প্রেরিত5
1অননিয় নামনি সাছে মানসিআ গাওনি হিন্জাও সাফীরাজৗং খৌছে জানানৈ টুকরাছে সম্পত্তি ফানদৗং।2বিয়ৗ বি ফাননায় টাকানি মাখাছেখৌ গাওজৗং দৗন্নানৈ থানায় মাখাছেখৌ লাবৗনানৈ প্রেরিতফৗরনি আঠেংয়াও দৗনফৈদৗং আরৗ বে বিষয়খৌ বিনি হিন্জায়াবৗ মিথিগৌ মৗন।3অব্লা পিতরা বিখৌ হৗন্দৗং, “ও অননিয়, বে মাব্রৈ জাখৗ যে শয়তাননা নৗংনি গৗসৗয়াও হাবনৗ মৗনখৗ আরৗ হু ফান্নানৈ মৗন্নায় মাখাছে টাকাখৌ মাব্রৈ গাওনি থাখৈ দৗনখৗমানানৈ গৗথার জিউনি সিগাঙাও নংখায় বুংনৗ হাখৗ।4মা কি ফাননায়নি সিগাং বে সম্পত্তিয়া নৗংনি অৗঙা মৗন? আরৗ বে সম্পত্তিখৌ ফানখাংনাইনি উনাও টাকায়া নৗংনিনৗ ছায়াও নৗংনি অধিকার গৈয়ামৗন, অব্লা বেবাদিখৌ সান্নায়া মা বাদি নৗংনি গৗসৗয়াও ফৈখৗ? নৗঙৗ মানসিফৗরখৌ বান ছৗলৈবায় বে অৗঙা, নাথায় ঈশ্বৗরখৌছৗ ছৗলৈদৗং।”5জেব্লা অননিয়আ বেফৗরখৌ খৗনাদৗং অব্লা বিয়ৗ হ্বায়াও গৗগ্লৈনানৈ থৈদৗং; আরৗ বে ঘটনাখৌ খৗনানায় সাফ্রৗমবৗ বিরাঠ গিদৗং।6অব্লা খাইছে জৗহৗলাওফ্রা ফৈবায় বিখৌ সি'জৗং ফানফবনানৈ বাইরাও লাংনানৈ ফবহৈদৗং।7তিন ঘন্টাসৗনি উনাও বে ঘটনাফৗরখৌ মিথিয়ালাবমানৗ বিনি হিন্জাওয়াবৗ সিঙাও হাবফৈদৗং।8আরৗ পিতরা বিনিয়াও সৗংদৗং, “আংনৗ খৗথাছায়, নৗং আরৗ অননিয় সানৈজৗং সম্পত্তি ফাননানৈ মৗনায় দামমা বে বান মৗন না?” বিয়ৗ হৗনবায়, “ও বিবান মৗন!”9পিতরা হৗনবায়, “নৗংছৗরৗ ফৗরবুনি গৗথার জিউখৌ আনজাৎ লানৗ মাব্রৈ সানৈবৗ খৌছে জাখৗ? খৗনাছং, নৗংনি হৌয়াখৌ ফবহৈনায় মানসিফ্রা দরখংয়াও ছফৈখাবায়, আরৗ বিছৗরৗ নৗংখৌবৗ বান্নানৈ বাইরাও লাংনায়ছৈ।”10বি সমাওনৗ সাফীরাআ বিনি আঠেং গুডিয়াও গৗগ্লৈদৗং আরৗ থৈদৗং। অব্লা জৗহৗলাওফ্রা ন্ব'সিঙাও হাবহৈদৗং আরৗ বিখৌ থৈনায় নুদৗং বাইরাও বানলাংদৗং আরৗ হৌয়ানি সেরাও ফবহৈদৗং।11বেফৗরখৌ খৗনানানৈ গাছেন মন্ডলী আরৗ বয়বৗ জাইফ্রা বে ঘটনাখৌ খৗনাদৗং বিছৗরৗ বিরাঠ গিদৗং।12প্রেরিতফ্রা মানসিফৗরনি সিগাঙাও গৗবাং সৗমৗ গৗনাং চিহ্নফৗর আরৗ বৗথিয়া গৗনাং হাবাফৗরখৌ মানসিফৗরনি গেজেরাও মাওদৗং মৗন। আরৗ গাছেন বিশ্বাসিফ্রা বয়বৗ শলোমননি বারান্দাও জ' লৗগৗলাজ্লায়ৗমৗন।13মানসিফ্রা বিছৗরখৌ জৗবৗদ মান হৗয়ৗব্লাবৗ রাওবৗ বিছৗরজৗং লৗগৗ লানৗ গৗহৗ খৗলামাখৗছৈ।14অব্লাবৗ বাংসিনছাও বাংসিন হৌয়া আরৗ হিন্জাওফ্রা ফৗরবুখৌ ফৗথাইনৗ হমমাছৈ আরৗ বিছৗরজৗং লৗগৗছে লৗগৗ লাফাদেৎদৗং।