bơy, kung muuyq dro xakaq.17Vii varơuq neq, Vaq xiaq gô, vii gô chiuq kaxêêt xăk riirh gô xôq muuyq yưk tra, gô hnoq ik nhonq jah ni.18Leh kơyq xok xăk riirh gô klơlh gô, lunư, gô kadih chiuq kaxêêt ni, Gô e qwuyen chiuq kaxêêt xăk riirh gô, ji gô e qwuyen nhonq xok ni yưk tra. Gô heq nhonq xok tanưưl neq xing Vaq gô.”
19Varơuq aklah vlôh laay xalih vlôh đom khơl manih Jo Thaiq vii kaluh apok nưq.20Tuôôy nưq, 'ngưng manih đom bing oot đnooy: “Dro neq biq kamuuych nhôp ji ta'ngơk. Aleq êêp kơy tameng ni?”21Sôôq kadrơy yôôych đnooy: “Neq leh aalq laa toleq apok ku adro biq kamuuych nhôp. Dang aleq kamuuych hnoq ik luh mot adro apul?”
22Atêq nưq, Lêh Hnhư Hơu Đơơu jah dơơp aduq Jê-ru-sa-lem. Tuôôy nưq laa xiêk ka oaq,23ji Lôôk Jê-xu đong hooy hlê đom hnhư hơu aduq ra vook Sa-lô-môn.24Atêq nưq, khơl manih Jo Thaiq dưk rawiit Kadraq, ji oot đnooy dii Kadraq: “Thơy kưq dơơp biit ravơq đom xuum ku 'wot dong truh dong leq? Atoh Thơy laa Lôôk Wơơt Dêh, dayh đnooy tyauq trôôk rayơh rayơơy ăm xet ka 'wot.”25Lôôk Jê-xu tơơl apok oot: “Gô heq đnooy dii êêp kơy ji êêp kơy leh tuôq. Kaluh varơuq đơu gô dưk dơơp đom yal Vaq gô, oot dơơp xanưk ka gô.26Lunư, êêp kơy leh tuôq vii êêp kơy leh thuôk xuq trưưu ku gô.27Trưưu gô tameng apok gô, măn gô 'yo xet oot, ji oot tyauq gô.28Gô kung kahniq ka oot varơuq riirh đơơy đơơy, ji oot kajưk dik leh biq hư hlơơp truh miet miet, ji hnoq be kơyq varoh ik paq kê trưưu leq đom sôôq oot klơlh ti gô.29Vaq Gô, Kơy heq kahniq oot ka gô, laa kôt lơyq iaq dêq hloay, ji be kơyq hnoq ik varoh oot klơlh ti Vaq.30Gô ji Vaq laa muuyq.”31Khơl manih Jo Thaiq laay xok phơu xôq hnoq ik tiip Kadraq.32Lôôk Jê-xu tơơl hlê dii oot: “Gô heq kahnoq ka êêp kơy 'ngưng varơuq kaxay xing Vaq. Êêp kơy xok phơu tiip gô vii varơuq leq đom sôôq kaluh varơuq nưq?”33Khơl manih Jo Thaiq tơơl hlê Kadraq: “'wot leh tiip phơu kơy vii varơuq kaxay, bơh vii kadrôôp katơơk galơh, ji vii kơy, laa muuyq dro manih araak, đong kadih xưng kơy laa Kơy Plêêk.”34Lôôk Jê-xu tơơl hlê oot: “Đom ganuun ku êêp kơy, be aalq e apok jah valơk đaneq: ‘Gô xanoh: “Êêp koot laa yaak”’ jơq be?35Atoh Kadraq taayh oot, nưq laa khơl adro đơu apok ku Kơy Plêêk truh dii, laa yaak (ji Rahlăp Vah be ik biq phaq ka'lăk),36yôôych aleq êêp kơy đnooy dii Kơy đơu Kơy Plêêk heq xôq đêh ji patăk dăt muut đom dêh araak đaneq: ‘Kơy katơơk galơh,’ vii gô đnooy: ‘Gô laa Koot Kơy Plêêk’?37Atoh gô leh đong dơơp kaluh varơuq ku Vaq gô, yôôych te tuôq gô.38Bơh atoh gô đong dơơp, long tabơh êêp kơy leh tuôq gô, yôôych dayh tuôq kaluh varơuq nưq, xôq êêp kơy hnoq ik xet ji hlolh đaneq Vaq đom gô, ji gô đom Vaq.”39Vii anưq, oot laay axek trôôk rôp Kadraq đơu Kadraq xaloot klơlh ti oot.
40Muuyq yưk tra, Kadraq wiit xuq piik pi hơq tavook daak Jô-đanh, truh aduq đơu adroyq neq Jăng dơơp bap-tem yôôch Kadraq măn aduq nưq.41'Ngưng manih truh dii Kadraq ji oot đnooy đaneq: “Long Jăng heq leh dơơp dơuq akêh leq, bơh tôôy varơuq đơu Jăng heq đnooy truh manih neq laa jơq.”42Ji aduq nưq, 'ngưng dro xôq xuum tuôq aduq Kadraq.

FAR EAST BROADCASTING COMPANY

https://app.library.bible/content/37a1dc7a54269bd3