Read زَاكَارِييَّا 10

زَاكَارِييَّا10rif_ati

أَعْذَاڒْ ن يَاهُوذَا ذ إِسْرَائِيل

¹”تَّارمْ أَنْژَارْ زِي سِيذِي، ذِي ڒْوقْثْ ن ونْژَارْ ن ثفْسُوثْ. سِيذِي إِتّڭّْ أَسَّامنْ، وَاهْ، نتَّا أَذْ أَسنْ إِوْشْ إِبُوذَا ن ونْژَارْ، إِ كُوڒْ إِجّْ ن وفْسُو ذڭْ إِيَّارْ.²مَاغَارْ ڒخْيَاڒَاثْ ن لْ-أَصْنَامْ سَّاوَاڒنْ ڒْغشّْ، ؤُ إِڭزَّاننْ تّْوَاڒَانْ إِخَارِّيقنْ ؤُ نِيثْنِي تّْعَاوَاذنْ ثِيرْجَا إِشمّْثنْ، نِيثْنِي سّْفوَّاجنْ س ڒعْوِينْ. خْ ؤُيَا إِ تّْوَاسِّيڭّْوجنْ أَمْ وُودْجِي، تّْوَاحْصَارنْ، مِينْزِي أَمكْسَاوْ وَارْ ذِينْ إِدْجِي.“

³”خْ إِمكْسَاونْ يَارْغَا وغْضَابْ إِنُو ؤُ نشّْ أَذْ خدْجْصغْ إِغَايْضنْ، مَاغَارْ سِيذِي ن ڒْعسْكَارَاثْ أَذْ إِسِّيجّْ خْ ثْحِيمَارْثْ نّسْ، خْ ثَادَّارْثْ ن يَاهُوذَا، ؤُ نتَّا أَذْ ثنْ إِسدّْ أَمْ ؤُيِيسْ نّسْ إِتِّيسِّيقنْ غَارْ ؤُمنْغِي.⁴زَّايسْ أَژْرُو ن ثغْمَارْثْ، زَّايسْ ڒوْثذْ، زَّايسْ ڒْقوْسْ ن ؤُمنْغِي، أَذْ زَّايسْ د-فّْغنْ خنِّي مَارَّا إِمْزيَّارنْ جْمِيعْ.⁵نِيثْنِي مَارَّا أَذْ ذوْڒنْ أَمْ أَيْثْ ن بُو-ثغْرُوضْثْ إِنِّي ذڭْ ؤُمنْغِي أَذْعفْسنْ خْ ؤُبدْجَاعْ ذِي زّْنَاقِي. وَاهْ، نِيثْنِي أَذْ مّنْغنْ، مَاغَارْ سِيذِي أَذْ يِيڒِي أَكِيذْسنْ، ؤُ نِيثْنِي أَذْ سضْحَانْ إِنِّي إِنْيِينْ خْ ييْسَانْ.⁶نشّْ أَذْ سّْجهْذغْ ثَادَّارْثْ ن يَاهُوذَا ؤُ أَذْ سّْنجْمغْ ثَادَّارْثْ ن يُوسُوفْ ؤُ نشّْ أَذْ أَسنْ وْشغْ ثَازذِّيغْثْ، مَاغَارْ نشّْ أَرّحْمغْ ذَايْسنْ ؤُ نِيثْنِي أَذْ إِڒِينْ أَخْمِي نشّْ وَارْ ثنْ نْضَارغْ، مَاغَارْ نشّْ ذ سِيذِي، أَربِّي نْسنْ، ؤُ نشّْ أَذْ غَارْسنْ سْڒغْ.“

⁷”إِنِّي ن إِفْرَايِيمْ أَذْ إِڒِينْ أَمْ يِيجّْ ن بُو-ثغْرُوضْثْ ؤُ ؤُڒْ نْسنْ أَذْ إِفَارْحْ أَمْ غَارْ بِينُو، ؤُ إِحنْجِيرنْ نْسنْ أَذْ ث ژَترنْ ؤُ أَذْ فَارْحنْ، ؤُڒْ نْسنْ أَذْ إِفَارْحْ ذِي سِيذِي.⁸نشّْ أَذْ خَاسنْ صفَّارغْ ؤُ أَذْ ثنْ سّْمُونغْ، مَاغَارْ نشّْ فْذِيغْ ثنْ، ؤُ نِيثْنِي أَذْ د-ذوْڒنْ ذڭْ وَاطَّاسْ، أَمْ مَامّشْ ثنْ ثُوغَا ذڭْ وَاطَّاسْ.⁹نشّْ أَذْ ثنْ زَارْعغْ جَارْ ڒڭْنُوسْ ؤُ نِيثْنِي أَذْ أَيِي إِذَارنْ ذِي جّْوَايهْ إِڭّْوجّنْ. خنِّي أَذْ دَّارنْ أَكْ-ذ إِحنْجِيرنْ نْسنْ ؤُشَا أَذْ د-ذوْڒنْ.¹⁰نشّْ أَذْ ثنْ جّغْ أَذْ د -عقْبنْ زِي مِيسْڒَا، أَذْ ثنْ د-سّْمُونغْ زِي أَشُّورْ ؤُ أَذْ ثنْ د-أَوْيغْ غَارْ ثمُّورْثْ ن جِيلْعَاذْ ؤُ غَارْ لُوبْنَانْ، مَاشَا أَيَا وَارْ ثنْ إِتّْقذِّي.¹¹نتَّا أَذْ إِژْوَا ڒبْحَارْ ن ڒحْصَارثْ نْسنْ ؤُ أَذْ إِوّثْ ڒمْوَاجْ ن ڒبْحَارْ ؤُ مَارَّا إِمُوشَانْ يُودْجْغنْ ن إِغْزَارْ ن نِيلْ أَذْ أَژْغنْ. نّْفَاخثْ ن أَشُّورْ أَذْ ثتّْوَاسّْوَاضعْ، ؤُ أَزدْجَاضْ ن مِيسْڒَا أَذْ إِتّْوَاودَّارْ.¹²نشّْ أَذْ ثنْ سّْجهْذغْ ذِي سِيذِي ؤُ نِيثْنِي أَذْ ؤُيُورنْ ذڭْ يِيسمْ نّسْ!“، أَمُّو إِ إِقَّارْ سِيذِي.

زَاكَارِييَّا 10 / rif_ati

أَعْذَاڒْ ن يَاهُوذَا ذ إِسْرَائِيل

زَاكَارِييَّا10rif_ati