1Oku batagatîfu bâwe bôhe, bwàli bumoleke bunji bwenêne. Ab’e Mîsiri, omu kuyumva ecihôgêro c’izù lyâbo buzira kubabona, bàkaz’ibaderha bany’iragi bulya bôhe bàrhali bababire.2Babavuga omunkwa gw’okubà barhali bacîhôlîre amabî bàjirirwe, banabahûna obwonjo oku bijiro byâbo by’obushombanyi.3Oku Ab’e Mîsiri bali omu mwizimya, abatagatîfu bâwe bôhe wabahà omunâra gwabamolekera, gubalangûle enjira y’ihanga gunababêre izûba lirhakoma ndi omu lubungo lwâbo lw’irenge.4Abo bandi bali bakwânîne banyagwe akamole bashwêkerwe n’omu mwizimya; abantu bàgwârhaga abâna bâwe mpira wâni, n’obwo bâli barhumirwe mpu bahereze igulu akamole karhazima k’irhegeko lyâwe!
Mîsiri na Israheli - Okurhumwa kwa Kaheza
5Bali bahizire okuyîrhira abatagatîfu abâna hoshi, cikwône, muguma alobôka omu bâna bâli bakabulirwe boshi, erhi okola wabahana, wabanyaga omwandu gw’abâna bâli hagwcerhe, boshi bahwera omu muhûsi gw’amîshi.6Obwo budufu, balarha bâli erhi babubwîzirwe, na ntyôla, okumanya endahiro bali bayêmîre kwabaha omurhima n’obusîme.7Olubaga lwâwe lwakaz’ilinga okucira kw’abashinganyanya n’okuhera kw’abashombanyi,8bulya nêci abashombanyi bîrhu wali ôbahanyire, nîrhu rhwêne warhuhà irenge erhi orhuhamagala emunda oli.9Obwôla abâna b’abashinganyanya barherekêrera omu mwa bâbwè, kushimba amarhegeko g’obwôrhere bwa Nyamuzinda, boshi haguma balahira ibango, mpu bashinganyanya bakabà barhagwasinyi oku binjà n’oku ntambala; agôla mango obwo, bagwîra bàyimba enyimbo za bîshe.10Olubî lw’ecihôgêro c’abashombanyi bâbo byayumvikana, haguma n’endûlù y’abadwîrhe balakira abâna bâbo.11Obuhane bwagwârha omushizi bwanajakwo nnawâbo, oku omugunda ababire kwo mwâmi naye anababala.12Boshi haguma obwo, na lufù luguma, boshi bafîrwa nk’aha bwaceraga. Abazîne banyihira okubisha abafîre erhi entwâli z’obûko bwâbo zamahungumukira oku liguma.13Ntyo, abà amafumu gâbo gàbuzagya buyêmêra, erhi babona bàfîrwa n’enfula, bajà bayêmêra oku olu lubaga ali mwene Nyamuzinda.14Oku byoshi biri bibohe omu kahwenyenye, n’oku obudufu bwahika omu karhî k’enjira yâbo,15kurhenga emalunga, Oluderho lwâwelugala-byoshi, lwacirhunika kurhenga oku ntebe y’obwâmi, lwayandagala nka mulwî wa ntwâli, omu karhî k’ecihugo c’okuhezibwa. Lwayisha lufumbasire engôrho nyoji, gwo muhigo gwâwe gurhashuba-nyuma.16Lwayimanga, lwabumba igulu lyoshi lufù, lwahuma oku nkuba lunayimanzire oku idaho.17Ho n’aho, ensanamu z’ebilôrho bibî zabagezamwo omusisi, ebihamba byàbagwârha barhamanyiri n’oku biyishire.18Oku zabahizire oku idaho eyi n’eyi, banali nk’abafîre, boshi bakaz’imanyîsa igwârhiro ly’olufù lwâbo;19ebilôrho byàbagezagyamwo omusisi, byàli biyôsire bibahànîrîze, kuderha mpu bankanahungumuka barhanamanyiri bici bafîrekwo.Bene Israheli babona omungo n’olukogo lwa Nyamubâho
20Cikwône, obwo buhane bw’olufù bwagwâsire ciru n’abashinganyanya banji bwabagwârhira omu irungu. Oku iragi lyâbo, omungo gwa Nyamuzinda gurhashingaga kasanzi.21Mulume muguma ntagengwa abalwîrakwo: ahuma amatumu g’omukolo gwâge, omusengero n’obubâni bw’okuhûna obwonjo, arhungâna omutula gwa Nyamuzinda, ahima olya kaheza, àyêrekana ntyo oku anali mwambali wâwe.22Akuba akabisha obwo, cikwône arhali oku buzibu bw’omubiri gwâge; nîsi erhi oku buhashe bw’amatumu gâge; buhashe bwa luderho àyazizemwo nyakuhana abantu, àkengêza endagâno n’endahiro balahiriraga bîshe.23Oku emirhumha ekola elunzirwe oku nsinga, aj’eluhya, ayonôla omungo anagusîka mpu gwankanayêrekera omu njira y’abazîne.24Bulyâla ecishûli câge calikwo igulu lyoshi, amazîno g’irenge lya bîshe erhi gali mahumbe muli milongo ini y’amabuye g’ecitwîro cidârhi, n’ecimanè càli oku irhwe lyâge erhi ciyandisirwekwo obwâmi bwâwe.25Omu kubona ebyo, Kaheza arhînya ashubira nyuma; wali obîre nka wayêrekana omungo gwâwe kwône lwanahwa.