TOBITI4shr_buk
1Olwo lusiku Tobiti akengêra oku abîkisize Gabaeli w’e Ragesi, ensaranga zâge omu Mediya.2Yêne acîjà emurhima, erhi: «Lolà oku nahunyire okufà, cankarhumaga ntahamagala mugala wâni Tobiya n’okumubwîra ogw’ezôla nsaranga embere nfè?»3Anacihamagala omugala Tobiya emunda ali, anacimubwîra, erhi: «Oyîsh’imbisha bwinjà bwinjà amango nafà. Okâkenga nyoko n’irhondo orhamulekêreraga ciru n’olusiku luguma, okajira okwankamusîmîsa na ntyo irhondo omanye wankamubabaza omurhima oku busha.4“Okaz’imukenga bwenêne, mwâna wâni, bulya abwîne mbaka nyinji we orhuma amango anali akuhêrhe omu nda yâge goshi, amango anafè onamubishe hôfi nâni nshinda nguma”».5Omu nsiku z’akalamo, mwâna wâni, Okâkengêra Nyamuzinda, orhôle omuhigo gw’okurhamuhemukira n’ogw’okushimba amarhegeko gâge. Okajira ebijiro bishingânîne omu nsiku z’obuzîne bwâwe zoshi, irhondo orhahîraga okagera omu njira y’obulenzi.6Nka kulya abajira eby’okuli bayololoka omu mirimo yâbo yoshi, kwo na kuguma ngasi bajira ebishingânîne nabo.7Oku bintu ogwêrhe, okaz’iyankakwo ebi warhabalamwo abandi bantu. Obusù bwâwe irhondo burhayûbîzagya embere z’omukenyi, na ntyo Nyamuzinda arhankayûbîza kuli we.8Okajira oburhabâle nk’oku ebirugu byâwe binali: nka ogwêrhe hinyi orhabâga nshonyi za kurhabâla n’ehyo hinyi ogwêrhe.9Okwo bulya erhi wêne odwîrhe wacîlundikira omuhako omu nsiku zâwe z’amalagîrire.10Bulya okurhabâla abandi kunayôkole omuntu, kumurhenze omu lufù, kurhankaziga ajà ahantu h’omwizimya.11Bulya oku ngasi banajira ntyo, oburhabâle bwâbo eri nterekêro bahânyire emw’Ow’Enyanya.12Mwâna wâni, ocîlange oku bugonyi, na burhanzi oyanke omukazi w’omu bûko bwâwe. Orhayankaga omukazi w’ahandi, olya orhali w’omu mulala gw’a babusi bâwe, bulya rhubà bene abalêbi: Nûhu, Abrahamu, Izaki na Yakôbo bo babusi bîrhu abo kurhenga mîra. Mwâna wâni, omanye oku abo boshi bayansire abakazi emwa bene wâbo, banagishwa omu bâna bâbo n’iburha lyâbo linahabwe igulu lyoshi nka kashambala kâbo.13Ntyo, mwâna wâni, okâzigira bene winyu, n’irhondo omanye wanakabagayaguza, babè bânarhabana babè bananyere b’omu bûko bwâwe. Orhôle omukazi mulibwo. Bulya akagayo kanahonye omuntu, karhume abula n’omurhûla. Okurhakola akantu kunarhume omuntu ashubira nyuma anakene bwenêne, bulya obwôlo ye nina w’ishali.14Omukamarho gw’omuntu wagukoleraga irhondo omanye gurhalegemaga omwo mwâwe, ci onamuhè duba duba gulya mukamarho gwâge na ntyo wanakolera Nyamuzinda, naye anakukamasa. Obè mwîrhonzi, mwâna wâni, omu bijiro byâwe byoshi n’okûla walezirwe bwinjà kukâshokolera olugendo lwâwe loshi.15Oku orhankasîma, nâwe orhakujiriraga owundi muntu. Orhakazâg’inywa idivayi mpu kuhika olaluke, irhondo endalwè erhabâga omu ngeso zâwe.16Omugati gwâwe oguhekwo oshalisire n’omulondo gwâwe yambisamwo orhayambirhi cici. Ebisigîre omu birugu byâwe, rhabâlamwo abandi, orhanabêraga obwo burhabâle mutula.17Olumîze emigati n’idivayi oku nshinda y’abashinganyanya, ci omanye orhahâga omunya-byâha.18Okâyumvirhiza ihano ly’omuntu mwîrhonzi n’irhondo orhahîraga okagayaguza ihano ly’obunguke. Ngasi mango okâkuza Nyakasane Nyamuzinda wâwe, onakamuhûna amâjira gâwe goshi gayôrhe gayumânîne.19Emihigo n’e njira zâwe zoshi bikugendekere bwinjà, bulya arhali amashanja goshi gajira omuhigo mwinjà. Ci konene Nyamuzinda yêne ohâna iragi, yêne onanyihya omuntu nk’oku analonzize. Nêci obwo, mwâna wâni, okashimba ago marhegeko n’irhondo garharhengaga omu mirhima gwâwe.20Nkumanyîsizagye buno oku nabisize talenta ikumi emwa Gabaeli, mugala wa Gabri, w’e Ragesi omu Mediya.21Orharhînyaga okujayo, mwâna wâni bulya rhukola bakenyi: wanabona bugale bunji nk’orhînya Nyamuzinda, nk’oyaka ngasi câha na nk’onakajira ebishingânîne embere za Nyakasane Nyamuzinda.