Filipi2
Nyɛɛ kase Kristo suɔmi ɔ
1Anɛ Kristo se nyɛɛli woɔ a bi he wami? Anɛ nyɛ suɔ mi bɔ nɛ e maa hia kaa nyɛɛ ye ke bua mi? Nyɛ nuɔ he kaa nyɛmimɛ ji wɔ ngɛ Nutsɔ ɔ mi, nɛ Mumi kake too ɔ nɛ ngɛ wɔ tsuo wa mi? Anɛ nyɛ tsui mi hi nɛ nyɛ naa mɔbɔ lo?2Lɛɛ nyɛɛ suɔ nyɛ he nɛ nyɛɛ hi si saminya. Nyɛɛ hɛɛ oti kake, nɛ nyɛɛ pee kake kɛ juɛmi kake kɛ tsu ni, nɛ nyɛ ha nɛ ye bua nɛ jɔ ye he anɔkuale mi.3Nyɛ ko fo nyɛ kɛkɛ nyɛ nɔ́ mi; nyɛ ko kale nyɛ he. Nyɛɛ ba nyɛ he si, nɛ nyɛ susu ni kpahi a he pe nyɛ nitsɛmɛ nyɛ he.4Nyɛ ko susu nyɛ kɛkɛ nyɛ níhi a he, se nyɛ na deka kɛ ha ni kpahi hulɔ.5Nyɛɛ ba nyɛ je mi kaa wa Nutsɔ Yesu Kristo.6Mawu ji lɛ mohu, se e dí e Mawu nɛ e ji ɔ se.7Nɛ e si e he wami kɛ e anunyami nɛ e ngɛ ɔ, nɛ e pee e he sɔmɔlɔ nɛ a fɔ lɛ kaa nɔmlɔ.8E ba e he si hluu kɛ ya su gbenɔ mi tete ngɛ sɛumi tso nɔ.9Enɛ ɔ he je nɛ Mawu wo e nɔ gojoo ngɛ, nɛ e ha lɛ biɛ nɛ pã biɛ fɛɛ biɛ,10konɛ nakutso fɛɛ nakutso nɛ kpla si kɛ ha Yesu biɛ ɔ ngɛ hiɔwe kɛ zugba a nɔ kɛ e sisi,11nɛ lilɛ tsuaa lilɛ nɛ jaje ke Yesu Kristo ji Nutsɔ kɛ wo Mawu nɛ ji Tsɛ ɔ hɛ mi nyami.12Suɔli, be mi nɛ i ngɛ nyɛ ngɔ ɔ, nyɛ buɔ ye munyu ɔmɛ tue. Se jehanɛ ɔ nɛ i be nyɛ ngɔ ɔ, e sa kaa nyɛɛ bɔ mɔde nɛ nyɛɛ pee nɔ́ kpakpahi nɛ tsɔɔ kaa a he nyɛ yi wami. Nyɛɛ bu Mawu tue kɛ he si bami saminya. Nɛ nyɛ je nyɛ he kɛ je nihi nɛ e sume ɔmɛ a he.13Ejakaa Mawu ɔ ngɛ ni tsue ngɛ nyɛ mi, e ngɛ yee kɛ ngɛ nyɛ buae nɛ nyɛɛ bu lɛ tue nɛ nyɛɛ pee e suɔmi nya ni.14Nyɛɛ pee nyɛ nɔ́ tsuaa nɔ nɛ munyu hwitihwiti kɛ nya sami nɛ ko hi mi,15konɛ piami ko nɛ ko hi nyɛ he. Nyɛɛ hi si himi nɛ he tsɔ kaa Mawu bimɛ, nɛ a ko na piami ko ngɛ nyɛ he ngɛ diblii je nɛ ɔ nɛ hyi tɔ kɛ nimli gɔdɔgɔdɔ kɛ tue mi tili ɔ mi. Nyɛ kpɛ ngɛ a kpɛti kaa blɔ tsɔɔmi kanehi,16nɛ nyɛ je wami munyu ɔ kpo kɛ tsɔɔ mɛ.Konɛ ke Kristo kpale kɛ ba a, ma na bua jɔmi kaa ye ni nɛ i tsu ngɛ nyɛ kpɛti ɔ, e pee we yaka gu.17Nɛ ke a ma pue ye muɔ si kaa bɔ sami kɛ ha Mawu ngɛ nyɛ hemi kɛ yemi he, nɛ tsɔɔ kaa, ke i ma gbo kɛ ha nyɛ ɔ, lɔ ɔ tete ye bua maa jɔ he, nɛ nyɛ hu nyɛ ma na bua jɔmi .18Nɛ e sa kaa nyɛ bua nɛ jɔ enɛ ɔ he, nɛ nyɛɛ kɛ mi nɛ nya kaa i na he blɔ nɛ ɔ nɛ i gbo kɛ ha nyɛ.
