ቄሴታ ሃላቃስ ጊዲዛ ጌሻ ማይኦ
1ሄሳፌ ጉዬ ቄሴታ ሃላቃ ኢያሶይ ጎዳ ኪታንቻ ሲንን ኤቂዳይሳኔ ጻላኤይካ ኢዛ ሞታናስ ኢዛፔ ኡሻቻ ባጋራ ኤቂዳይሳ ታና ኣጁታን ቤሲዴስ።2ጎዳይ ቃሴ ጻላኤ፥ «ሃይሶ ጻላኤ ጎዳይ ኔና ሴሮ፤ ዬሩሳላሜ ዶሪዳ ጎዳይ ኔና ሃንቆ፤ ሃይሲ ኣዴዚ ታማፔ ኣቲዳ ዱርጫ ጊዴኔ?» ጊዴስ።3ኢያሶይካ ቂታ ማይኦ ማይኢዲ ኪታንቻዛ ሲንን ኤቂዴስ።4ኪታንቻዚ ባ ሲንን ኤቂዳይታ፥ «ሄሳ ቂታ ማይኦዛ ኢዛ ቦላፌ ቃሪ ዲጊቴ» ጊዴስ፤ ኢያሶስካ፥ «ሄኮ ታ ኔ ናጋራ ኔፔ ዲጋዲስ፤ ታ ኔና ሎኦ ማይኦ ማይዛና» ጊዴስ።5ቃሴ ታኒካ፥ «ጌሻ ጎሴ ኢዛ ሁኤን ጎዚሲቴ» ጋ ኣዛዛዲስ፤ ጎዳ ኪታንቻይ ኢዛ ኣቻን ኤቂ ዲሺን ጌሻ ጎሴ ኢዛ ሁኤን ጎዚሲዳኔ ማይኦካ ማይዚዳ።6ጎዳ ኪታንቻይካ ኢያሶይ ናጌታና ማላ ኢዛስ ዞሬ ኢሚዴስ።7ኡባፌ ዎልቃማ ጎዳይ፥ «ኔ ታ ኦጌን ቢኮ፥ ኔ ታ ኣዛዞ ናጊኮ ታ ኬ ኔ ኣይሳና፤ ጊቤዛሲካ ኔ ኣዋታና። ቃሴካ ሃይሳን ኤቂዳይታራ ኢሲፌ ኔ ጌላና ማላኔ ኬዛና ማላ ታ ኔስ ማታ ኢማና።8«ሃይሶ ቄሴታ ሃላቃ ኢያሶ ሲያ! ኔ ማታን ኔና ኦ ማዲዛይቲ ቡሮ ሲንፌ ሃናና ሎኦ ማላታ ጊዲዳ ጊሻስ ኢስቲካ ሲዬቶ፤ ሄኮ ታኒ ቡሮ ፑርጪዛ ታ ኣይሌዛ ኤሃና።9ቤያ! ታኒ ኢያሶ ሲንን ላፑን ኣይፌይ ዲዛ ሹች ዎና፤ ታ ሄ ሹቻ ቦላን ጻፌቲዛዝ ዎጫ ዎጫ ጻፋና፤ ሄ ቢታይ ናጋራካ ታ ኢሲ ጋላስ ዲጋና» ጌስ።10ኡባፌ ዎልቃማ ጎዳይ፥ «ሄ ዎዴ ኢሶይ ኢሶይ ባ ዎይኔ ሚ ጋርሳኒኔ ባ ባላሴ ሚ ጋርሳን ባ ላጌ ዲጊሳስ ጼይጋና» ጌስ።