Acts11
1Lăm vrêq, khây con tuyh bây khây pôp ŏh gŭq u lam ntĕh Yu-đê chăng pành văl aling khoi gĕh wŏq camvŭm Cô Voq de.2Canŏq en, lăm Phi-e-rơ saq hao tât Yê-ru-sa-lem, khây tamun sŭng vatom gĕh chit ntô tăm cammlăh bây nĕh,3nhai pành cô gĕh saq lăp sŭng gatŭq khây tamun đăng chit ntô en sa simơ bây khây nĕh.4Aheq lăm hao mŭnh, Phi-e-rơ nhai đơm an khây nĕh bây vôq lưr pành:5“Sŭng lăm ănh vơu ngwân u palây Yôp-bê, en sŭng lăm chhu vôq ănh ngâr ngâr ănh gĕh sinlơ an sây sĭq du păch vadâng nŏq rŏh jưr, dân ca du păng nseng măq lăm puôn mŭh gĕh yar jưr a vlơ trôq en nĕh tât sŏng vi ănh,6en lăm pơq măt deng lăp sŭng nŏq, ănh chĕq măt en sây khây con puôn jâng vlơ ntĕh, khây gŏng nggô, khây con wơr vlơ măt ntĕh, nggâm khây sŭm khlang a vlơ galwang trôq.7En ănh khoi chăng gĕh du camvŭm nhai bây ănh: ‘Ơ Phi-e-rơ, lăm căh vĭq, ôp gŏng en sa chĕq vồh!’8Aheq ănh âh: ‘Cŭh Siđăch, đăng gĕh nồq, mvăc păch sŭq cavơm ha đăng soch jrŏh đăng lăm lây lăp gĕh sŭng mŭnh con hôq.’9Cồ canŏq, camvŭm a vlơ trôq âh sĭq vlâq sŭng dâq di var pành: ‘Khây păch lây Cô Voq gĕh ôp jrŏh, con vâng sên pành sŭq cavơm vầy.’10Lăm nŏq, vrŭq heq gĕh ôp lŭh tât pe dâq, en ăp sinlơ gĕh đưc sĭq vlâq hao trôq.11En sên tĭq, sŏng lăm nŏq, pe ndu tamun klô a Sê-sa-rê gĕh pađăr saq tât bây ănh, tao yăq a vôq nhi cồ khananh gŭq n'un.12Lăm nŏq, Siđăch Wênh pađăr ănh saq bây khây nĕh, vâng ngâm păch lây lĕq. Canŏq en, prau ndu pôp ŏh heq khoi tăm saq bây ănh, en khananh saq lăp sŭng nhi tamun nŏq de.13Alưr nŏq, nĕh đơm sĭq vlâq an khananh bơh năm nĕh gĕh sây con gŭn tao yăq sŭng nhi nơm, săng pành: ‘Vrêq pađăr tamun saq tât Yôp-bê, en panh Si-môn, tamun cồ gĕh cuôl pành Phi-e-rơ,14cồ tamun nhai an pôp khây camvŭm pân pađau chĕq don a nŏq, pôp gĕh yơt — pôp nggâm lĕq caniêp pôp de.’15En lăm ănh pơq vôq nhai, Siđăch Wênh rŏh jưr vlơ khây nĕh khoi dân ca vlơ vơn a lăm daq vôq.16En ănh căh tât camvŭm nhai Siđăch de, bơh năm Siđăch gĕh nhai: ‘Yăng gĕh ôp vrŭq ŭm vôq a daq; cồ canŏq, pôp ŏh nhâng gĕh ŭm vôq a Siđăch Wênh.’17Canŏq, hê Cô Voq gĕh paq an khây nĕh simơ du sinăc khoi dân ca an vơn lăm chĕq nuih talaq tôq u siđăch, cồ Candranh Krit Yêsu, nŏq ănh heq cồ vu lây en thêng păng khăq Cô Voq?”18Vrêq heq, lăm chăng gĕh khây camvŭm nŏq, khây nĕh đăng tăm cammlăh wŏq en tapơ Cô Voq, nhai pành: “Canŏq Cô Voq khoi gĕh paq an khây văl daq aling nuih talaq palâq vôq chĕq wŏq sinlơ rĭh.”19Alưr nŏq, khây tamun saq taprăh a dâq ôp lŏh sat gĕh văt tât payh ơ vrŭq Ê-tiên nŏq saq parang lŭh tât Phê-ni-si, Chip-rơ bây An-ti-ôt, đăng nhai camvŭm Cô Voq an vu lây aling, ayh an tamun Yo-thai.20Cồ canŏq var pe ndu sŭng khây nĕh cồ khây tamun gĕh tơm u Chip-rơ bây Si-ren, en khây tamun heq lăm saq tât An-ti-ôt, khây nĕh khoi nhai bây khây tamun Hi Lap, nhai lŭh Sipơp Yăh sĭq Siđăch Yêsu.21Gĕh ti Cô Voq gŭq bây khây nĕh; nŏq gĕh gŏq tamun, payh ơ tôq, nŏq palâq vôq sĭq bây Cô Voq22Vrêq heq, camvŭm vu nhai sĭq khây tamun heq parang tât tôr Vatom Gŭn gŭq u Yê-ru-sa-lem, mŏh khây nĕh pađăr Ba-na-ba saq tât tu An-ti-ôt,23en lăm saq tât gatŭq bây deng sây sinlơ yăh an ngăn Cô Voq de, nĕh gĕh vui hơn bây pành jrâng lĕq săq căh gŭq sŭng Cô Voq bây sinlơ kram gajăp sŭng nuih talaq.24Mvăc Ba-na-ba heq cồ tamun yăh, vênh rămvi Siđăch Wênh nggâm sinlơ tôq, en gĕh gŏq tamun gĕh văt lăp an Cô voq.25Alưr nŏq, nĕh saq tât Tat-sơ chĕq wŏng Sau-lơ.26Lăm wŏng vlam en, nĕh iau Sau-lơ tât An-ti-ôt. Canŏq en, vrŭq văt tât an khây nĕh lawân sŭng lĕq du mva nŏq cồ gĕh vatom sĭq vlâq bây Vatom Gŭn en pađau tămti gŏq ndu. Khoi sŭng lăm nŏq, dâq vôq lĕq u An-ti-ôt, khây con tuyh gĕh cuôl pành Tamun Krit.27Lăm vrêq, sŭng khây năr nŏq, khây tiêng tri a Yê-ru-sa-lem saq jưr tât An-ti-ôt.28Canŏq en, lăm du mvu sŭng khây nĕh, săq A-ga-but, tao yăq, don Siđăch Wênh, nĕh an gưt pành du dâq pangot măq mơch tât vlơ lam dưnya. Vrŭq heq gĕh văt tât sŭng nggơih Cơ-lôt.29Canŏq en sŭng khây con tuyh, ăp ndu sŭng khây nĕh, hê vu lây gĕh prơn dâng lây, khây nĕh du nuih talaq sŭmmrăp lŭh păch tăm lăp ti chĕq dơp an pôp ŏh rĭh u Yu-đê,30en khây nĕh nhâng gĕh ôp canŏq, lăm don ti Ba-na-ba bây Sau-lơ dơp an jên tât khây cô camvĭnh.
FAR EAST BROADCASTING COMPANY