15মানসিফ্রা জব্রাফৗরখৌ লামাফৗরাও লাবৗদৗং আরৗ বিছানাফৗরাও আরৗ সেরফায়ফৗরাও ফুঠুনানৈ দৗনফৈদৗং জাহাথে পিতরা লামাজৗং থাবায়লাংনায় সমাও বিনি সাইখংঙা যেন বিছৗরনি খাইছেনি, ছায়াও গৗগ্লাইনায় বাদি।16আরৗ যিরূশালেমনি খাঠি খালা নৗগৗরফৗরনিফ্রায়বৗ গৗবাং মানসিফ্রা জব্রাফৗর আরৗ বাদুয়া জিউফৗর হমজানায় মানসিফৗরখৌ লাবৗদৗং; আরৗ বিছৗর বয়বৗ ছৗখাজাদৗং।17গাহায় যাজক আরৗ বিনি লৗগৗফৗর, বে জাবায়, সদ্দূকীফৗরনি দলনি সর্দস্য প্রেরিতফৗরখৌ বিরাঠ মগন ছানানৈ বিছৗরনি বিরুদ্ধ জিখাংদৗং।18বিছৗরৗ প্রেরিতফৗরখৌ হমনানৈ জনসাধারণনি জৗবথেসালিয়াও দৗনদৗং।19নাথায় বি হরাও ফৗরবুনি সাছে আরফ'আ জৗবথেসালিনি দুয়ারখৌ খেওদৗং আরৗ বিছৗরখৌ বাইরাও লাংনানৈ হৗন্দৗং।20“থাং, নৗংছৗরৗ মন্দিরাও গছংনানৈ গৗঠাংনি খৗথাখৌ গাছেন মানসিফৗরনৗ খৗথাহৈ!”21প্রেরিতফ্রা মানিদৗং, আরৗ ফুংজামাৎনিন মন্দিরাও হাবহৈনানৈ মানসিফৗরখৌ ফৗরৗংনৗ হমদৗং। নাথায় দেৎসিন যাজক আরৗ বিনি লৗগৗফৗরা ছফৈনানৈ, ইস্রায়েলনি দৈদেনগিরিফৗরখৌ লিংথুমনানৈ মৗনছে জুথুমা খৗলামদৗং, আরৗ প্রেরিতফৗরখৌ লাবৗনানৈ আফাৎগিরিফৗরখৌ জৗবথেসালিয়াও থৗনহৎদৗং।22নাথায় বে সান্ত্রিফ্রা জৗবথেসালিয়াও ছহৈনানৈ প্রেরিতফৗরখৌ মৗনহৈয়িখাই থাংফিননানৈ বে খবরখৌ হৈদৗং।23“জৗঙৗ জৗবথেসালিখৌ ফাংথেনাইনি মৗনহৈয়ৗ, লৗগৗছে নেগ্রাফৗরখৌ গছংনানৈ দুয়ারফৗরাও থানায় মৗনহৈদৗং, নাথায় জেব্লা জৗঙৗ খেওনানৈ বিছৗরখৌ নাইহৈয়ৗ, জৗঙৗ সিঙাও রাওখৌবৗ মৗনাখৈ।”24দেৎসিন যাজকফৗর আরৗ মন্দিরনি নেগ্রাফ্রা আরৗ সান্ত্রিফ্রা বেখৌ খৗনানানৈ প্রেরিতফৗরখৌ মা জাখৗ হৗন্নানৈ সৗমৗ নাংহৗদৗং।25অব্লা ছৗরবা সাছেআ ফৈনানৈ হৗন্দৗং, “খৗনাছং! জাই মানসিফৗরখৌ নৗংছৗরৗ জৗবথেসালিয়াও দৗনদৗংমৗন, বিছৗরৗ মন্দিরাও মানসিফৗরনৗ ফৗরৗংগাছেননৗ দং।”26বি সমাওনৗ হাদাংগিরিয়া গাওনি সান্ত্রিফৗরখৌ লানানৈ প্রেরিতফৗরখৌ লাবৗদৗং। বিছৗরৗ জোর খৗলামাখৈ, মানৗনা বিছৗরৗ মানসিফৗরখৌ অন্ঠাইজৗং খুবৈথাৎজানৗ গিদৗংমৗন।27বিছৗরৗ প্রেরিতফৗরখৌ সিঙাও লাবৗনানৈ আফাৎগিরিফৗরনি সিগাঙাও ফছংহৈদৗং, যেন দেৎসিন যাজকজৗং সৗংজানৗ থাখৈ।28“জৗঙৗ যীশুনি নামৈ ফৗরৗংনাইখৌ গৗরায়ৈ রাইফৗথায়া মৗন,” বিয়ৗ হৗন্দৗং, “অব্লাবৗ নৗংছৗর গাওছৗরনি ফৗরৗংনায়জৗং যিরূশালেমাও ফৗস্রাওবায়, আরৗ বে মানসিনি থৈনি জৗংনিয়াও দাইখৌ খৗলামনৗ সান্দৗং।”29অব্লা পিতর আরৗ গুবুন প্রেরিতফ্রা বুংফিনদৗং, “জৗঙৗ, মানসিফৗরনিখৌ অৗঙা নাথায় ঈশ্বৗরনি থৗন্নায়খৌছৗ মানিথারনাংনায়।