Mîsiri na Israheli: baguma omu mwizimya, abandi omu bumoleke
1Nêci Yâgirwa, emihigo yâwe erhaba nshâhu, erhanayumvikana; emirhima y’ebingolongolo yôhe mpu yamâbona enjira, n’obwo kuhabuka.2Banyankola-maligo, oku bali mpu lero bamajaga bahinaga olubaga lutagatîfu, babugâna bakola bali omu mugozi gw’omwizimya, omu migozi y’obudufu burhatwîkanuka, babugâna bali bashwêkere omu mwabâbwè, banakola bakage barhaciri omu kubona-mbere kw’ensiku n’amango.3Oku bamanyire mpu bayôrha bwifulikwe bo n’ebyâha byâbo by’obufundafunda, enyuma z’ecisîka cîru-cîru c’okubà bàyibagirwe, bàbona kukola kushandâzibwa bashandâzibwa, bànagwârhwa n’ebihamba binene, bànakangwa n’eri nka myomoka.4Bulyala n’enyumpa bàli mpu bacîfulisiremwo erhabacingaga oku bwôba, n’olubî lw’okuyôbohya lwàkazag’iyumvikana eburhambi bwâbo. n’abali nka bazimu bagwêrhe obusù bwîrubwîru bàkaz’ibabonekera.5Na ntà muliro gwabwîne obuhashe bw’okubamolekera, ciru n’obumoleke bw’enyenyêzi burhahashag’imolekera obwo budufu bw’ecôba.6Cikwône, eciriro cinene càkazag’icîyâsa ciciyerekane cinabasigire ecôba, n’erhi ebyo byabâga byamagera, omu bwôba bwâbo, bakaz’iderha mpu nta côba cicilushire eco bayumvîrhe.7Mpu bakolêsa amafumu, nago gayabirwa, mpu bayengeha lero bayengehulwa, enshonyi zahabumha,8bulyala ahakazâg’icikunga mpu bànakangûla omuntu olimwo ecikango, bone zaba nkumba erhi kukanguka kurhuma.9Ciru bankabire barhakangusiri n’akantu k’ecôbà, ebiryanyi byagera, n’olushungûrho lw’ensimba ziyandala binabakange: bakaz’ifà bàgeramwo omusisi erhi bwôba burhuma, balahire ciru okugalamula amasù mpu babone ecirêre n’obwo ntâko omuntu abule bwacibona.Baherêrekera bàkaz’igeramwo omusisi n’obwôba, balahira ciru okulola kuli ebyo, ciru na ntâkwo bankacicîfumizemwo.10Omanye oku obubî ye mwôba murhanzi, bwone bunacîyâgiriza; erhi bulisa omuntu n’amagala, anamanye mpu ye kola mubî kulusha abandi.11Obwôba cirhali cindi aha nyuma ly’okuleka oburhabâle bw’entimanyo.12Bulyala amango omuntu omu murhima gwâge, arhacilinda burhahâle buci, go mango acîkebwa mpu ecirhumire c’amalibuko gâge cirhali cinyi, n’obwo arhacimanyiri.13Ega obwôla, mw’obwo budufu abalume bàhulabulaga, budufu ndundulya y’omurhindi Nnakuzimu, oku boshi iro liguma bàli,14bakarhangâla, barhal’ibona bashimbirwe n’emyômoka, barhal’iyumva omurhima guli budûrhuka erhi bwôba bwàli bubarhibukîre burhuma.15Na ntyo ngasi owali okulumbire, ciru ankabire ye ndi, anabe nka kulya bamuhiramwo emmambo banamwigalire omu mpamikwa nzira-kahamikizo.16Omuntu, abè murhunzi erhi abè lungere, ciru ankabire omuntu buhumba akola, erhi ankabire amagwârhwa, amango amanashangwa n’omwizimya, arhacigwêrhi kundi-kundi ankajira. bulyala ogwo mugozi gw’omwizimya boshi gwàli gushwesire.17Empûsi yàhûsa, olwimbo lw’ebinyunyi byalyogôlera omu mashaka, olubî lw’amabuye gàhonongoka,18emirindi y’ebiryanyi byàgundumuka, okuyâma kw’eby’erubala bikali, omulenge gw’izu entôndo zigalwîre, ebyo byoshi byakaz’irhuma bàgurumanwa n’obwôba.19Ago mango obwo erhi igulu lyoshi limolekirwe n’omûshi gw’akalengerere, na ngasi muguma erhi ali omu mirimo yâge buzira kurhangwa.20Cikwône bôhe bonebone, endundulya y’omwizimya yacîbululira kulibo, ci erhi na bone bacizidohire, kulusha omwizimya.