Paulo hɛ ja ngɛ e huɛmɛ a he
19Ke Mawu suɔ ɔ, e be kɛe nɛ i ma tsɔ Timoteo kɛ ba nyɛ ngɔ. Nɛ ke e kpale kɛ ba a, e ma ba bɔ mi nyɛ he sane kɛ wo mi he wami.20Nɔ ko nɔ ko be nɛ ngɛ nyɛ he suɔmi kaa Timoteo.21Nɔ tsuaa nɔ ngɛ lɛ nitsɛ e níhi a he susue, se pi Yesu Kristo níhi.22Se nyɛ le Timoteo, e ngɛ kaa ye bi. E ngɛ yee kɛ ngɛ mi buae ngɛ Manye Munyu ɔ fiɛmi mi.23I ma suɔ nɛ ma tsɔ lɛ kɛ ba nyɛ ngɔ nɔuu ke i le nɔ́ nɛ maa ba ye nɔ ngɛ hiɛ ɔ.24Nɛ i heɔ yeɔ kaa e be kɛe nɛ Nutsɔ ɔ ma ha nɛ ami nitsɛ hu ma ba nyɛ ngɔ.25Se i susu kaa e sa nɛ ma tsɔ wa nyɛmi Epafrodito kɛ kpale kɛ ba nyɛ ngɔ. Nyɛ tsɔ lɛ nɛ e ba ye kɛ bua mi ngɛ ye hiami ɔ mi. I kɛ lɛ wa pee nyɛmi kɛ ngɛ ta kake hwue.26Amlɔ nɛ ɔ i kpale ngɛ lɛ tsɔe kɛ ba we, ejakaa e hɛ ngɛ jae ngɛ nyɛ tsuo nyɛ he, nɛ e hao hulɔ, ejakaa nyɛ nu kaa e be he wami.27Nɛ e be he wami niinɛ. Anɔkuale mi ɔ, e piɛ bɔɔ nɛ e gbo. Se Mawu na imi kɛ lɛ tsuo mɔbɔ nɛ e ha we nɛ kikɛmɛ a aywilɛho sane nɛ ɔ nɛ ba piɛ ye haomi ɔmɛ a he.28Enɛ ɔ he je titli nɛ i ngɛ lɛ nyɛ ngɔ tsɔe ekohu ngɛ; nɛ i le bɔ nɛ nyɛ bua maa jɔ nyɛ he ha ke nyɛ na lɛ ɔ. Nɛ ami hu i ma na bua jɔmi nɛ ye kɔmɔ yemi ɔ se maa po bɔɔ.29Lɔ ɔ he je ɔ, nyɛ he lɛ atuu kɛ bua jɔmi babauu ngɛ Nutsɔ ɔ biɛ mi. Ejakaa nihi kaa kikɛ ɔ, a sa hɛ mi nyami womi.30E ngɔ e he wami tsuo kɛ ha Kristo ni tsumi ɔ, nɛ e piɛ bɔɔ nɛ e ko gbo benɛ e ngɛ yee kɛ ngɛ mi buae kɛ tsu ni tsumihi nɛ nyɛ nyɛ we nyɛ tsu ɔ, ejakaa i kɛ nyɛ wa kpɛti kɛ ɔ.Biblica, Inc.