30নৗংছৗরৗ জাইখৌ ক্রুশাও ডৗখ্ঠাবনানৈ সিথাৎদৗং, বি যীশুখৌ জৗংনি আজৌ আজৈফৗরনি ঈশ্বৗরা থৈনায়নিফ্রায় ঠাংখাংফিনহৗবায়।31ঈশ্বৗরা বিখৌ রাজপুত্র আরৗ বাছাইগিরি খৗলামনানৈ গাওনি আগ্ডা ঠিঙৈ ফজবায় আরৗ যেন ইস্রায়েল মানসিফৗরখৌ গৗসৗ সৗলায়হৗয়ৗ আরৗ বিছৗরনি পাপফৗরখৌ ক্ষমা হৗনৗ।32জৗংবৗ বেফৗরনি থাখৈ সাক্ষী, আরৗ ঈশ্বৗরা গাওনি খৗথা মানিগ্রাফৗরনৗ হৗনায় গৗথার জিউয়াবৗ বেফৗরনি সাক্ষীয়া।”33জেব্লা বিছৗরৗ বে খৗথাখৌ খৗনায়ৗ, অব্লা দৈদেনগিরিফ্রা রাগ জৗংনানৈ বিছৗরখৌ সিথাৎনৗ হাস্থায়দৗং।34নাথায় গমলীয়েল মুংনি সাছে ফরীশী আইন গুরুআ, গাছেন মানসিফৗরজৗং মান হৗজায়ৗমৗন, আফাৎগিরিফৗরনি সিগাঙাও গছংনানৈ হৗন্দৗং, বে মানসিফৗরখৌ দান্দিছেনি থাখৈ বাইরাও লাংথদৗ।35আরৗ বিয়ৗ সানসুমৈগিরিখৌ হৗন্দৗং, “ও জৗংনি ইস্রায়েল মানসিফৗর বে মানসিফৗরনি ছায়াও নৗংছৗরৗ জাইখৌ মাওনৗ হাস্থাইদৗং, বেনি থাখৈ সাবধান জাদৗ।36মানৗনা ইছে সিগাঙাও থুদা মুংনি সাছে নুজানানৈ গাওখৌ সাছে গেদেৎ হৗন্নানৈ লাদৗংমৗন, আরৗ বিজৗং চারশোজন মানসিফৗর লৗগৗ লাফৈদৗং মৗন। নাথায় সিথাৎজানায়নি উনাও বিনি হান্জানি মানসিফ্রা গাওসাৎলাংনানৈ গৗমালাংদৗং।37বিনি উনাও মানসিফৗরনি অন্জিমাখৌ লানায় সমাও গালীলনি যিহূদা নুজানানৈ দল মৗনছে মানসিফৗর লানানৈ বিরুদ্ধ জিখাংদৗ মৗন। বে সমাওবৗ বিবৗ সিথাৎজাদৗং আরৗ বিনি মানসিফ্রা ছেৎখাই ফেৎখায় জাদৗংমৗন।38বিখাইনৗ, আং নৗংছৗরখৌ হৗন্নৗ, বে মানসিফৗরনি ছায়াও নৗংছৗরৗ জেবৗ দাখৗলাম। বেছৗরখৌ থাংনৗ হৗ, বিছৗরনি মাওনায়ফ্রা মানসিনিফ্রায় জাদৗংব্লা, বিছৗরৗ গাওছৗরনৗ জৗবলাংনায়।39নাথায় ঈশ্বৗরনিফ্রায় জাদৗংব্লা, নৗংছৗরৗ বে মানসিফৗরখৌ বাথেনৗ হাথারনায় অৗঙা। নৗংছৗরৗ মিথি, নৗংছৗরৗ ঈশ্বৗরনি বিরূদ্ধনাওছৗ দাওহা নাংনায় জানায়।”40বিনি বুংনায়খৌ মানসিফৗরা মানিনান লাদৗং। বিছৗরৗ সিঙাও প্রেরিতফৗরখৌ লিংহৎদৗং আরৗ বিছৗরখৌ বুনানৈ যীশুনি নামৈ বুংবাওয়ি বাদি গৗরায়ৈ রাইফৗথানানৈ বিছৗরখৌ, হগারহৎদৗং।41যীশুনি নামৈ মান গৈয়ি খৗলামজাব্লাবৗ বিছৗরজৗং যোগ্য সানজাখানায়খায় প্রেরিতফ্রা সানসুমৈগিরিনিফ্রায় রংজা বাজা অৗংখাৎলাংদৗং।42আরৗ বেনি উনাও বিছৗরৗ সানফ্রৗমবৗ মন্দিরনি সিথ্লাও যীশুআনৗ মসিহ হৗন্নানৈ মানসিফৗরনি ন্ব' ন্ব' ফৗরৗংনাইখৌ মাব্লাবাবৗ বন্ধ খৗছামা মাৎনিন যীশুনি গাহাম খৗথাখৌ খৗথাবাইদৗং।
The Seed Company